Die “Goddelike Vrede”-Streekbyeenkoms—Net wat ons nodig gehad het!
“HARTE is bereik en gesindhede beïnvloed.” “Jehovah het ’n feesmaal met talle wonderlike disse berei.” “Die toesprake was openhartig en reguit.” “Net wat ons NOU nodig gehad het!” “Dit is net wat ons nodig gehad het!”
Sulke betuigings van waardering is tipies van die baie wat uitgespreek is vir 1986 se “Goddelike Vrede”-Streekbyeenkoms van Jehovah se Getuies. Al hierdie betuigings het getoon dat die aanwesiges ag gegee het op die uitstekende raad wat deur die voorsitter en die eerste spreker in sy toespraak “Luister en verstaan” gegee is.
Aangesien God se Woord so baie oor vrede te sê het (die woord kom meer as 300 keer in die Bybel voor), was dit uiters gepas dat dit die tema van ons 1986-streekbyeenkomste was. Trouens, 18 van die geïnspireerde briewe van Romeine tot Openbaring begin met begroetings soos: “Mag genade en vrede vir julle vermenigvuldig word!” Let daarop dat die woord “vrede” in die Hebreeuse Skrifte vertaal word uit sha·lohmʹ, wat nie net die afwesigheid van oorlog en onenigheid beteken nie, maar ook op gesondheid, voorspoed en welvaart dui.—1 Petrus 1:2.
Vrede het herhaaldelik in die program na vore gekom. Soos die spreker in die programrede beklemtoon het, is Jehovah “die God van vrede”. Sy Seun, die “Vredevors”, het vrede vir sy volgelinge belowe (Filippense 4:9; Romeine 16:20; Jesaja 9:5; Johannes 14:27; 16:33). Die spreker wat die programrede gehou het, het getoon dat die vrede wat Getuies geniet uniek is omdat dit nie van faktore van buite afhanklik is nie. Dit is afhanklik van ons eerbied vir gesag, wat die rede is waarom die wêreld sonder vrede is—dit het geen eerbied vir die hoogste Gesag, Jehovah God, nie. Jesaja het dit so goed gestel: “Ag, as jy maar na my gebooie geluister het, dan sou jou vrede gewees het soos ’n rivier.”—Jesaja 48:18.
Van die nuttige wenke wat gegee is om ons te help om goddelike vrede in ruimer mate te geniet, is om by elke vergadering ’n praktiese punt van raad te probeer onthou waarop ons ons kan toelê. Hierdie toespraak het getoon dat ons, as ons vredemakers wil wees, nie net vreedsaam moet wees nie; ons moet vrede bevorder en bereid wees om toegewings ter wille van vrede te maak.
As skoene aan ons voete die evangelie van vrede
Ons boodskap word tereg “die evangelie van vrede” genoem (Efesiërs 6:15). Ons het heelwat goeie raad ontvang oor hoe om hierdie evangelie van vrede uit te dra. ’n Driedelige simposium oor ons bediening het ons in hierdie opsig baie gehelp. Die eerste spreker het getoon hoe ons huis-tot-huisbediening ’n kenmerk van Jehovah se Getuies geword het. Aangesien hierdie werk nie maklik is nie, toon ons ons liefde vir God en die mens deur daaraan deel te neem. Om werklik sukses te behaal, moet ons pligsgetrou en vindingryk wees deur akkurate aantekeninge te hou en op verskillende tye terug te gaan ten einde almal te bereik.
Die tweede spreker het verduidelik dat ons, as ons dissipels wil maak, gedurig herbesoeke op belangstellendes moet doen en ’n positiewe gesindheid aan die dag moet lê. Ons moet persoonlike belangstelling toon in die mense wat ons besoek deur by die eerste besoek ’n aantekening te maak van waarin die huisbewoner belangstel. Maak seker dat die huisbewoner tydens elke herbesoek iets nuuts leer.
Die derde spreker het getoon dat ons Bybelstudente gehelp sal word om Getuies te word as ons hulle harte bereik deur beskouingsvrae te vra. Ons wil opregte belangstelling in hulle toon deur hulle na God se organisasie te rig, hulle te help om vergaderinge by te woon, hulle op ander tye te besoek en hulle selfs na ons huise te nooi. In die afgelope 35 jaar het Bybelstudies tienvoudig vermeerder.
