Staan stil en sien die redding van Jehovah!
“Neem stelling in, staan stil en sien die redding van Jehovah ten behoewe van julle.”—2 KRONIEKE 20:17.
1, 2. Waarom is die dreigende aanval van “Gog van die land Magog” ’n groter bedreiging as internasionale terrorisme?
TERRORISME is al deur sommige beskryf as ’n aanval op die wêreldgemeenskap, ja, op die beskawing as sodanig. So ’n bedreiging moet natuurlik ernstig opgeneem word. Daar is egter ’n ander aanval wat selfs belangriker is, waaraan die wêreldgemeenskap min of geen aandag skenk nie. Wat is dit?
2 Dit is die aanval deur “Gog van die land Magog”, waarvan die Bybel in Esegiël hoofstuk 38 praat. Is dit ’n oordrywing om te sê dat hierdie aanval ’n groter bedreiging as internasionale terrorisme inhou? Glad nie, want Gog se aanval behels meer as net ’n aanval op menseregerings. Dit val die hemelse regering van God aan! Maar in teenstelling met mense, wat aanvalle op hulle stelsel net in beperkte mate kan afweer, is die Skepper volkome in staat om Gog se boosaardiger aanval die hoof te bied.
’n Aanval op God se regering
3. Wat is wêreldheersers sedert 1914 genooi om te doen, en hoe het hulle gereageer?
3 Konflik tussen God se tans heersende Koning en Satan se goddelose stelsel bestaan al sedert God se Koninkryk in 1914 in die hemel opgerig is. In daardie tyd is menseheersers in kennis gestel dat hulle hulle aan God se gekose Heerser moet onderwerp. Maar hulle het geweier om dit te doen, soos voorspel is: “Die konings van die aarde neem stelling in en die hoë amptenare het soos een man saamgespan teen Jehovah en teen sy gesalfde en gesê: ‘Laat ons hulle bande stukkend skeur en hulle toue van ons afwerp!’” (Psalm 2:1-3). Verset teen Koninkryksheerskappy sal ongetwyfeld ’n hoogtepunt bereik gedurende die aanval deur Gog van Magog.
4, 5. Hoe kan mense teen God se onsigbare, hemelse regering veg?
4 Ons wonder dalk hoe mense teen ’n onsigbare, hemelse regering kan veg. Volgens die Bybel bestaan hierdie regering uit “die honderd-vier-en-veertigduisend, wat van die aarde gekoop” is, tesame met “die Lam”, Christus Jesus (Openbaring 14:1, 3; Johannes 1:29). Aangesien die nuwe regering in die hemel is, word dit die “nuwe hemele” genoem, terwyl die aardse onderdane daarvan logieserwys “’n nuwe aarde” genoem word (Jesaja 65:17; 2 Petrus 3:13). Die meeste van Christus se 144 000 medeheersers het reeds hulle aardse loopbaan getrou voltooi. Hulle het sodoende bewys dat hulle waardig is om hulle nuwe dienstoewysing in die hemel te ontvang.
5 ’n Klein oorblyfsel van die 144 000 is egter nog op die aarde. Van die meer as 15 000 000 wat die herdenking van die Here se Aandmaal in 2002 bygewoon het, het net 8 760 hulle hoop bekend gemaak om onder diegene te wees wat vir hierdie hemelse toewysing gekies is. Enigeen wat hierdie oorblywende toekomstige lede van die Koninkryk durf aanval, val in werklikheid God se Koninkryk aan.—Openbaring 12:17.
