Vrede en veiligheid​—deur God se Koninkryk

“DIE oogmerke van die Verenigde Volke is: 1. Om internasionale vrede en veiligheid te handhaaf.”​—Handves van die Verenigde Volke.

Dit is ’n prysenswaardige ideaal, om die minste te sê. Maar soos ons reeds gesien het, toon die resultate van die afgelope 40 jaar duidelik dat die Verenigde Volke nie daarin geslaag het om ‘internasionale vrede en veiligheid te handhaaf’ nie. Die feit dat dit 1986 die “Internasionale Vredesjaar” verklaar het, sal ook geen verskil maak nie.a

Daar is slegs een manier waarop duursame vrede en veiligheid na die aarde gebring sal word​—deur God se Koninkryk in die hande van Jesus Christus. Dit is die ware hemelse regering waarvoor Jesus sy volgelinge leer bid het (Mattheüs 6:9, 10). Maar waarom sal dit slaag wanneer die Verenigde Volke gefaal het? Om dit eenvoudig te stel: God se Koninkryk sal slaag om die einste redes waarom die Verenigde Volke nie geslaag het nie.

Meer as menslike wysheid is nodig

In ons vorige nommer het ons een rede getoon waarom die Verenigde Volke tot mislukking gedoem was, en dit is omdat God die mens nie die wysheid of reg gegee het om homself te regeer nie (Jeremia 10:23). Geen mensgemaakte organisasie, hoe welmenend ook al, kan dus daarin slaag om vrede en veiligheid te bring nie.

In teenstelling hiermee het Jesus Christus, die aangestelde Koning van God se Koninkryk, altyd bomenslike wysheid geopenbaar (Mattheüs 13:54). ’n Treffende voorbeeld is sy beroemde Bergpredikasie (Mattheüs, hoofstuk 5 tot 7). Daarin het hy verduidelik hoe om ware geluk te vind, geskille te besleg, geslagsonsedelikheid te vermy en ’n veilige toekoms te vind. Is dit nie redelik dat ’n heerser met sulke wysheid en begrip van die mensenatuur sou weet hoe om vrede en veiligheid te bring nie?

Jesus se skerpsinnigheid is daarbenewens verder versterk deur sy wonderdadige vermoë om mense se harte te lees en te weet wat hulle ware beweegrede en innerlike redenering is (Mattheüs 9:4; Markus 2:8). Dink aan wat dit beteken: Een groot hindernis vir vrede en veiligheid vandag is wantroue. Omdat die een nie weet wat die ander een dink en wat sy beweegrede is nie, raak mense en nasies dikwels wantrouig. Hierdie wantroue is ’n hindernis in die weg van vrede. Maar vir die heerser wat “mense se harte lees”, is dit geen probleem nie.​—Johannes 2:25, Knox.

Bomenslike vyande word uit die weg geruim

Nog ’n vername rede waarom die Verenigde Volke se pogings om vrede te bring tot mislukking gedoem was, is die invloed van “die owerste van hierdie wêreld”, Satan die Duiwel (Johannes 12:31). Hy en sy demonhorde weet dat hulle “min tyd” oor het voordat hulle uit die weg geruim word. Omdat hulle vasbeslote is om ‘wee vir die bewoners van die aarde’ te veroorsaak, het hulle vrede in die wiele gery deur die mensdom op politieke en nasionale gebied te verdeel.​—Openbaring 12:9-12.

Wie kan sulke bomenslike aanstigters van oorlog uit die weg ruim? Die Bybel sê: Jesus Christus, die een wat Migael genoem word, wat saam met sy engele vir Satan en sy demone uit die hemele gewerp het. Ons lees dus: “Ek het ’n engel [Jesus] uit die hemel sien neerdaal, met die sleutel van die afgrond en ’n groot ketting in sy hand. En hy het die draak gegryp​—die ou slang wat die duiwel en die Satan is—​en hy het hom . . . in die afgrond gewerp en hom toegesluit en dit bo hom verseël (Openbaring 20:1-3). Satan sal dus verwyder word. Slegs dan sal dit moontlik wees om die lewe in ware vrede en veiligheid te geniet.

’n “Kind” van God

Ons vorige nommer het ’n derde rede aangevoer waarom die Verenigde Volke nooit vrede en veiligheid kan bring nie: Dit is ’n kind van hierdie wêreld en het as sodanig die swakhede, euwels en verdorwenheid wat sy ledenasies kenmerk, geërf.