Na hierdie simposium is daar vir ons beklemtoon dat ons gretig moet wees om by elke moontlike geleentheid en in alle omstandighede die goeie nuus van vrede te verkondig. Ouderdom moet ons nie belemmer nie. Jong kinders en dié in hulle negentigerjare hou aan om te preek. Party is pioniers, of voltydse predikers, hoewel hulle heeltemal blind is. Ander is pioniers hoewel hulle doof is, en nog ander is aan rolstoele gekluister. Een pionieregpaar het ses jong kinders wat hulle in die velddiens vergesel.
Die raad “Doen jou bes deur aan die voltydse diens deel te neem” was uiters gepas. Voltydse diens is die bevredigendste, die lonendste, leefwyse. Pioniers is aangespoor om hul bes te doen om in die voltydse diens te bly.
Soos by vorige byeenkomste het veteraanverkondigers van die goeie nuus van hulle laat hoor. Sommige staan al van 30 tot selfs 70 jaar in die diens. Hulle het vertel van die vreugde wat die verkondiging van die goeie nuus verskaf. Dit was inderdaad bemoedigend om te hoor hoe hulle struikelblokke uit die weg geruim het om in die bediening te volhard. Een broer het byvoorbeeld in 43 jaar nie een maand versuim om aan die veldbediening deel te neem nie.
Raad vir gesinslede
Die uitstekende raad vir gesinslede was baie nodig weens die bedreiging wat die goddelose stelsel vir lede van die Christengesin inhou. Daar is vir jongmense gevra: “Is julle geestelik vooruitstrewend?” Vandag dien baie voltyds as pioniers en in Bethelhuise. Maar kan meer dit doen? Ons is geestelik vooruitstrewend as ons God se wil eerste in ons lewe stel. Dit beteken ook dat ons goeie studiegewoontes moet hê en gereeld aan gemeentelike bedrywighede en aan die velddiens moet deelneem, sowel as om goeie verhoudinge met ouer persone te hê. En dit beteken om nie genot te put uit iets wat God se Woord verbied nie.
Nog ’n driedelige simposium het begin met die ondersoekende vraag: “Is julle huis ’n plek van rus en vrede?” ’n Voorvereiste hier is om as huweliksmaat ’n getuie van Jehovah te kies wat Koninkryksbelange eerste stel en wat die vrug van God se gees openbaar. ’n Huis kan alleen ’n plek van rus en vrede wees as die man geestelik die leiding neem en sy vrou soos sy eie liggaam liefhet. Die vrou moet haar man ondersteun en diepe eerbied vir hom hê. Dit is ook belangrik om saam te bid en om geen plek aan die Duiwel te gee nie. Kinders kan hulle deel doen om die huis ’n plek van rus en vrede te maak deur onderdanig te wees en hulle samewerking te gee. Gesinsbande word versterk wanneer gesinne die Bybel en Bybellektuur saam studeer.—Psalm 34:12.
Die toespraak “Is skeiding die weg tot huweliksvrede?” was broodnodig. Die antwoord? Miskien vir wêreldlinge maar nie vir Getuies nie! Vir hulle is skeiding nie ’n maklike uitvlug uit ’n huwelik vol probleme nie. Die hele gees van God se raad oor die huwelik is dat egpare verenig moet bly. Skeiding het feitlik altyd ’n nadelige uitwerking op die betrokke kinders, en daar is ander slegte vrugte. Ronduit gesê, skeiding is ’n erkenning dat òf een huweliksmaat of albei nie die vrug van die gees toepas nie.—Galasiërs 5:22.
Die toespraak “Moet ’n ongetroude persoon onvolkome voel?” het uitstekende raad vir ongetroude Christene bevat. Nee, hulle hoef geensins onvolkome te voel nie! Aangesien die bediening die middelpunt van ons lewe is, kan ons volkome wees hetsy ons getroud of ongetroud is. Trouens, Paulus het getoon dat ongetroude Christene sekere voordele het. Deur vergenoegdheid te kweek, kan hulle hul verheug in die gawe van die ongehude staat en die beste daarvan maak.—1 Korinthiërs 7:32-34.