Die koning voltooi sy oorwinning
6. Hoe beskou Jehovah en Christus teenstand teen God se volk?
6 Jehovah se reaksie op die teenstand teen sy opgerigte Koninkryk is voorspel: “Hy wat in die hemel sit, sal lag; Jehovah sal hulle bespot. In dié tyd sal hy hulle in sy toorn aanspreek, en in sy brandende misnoeë sal hy hulle ontstel en sê: ‘Ek, ja ek, het my koning ingehuldig op Sion, my heilige berg’” (Psalm 2:4-6). Die tyd het nou aangebreek vir Christus om, onder Jehovah se leiding, “sy oorwinning te voltooi” (Openbaring 6:2). Hoe beskou Jehovah teenstand teen sy volk gedurende die tyd van die finale oorwinning? Asof dit teen hom en teen sy heersende Koning gerig is. “Wie aan julle raak, raak aan my oogappel”, sê Jehovah (Sagaria 2:8). En Jesus het nadruklik verklaar dat hy die dinge wat mense aan sy gesalfde broers doen of nie doen nie, beskou asof dit aan hom gedoen of nie gedoen word nie.—Matteus 25:40, 45.
7. Om watter redes ervaar die “groot menigte”, wat in Openbaring 7:9 beskryf word, Gog se toorn?
7 Natuurlik sal diegene wat die gesalfdes heelhartig ondersteun, ook Gog se toorn ervaar. Hierdie toekomstige lede van God se “nuwe aarde” is “’n groot menigte” wat “uit alle nasies en stamme en volke en tale” geroep is (Openbaring 7:9). Daar word gesê dat hulle “voor die troon en voor die Lam staan, geklee in wit klere”. Hulle het dus ’n goedgekeurde posisie voor God en Christus Jesus. Met “palmtakke in hulle hande” loof hulle Jehovah as die regmatige Soewerein van die heelal, wie se heerskappy deur die bewind van sy gekroonde Koning, Jesus Christus, “die Lam van God”, uitgeoefen word.—Johannes 1:29, 36.
8. Hoe sal Christus reageer op Gog se aanval, en met watter gevolg?
8 Gog se aanval sal daartoe aanleiding gee dat God se gekroonde Koning optree en die oorlog van Armageddon voer (Openbaring 16:14, 16). Dié wat geweier het om Jehovah se soewereiniteit te erken, sal vernietig word. Daarenteen sal dié wat verdrukking verduur het weens hulle lojaliteit aan God se Koninkryk, blywende verligting ervaar. Die apostel Paulus het hieroor geskryf: “Dit is ’n bewys van die regverdige oordeel van God, wat daartoe lei dat julle die koninkryk van God waardig geag word, waarvoor julle ook ly. Hierby word in aanmerking geneem dat dit regverdig is van God om verdrukking te vergeld aan dié wat vir julle verdrukking veroorsaak, maar aan julle wat verdrukking ly, verligting saam met ons by die openbaring van die Here Jesus vanuit die hemel met sy magtige engele in ’n vlammende vuur, wanneer hy wraak uitoefen op dié wat God nie ken nie en dié wat die goeie nuus oor ons Here Jesus nie gehoorsaam nie.”—2 Tessalonisense 1:5-8.
9, 10. (a) Hoe het Jehovah Juda die oorwinning oor ’n gedugte vyand gegee? (b) Wat moet Christene van vandag voortgaan om te doen?
9 Gedurende die naderende groot verdrukking, wat ’n hoogtepunt in Armageddon sal bereik, sal Christus oorlog voer teen alles wat boos is. Maar sy volgelinge sal nie hoef te veg nie, net soos dit ook nie vir die inwoners van die tweestammeryk van Juda duisende jare gelede nodig was om te veg nie. Die stryd het aan Jehovah behoort, en hy het hulle die oorwinning gegee. Die verslag sê: “Jehovah [het] manne in ’n hinderlaag opgestel teen die kinders van Ammon, Moab en die bergstreek Seïr wat Juda binnegekom het, en hulle het teen mekaar geveg. En die kinders van Ammon en Moab het teen die inwoners van die bergstreek Seïr opgestaan om hulle aan vernietiging oor te gee en te verdelg; en net toe hulle met die inwoners van Seïr klaar was, het hulle elkeen gehelp om sy naaste te verdelg. Maar Juda het by die wagtoring van die wildernis gekom. Toe hulle hulle gesigte na die menigte draai, kyk, toe het hulle lyke op die aarde gelê sonder dat iemand ontkom het.”—2 Kronieke 20:22-24.
