Hoe party antwoorde gekry het

MILJOENE mense bid. Sommige is daarvan oortuig dat hulle gebede verhoor word. Ander wonder of hulle gebede ooit gehoor word. Dan is daar dié wat antwoorde wil hê, maar nie daaraan dink om hulle versoeke in gebed tot God te rig nie.

Die Bybel identifiseer die ware God as die “Hoorder van die gebed” (Psalm 65:2). Is jy seker wanneer jy bid dat jy jou gebede tot die ware God rig? Is jou gebede die soort wat hy sal verhoor?

Vir baie mense in alle wêrelddele was die antwoord ja! Hoe het hulle antwoorde gekry? Wat het hulle geleer?

God—Wie is hy?

’n Onderwyseres in Portugal wat deur nonne en priesters onderrig is, het haar geloof in opregtheid beoefen. Toe die kerk hulle standpunt verander en party van die gebruike afgeskaf het wat sy geleer het belangrik is, het dit haar verwar. Op reis in die buiteland het sy met Oosterse godsdienste in aanraking gekom en begin wonder of daar net een ware God is. Hoe moet sy aanbid? Toe sy haar priester oor dinge in die Bybel gevra het, is haar vrae as onbelangrik afgemaak, en sy was teleurgesteld.

Die Katolieke kerk het ’n pamflet in hierdie onderwyseres se stad versprei waarin lidmate gewaarsku is om nie met Jehovah se Getuies te praat nie. Maar sy het nog steeds nie antwoorde op haar vrae gehad nie. Toe die Getuies eendag aan haar deur klop, het sy geluister en belangstelling getoon in wat sy gehoor het. Dit was die eerste keer dat sy met hulle gepraat het.

Om antwoorde op haar baie vrae te kry, het hierdie vrou die Bybel saam met die Getuies begin studeer. Elke week het sy ’n lang lys vrae vir hulle gehad. Sy wou weet wat God se naam is, of daar net een ware God is, of hy die gebruik van beelde in aanbidding goedkeur, ensovoorts. Sy was verbaas en verheug om te sien dat al die antwoorde wat sy kry, nie persoonlike menings is nie, maar uit die Bybel kom. Mettertyd is al haar vrae beantwoord. Vandag aanbid sy Jehovah met gees en waarheid, soos Jesus Christus gesê het “ware aanbidders” sou doen.—Johannes 4:23.

In Sri Lanka het ’n gesin die Bybel gereeld saam gelees, maar hulle het nie antwoorde gekry op die talle vrae wat vir hulle belangrik was nie. Hoewel hulle hulp nodig gehad het, kon hulle priester dit nie voorsien nie. Maar Jehovah se Getuies het die gesin besoek en Bybellektuur by hulle gelaat om hulle te help. Later, toe die Getuies die gesin bevredigende antwoorde op hulle Bybelvrae gegee het, het hulle tot ’n Bybelstudie ingestem. Wat hulle uit hulle studie geleer het, was vir hulle baie interessant.

Die leerstellings wat die vrou as kind in die kerk geleer het, het dit egter vir haar moeilik gemaak om te sien dat die Vader van Jesus Christus “die enigste ware God” is, soos Jesus self gesê het (Johannes 17:1, 3). Sy is geleer dat Jesus gelyk is aan die Vader en dat hierdie “verborgenheid” nie bevraagteken mag word nie. Sy was raadop en het opreg tot Jehovah gebid, sy naam gebruik en hom gevra om haar te wys wie Jesus is. Toe het sy die betrokke tekste weer sorgvuldig ondersoek (Johannes 14:28; 17:21; 1 Korintiërs 8:5, 6). Dit was asof skille van haar oë afgeval het, en sy kon toe duidelik sien dat Jehovah—die Skepper van hemel en aarde en die Vader van Jesus Christus—die ware God is.—Jesaja 42:8; Jeremia 10:10-12.

Lyding—Waarom?

Die man Job het verskriklike lyding deurgemaak. Al sy kinders het in ’n storm omgekom, en hy het in armoede verval. Hy het ook aan ’n pynlike siekte gely en druk van valse vriende verduur. Terwyl hy al hierdie dinge deurgemaak het, het hy ’n paar ondeurdagte uitlatings gemaak (Job 6:3). Maar God het die omstandighede in ag geneem (Job 35:15). Hy het geweet wat in Job se hart is en het die raad voorsien wat Job nodig gehad het. Hy doen dit ook vandag vir mense.

