Seëvierend “aan die einde van die dae”
“Daar is ’n God in die hemel wat geheime openbaar, en Hy het. . .bekend gemaak wat aan die einde van die dae sal gebeur.”—DANIËL 2:28.
1. (a) Waarom is die profesieë van Jeremia, Esegiël en Daniël vandag vir ons van die allergrootste belang? (b) Waarom is daardie geïnspireerde geskrifte bewaar?
JEREMIA, ESEGIËL, DANIËL—aan watter opwindende profesieë dink ons tog wanneer ons daardie name hoor! Byna 2 600 jaar gelede het daardie drie moedige knegte van die Soewereine Heer Jehovah die laaste dae van afvallige Jerusalem beleef, hoewel hulle op verskillende plekke en in wyd uiteenlopende omstandighede gedien het. Maar elkeen het uit sy besondere posisie geprofeteer oor gebeure wat ’n hoogtepunt sou bereik tydens ’n latere tydperk genaamd “die einde van die dae”. Daardie geïnspireerde geskrifte is bewaar vir die bemoediging van almal wat God en geregtigheid liefhet en wat graag die naderende “groot verdrukking” wil oorleef.—Mattheüs 24:3-22; Romeine 15:4.
2. Waarom het Jeremia krag van Jehovah nodig gehad?
2 Jeremia het in Jerusalem geprofeteer. Terwyl die onheil nader gekom het, het die regeerders sowel as die inwoners in wetteloosheid en verdorwenheid verval. Daarom het Jehovah sy profeet versterk soos “’n onneembare kopermuur” om vas te staan te midde van hulle verdorwenheid.—Jeremia 15:11, 20; 23:13, 14.
Profete van vrede
3. Watter valse woorde het die profete gespreek?
3 Jehovah het by monde van Jeremia oor Jerusalem se verdorwe godsdiensleiers gesê: “Luister nie na die woorde van die profete wat vir julle profeteer nie; hulle vervul julle met ydele verwagtinge; gesigte uit hulle eie hart verkondig hulle, nie uit die mond van die HERE nie. Hulle sê gedurig aan my veragters: Die HERE het gespreek: Julle sal vrede hê.” Daardie valse profete het gesê: “Vrede, vrede!—terwyl daar geen vrede is nie.”—Jeremia 23:16, 17; 6:14.
4. Aan watter hoop klou baie van die Christendom se lede vas?
4 Net so is daar vandag in die afvallige Christendom profete van vrede. Baie van hulle klou vas aan wat pous Paulus VI “die laaste hoop op harmonie en vrede” genoem het, die Verenigde Volke. Daardie liggaam gaan eersdaags 1986 tot Internasionale Vredesjaar uitroep. Toe die pous sy besluit aangekondig het om aan die Jaar deel te neem, het hy die hoop uitgespreek dat “hierdie Jaar die gewenste resultate sal lewer en ’n betekenisvolle stap sal wees in die rigting van vreedsame betrekkinge onder volke en nasies”. Maar is dit realisties om te verwag dat die nasies ware vrede tot stand sal bring?
5. Wat voorspel Jehovah, en hoe sal dit “aan die einde van die dae” vervul word?
5 God beskryf self wat sal gebeur: “Kyk, ’n storm van die HERE, grimmigheid het uitgegaan, ja, ’n dwarrelstorm! Op die hoof van die goddelose mense breek dit los. Die toorn van die HERE sal nie afgewend word nie, totdat Hy uitgevoer en tot stand gebring het die raadslae van sy hart; aan die einde van die dae sal julle dit duidelik verstaan [of, “met verstand daarop let”, NW].” (Jeremia 23:19, 20; kyk ook 30:23, 24.) Ja, die valse godsdiensleiers sal mettertyd verstaan wat “die einde van die dae” vir hulle beteken. Maar dan sal dit vir hulle te laat wees om daarop te let!—Vergelyk Openbaring 18:10, 16; 19:11-16; Mattheüs 24:30.