10 Dit was presies soos Jehovah voorspel het: “Julle sal . . . nie hoef te veg nie” (2 Kronieke 20:17). Dit is die voorbeeld wat Christene moet volg wanneer Jesus Christus kom “om sy oorwinning te voltooi”. Intussen gaan hulle voort om die kwaad te bestry, nie met vleeslike wapens nie, maar met geestelike wapens. Sodoende “hou [hulle] aan om die kwaad met die goeie te oorwin”.—Romeine 6:13; 12:17-21; 13:12; 2 Korintiërs 10:3-5.
Wie sal Gog se aanval uitvoer?
11. (a) Watter instrumente sal Gog gebruik om sy aanval uit te voer? (b) Wat behels geestelike waaksaamheid?
11 Gog van Magog word geïdentifiseer as Satan die Duiwel in sy verlaagde toestand sedert 1914. As ’n geesskepsel kan hy nie sy aanval direk uitvoer nie, maar hy sal menslike instrumente gebruik om sy dade te verrig. Wie sal hierdie menslike instrumente wees? Die Bybel gee ons nie besonderhede nie, maar dit gee ons wel sekere aanduidings wat ons kan help om hulle te identifiseer. Namate wêreldgebeure ter vervulling van Bybelprofesieë ontvou, sal ons geleidelik ’n duideliker prentjie kry. Jehovah se volk vermy spekulasie maar bly geestelik waaksaam, ten volle bewus van politieke en godsdiensverwikkelinge wat in die raamwerk van die vervulling van Bybelprofesieë pas.
12, 13. Hoe het die profeet Daniël ’n finale aanval op God se volk voorspel?
12 Die profeet Daniël werp lig op ’n finale aanval op God se volk deur te skryf: “Hy [die koning van die noorde] sal beslis met ’n groot woede uitgaan om te verdelg en om baie aan vernietiging oor te gee. En hy sal sy paleistente tussen die groot see en die heilige Sieraadberg opslaan.”—Daniël 11:44, 45.
13 In die konteks van die Bybel was “die groot see” die Middellandse See, en “die heilige Sieraadberg” was Sion, waarvan Jehovah gesê het: “Ek, ja ek, het my koning ingehuldig op Sion, my heilige berg” (Psalm 2:6; Josua 1:4). In geestelike sin stel die land “tussen die groot see en die heilige Sieraadberg” dus die voorspoedige geestelike toestand van gesalfde Christene voor. Hulle word nie meer geassosieer met die see van die mensdom wat van God vervreem is nie, en hulle sien daarna uit om saam met Christus Jesus in die hemelse Koninkryk te heers. Dit is duidelik dat God se gesalfde knegte, tesame met hulle lojale metgeselle, die groot menigte, die teiken sal wees van die koning van die noorde wanneer hy sy boosaardige aanval loods ter vervulling van Daniël se profesie.—Jesaja 57:20; Hebreërs 12:22; Openbaring 14:1.
Hoe sal God se knegte reageer?
14. Watter drie dinge sal God se volk doen wanneer hulle aangeval word?
14 Watter optrede sal van God se knegte verwag word wanneer hulle aangeval word? Die reaksie van God se tipiese nasie in die dae van Josafat dien weer eens as voorbeeld. Let op dat die volk beveel is om drie dinge te doen: (1) stelling in te neem, (2) stil te staan en (3) die redding van Jehovah te sien. Hoe sal God se volk vandag in ooreenstemming met hierdie woorde optree?—2 Kronieke 20:17.
15. Wat beteken dit vir Jehovah se volk om stelling in te neem?
15 Hulle neem stelling in: God se volk sal, sonder om te weifel, voortgaan om hulle standpunt as aktiewe ondersteuners van God se Koninkryk te handhaaf. Hulle sal voortgaan om hulle standpunt ten opsigte van Christelike neutraliteit te behou. Hulle sal “standvastig, onbeweeglik” wees in hulle lojale diens aan Jehovah en aanhou om Jehovah in die openbaar vir sy liefderyke goedhartigheid te loof (1 Korintiërs 15:58; Psalm 118:28, 29). Geen druk, nou of in die toekoms, sal hulle hierdie goddelik goedgekeurde posisie laat prysgee nie.