Castro, wat in Mosambiek woon, was net tien jaar oud toe sy moeder dood is. Hy was verpletter. “Waarom moes sy sterf en ons agterlaat?” het hy gevra. Hoewel hy deur godvresende ouers grootgemaak is, het niks nou vir hom sin gemaak nie. Wat sou die kwellinge van sy verstand en hart verlig? Hy het vertroosting gevind toe hy ’n klein Chichewa-Bybeltjie gelees en met sy ouer broers daaroor gepraat het.

Castro het geleidelik tot die besef gekom dat sy moeder nie gesterf het omdat God onregverdig is nie, maar weens oorgeërfde onvolmaaktheid (Romeine 5:12; 6:23). Die Bybel se belofte van ’n opstanding het hom die grootste vertroosting gebied, want hy het daarin die versekering gekry dat hy sy moeder weer sal sien (Johannes 5:28, 29; Handelinge 24:15). Ongelukkig het sy vader net vier jaar later gesterf. Maar dié keer kon Castro die verlies beter verwerk. Vandag is hy lief vir Jehovah en gebruik hy sy lewe lojaal in God se diens. Die vreugde wat hy gevind het, is duidelik vir almal wat hom ken.

Baie mense wat geliefdes deur die dood verloor het, vind vertroosting in dieselfde Bybelwaarhede wat Castro vertroos het. Sommige wat baie ontberings verduur het weens die dade van goddelose mense, vra soos Job: “Waarom bly die goddeloses lewe?” (Job 21:7). Wanneer mense werklik luister na wat God in antwoord hierop in sy Woord sê, vind hulle uit dat die manier waarop God sake hanteer, in werklikheid tot hulle eie beswil is.—2 Petrus 3:9.

Barbara, wat in die Verenigde State grootgeword het, het nie self die gruwels van oorlog beleef nie. Maar sy het grootgeword in ’n wêreld waar oorlog iets alledaags is. Die gruweldade van oorloë was elke dag in die nuus. Op skool kon sy nie verstaan waarom gebeure in die geskiedenis ontvou het op maniere wat so onvoorspelbaar gelyk het nie. Wat was die rede hiervoor? Het dit vir God saak gemaak wat gebeur? Sy het geglo dat God bestaan, maar sy was verward.

Barbara se uitkyk op die lewe het egter geleidelik verander nadat sy met Jehovah se Getuies begin assosieer het. Sy het na hulle geluister en die Bybel saam met hulle gestudeer. Sy het vergaderinge by ’n Koninkryksaal bygewoon. Sy het selfs een van hulle groot streekbyeenkomste bygewoon. Wat meer is, wanneer sy vrae gevra het, het sy opgemerk dat sy nie verskillende menings by verskillende Getuies kry nie. Die Getuies het eenstemmig gepraat omdat hulle beskouing op die Bybel gegrond is.

Die Getuies het bewyse uit die Bybel aangehaal wat toon dat die wêreld deur Satan die Duiwel, die heerser daarvan, beïnvloed word en dat dit sy gees weerspieël (Johannes 14:30; 2 Korintiërs 4:4; Efesiërs 2:1-3; 1 Johannes 5:19). Hulle het verduidelik dat gebeure wat Barbara verwar het, in die Bybel voorspel is (Daniël, hoofstukke 2, 7 en 8). God het dit voorspel omdat hy die vermoë het om in die toekoms te sien wanneer hy verkies om dit te doen. Party van daardie gebeure is deur God teweeggebring. Ander het hy bloot toegelaat om te gebeur. Die Getuies het vir Barbara gewys dat die Bybel ook goeie en slegte gebeure vir ons dag voorspel het en dat dit die betekenis daarvan verduidelik (Matteus 24:3-14). Hulle het haar die Bybel se beloftes van ’n nuwe wêreld gewys waarin regverdigheid sal heers en lyding iets van die verlede sal wees.—2 Petrus 3:13; Openbaring 21:3, 4.