Nodige raad oor ’n rein lewe
Die immer verslegtende sedes van hierdie wêreld het veroorsaak dat ’n aantal Getuies bestraf en selfs uitgesit is vir slegte gedrag. Hoe gepas was die reguit raad oor gedrag dus! As ons goddelike vrede wil geniet, moet ons gedurig op ons gedrag let. Dit is byvoorbeeld duidelik gestel in die toespraak “Vermy die strikke van gesellige vermaak”. Partytjies kan groot pret wees, maar as ons nie versigtig is nie, kan dit maklik op ons teokratiese bedrywighede inbreuk maak en tot onreinheid lei. Die onvolmaakte mensehart is bedrieglik en gereed om enige geleentheid aan te gryp om met onsedelikheid te speel. Veral groot gesellighede, sowel as musiek wat verderf, hou ernstige gevare in.—1 Korinthiërs 15:33.
Om ons goddelike vrede te bewaar, moet ons ag slaan op die raad wat vervat was in die toespraak “Vermy die dodelike ‘lug’ van hierdie wêreld”. Soos die lug wat ons inasem, is hierdie selfsugtige en ongehoorsame gees van die wêreld oral om ons. Die toespraak het gehandel oor nege manifestasies van hierdie dodelike lug, waaronder onsedelikheid, uiterstes in kleredrag en persoonsversorging, onmatige gebruik van voedsel en drank, verslaafdheid aan sport en rassetrots. As sulke lug aanhoudend geadem word, sal dit jou geestelik doodmaak.
Hierdie saak is verder benadruk deur die toespraak “Bly jy in elke opsig rein?” As ons in hierdie opsig onverskillig is, maak ons ons aan huigelary skuldig. Om ’n goeie gewete te hê, moet ons fisies, verstandelik, sedelik en geestelik rein bly. Daarom moet ons ‘die kwaad haat’, “verafsku wat sleg is”. Dit beteken ook dat ons afvallige propaganda moet verafsku.—Psalm 97:10; Romeine 12:9.
Die uitstekende toespraak “Jehovah se tug lewer ’n vredevolle vrug” was hier ter sake. Jehovah is die Groot Tugmeester, en hy tugtig ons omdat hy ons liefhet. Ons almal het tug nodig. Selfs die Seun van God het dit nodig gehad! (Hebreërs 5:8). Ja, tug beteken basies opleiding, nie altyd straf nie, en om baat te vind by die talle maniere waarop God dit uitoefen, moet ons eerlik met onsself wees—en nederig bly!
Die toespraak “Hou aan om mekaar op te bou”, het goeie raad in verband met ons spraak bevat. Hoeveel skade kan onbedagsame woorde, vittery en ’n klaaggees tog nie berokken nie! Die tong is voorwaar moeilik om te beheers. Ons is gepas daaraan herinner om ‘nie kwaad te spreek van mekaar nie’ (Jakobus 4:11). Broederliefde sal ons op ons hoede stel. En voordat ons iets sê, sal dit ons ons laat afvra: “Is dit werklik so?” “Moet ek daarvan praat?” “Sal dit opbou?”
Raad uit die profesieë
Toespraak na toespraak het van die geïnspireerde profesieë gebruik gemaak vir herinneringe en vermanings. In die toespraak “God se oordele—ongewild by die wêreld” het die spreker dus beklemtoon dat ons nie net goeie nuus oor ’n paradys verkondig nie, maar ook, soos Jeremia, God se naderende oordele (Jeremia, hoofstukke 6 en 7). Ons word vermaan om Jeremia na te volg wat die valse leerstellings en verdorwe gebruike van die godsdiensleiers van sy dag blootgelê het.
Die toespraak “’n Tyd van toetsing en sifting” het die hedendaagse toepassing van Maleagi 3:1-3 bespreek. Jehovah se volk is inderdaad gereinig van valse Babiloniese leerstellings en gebruike. Die instelling van teokratiese orde en die besef dat die huis-tot-huisbediening van die allergrootste belang is, is van die positiewe punte wat die spreker gestel het.
Ons het ook ’n uitstekende toespraak gehoor waartydens die spreker hoofstukke 11 en 12 van Daniël bespreek het. Die titel was “Geopenbaarde verborgenhede bied ’n gewisse hoop op vrede”. Die wedywer tussen die koning van die noorde en die koning van die suide hou die wêreld in beroering. Daniël se profesie toon dat hierdie konings nooit hulle konflikte kan beëindig nie. Slegs Migael kan blywende vrede bring.
