„Koninkryksvermeerdering”-byeenkomste—Ryk, geestelike feeste!
JEHOVAH het beloof dat ,die kleine ’n duisend sou word en die geringe ’n magtige nasie’. Hy sou dit self „op die regte tyd gou laat kom” (Jesaja 60:22, vgl. NW). En in sommige lande het Koninkryksverkondigers sedert die Tweede Wêreldoorlog duisendvoudig toegeneem. Tot vandag toe geniet Jehovah se Getuies wonderlike vermeerderinge in Brasilië, Italië, Japan, Mexiko—ja, rondom die aarde. Hoe gepas dan dat hulle onlangse byeenkomste „Koninkryksvermeerdering”-Streekbyeenkomste genoem is!
Van groter belang as getalsvermeerderinge is natuurlik die ryk, geestelike seëninge wat ons as getuies van Jehovah geniet. En hoe baie daarvan het ons by hierdie byeenkoms geniet! ’n Hersiening van programglanspunte sal ons geheues verfris, ons harte verbly en ons opnuut vasbeslote maak om die goeie raad toe te pas.
Die geheeleffek
In die Verenigde State alleen is 117 byeenkomste gehou. Altesaam 1 159 898 het dit bygewoon (35 828 meer as verlede jaar), en 10 625 is gedoop. Dit was vier dae van geestelike feesviering, en die program was soos ’n basuin wat helder note laat klink het—Skriftuurlike raad om die hart en gewete te versterk.
„Elke faset van die lewe is in die toesprake behandel”, het een byeenkomsganger gesê. Daar was ook kommentare soos die volgende: „As ek by die huis kom, sal ek meer stof tot nadenke hê as na enige ander byeenkoms.” „Dit lyk altyd asof hierdie jaar se byeenkoms beter is as verlede jaar s’n, maar vanjaar s’n was die allerbeste!” Ja, die program was werklik uitstekend.
Hierdie byeenkomste het ook Jehovah se naam en Koninkryk bekend gemaak. Dit is byvoorbeeld gedoen toe baie Koninkryksverkondigers op Vrydagmiddag aan die veldbediening deelgeneem het. Daar was ook goeie dekking in die media. Koerant-, radio- en televisieberigte het vertel van byeenkomsbedrywighede en die opvattings van Jehovah se Getuies.
„Die kleine word ’n duisend”
Dit was die tema van die eerste dag, gebaseer op Jesaja 60:22. Die toespraak „Luister sodat jy in die vervolg wys kan wees” het byeenkomsgangers aangespoor om te luister na raad wat in die besonder op hulle van toepassing is en aandag te skenk aan daardie aspekte wanneer hulle weer by die huis kom (Spreuke 19:20). Daarna het die voorsittersrede gevolg, „Laat ons saam God se naam verhef”, ’n baie bemoedigende bespreking van Psalm 34. Om Jehovah se naam te verhef, beteken om dit in alle omstandighede te loof en eerbied te toon vir al die Skepper se geestelike voorsieninge. En hoe dankbaar moet ons tog wees vir die uitmuntende geestelike voorsieninge wat hy deur sy organisasie maak!
Die toespraak „Verkondig Jehovah se werke aan die volgende geslag” was voorwaar hartverblydend. Die ouer garde onder ons ondervind al jare lank Jehovah se goedheid en het derhalwe baie om die jonger geslag mee te deel. En bejaarde Getuies tree nie af nie. Al die lede van die Bestuursliggaam bly byvoorbeeld druk besig hoewel hulle ouderdomme van 59 tot 91 jaar wissel! Skriftuurlike en hedendaagse voorbeelde toon bowendien hoe gepas dit vir die jonger geslag is om ouer dienaars van Jehovah te respekteer en met hulle saam te werk.
Die belangrikheid van heiligheid is beklemtoon in die toespraak „Laat ons altyd vlekkeloos, onberispelik en in vrede bevind word” (2 Petrus 3:14). As ons vlekkeloos wil bly, moet ons die wêreld se onsedelikheid en hebsug vermy. Om vreedsame verhoudinge met ander te bewaar, moet ons toeskietlik wees wat ons voorkeure betref en moet ons ons soos minderes gedra.
Vervolgens is byeenkomsgangers aangespoor: „Spreek oor die heerlikheid van sy Koningskap.” Ons kan byvoorbeeld informeel getuig as ons altyd traktate en ander lektuur byderhand het, ons geleenthede goed benut en ’n positiewe gesindheid aankweek. Die toespraak met die titel „Die vermeerdering vind nou plaas!” het getoon dat groot getalle mense aan die goeie nuus gehoor gee. In 40 jaar het Jehovah se Getuies vermeerder van ongeveer 126 000 tot meer as 2 842 500, met oor die 7 416 900 wat die Gedenkmaal bywoon! Bemoedigende betuigings is gehoor van sommige wat ’n deel gehad het aan hierdie groot vermeerdering.