6. Watter aangename uitslag sal daar vir baie wees?
6 Maar gelukkig is daar baie mense wat eens gevangenes van valse godsdiens was wat nou “daarop let”. Hulle gee gehoor aan die oproep: “Gaan uit haar [valse godsdiens] uit, my volk”, aangesien hulle nie gemeenskap met haar sondes wil hê of ’n deel van God se oordeel teen haar wil ontvang nie. Mag jy, as jy een van hierdie mense is, aanhou om ag te slaan op wat God se Woord te sê het oor “die einde van die dae” en die heerlike tydperk van vrede wat daarop sal volg.—Openbaring 18:2, 4, 5; 21:3, 4.
Gog se aanval
7. In watter omstandighede het Esegiël geprofeteer?
7 Hoe vaar God se volk gedurende “die einde van die dae”? Laat die profeet Esegiël ons vertel. As ’n jong man het hy ongetwyfeld vir Jeremia geken, maar toe is Esegiël na Babilonië weggevoer. Daar is hy in 613 v.G.J. by die Kebarrivier opdrag gegee om as Jehovah se profeet en wag op te tree ten behoewe van die Joodse ballinge, ’n diens wat hy minstens 22 jaar lank getrou uitgevoer het. Sy profesieë strek egter baie verder as sy eie tyd. In hoofstukke 37 en 38 vertel hy van ‘Gog van Magog’.
8, 9. (a) Watter groot geskil moet besleg word, en wanneer? (b) Wie is Gog, wie volg hom en watter beleid volg hy? (c) Wat sal Jehovah met Gog doen?
8 Wie is hierdie ‘Gog van Magog’? Wel, wie is God se aartsvyand met wie hy die groot geskilpunt van “die einde van die dae”, die geskil oor universele soewereiniteit, moet besleg? Hy is Satan die Duiwel, wat deur die Herder-Koning, Jesus Christus, uit die hemel gewerp is, nadat Hy in 1914 sy troon bestyg het. Die verlaagde en toornige Gog is nou beperk tot ’n klein geesteryk, “die land Magog”, naby hierdie aarde. Dit beteken “ellende” vir die aarde, omdat Gog weet dat hy min tyd het om sy skandelike beleid van ‘regeer of ruïneer’ uit te voer.—Esegiël 37: 24-28; 38:1, 2; Openbaring 11:18; 12:9-17, vgl. NAV.
9 Esegiël haal die Soewereine Heer Jehovah soos volg aan: “Kyk, Ek het dit teen jou, o Gog, vors [wêreldheerser] . . . En Ek sal jou weglok en hake in jou kakebene sit en jou laat uittrek en jou hele leër, . . . baie volke saam met jou” (Esegiël 38:3-6; Johannes 12:31). Ja, Gog het baie volke saam met hom, want “die hele wêreld [lê] in die mag van die Bose” (1 Johannes 5:19). Nogtans kan Jehovah figuurlike hake in Gog se kake sit om hom te maneuvreer. Maar waarom, en hoe?
10. (a) In wie stel Jehovah se Getuies hulle vertroue, in teenstelling met die nasies? (b) Waarom word Gog en sy bende vertoornd? (c) Wat moet ons doen om behoue te bly?
10 Op aanstigting van Gog redeneer die supermoondhede vandag dat wêreldvrede afhang van hulle ophoping van toenemend afgryslike kernwapens. En ander nasies verleen hulle steun hieraan. Maar God se volk “wat uit die nasies versamel is”, het wapens van geweld die rug toegekeer. Jehovah se Getuies is die enigste “nasie” op aarde wat waarlik kan sê: “Op God vertrou ons” (Jesaja 2:4; 31:1; Spreuke 3:5). Hierdie vredeliewende getuies van Jehovah ‘woon in veiligheid; hulle woon almal sonder muur en het geen grendel of poorte nie’. Hulle woon “op die middelpunt van die aarde”, want in alle nasies is hulle in die kollig as die een volk wat nie voor Gog geswig het nie (Esegiël 38:11, 12). Gevolglik mobiliseer die verwoede Gog van Magog sy hele demoniese organisasie. Soos ’n brullende leeu maak die verdorwe Satan hom gereed vir ’n volskaalse aanval. As ons dit wil oorleef, moet ons almal ‘hom teëstaan, standvastig in die geloof.—1 Petrus 5:8, 9.