Nog ’n toespraak wat van die geïnspireerde profesieë gebruik gemaak het, was “Wêreldwye veiligheid onder die ‘Vredevors’”. Dit het gehandel oor Jesaja 9:5 en 6 en die konteks van daardie verse, en het getoon hoe daardie profesie gepas op Jesus Christus van toepassing is. Die spreker het ten slotte gesê dat Migael “sy briljante loopbaan [sal] bekroon met hierdie oorwinning by Armageddon wat tot in alle ewigheid sal weerklink sonder om te verdof! . . . Voorwaarts dus tot groter wêreldprominensie as ooit tevore, al julle getuies van Jehovah, met volkome vertroue op julle God en sy heersende Koning, die ‘Vredevors’! Toon volkome onverskrokkenheid ondanks die huidige wêreldsameswering. Dien almal as tekens en wonders tot eer van Jehovah.” Dit was werklik een van die byeenkoms se mees besielende toesprake.
Waardeer diegene wat die leiding gee
’n Tweedelige simposium met die titel “Opsieners wat vredes belange bevorder” het ons waarlik gehelp om diegene wat die leiding gee te waardeer. Die eerste spreker het die rol van reisende opsieners bespreek en getoon dat hulle inderdaad dubbele eer werd is weens hulle talle pligte. Hulle hou onder meer toesprake, help met probleme, lei broers in die getuieniswerk op en besoek mense wat liggaamlik of geestelik siek is. Waarlik, alle reisende opsieners verdien ons volle samewerking, en gasvryheid soos dié van Lidia.—Handelinge 16:15.
Die tweede spreker het die pligte van die ouere manne en die rol wat hulle speel om vrede in die gemeente te bevorder, uitgestippel. Hulle kan dit doen deur vir vergaderinge voor te berei en dit te lei, herdersbesoeke te doen, regterlike sake te hanteer, die leiding in die velddiens te gee en ’n goeie voorbeeld te stel wat gedrag en gesinslewe betref. Ons almal moet gewis waardering toon vir die aangestelde ouere manne deur gehoorsaam en onderdanig te wees, soos Hebreërs 13:17 ons vermaan.
“Streef na en verkry ’n voortreflike reputasie” was ’n toespraak wat, met die oog op die groot vermeerdering in Getuies, die behoefte aan bekwame ouere manne beklemtoon het. Dit het aan alle toegewyde broers wat nie ouere manne is nie, getoon hoe hulle groter voorregte kan nastreef. Die toespraak het veral dié wat bekwaam is maar nie die nodigheid sien om meer te doen nie, aangespoor om hulle af te vra: Waarom skram ek weg?
Ander geestelike genietinge
Die toespraak “Is jy vergenoeg met Jehovah se geestelike voorsienings?” is baie waardeer. Ons het byvoorbeeld gehoor van diegene in die Bybel wat die geestelike voorsienings van God waardeer het en dié wat dit nie waardeer het nie. In die mate waarin ons van ons geestelike behoefte bewus is, sal ons met Jehovah se voorsienings vergenoeg wees en dit toon. Hoe? Deur die tyd uit te koop vir persoonlike Bybelstudie en deur onsself te dissiplineer terwyl ons by die vergaderinge is sodat ons ten volle daarby baat kan vind.
Nog iets wat vir ons geestelikheid belangrik is, is in die toespraak “Hoe betekenisvol is jou gebede?” bespreek. Daar is voorgestel dat ons ons afvra: Het ek toegelaat dat my gebede herhalend, stereotiep of gejaag word, asof ek te besig is om my beste te gee wanneer ek met God praat? In gebed nader ons die grootste Persoon in die heelal. As ons wil hê dat ons gebede sinvol moet wees, moet God vir ons werklik wees. Ons gebede moet uit die hart kom en spesifiek wees, en ons moet dink voor ons bid.
Die dooptoespraak “Maak vrede met God deur toewyding en doop” was nog ’n hoogtepunt. Die spreker het getoon dat ons doop ’n uiters ernstige en terselfdertyd ’n uiters vreugdevolle geleentheid is. Daardeur maak ons vrede met God en word ons geordende bedienaars van Jehovah se Getuies. En ons toewyding is nie bloot ’n verpligting nie, want ons kan tegelykertyd na ’n hele aantal verpligtinge omsien. Ons toewyding beteken eerder dat ons ons uitsluitlik aan ’n Goddelike Wese, Jehovah God, oorgee.