Die eerste dag se program is afgesluit met die aansporende toespraak „Oorlewendes tot in ’n nuwe aarde” en die bekendstelling van ’n nuwe boek met die titel Oorlewing tot in ’n nuwe aarde. Dit behandel 47 profetiese tipes en beskrywings van mense wat die einde van hierdie stelsel sal oorleef en die aardse gebied van God se Koninkryk sal beërwe. Hierdie publikasie is inderdaad met groot geesdrif ontvang.
„Verkondig die Koninkryk wyd en syd”
Dit was die tema van die tweede dag van die byeenkoms, en die program het klem gelê op ons voorreg om die Koninkryksboodskap uit te dra. Pioniers met wie daar onderhoude gevoer is gedurende die toespraak „Sal jy ingaan deur die groot oop deur?” het vertel van die opofferinge wat hulle moes maak om voltydse bedienaars te word, maar het gesê dat dit hulle diepe bevrediging verskaf en waarlik verrykende seëninge meegebring het om deur hierdie groot deur in te gaan (Spreuke 10:22). Diegene wat nie in die voltydse diens is nie, het rede tot ernstige nadenke gehad toe die spreker gevra het: „Laat ons omstandighede ons toe om die pionierdiens te betree?”
Soos die volgende toespraak duidelik getoon het, was die apostel Paulus „Ywerig besig om die goeie nuus van die Koninkryk te verkondig” (Handelinge 18:5). Aangesien die verkondiging van die goeie nuus een van die vernaamste redes vir die bestaan van die Christengemeente is, kan elke hedendaagse getuie van Jehovah hom tereg afvra: „Is ek ’n ywerige verkondiger van die Koninkryk? Is daar enige rede waarom ek nie gereeld elke week aan die een of ander aspek van die Koninkryksprediking kan deelneem nie?”
Die toespraak „Oefen jou met godvrugtige toewyding as jou doel” het getoon dat sulke toewyding beteken dat ons persoonlik geheg is aan Jehovah. En hoewel ’n mate van sekulêre opvoeding nodig is, kan ons ons tereg afvra: Is my doelwit ’n loopbaan in die wêreld, of wil ek graag Jehovah behaag?
Die drama Goddelike opvoeding vermeerder Koninkryksvrugte, wat in die moderne tyd gespeel het, het ook die soeklig op sekulêre opvoeding laat val. Hierdie drama het die gevare van universiteitsopleiding teenoor die beloninge van die voltydse diens gestel. Jongmense het die openhartige raad waardeer, en een jong man het opgemerk: „Daardie drama was nie ’n oordrywing nie.”
’n Heerlike verrassing daardie oggend was die uitreiking van Kingdom Melodies Nr. 5. En baie het hulle waardering uitgespreek vir die nuwe liedere wat tydens die program gebruik is.
Die middagprogram het met die programrede, „Koninkryksvrugte vermeerder wêreldwyd”, begin. Dit het ’n vers-vir-versbespreking van Jesaja hoofstuk 60 ingesluit, met ’n terugblik op Koninkryksvermeerdering sedert 1919. Hoogtepunte van daardie tydperk is uitgelig, soos die aanvaarding van die naam Jehovah se Getuies in 1931 en die duidelike identifisering van die „groot menigte” in 1935 (Jesaja 43:10-12; Openbaring 7:9). Daar is gewys op die vermeerderinge wat ons gedurende die Tweede Wêreldoorlog en sedertdien ter vervulling van Jesaja 60:22 geniet het.
Dit alles was ’n gepaste voorspel tot die toespraak „’n Vreugdevolle volk—Waarom?” Hoeveel rede tot vreugde het ons tog nie! Ons het ’n gelukkige God, en blydskap is ’n vrug van sy gees. Ons geniet die lig van die waarheid, die beskerming van Bybelse sedes, die allerbeste omgang, en die voorreg om Jehovah se hart te verbly deur ons onkreukbaarheid te bewaar en die goeie nuus te verkondig. Trouens, baie byeenkomsgangers het daardie middag vreugdevol aan die Koninkrykspredikingswerk deelgeneem, ná ’n toespraak wat hulle waardering vergroot het vir die groot verskeidenheid gedrukte materiaal wat so nuttig is in ons bediening.
