Koninkryksverkondigers berig

Baie eilande is bly

JESUS het vir sy dissipels gesê: „Julle sal my getuies wees . . . tot aan die uiterste van die aarde” (Handelinge 1:8). Daardie opdrag sou uiteindelik die uitgestrekte Westelike Stille Oseaan insluit, waar die Koninkrykswerk in die hele Mikronesië nou onder toesig van die Wagtoring- Bybel- en Traktaatgenootskap se takkantoor in Guam is. Talle bewoners van hierdie pragtige eilande is vandag bly. Waarom? Psalm 97:1 verskaf die rede: „[Jehovah] is Koning; laat die aarde juig; laat baie eilande bly wees!”

Daar word baie tale op die verskillende eilande in hierdie deel van die wêreld gepraat, en dit skep ’n groot probleem in die verkondiging van die goeie nuus dat ,Jehovah Koning is’. Dit was gevolglik ’n hoogtepunt van hierdie diensjaar toe hulle die maandelikse uitgawe van Die Wagtoring in vyf van die vername tale sowel as My boek met Bybelverhale en die brosjure Jy kan vir ewig op die aarde lewe! in ’n aantal Mikronesiese tale ontvang het. Die feit dat lektuur in die plaaslike tale van hierdie afgesonderde mense beskikbaar is, is werklik ’n seën en voorsien in ’n groot behoefte. Die eilanders reageer gunstig, veral aangesien die godsdienste van die Christendom oor die algemeen nie die moeite doen om lektuur in hulle tale te vertaal nie.

◻ Die sendelinge berig byvoorbeeld dat My boek met Bybelverhale in Truks op die pragtige eiland Moen in Truk ’n beroering veroorsaak het toe huisbewoners dit ontvang en vir hulle vriende en familielede gewys het. Mense het die sendelinge op straat voorgekeer en ’n boek gevra, en party het selfs voor 6:30 vm. by die sendinghuis ’n eksemplaar gaan vra. Nog ander het na die Departement van Onderwys gegaan om Jehovah se Getuies te kry wat daar werk.

Een opvoedkundige het gevra hoe dit kom dat Jehovah se Getuies so ’n boek in Truks kan druk wanneer die Katolieke en die Protestante al lank daar is en niks soortgelyks gelewer het nie. Selfs voormalige teenstanders wou die boek hê.

◻ ’n Ondervinding uit die Marshall-eilande toon hoe Bybelwaarheid eenheid en geluk in ’n huis kan bring. Die man was ’n dronkaard en ’n strawwe roker sowel as ’n ywerige, aktiewe Katoliek. Twee jong Getuies het hom tuis besoek en hy het, ondanks besware van sy vrou, ’n Bybelstudie aanvaar. Sy vrou het hom die daaropvolgende drie jaar teëgestaan. Maar toe sy opmerk hoe die waarheid hom laat verander het omdat hy opgehou rook het, nie meer dronk geword het nie en begin het om dinge saam met sy gesin te doen, het sy uiteindelik na die goeie nuus geluister en ander vertel wat sy geleer het. Die twee het hulle huwelik gewettig en hulle toewyding aan Jehovah deur doop gesimboliseer. Die man dien nou as ’n ouere man in die gemeente en sy vrou sien daarna uit om die pionierdiens te betree.

Geluk en vrede het na hierdie huis gekom, net soos na talle sodanige huise op die eilande wat die psalmis gesê het bly sou wees omdat Jehovah Koning geword het.​—Psalm 144:15.

[Kaarte op bladsy 11]

(Sien publikasie vir oorspronklike teksuitleg)

Belau

Jap

Rota

Guam

Saipan

Truk

Ponape

Kosrae

Nauru

Marshall-eilande

Kiribati

Midway-eilande

Stille Oseaan