Die twee Bybeldramas was onder die gewildste dele op die program. Die bewaring van lewe tydens hongersnood het gehandel oor die roerende verhaal van Josef en sy broers, wat baie ’n traan laat wegpink het. Josef se ruimhartige vergewensgesindheid is ’n goeie voorbeeld vir ons almal. Die verslag het ook profetiese betekenis. Die tweede drama, Soek God se geregtigheid vir oorlewing, het kragtige en treffende raad bevat oor die probleme van ons jongmense. Dit het beklemtoon dat ons op ons gedrag moet let, Koninkryksbelange eerste moet stel en nie die beweegredes van ander oorhaastig moet oordeel nie.
Die openbare toespraak, “Uiteindelik vrede!—Wanneer God spreek”, het gestrook met die tema van die byeenkoms. Eerstens is daar gewys op die dwaasheid van al die kernvoorbereidings en die hopeloosheid van die wêreldsituasie uit enige menslike oogpunt. Slegs God se Koninkryk bied ’n gewisse hoop. Wat beteken dit om te luister wanneer God spreek? Dit beteken nie net dat ons aandagtig na God luister en verstaan wat hy sê nie, maar ook dat ons reageer op wat hy sê. Dan sal ons nie mislei word deur die bedrieglike uitroep “Vrede en veiligheid!” nie.
Na die slottoespraak, “Toegerus deur die God van vrede om sy wil te doen”, het al die byeenkomsgangers huis toe gegaan, bly oor die geestelike fees wat hulle gedurende die vier dae kon geniet. Waarlik, die byeenkoms het ons beter as ooit tevore toegerus om God se wil te doen. Laat ons dus vooruitgaan, vasbeslote om wat te doen? Om die groot Koninkrykspredikingswerk te volbring en ons goddelike vrede en alles wat dit vir ons beteken werklik te waardeer!
In die Verenigde State is daar 135 byeenkomste op 65 plekke en in 11 tale gehou. Die topopkoms was 1 276 578 en 12 603 is gedoop. Die drie byeenkomste in die Yankeestadion in die stad New York het ’n topopkoms van 95 091 gehad, en 1 110 is gedoop.
[Venster op bladsy 30]
Nuwe hulpmiddele wat by “Goddelike Vrede”-Byeenkomste uitgereik is
Eerstens is ’n hersiene uitgawe van die boekie “Kyk, Ek maak alles nuut” aan die einde van ’n toespraak oor daardie onderwerp uitgereik. Dit is nou ’n vierkleurbrosjure in groot druk, en dit bevat bykomende informasie. Dit behoort ’n ideale instrument te wees om tuisbybelstudies mee te begin.
Tweedens is ’n vierkleurbrosjure van tydskrifgrootte, Jehovah se Getuies—Verenig in die uitvoering van God se wil wêreldwyd, uitgereik. Dit is ’n uitstekende instrument om ander vertroud te maak met ons verskillende bedrywighede en verstrek heelwat geskiedkundige informasie oor Jehovah se Getuies.
Die derde publikasie wat uitgereik is, is ’n Bybelstudiehulp met 192 bladsye wat aanvanklik by ons Gemeentelike Boekstudies gebruik gaan word. Die titel daarvan is Wêreldwye veiligheid onder die “Vredevors”.
Koninkryksmelodieë nr. 7 is vierde uitgereik, en al die byeenkomsgangers was bly om ’n uittreksel daarvan te hoor.
Almal was verheug om tydens die slottoespraak te hoor dat die Watch Tower Publications Index vir 1930-1985 in die nabye toekoms beskikbaar sou wees. Wat ’n seën vir alle ernstige Bybelstudente!
[Prente op bladsy 31]
1. Josef word deur sy broers verkoop in ’n drama by ’n byeenkoms van Koreaanse Getuies in die Verenigde State
2. F. W. Franz, president van die Wagtoringgenootskap, spreek ’n byeenkomsgehoor toe
3. ’n Deel van ’n oplettende gehoor in Yankee-stadion, New York
4. Duisende is gedoop om hulle toewyding aan Jehovah God te simboliseer