“Hoe sal jy antwoord?”
1. Voor watter uitdagings kom baie van ons te staan?
1 Is jy lief vir God se Woord, maar vind jy dit moeilik om besonderhede oor Bybelverslae te onthou, of waar spesifieke stellings in die Skrif opgeteken is? Wil jy graag hê dat jou kinders ’n goeie begrip van die grondfeite en -leerstellings in die Bybel moet hê? Die rubriek “Hoe sal jy antwoord?” wat elke maand op bladsy 31 van die Ontwaak! verskyn, kan jonk sowel as oud help om beter vertroud te raak met God se Woord.—Han. 17:11.
2. Hoe kan die verskillende gedeeltes van die rubriek “Hoe sal jy antwoord?” gebruik word?
2 Hoe kan jy hierdie rubriek die beste benut? Die Ontwaak! van Januarie 2006 het die volgende wenke gegee: “Neem ’n oomblik om na bladsy 31 . . . te kyk. Jong lesers sal sommige gedeeltes op hierdie bladsy interessant vind; ander dele sal die geheue van meer gevorderde Bybelstudente toets. Die gedeelte ‘Wanneer in die geskiedenis?’ sal jou help om ’n tydlyn te maak wat toon wanneer Bybelkarakters gelewe het en wanneer belangrike gebeure plaasgevind het. Die antwoorde op die gedeelte ‘In hierdie nommer’ sal êrens in die tydskrif gevind kan word, maar die antwoorde op die meeste van die ander vrae sal op ’n gegewe bladsy in dieselfde tydskrif verskyn, waar dit onderstebo gedruk sal wees. Jy kan gerus navorsing doen voordat jy daardie antwoorde lees, en dan kan jy ander daarvan vertel. Jy kan selfs hierdie nuwe rubriek, ‘Hoe sal jy antwoord?’ gebruik vir gesins- of groepbesprekings van die Bybel.”
3. Hoe het party gesinne by hierdie rubriek baat gevind, en watter gedeeltes geniet jy die meeste?
3 Trouens, baie gesinne geniet dit om hierdie rubriek as ’n grondslag vir hulle gesinstudie te gebruik. ’n Moeder skryf: “Ek en my man het gedink dat dit ’n goeie idee sal wees om die ‘Prentejag vir kinders’ in ons gesinstudie in te sluit om dit vir ons driejarige dogtertjie lewendig en interessant te hou. Dit verskaf ons soveel plesier om te sien hoe sy haar eie Ontwaak! opgewonde neem en gou deur elke bladsy kyk totdat sy kry waarna sy soek.” ’n Vader in Brasilië sê: “Ek en my sewejarige seuntjie hou baie van hierdie bladsy van die Ontwaak! Dit het Moises gehelp om aandag te skenk, tekste na te slaan, prente te waardeer en datums te verstaan.” Ashley, wat agt jaar oud is, skryf: “Dankie vir ‘Hoe sal jy antwoord?’ agter in die Ontwaak! Dit leer my baie van die Bybel.”
4. Hoe kan ’n gesin hierdie rubriek as deel van hulle gesinsbybelstudie gebruik?
4 Jy kan gerus “Hoe sal jy antwoord?” van tyd tot tyd as deel van julle gesinstudie gebruik. Julle kan die Index of Watchtower Library op CD-ROM gebruik om die antwoorde op party van die moeiliker vrae na te slaan. Sodoende sal jy jou kinders leer hoe om navorsing te doen. As jy ouer kinders het, kan jy hulle gerus vra om voor die gesinstudie die antwoorde op “Wie is ek?” of “Wanneer in die geskiedenis?” na te slaan. Hulle kan dan gedurende die studie vertel wat hulle gevind het. Die doeltreffende gebruik van hierdie bladsy is een manier waarop ouers God se Woord by hulle kinders kan inskerp en hulle kan help om “die heilige geskrifte” van kleintyd af te ken.—2 Tim. 3:15; Deut. 6:7.