Koninkryksverkondigers berig
Hulle vind ’n lewensdoel
IN HIERDIE verworde, deurmekaar wêreld soek talle mense na sin en ’n doel in die lewe. Hulle vra: ‘Waarom is ons hier? Waar kom ons vandaan? Wat hou die toekoms in?’ Baie wend hulle tot God vir antwoorde, en hy stel hulle nie teleur nie (Mattheüs 7:7, 8). Dit was die ondervinding van ’n vrou in Griekeland. Sy sê:
◻ “Ek was 14 toe ek oor die mens en sy doel in die lewe begin wonder het. Nadat ek antropologie op skool bestudeer het, het ek gedink dat die geneeskunde my vrae sou beantwoord, maar ek het van mening verander toe niemand die oorsprong van die mens aan my kon verduidelik nie.” Sy gaan voort: “Ek het my tot astrologie begin wend en Oosterse godsdienste, soos Islam en die godsdiens van Tibet, bestudeer. Ek het Lamaïsme en daarna spiritisme in my lewe begin toepas. Toe ek met die geeste in aanraking gekom het, het ek gemeen dat ek die waarheid gevind het. Westerse godsdienste beweer dat hulle hulle oortuiginge op die Bybel baseer, maar aangesien my godsdiensonderwyser nooit my vrae uit die Bybel kon antwoord nie, het ek my spiritistiese gebruike, astroreise en hipnose voortgesit.”
In 1982 het hierdie vrou met Jehovah se Getuies in aanraking gekom, maar sy sê: “Hulle verduideliking van die Bybel was veels te eenvoudig in vergelyking met die komplekse leerstellings wat ek geleer het. Maar iets het my voortdurend aangespoor om die Bybel op die proef te stel. Ek het dus uit louter egotisme ’n Bybelstudie aanvaar om die Getuies verkeerd te bewys.”
Nadat sy die Bybel omtrent ’n jaar lank saam met Jehovah se Getuies bestudeer het, verduidelik sy: “Nou bedank ek Jehovah van harte dat hy my gehelp het om die waarheid te leer. Eindelik is ek vry van al die valse teorieë en bygelowe. Die waarheid is inderdaad eenvoudig en maklik om in God se Woord, die Bybel, te vind. Oplaas het ek die antwoorde op my vrae gevind; nou weet ek wat die oorsprong van die mens en die doel van die lewe is.”
◻ ’n Sewe-en-twintigjarige Griek wat voorheen met kommunisme gemoeid was, het ook ’n doel in die lewe gevind. Hy het in Duitsland ingenieurswese bestudeer, toe na Griekeland teruggekeer en by die leër aangesluit. Sy ondervindinge het hom geleidelik daarvan oortuig dat die mens nie meer in staat is om sy probleme op te los en sy lewe te verbeter nie. Voordat hierdie man Duitsland toe gegaan het, het ’n buurman wat ’n Getuie is met hom oor die Bybel gepraat, en hy het nou daardie gesprekke onthou. Gevolglik het hy, net ’n paar maande voor sy ontslag uit die leër, vir sy offisier gesê: “Ek beskou myself nie meer as ’n soldaat nie!” Sy gesin het gedink dat hy geestelik versteurd is en het hom gedwing om na psigiaters te gaan. Hulle het hom groot dosisse medisyne gegee wat hom fisies en verstandelik aangetas het sodat hy dit uiteindelik gestaak het.
Twee Getuies het hom in hulle bediening van huis tot huis ontmoet en die Bybel saam met hom begin bestudeer. Nadat hy sy lewe in ooreenstemming met Jehovah se vereistes gebring het, het hy ’n bedrywige verkondiger van die goeie nuus geword. In 1984 het hy die Gedenkmaal bygewoon saam met tien familielede wat hy genooi het.
Ja, hy het ’n doel in die lewe gevind, en hy wil Jehovah nou as ’n spesiale pionier dien. Hy hoop om die ewige lewe in God se Nuwe Orde van geregtigheid te verkry.—Jesaja 65:17, 18.