Jesus se lewe en bediening
Vanaf hierdie nommer sal ’n nuwe rubriek met die bogemelde tema in Die Wagtoring verskyn.
VIR die afgelope vyf jaar, sedert Junie 1980, het Die Wagtoring een keer per maand die geïllustreerde rubriek van twee bladsye, „God se Woord is lewend”, bevat. Talle Bybelleerstellinge en geskiedkundige verslae is deur middel van prente en eenvoudige teks op ’n lewendige en eenvoudige wyse uiteengesit. Nou sal ’n nuwe rubriek, wat die lewe en bediening van Jesus Christus bespreek, „God se Woord is lewend” vervang.
Jy kan die eerste artikel van hierdie nuwe rubriek op die volgende twee bladsye lees. Jy kan daarna uitsien om gedurende die volgende paar maande ’n nuwe aflewering in elke nommer van Die Wagtoring te ontvang. Hierdie nuwe reeks artikels sal net soos „God se Woord is lewend” met prente toegelig word en twee bladsye beslaan.
Dit is gepas dat Jesus Christus op hierdie manier in Die Wagtoring op die voorgrond geplaas word, want Jesus het ’n groter invloed op die mensegeskiedenis gehad as enige ander mens. Maar nog belangriker is dat miljoene mense van alle rasse en nasionaliteite hulle lewens ten goede verander het toe hulle sy lewe en leerstellinge begin waardeer het.
Jy weet waarskynlik alreeds heelwat van Jesus en sy bediening af. Maar weet jy wanneer en waar dinge gebeur het sodat jy hulle met mekaar in verband kan bring en beter kan onthou? Wanneer het Jesus byvoorbeeld sy 12 apostels gekies—vroeg in sy bediening of heelwat later? Was dit voor of na die Samaritaanse vrou hom as die Christus geïdentifiseer het? En waar het hy die 12 gekies, of die 5 000 wonderdadig gevoed, of die Bergpredikasie gehou? Aangesien hierdie nuwe rubriek die verhaal van Jesus se lewe en bediening chronologies sal behandel en illustrasies sowel as beskrywende kommentare sal bevat, sal dit jou help om hierdie belangrike gebeure onuitwisbaar op die verstand in te prent.
Hierdie rubriek sal nuttig wees vir persone wat die Bybel al lank lees sowel as vir nuwer Bybelstudente, en vir ouers wanneer hulle met hulle kinders studeer. Daarom word vrae voorsien. Wat ’n uitstekende manier tog om hulle te help om vertroud te raak met die stigter van die Christelike godsdiens en sy leer! Jy kan dalk aan maniere dink waarop jy die artikels kan gebruik om jou gesin en ander te help. Onthou, feitlik almal hou van verhale, en talle geniet vervolgverhale waar hulle gereeld ’n aflewering ontvang.
Spoor ander dus vanaf die eerste aflewering aan om hierdie vervolgverhaal gereeld te lees. Jy sal opmerk dat Bybelaanhalings geparafraseer is om dit makliker verstaanbaar te maak, en die Bybeltekste word aan die einde van elke verhaal aangegee. Spoor almal aan om hierdie Bybelverhale te lees. Ja, benut hierdie nuwe rubriek in Die Wagtoring in jou dissipelmaakwerk!