11. Hoe laat Jehovah ‘Gog teen Sy land aankom’, en met watter doel?
11 Jehovah beveel Esegiël: “Daarom, profeteer, o mensekind, en sê aan Gog: So spreek die Here HERE: Sal jy dit nie opmerk in die dag as my volk [geestelike] Israel veilig woon nie?” Gog en sy bende is afgunstig op die veiligheid en voorspoed wat hulle vandag onder Jehovah se Getuies sien. Hulle is vertoornd omdat die Getuies “nie van [Satan se] wêreld is nie”. So tart Jehovah vir Gog en lok Hy hom uit om die weerlose Getuies aan te val. Jehovah sê vir Gog: “Jy sal optrek teen my volk Israel soos ’n wolk om die land te oordek. Aan die einde van die dae sal dit wees—dan sal Ek jou teen my land laat aankom, sodat die nasies My kan ken as Ek My in jou, o Gog, voor hulle oë as die Heilige laat ken.”—Esegiël 38:14, 16; Johannes 17:14, 16.
12. Wat is volgens Esegiël 38:18-23 die uitslag van Gog se aanval?
12 Die verwoede Gog maak aanstaltes om die voorspoedige “land” van Jehovah se volk in te neem. Maar is Gog die enigste een wat toornig word? Wat van die Soewereine Heer Jehovah se toorn teen Gog en sy dupes? In Esegiël 38:18-23 vertel Jehovah hoe hy hom ‘voor die oë van die nasies as die Heilige laat ken’ deur Gog te verslaan en sy lojale knegte te red. Die Soewereine Heer sluit die berig oor sy triomf oor Gog en sy bende af deur te sê: “Hulle sal weet dat Ek [Jehovah] is.” Sy roemryke naam sal geregverdig wees!
‘Geheime geopenbaar’
13. Hoe het Daniël ’n goeie voorbeeld vir jong Getuies gestel?
13 Terwyl Esegiël onder die Joodse ballinge naby Babilon geprofeteer het, is die jong Daniël, wat van vorstelike Joodse afkoms was, aan die koninklike hof van Nebukadnesar onderrig. Daar het hy, as ’n handhawer van onkreukbaarheid, ’n goeie voorbeeld gestel vir alle jong knegte van Jehovah wat vandag lewe.—Daniël 1:8, 9.
14. In watter saak het die jong Daniël al die eer aan God gegee?
14 Die tweede jaar na die val van Jerusalem het ’n droom Nebukadnesar ontstel. Toe hy wakker word, kon hy nie eens die droom onthou nie. Maar godvresende Daniël het sowel die droom as die uitlegging daarvan aan die koning te kenne gegee. Daniël het God al die eer hiervoor gegee en vir die koning gesê: “Daar is ’n God in die hemel wat geheime openbaar, en Hy het koning Nebukadnesar bekend gemaak wat aan die einde van die dae sal gebeur” (Daniël 2:28). Wat leer ons uit die droom en uit die toepassing daarvan op “die einde van die dae”?
15, 16. Wat is die uitlegging van Nebukadnesar se droom?
15 Hier sien ons ’n kolos, ’n enorme beeld, wat merendeels uit ’n reeks verskillende metale bestaan. Daniël verduidelik dat hierdie metale ’n reeks koninkryke voorstel en sê vir Nebukadnesar: “Ú is die hoof van goud”, skynbaar met verwysing na die Babiloniese dinastie. Daar volg ander wêreldmoondhede: die bors en arms van silwer staan vir Medo-Persië, die buik en lendene van koper vir Griekeland en die bene van yster vir Rome en, later, die wêreldmoondheid van Brittanje en Amerika (Daniël 2:31-40). Deur “die tye van die nasies” heen, van 607 v.G.J. tot 1914 G.J., het hierdie moondhede heerskappy uitgeoefen in die koninkryk van ‘die god van hierdie wêreld’.—Lukas 21:24; 4:5, 6; 2 Korinthiërs 4:4.
