Koninkryksverkondigers berig
Uitbreiding by die “middelpunt”
DIE stad Kitwe, Zambië, word dikwels in nywerheidskringe die “middelpunt” van die Koperstreek genoem. Dit is omdat Kitwe reg in die middel van die mynstreek lê. Kitwe is egter ook ’n ander soort middelpunt—die middelpunt van teokratiese bedrywighede in Zambië. Die takkantoor is sedert 1962 daar geleë, en gedurende hierdie twee dekades het die getal verkondigers in Zambië feitlik verdubbel, van 30 129 in 1962 tot ’n hoogtepunt van 58 925 in 1984. Die Gedenkmaalopkoms vir 1984 was 393 431, en dit is een persoon uit elke 16 van Zambië se bevolking.
Met sulke snelle groei het die ou takfasiliteite gou ontoereikend geword. Die huidige gebou is aanvanklik net vergroot toe nog ’n eetsaal vir die hoofkwartierpersoneel en ’n plek vir berging en verskeping aangebou is. Die tak in Zambië het egter weldra Bybellektuur begin druk. En kort voor lank was die klein drukkery so beknop dat daar min beweeg- of bergruimte was. Aangesien die takkantoor in ’n woongebied geleë was, was dit ook moeilik om met die drukkery voort te gaan sonder om die bure te steur.
Die broers van Zambië het dus aansoek gedoen om ’n perseel waar hulle ’n nuwe drukkery kon bou. Maar dit was nie maklik om so ’n perseel te bekom nie. Die eerste perseel wat voorgestel is, is deur die stadsraad verwerp omdat dit ‘vir regeringsgebruik afgesonder’ is. ’n Broer het egter ’n stuk grond wat aan hom behoort het, aangebied. Toe die broers goedkeuring verkry het, het hulle onmiddellik ’n internasionale argitekfirma gehuur om planne te teken en dit by die stadsraad om goedkeuring voor te lê. Hierdie nuus het die broers in Zambië met geesdrif vervul! Talle het met die bouwerk kom help, wat gedoen is onder die toesig van ’n broer wat ’n professionale kontrakteur is. Die gebou is in slegs twee jaar, in 1984, voltooi.
Die toewyding van die gebou was inderdaad ’n heuglike geleentheid. Hoewel die broers meegedeel is dat sitplek vir die program uiters beperk was, het meer as 4 000 uit alle dele van Zambië die vergadering bygewoon! Hulle was met ontroering vervul toe die takkoördineerder die geskiedenis van die werk in Zambië verhaal het en getoon het hoe Jehovah die werk aldaar gesteun het. Hierna het veterane ondervindinge vertel. Party was in die verlede spesiale pioniers in lande soos Tanzanië, Kenia en Uganda toe die werk daar onder die toesig van die Zambiese tak was. Nou sien die tak wat in Kenia opgerig is na hierdie lande om.
Broer John McBrine, wat van Zimbabwe af as sone-opsiener gekom het, het die program afgesluit deur die Zambiese broers aan te spoor om hierdie nuwe tak goed te gebruik. Die lektuur wat by hierdie drukkery gelewer word, sal ware aanbidding bevorder en opregte persone help om tot kennis van die waarheid te kom! En wat sal ongetwyfeld die gevolg hiervan wees? Verdere uitbreiding by die “middelpunt” van teokratiese bedrywighede in Zambië!
[Prent op bladsy 31]
Nuwe Wagtoringtak in Kitwe, Zambië