Ek sal Jehovah loof ondanks my gebreke!

DIEGENE wat Jehovah God getrou dien ondanks ernstige gebreke het voortdurend bewyse dat hy hulle ondersteun. “Hy sal nooit die regverdige laat wankel nie.”​—Psalm 55:23.

Sulke gerusstellende woorde het ware betekenis vir Bill en Janice, albei in hulle laat twintigerjare. Hulle is ongeveer drie jaar getroud en verbonde aan ’n gemeente van Jehovah se Getuies in Washington, D.C. Bill is ’n pionier, ’n voltydse Koninkryksverkondiger, en hou verskeie tuisbybelstudies. Vier van hierdie studies word met dowe mense gehou.

Janice is doof gebore, en komplikasies wat met haar soort doofheid gepaard gaan, het haar boonop blind laat word. Tydens die “Koninkryksvermeerdering”-Streekbyeenkoms verlede jaar het Janice in ’n deel gesit wat vir dowes voorbehou is en waar die gesproke woord in vingertaal omgesit is. Omdat Janice ook blind is, kon sy natuurlik nie die boodskap op daardie manier ontvang nie. Daarom is ’n tolk aangestel om langs haar te sit. Deur haar hand op die dominante hand van die tolk te plaas, kon Janice die program “hoor”.

Toe een van die Koninkryksliedere gesing is, het daar geen tolk op die verhoog verskyn nie weens ’n misverstand in verband met die rooster. Bill, wat op daardie tydstip vir Janice getolk het, het toe saam met haar op die verhoog gegaan en die lied in vingertaal getolk. Sy het haar hand op haar man s’n geplaas en saam met die ander gesing​—iets wat menige oog vol trane laat skiet het.

Dit is nou ongeveer twee jaar dat Bill en Janice “in die waarheid wandel” (3 Johannes 4). En hoewel Janice fisiek blind en doof is, help sy ander om God se waarheid te sien en te hoor. Sy is geseën met drie tuisbybelstudies, wat almal in vingertaal gehou word omdat die studente ook doof is. Ja, waar daar ’n opregte begeerte is om Jehovah te loof en ander geestelik te help, vind sy knegte ’n manier om dit te doen.

[Prent op bladsy 25]

Bill en Janice Adams “luister” na ’n Bybeltoespraak