16 Dit is egter “aan die einde van die dae” dat “die nageslag van die mense”, die gewone man, na vore kom. In baie lande is konings, keisers en tsare deur revolusionêre en demokratiese regeerders vervang. Die mens se wanbestuur van die aarde word ’n mengelmoes van wrede diktatorskappe en buigsamer demokratiese regeringsvorms. Soos yster en klei meng hulle nie. Selfs in die Verenigde Volke kleef hulle nie aan mekaar vas nie maar neem hulle eerder deel aan bitsige debatte, terwyl dreigemente oor en weer geslinger word. Dit is inderdaad “’n verdeelde koninkryk”.—Daniël 2:41-43, vgl. NW.
17. Hoe word die profesie “aan die einde van die dae” vervul?
17 Die geskil in verband met wêreldoorheersing bereik dus “aan die einde van die dae” sy hoogtepunt. En wat is die oplossing? God se Messiaanse Koninkryk is reeds sedert 1914 in beweging. Dit is die “klip” wat uit die “berg” van Jehovah se universele sowereiniteit losraak. Geen menslike politikus het iets daarmee te doen nie! Hier kom dit, volmaak op koers. Op God se bestemde tyd verbrysel dit die voete van die beeld en maal dit die hele kolos tot stof. Soos kaf voor die wind word menseheerskappy weggevoer, en daar bly geen spoor van oor nie. Maar die “klip”—die Koninkryk van die groot God en sy Christus—word ’n groot berg wat die hele aarde vul. Daardie koninkryk sal ‘in ewigheid nie vernietig word en aan geen ander volk oorgelaat word nie’. Dit sal vir ewig bestaan. Hoe dankbaar is ons tog teenoor Jehovah omdat hy sulke geheime lank vooruit ‘geopenbaar’ het!—Daniël 2:29, 44, 45.
’n Hedendaagse “botsing”
18. (a) Watter latere gesig het Daniël ontvang? (b) Wat is verbasend in verband met hierdie gesig?
18 Daniël het egter nog iets te sê gehad oor menseregering en “die einde van die dae”. Sowat 70 jaar nadat hy Nebukadnesar se droom bekend gemaak het, was die bejaarde Daniël nog in Babilon, maar nou het hy onder Kores, die koning van Persië, gedien. Terwyl hy op die oewer van die Hiddekelrivier was, het ’n engel aan hom verskyn en gesê: “Ek het dan gekom om jou inligting te gee oor wat jou volk aan die einde van die dae te beurt sal val, want die gesig sien nog op die verre toekoms” (Daniël 10:14). Die engel het vervolgens in fyn besonderhede die regeerders en gebeure beskryf wat sou kom gedurende die geskiedenis van Persiese, Griekse, Egiptiese, Romeinse, Germaanse, Anglo-Amerikaanse en sosialistiese regeringsvorms. Hoe verbasend tog dat al hierdie geskiedenis, wat oor meer as 2 500 jaar strek, vooruit geskryf kon word! Dit gee ons groot vertroue in die geïnspireerde, profetiese Woord van Jehovah God!a
19. Watter hedendaagse gebeure word in hierdie profesie voorspel?
19 Hierdie profesie vertel dat daar met verloop van tyd twee supermoondhede sou opstaan, “die koning van die Suide” en “die koning van die Noorde”. Op die ou end, sê die engel, sal die noordelike koning “homself verhef en hom groot hou bo enige god, en teen die God van die gode sal hy wonderbaarlike dinge spreek”—nie gunstige dinge nie, want hy ‘vereer die god van die vestings’. Teenoor hierdie grootpraterige “koning” staan “die koning van die Suide”, wat ook groot militêre mag besit. Soos voorspel, kom hierdie twee konings “in botsing”. Die hedendaagse koue oorlog tussen die supermoondhede word goed hierdeur toegelig. Soms ‘bots’ hulle taamlik hard wanneer hulle aandring op pariteit in kernwapens, terwyl hulle steeds hul oorlogsvoorbereidings tot die uiterste voer.—Daniël 11:36-45.
20. Wat bepaal die uitslag, en hoe is “Migael” hierby betrokke?
20 Hoewel die profesie voorspel dat “die koning van die Noorde” soos ’n vloed in baie lande sal instroom, is dit nie die faktor wat die uitslag bepaal nie. Die bepalende faktor word in Daniël 12:1 (NW) gemeld: “En gedurende daardie tyd sal Migael opstaan, die groot vors wat ten behoewe van die seuns van jou volk optree.” Hierdie Migael is Jesus Christus, wat in 1914 in sy Koninkryk ‘opgestaan’ en dadelik vir Satan uit die hemele gewerp het. En dit is hierdie “Koning van die konings” wat by Armageddon tot aksie oorgaan en al “die konings van die aarde”, met inbegrip van die konings van die “Noorde” en die “Suide”, vernietig.—Openbaring 12:7-10; 19:11-19.
