God se Woord is lewend

Rut het God se volk waardeer

HIERDIE aantreklike jong vrou is Rut, wat in Moab, oos van die Dooie See, gewoon het. Hoewel sy grootgeword het onder die Moabiete, wat valse gode aanbid het, wil sy graag die ware God, Jehovah, saam met sy volk Israel dien (Numeri 25:1-5). Wanneer hierdie geleentheid hom voordoen, gryp sy dit so gretig aan dat dit haar bemind maak by ander aanbidders van Jehovah wat haar as “’n deugsame vrou” ken.—Rut 3:11.

’n Hongersnood in Israel het aan Rut hierdie geleentheid gebied om Jehovah te dien. As gevolg van die hongersnood het ’n gesin van vier uit die dorp Betlehem na die land Moab getrek. Hulle is die gesin wat jy hier sien—Elimeleg, sy vrou Naomi en hulle seuns Maglon en Giljon. Maar kort daarna sterf Elimeleg. Later trou Maglon met Rut, en Giljon trou met ’n ander Moabitiese meisie genaamd Orpa. Rut se man en skoonmoeder aanbid Jehovah, en so leer sy die ware God ken.

Kort daarna sterf Maglon en Giljon, en die drie vroue word sonder mans of kinders agtergelaat. Jy kan jou hulle verdriet voorstel. Wat sal hulle doen? Naomi hoor dat die hongersnood in Israel verby is. Sy besluit om na haar mense in Betlehem terug te keer. Rut en Orpa is baie lief vir hulle skoonmoeder en gaan saam met haar. Maar nadat hulle ’n ent gereis het, sê Naomi vir die meisies: ‘Gaan terug huis toe en bly by julle moeders.’

Naomi soengroet die meisies, en hulle begin huil. “Nee, ons wil saam met u teruggaan na u volk”, snik hulle. Maar Naomi spoor hulle aan: ‘Julle moet teruggaan, my dogters.’ Orpa draai toe om, maar nie Rut nie.

Daarop sê Naomi vir Rut: “Draai om agter jou skoonsuster aan!” Maar Rut antwoord met oortuigende erns: “Moenie by my aandring dat ek u moet verlaat om agter u om te draai nie; want waar u gaan, sal ek gaan; en waar u vertoef, sal ek vertoef; u volk is my volk, en u God is my God” (Rut 1:1-17). Rut gaan saam met Naomi terug en word ’n deel van God se volk Israel.

Het jy, soos Rut, die ware God, Jehovah, en die mense wat hom aanbid, leer ken? Indien wel, mag jy net so vasbeslote wees om Jehovah se dienaars vandag lojaal te ondersteun soos wat Rut lank gelede was!

[Kaart op bladsy 8]

(Sien publikasie vir oorspronklike teksuitleg)

DOOIE SEE

MOAB