In verfrissende teenstelling word die Koninkryk wat vrede en veiligheid sal bring in Openbaring 12:5 as ’n “kind” van God voorgestel. Sy heerser weerspieël God se hoedanighede. Let op sommige van die innemende eienskappe wat geopenbaar word deur sy heerser, Jesus Christus: selfopofferende liefde (Johannes 15:12, 13); hartlikheid en gevoel (Mattheüs 9:10-13; Lukas 7:36-48); nederigheid (Johannes 13:3-5, 12-17); medelye (Markus 6:30-34); simpatie (Hebreërs 2:17, 18; 4:15); standvastig vir geregtigheid (Jesaja 11:4, 5). Sou jy jou nie graag aan so ’n heerser wou onderwerp nie?

Die “nuwe aarde”

’n Laaste rede waarom die Verenigde Volke nooit daarin kan slaag om vrede te bring nie, is aangedui deur die woorde van voormalige sekretaris-generaal Dag Hammarskjöld wat in 1953 gesê het: “Ons grootste hoop is dat ons die ou aarde mag red.” As hy in gedagte gehad het om hierdie wêreldwye stelsel te red, dan is sulke pogings om die “ou aarde” te red tot mislukking gedoem. Waarom?

Eerstens, hierdie “ou aarde” bestaan uit mensgemaakte regerings. Individuele regerings bevorder nasionalisme wat die mens verdeel; nasionalisme benadruk die belange van een nasie eerder as om die welsyn van alle nasies na te streef. Hierdie eiebelang ondermyn enige pogings van die Verenigde Volke om vrede te bring. ’n Hoofartikel in die Britse koerant The Guardian het gesê: “Die vooruitsigte op hervorming is baie gering, aangesien nie een van die ledenasies bereid is om sy eie belange ter wille van die gesamentlike welsyn op te offer nie. Die enigste ware funksie van die [Verenigde Volke se Algemene] Vergadering is om as ’n soort barometer van wêreldwye mening te dien. Sy agenda is vol geskille wat jare lank gedebatteer is met min indien enige vooruitgang tot ’n oplossing.”

Maar daar is ’n dwingender rede waarom die Verenigde Volke se pogings om die “ou aarde” te red vergeefs is: Dit is in stryd met God se voornemens. Hoe so? In God se oë kan die “ou aarde” nie hervorm word nie. Die tyd kom nader wanneer God se verklaarde voorneme vervul sal word. Die apostel Johannes het dit soos volg beskryf: “Ek het ’n nuwe hemel en ’n nuwe aarde gesien, want die eerste hemel en die eerste aarde het verbygegaan” (Openbaring 21:1). Deur mensgemaakte regerings uit die weg te ruim, sal God se Koninkryk verdelende nasionalisme wegdoen. In die plek daarvan sal “’n nuwe aarde”, ’n regverdige mensegemeenskap, onder een hemelse regering, God se Koninkryk, floreer. Dan, en slegs dan, sal die mensdom ware vrede en veiligheid wêreldwyd kan geniet.

‘Smee pikke van swaarde’

Die woorde van ’n Bybelprofesie wat op ’n muur oorkant die Verenigde Volke-gebou gegraveer is, verseker ons dat dit ’n realistiese hoop is. Dit lui: “Hulle sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie.”​—Aangehaal uit Jesaja 2:4.

Nee, die Verenigde Volke kon nie die nasies keer om ‘die swaard op te hef teen mekaar nie. Daar is nietemin ’n volk wat lewende bewys lewer dat hulle ‘van hul swaarde pikke gesmee het’. Hulle openbaar ’n eenheid wat uitstyg bo rasse- en nasionale grense. Geen druk, hoe groot ook al, kan hierdie neutrale Christene dwing om ‘die swaard op te hef teen hulle medemens nie. Wie is hulle? Jehovah se Getuies.

Die ondervinding van een Getuie in ’n Afrikaland waar politieke terrorisme hoogty vier, is tipies van hulle reaksie wanneer hulle aan druk onderwerp word om aan die oorloë van die nasies deel te neem.