21. Wat is dan die uitslag “aan die einde van die dae”?
21 Daar, by die hoogtepunt van “die einde van die dae”, sal die uitslag duidelik wees: God se Koninkryk sal seëvier. Die engel beskryf dit met hierdie verdere woorde: “En dit sal ’n tyd van benoudheid wees soos daar nie gewees het vandat ’n volk bestaan het tot op die tyd nie.”—Daniël 12:1; vergelyk Jeremia 25:31-33; Markus 13:19.
22. Hoe moet ons, as God se volk, op hierdie profesieë reageer, en watter vooruitsig het ons?
22 Moet ons daardie tyd van verdrukking en benoudheid vrees? Nie as ons aan Jehovah se kant staan nie, want die engel sê voorts: “In die tyd sal jou volk gered word, elkeen wat in die boek opgeskrywe staan” (Daniël 12:1). Laat elkeen van ons ons dan toelê op ywerige Bybelstudie en ons inspan in Jehovah se diens. Mag ons dan “aan die einde van die dae” ons name opgeteken vind in God se “gedenkboek” wat “voor sy aangesig geskrywe [is] vir die wat die HERE vrees en sy Naam eer” (Maleagi 3:16). So sal ons die voorreg hê om mee te doen aan sy oorwinning “aan die einde van die dae”.
[Voetnote]
a Kyk die boek “Laat u wil geskied op aarde”, wat in 1967 deur die Wagtoringgenootskap uitgegee is, bladsye 220-325.
In verband met “die einde van die dae”:
◻ Watter uitslag in verband met wêreldvrede het Jeremia voorspel?
◻ Watter geskil word deur Gog se aanval besleg, en hoe?
◻ Op watter groot hoogtepunt dui Nebukadnesar se droom?
◻ Hoe sal die magstryd tussen die twee “konings” eindig?
[Venster op bladsy 24]
DIE logogram wat deur die VV goedgekeur is vir sy Internasionale Vredesjaar (1986) toon ’n olyftak, ’n duif en mensehande. Dit word soos volg verduidelik: “Die duif is die simbool van vrede gepaard met die olyftak-embleem van die Verenigde Volke. Mensehande ondersteun die duif wat gereed is om te vlieg, en dit beklemtoon die rol van mense by die handhawing van vrede.”
In hierdie kerneeu is daar inderdaad ’n dringende behoefte aan vrede. Maar kan dit deur mensehande bewerkstellig word? Jeremia herinner ons: “Ek weet, o HERE, dat aan die mens sy weg nie toebehoort nie; nie aan ’n man om te loop en sy voetstappe te rig nie.” En die profeet voeg hierdie versoek by: “Stort u grimmigheid uit oor die nasies wat U nie ken nie.”—Jeremia 10:23-25.
Die duif en die olyfblad is aan die Bybelverhaal van Noag ontleen (Genesis 8:11). Hoe is vrede in daardie tyd herstel? Dit was deur ’n godsgerig, die wêreldvloed wat ’n verdorwe mensegeslag uitgedelg het. Jesus het gesê dat “die dae van Noag”, met hulle geweld en boosheid, profeties was van die tyd van sy “teenwoordigheid”, wat nou is.—Mattheüs 24:37-39, vgl. NW; Genesis 6:5-12.
“Die God van vrede” moet weer ’n sataniese stelsel uitwis, waarna die “Vredevors”, Jesus Christus, ewige vrede sal inbring.—Romeine 16:20; Jesaja 9:5, 6; 33:7.
[Prent op bladsy 24]
Jeremia wys op die ware hoop op vrede
[Prent op bladsy 25]
Esegiël waarsku ons om nou voor te berei vir die aanval deur Gog
[Prent op bladsy 27]
Daniël onthul die uitslag van “die einde van die dae”