16. In watter opsigte sal Jehovah se knegte stilstaan?
16 Staan stil: Jehovah se knegte sal nie hulleself probeer red nie, maar sal eerder volkome op Jehovah vertrou. Net hy kan sy knegte uit wêreldchaos red, en hy het belowe om dit te doen (Jesaja 43:10, 11; 54:15; Klaagliedere 3:26). Vertroue in Jehovah sal vertroue insluit in die hedendaagse sigbare kanaal wat hy ongetwyfeld al dekades lank gebruik om sy voornemens uit te voer. Dan sal ware Christene meer as ooit tevore hulle vertroue moet stel in medeaanbidders wat deur Jehovah en sy heersende Koning aangestel is om die leiding te neem. Hierdie getroue manne sal God se volk rig. As hulle leiding verontagsaam word, kan dit rampspoedig wees.—Matteus 24:45-47; Hebreërs 13:7, 17.
17. Om watter rede sal God se getroue knegte die redding van Jehovah kan sien?
17 Sien die redding van Jehovah: Redding sal die beloning wees vir almal wat Christelike onkreukbaarheid handhaaf en wat op Jehovah vertrou vir verlossing. Tot die finale uur—en sover dit vir hulle moontlik is—sal hulle die koms van die dag van Jehovah se oordeel aankondig. Die hele skepping moet weet dat Jehovah die ware God is en dat hy getroue knegte op aarde het. Nooit weer sal daar ’n langdurige geskil oor die regmatigheid van Jehovah se soewereiniteit hoef te wees nie.—Esegiël 33:33; 36:23.
18, 19. (a) Hoe weerspieël die oorwinningslied in Eksodus hoofstuk 15 die gevoelens van dié wat Gog se aanval sal oorleef? (b) Wat is dit nou vir God se volk gepas om te doen?
18 Met hernieude energie sal God se volk die nuwe wêreld binnegaan, gretig om ’n oorwinningslied te sing, net soos die eertydse Israeliete ná hulle verlossing deur die Rooi See. Ewig dankbaar teenoor Jehovah vir sy beskerming sal hulle as individue en as ’n groep die woorde van lank gelede herhaal: “Laat my tot Jehovah sing, want hy het hoog verhewe geword. . . . Jehovah is ’n krygsman. Jehovah is sy naam. . . . U regterhand, o Jehovah, kan ’n vyand verpletter. En in die volheid van u verhewenheid kan u dié neerwerp wat teen u opstaan; u stuur u brandende toorn uit, soos stoppels verteer dit hulle. . . . In u liefderyke goedhartigheid het u die volk gelei wat u verlos het; in u krag sal u hulle beslis na u heilige woonplek voer. . . . U sal hulle bring en hulle plant op die berg van u erfdeel, ’n vaste plek wat u gereedgemaak het vir u om in te woon, o Jehovah, ’n heiligdom, o Jehovah, wat u hande opgerig het. Jehovah sal as koning heers tot onbepaalde tyd, ja, vir ewig.”—Eksodus 15:1-19.
19 Hoe gepas is dit tog nou, met die vooruitsig op ewige lewe helderder as ooit tevore, dat God se knegte hulle toegewydheid aan Jehovah toon en hom met hernieude vasbeslotenheid as hulle ewige Koning dien!—1 Kronieke 29:11-13.
Kan jy verduidelik?
• Waarom sal Gog se aanval teen die gesalfdes en die ander skape gerig wees?
• Hoe sal God se volk stelling inneem?
• Wat beteken dit om stil te staan?
• Hoe sal God se volk die redding van Jehovah sien?
[Prent op bladsy 18]
Jehovah het Josafat en sy volk die oorwinning gegee sonder dat hulle hoef te geveg het
[Prent op bladsy 20]
Die gesalfdes sowel as die ander skape ondersteun Jehovah se soewereiniteit
[Prent op bladsy 22]
Soos die eertydse Israeliete sal God se volk binnekort ’n oorwinningslied sing