„Laat ons toepas wat ons leer”
Die derde dag het begin met twee ouere manne wat die dagteks bespreek en die aandag vestig op die voorgaande tema. Vervolgens was daar ’n simposium met die titel „Voldoen aan die vereistes vir ’n Christengesin”. Eers is daar gekyk na die verantwoordelikhede van die Christenman, wat vrae soos die volgende moet beantwoord: Sorg jy dat jy nooit jou hoofskap op ’n selfsugtige wyse uitoefen nie? Stel jy ’n goeie voorbeeld deur materiële belange op nulle plek te hou terwyl jy jou kinders leer om die Koninkryk eerste in hulle lewe te stel? Beskou jy naweke net as tye van ontspanning of hoofsaaklik as geleenthede om aan heilige diens deel te neem?
Die volgende toespraak, „’n Vrou wat diepe eerbied toon”, het daarop gewys dat die vrou se skriftuurlike rol by ’n wyse, regverdige en liefdevolle God ontstaan het, en hy weet wat die beste vir elkeen is. ’n Vrou moet natuurlik ook met eerbied behandel word. Dit is miskien nie altyd vir ’n vrou maklik om diepe eerbied teenoor haar man te toon nie, aangesien hy nie volmaak is nie. Maar wanneer sy sulke eerbied toon, bring dit Jehovah se goedkeuring mee, lei dit tot gesinseenheid en verskaf dit vir haar geluk.
Jongmense het in die besonder baat gevind by die toespraak „Kinders wat hulle ouers eer”. Om jou ouers te eer, beteken dat jy hulle uit die hart gehoorsaam en teen verkeerde neigings waak. ’n Jong Christen kan hom gerus afvra: Strek my gedrag God, my ouers en myself tot eer?
Daar was nog raad vir die jeug in die toespraak „Jongmense, moenie bedrieg word nie”. Heelparty onderhoude is gevoer, en die spreker het beklemtoon dat ons die Duiwel se pogings om ons te bedrieg moet weerstaan. Dit is gevolg deur die toespraak „Seuns wat Jehovah se hart verbly”, waarin getoon is dat Jesus, Dawid en ander Jehovah se hart in hulle jeug verbly het. Baie van ons jongmense verbly eweneens vandag Jehovah se hart deur hulle goeie gedrag en ywerige diens (Spreuke 27:11). Wat ’n voorreg!
Die dooptoespraak, „Laat ons ons aan die kragtige hand van Jehovah onderwerp”, het beklemtoon dat ’n mens òf aan God se organisasie òf aan Satan s’n lojaal is. Toewyding en doop verg veranderinge in ons denke, spraak en gedrag, en dit vereis gereelde bywoning van vergaderinge en volle deelname aan die Christelike bediening.
Drie van die vernaamste verantwoordelikhede van opsieners het daardie middag na vore gekom in die toespraak „Ouere manne, volg die Groot Herder na”. (1) Ouere manne moet hulle verantwoordelikneid om God se kudde te voed ernstig opneem en nie hulle voorbereiding ter elfder ure doen nie. (2) Deur voorbeeld en lering moet hulle die kudde beskerm teen gevare soos permissiwiteit, buitensporige vermaak, ongeoorloofde seks en afvalligheid. (3) Ouere manne moet gereeld aan die herderswerk deelneem.
’n Bespreking tussen ’n ouere man en ’n bedieningskneg het vervolgens opgeklaar „Wat dit beteken om jou aan Koninkryksgesag te onderwerp”. Die grondoorsaak van die minagting van regmatige gesag is selfsug, wat sy oorsprong by die Duiwel het. Onderwerping aan Koninkryksgesag beteken dat ’n mens Bybelbeginsels volg en onderdanig is aan diegene wat aangestel is om die leiding onder ons te neem.
Maar gestel ’n boesemvriend vertel ons dat hy ’n ernstige sonde gedoen het, maar hy wil hê dat ons dit geheim moet hou. Die sieldeurvorsende toespraak „Moenie deel hê aan die sondes van ander nie” het beklemtoon dat ons aan Jehovah en sy organisasie lojaal moet wees. As ons nie ons gewetensgekwelde vriend kan oorreed om teenoor die ouere manne te bieg nie, moet ons hulle gaan inlig oor die saak. Dit is in werklikheid in die oortreder se geestelike belang, en berigte toon dat ’n aantal persone hierdie raad ter harte geneem het.
’n Toespraak wat baie gunstige kommentaar uitgelok het, was die een met die titel „Aan watter tafel eet jy?” Deur die beginsel van die apostel Paulus se raad in 1 Korinthiërs 10:14-22 uit te brei, besef ons dat ons aan Jehovah se tafel eet wanneer ons God die aanbidding gee wat hom toekom en ons met sy waarhede voed. Ons moet dus „die tafel van die duiwels” vermy deur te waak teen dinge soos ongeoorloofde seks, materialisme, onbehoorlike vermaak en filosofieë wat God se Woord verkleineer. Wanneer ons uitsluitlik aan Jehovah se tafel eet, verskaf dit ons vreugde, tevredenheid en ’n gewisse hoop.