Mettertyd het Barbara begin verstaan dat Jehovah God nie verantwoordelik is vir menselyding nie, maar dat hy dit ook nie verhoed deur mense te dwing om sy gebooie te gehoorsaam as hulle dit nie wil doen nie (Deuteronomium 30:19, 20). God het voorsienings gemaak waardeur ons vir ewig in geluk kan lewe, maar hy gee ons nou die geleentheid om te toon of ons in ooreenstemming met sy regverdige weë sal lewe (Openbaring 14:6, 7). Barbara het haar voorgeneem om te leer wat God se vereistes is en om daarvolgens te lewe. Sy het ook onder Jehovah se Getuies die soort liefde gevind wat Jesus gesê het sy ware volgelinge sal identifiseer.—Johannes 13:34, 35.

Jy kan ook baat vind by die voorsienings wat haar gehelp het.

’n Betekenisvolle lewe

Selfs diegene wat skynbaar ’n suksesvolle lewe lei, soek dalk antwoorde op vrae wat hulle verwar. Byvoorbeeld, Matthew, ’n jong man in Brittanje, het nog altyd ’n diep begeerte gekoester om die ware God en die doel van die lewe te vind. Toe Matthew 17 jaar oud was, is sy vader oorlede. Later het Matthew ’n universiteitsgraad in musiek ontvang. Hy het al hoe meer bewus geword van hoe vergeefs sy materialistiese lewenswyse is. Hy het die huis verlaat om in Londen te gaan woon, en daar het hy betrokke geraak by dwelms, nagklubs, astrologie, spiritisme en Zen-Boeddhisme, asook ander filosofieë—alles in sy soeke na ’n bevredigende lewenswyse. Uit wanhoop het hy God gesmeek om hom te help om die waarheid te vind.

Twee dae later het Matthew ’n ou vriend raakgeloop en hom van sy probleem vertel. Hierdie man het met Jehovah se Getuies gestudeer. Toe 2 Timoteus 3:1-5 vir Matthew gewys is, was hy verbaas om te sien hoe akkuraat die Bybel die wêreld om ons beskryf. Toe hy die Bergpredikasie gelees het, het dit sy hart geraak (Matteus hoofstukke 5-7). Hoewel hy aanvanklik huiwerig was weens kritiek wat hy oor Jehovah se Getuies gelees het, het hy uiteindelik besluit om vergaderinge by ’n Koninkryksaal in die omgewing by te woon.

Matthew het gehou van wat hy gehoor het en het die Bybel saam met een van die gemeentelike ouer manne begin studeer. Hy het spoedig besef dat die dinge wat hy leer, juis dít is waarna hy gesoek het, die antwoord op sy gebed. Hy het gebruike wat Jehovah mishaag, die rug toegekeer en die voordele daarvan ondervind. Namate hy ’n heilsame vrees vir God ontwikkel het, het dit hom beweeg om sy lewe in ooreenstemming met God se gebooie te bring. Matthew het geleer dat so ’n lewe waarlik betekenisvol is.—Prediker 12:13.

Dit was nie voorbestem dat Matthew of ander wat in hierdie artikel genoem is, ’n bevredigende lewe sou vind nie. Nogtans het hulle geleer dat Jehovah God ’n liefdevolle voorneme het vir almal wat graag sy gebooie wil gehoorsaam (Handelinge 10:34, 35). Daardie voorneme sluit die ewige lewe in, in ’n wêreld waar daar geen oorlog, siekte en honger sal wees nie—waar selfs die dood nie sal wees nie (Jesaja 2:4; 25:6-8; 33:24; Johannes 3:16). Is dit wat jy graag wil hê? Indien wel, kan jy meer leer oor hoe om die sleutel tot ’n bevredigende lewe te vind deur die Bybelvergaderinge by ’n Koninkryksaal van Jehovah se Getuies by te woon. Jy word hartlik uitgenooi om dit te doen.

[Prent op bladsy 7]

Bid ernstig tot God en gebruik sy persoonlike naam

[Prent op bladsy 7]

Studeer die Bybel saam met diegene wat waarlik vir ander die waarhede daarin leer

[Prente op bladsy 7]

Woon vergaderinge by die Koninkryksaal by

[Foto-erkenning op bladsy 4]

Voetslaner: Chad Ehlers/Index Stock Photography