Om rekrute vir hulle guerrillaleër te kry, ontvoer ’n terroristegroep in hierdie land manne en gee hulle dan ’n keuse: Dien in die terroristeleër of word geskiet. Eendag het hulle een van Jehovah se Getuies ontvoer. Die leiers, wat besig was om te drink, het hom die keuse gegee. Hulle het twee bierbottels voor hom gesit, na die een gewys en gesê dat dit die regering voorstel en die ander een hulle terroristegroep. ‘Aan wie se kant is jy?’ het hulle hom gevra. Die Getuie het ’n oomblik gedink. Toe het hy ander bierbottels daar naby gesien, een opgetel en dit tussen die twee gesit en gesê: ‘Dit is waar ek is.’ Hy het bygevoeg: ‘Ek is neutraal, aangesien ek aan die kant van God se Koninkryk is.’ Hierna is hy etlike kere geslaan. Toe is hy gedwing om slawearbeid in die guerrillakamp te verrig, terwyl hy nooit geweet het of hulle hom gaan skiet nie. Agt maande later het hy ontsnap toe regeringsmagte die kamp aangeval het.

Jehovah se Getuies trotseer gevangenskap, selfs die dood, eerder as om aan die oorloë van die nasies deel te neem. Duisende van hulle is gevolglik in Nazi-Duitsland in konsentrasiekampe gesit omdat hulle nie die Nazi-skrikbewind wou ondersteun nie. Honderde Getuies is in die kampe tereggestel of dood. En tog is daar nou baie van Jehovah se Getuies in Duitsland en rondom die aarde, terwyl die wrede Nazi-regering lankal nie meer bestaan nie.

Maar waarom kan hulle ‘van hulle swaarde pikke smee’? Die inleiding van UNESCO se Handves gee ons ’n leidraad waar dit sê: “Aangesien oorloë in die gedagtes van mense ontstaan, is dit in die gedagtes van mense dat die vredesverdedigingsmiddele opgerig moet word.”

In ooreenstemming hiermee sê Jesaja se profesie oor diegene wat ‘van hulle swaarde pikke smee’: “Hulle sal nie meer leer om oorlog te voer nie.” Deur die Skrif te bestudeer en toe te pas, leer hulle eerder ‘God se weë en wandel hulle in sy paaie’ (Jesaja 2:3, 4). Met behulp van sy heilige gees ‘vernuwe hulle hulle denke’ en word hulle vredeliewend.​—Romeine 12:2, 18, NAV.

Die duidelike bewys dat Jehovah se Getuies ‘van hulle swaarde pikke gesmee het’, bewys dat dit moontlik is om in vrede en veiligheid te lewe. Hulle huidige lewenswyse demonstreer op ’n klein skaal wat God se Koninkryk deur Christus in die nabye toekoms aardwyd gaan doen.

Vind so ’n vooruitsig by jou byval? Jehovah se Getuies sal graag die bewys dat God se Koninkryk binnekort blywende vrede en veiligheid sal bring met jou deel. Tree gerus plaaslik met hulle in verbinding of skryf aan die uitgewers van hierdie tydskrif. Leer meer oor hoe jy nou ‘van swaarde pikke kan smee’, met die vooruitsig om binnekort die lewe in ’n wêreld sonder oorlog te geniet.

[Voetnote]

[Venster op bladsy 5]

Waarom die Verenigde Volke gefaal het:

◻ Menslike wysheid te beperk (Jeremia 10:23)

◻ Pogings tot mislukking gedoem weens Satan se invloed (Openbaring 12:12)

◻ Dit is ’n kind van hierdie wêreld en erf sy swakhede (1 Johannes 5:19)

◻ Dit probeer die “ou aarde” red, en dit is strydig met God se voornemens (1 Johannes 2:17)

Waarom God se Koninkryk suksesvol sal wees:

◻ Die heerser daarvan het bomenslike wysheid en kan mense se harte lees (Johannes 2:25)

◻ Dit sal die demoniese aanstigters van oorlog uit die weg ruim (Openbaring 20:1-3)

◻ Dit is ’n “kind” van God, en die heerser daarvan weerspieël God se eienskappe (Openbaring 12:5)

◻ Dit sal ’n regverdige “nuwe aarde” tot stand bring onder ’n enkele hemelse regering (Openbaring 21:1)

[Prent op bladsy 7]

God se Koninkryk sal “’n nuwe aarde”, ’n regverdige mensegemeenskap, tot stand bring wat onder een hemelse regering sal floreer