Die tema van die slottoespraak op die derde dag was „Die heilige Skrif vermeerder ons juiste kennis van God”. Nadat die spreker vertel het van die talle Bybels wat die Wagtoringgenootskap deur die jare heen gedruk het, het hy sy gehoor in vervoering gehad deur ’n nuwe naslaanuitgawe van die New World Translation of the Holy Scriptures bekend te stel. Dit bevat meer as 125 000 kruisverwysings, nuttige voetnote en ’n waardevolle aanhangsel. Wat ’n seën vir Bybelstudente!
„Oneindige vermeerdering van Koninkryksheerskappy”
Dit was die tema van die vierde en laaste dag van die byeenkoms. Die toespraak „Verafsku jy wat sleg is?” het getoon dat ons wysheid nodig het om te bepaal wat sleg is en dat ons dit moet haat of verafsku, aangesien ’n verkeerde weg Jehovah se onguns meebring en onsself en ander skaad (Romeine 12:9). Ons moet bowendien besef dat wanneer Jehovah sê dat iets sleg is, dit werklik sleg is en vermy moet word.
Die tema van die volgende toespraak was „Koninkryksvermeerdering bring groter verantwoordelikheid mee”. Ja, groot vermeerdering plaas ’n verpligting op almal wat al langer in die waarheid is. Hulle moet na die geestelike belange van die nuwelinge omsien. Dit kan onder meer gedoen word deur gasvryheid te betoon en deur ’n goeie voorbeeld te stel in alle vertakkings van heilige diens.
Waak teen skandelike dwaasheid was die titel van die tweede drama. Dit het die slegte gevolge van Agan se hebsug aanskoulik uitgebeeld (Josua, hoofstuk 7). Die drama het ook getoon hoe ’n soortgelyke geval van skandelike dwaasheid die vloei van God se heilige gees in ’n gemeente kan belemmer. Dit alles het sterk beklemtoon dat ons ons deel moet doen om die organisasie rein te hou terwyl ons ons eie hart teen versoeking bewaak! Die middagprogram het begin met ’n openbare toespraak „’n Regering wat doen wat die mens nie kan doen nie”. Jy kan die bemoedigende boodskap van hierdie toespraak op bladsye 10 tot 20 van hierdie nommer van Die Wagtoring lees.
Vervolgens was daar die toespraak „Die eer om Jehovah se naam te dra”. Dit was gebaseer op die brosjure The Divine Name That Will Endure Forever, wat daardie oggend bekend gestel is. Die spreker het daarop gewys dat die Bybel se belangrikste waarheid nie die losprys of die hoop op lewe in die Paradys is nie, maar die feit dat Jehovah die enigste ware God is. As draers van Jehovah se naam moet ons erken dat hy die Groot Voornemer is, sy eienskappe liefhê en ons bes doen om daardie eienskappe na te volg en sy naam by elke geleentheid bekend te maak.
In die laaste toespraak, „Koninkryksorganisasie gereed vir verdere vermeerdering”, het die spreker beklemtoon watter groot voorreg ons het om in hierdie tyd van vermeerdering te lewe. Ons moet egter die gehalte van ons aanbidding hoog hou, en elkeen van ons moet aanhou om vooruitgang te maak. Soos een spreker ten slotte gesê het: „Laat ons met die ondersteuning van Jehovah en sy Seun voortgaan as ’n Koninkryksorganisasie wat gereed is vir verdere vermeerdering. Ons het elke rede om God se naam tesame te verhef, nou en tot in ewigheid.”
Die „Koninkryksvermeerdering”-Streekbyeenkomste het beslis ’n positiewe en geestelik stimulerende uitwerking gehad. Van begin tot einde was hulle waarlik ryk, geestelike feeste.
[Prent op bladsy 24]
’n Drama wat in die moderne tyd gespeel het, het bewys dat goddelike opvoeding Koninkryksvermeerdering en ryk beloninge meebring
[Prent op bladsy 25]
Die duisende wat gedoop is, het hulle aan die kragtige hand van Jehovah onderwerp
[Prent op bladsy 26]
Byeenkomsgangers was verheug om die puik naslaanuitgawe van die New World Translation te ontvang
[Prent op bladsy 27]
’n Roerende Bybeldrama het beklemtoon dat ons teen skandelike dwaasheid moet waak