Koninkryksverkondigers berig
Teokratiese uitbreiding in Venezuela
DAE lank was daar ’n buitengewoon drukkende hitte. Verbygangers was verbaas om die arbeiders onder die skroeiende son te sien werk terwyl al die ander eerder in die skadu of in ’n vertrek met lugversorging ontspan het. Geleidelik het die raamwerk van ’n nuwe gebou begin vorm aanneem. In drie en ’n half maande het die werkers ’n vierverdiepinggebou voltooi—die nuwe aanbousel by die Wagtoringgenootskap se takgebou in La Victoria, Venezuela.
Dit was in werklikheid die tweede keer dat die tak in Venezuela vergroot is sedert die ingebruikneming daarvan in 1946, toe daar net 13 Koninkryksverkondigers in die land was. Teen 1977 het hulle getal tot meer as 13 000 aangegroei. ’n Nuwe takgebou in La Victoria is derhalwe in dieselfde jaar voltooi en toegewy. Sedertdien het die aantal Getuies in die land meer as verdubbel. Dit was weer eens tyd om uit te brei.
Die nuwe aanbousel (regs agter op die foto), met ’n vloerruimte van meer as 1 900 vierkante meter, het die totale kapasiteit van die tak meer as verdubbel. Die oprit heel regs lei na die motorhuis in die kelder waar 15 motors kan parkeer. Die drukkery is verskuif van die 1977-gebou (die lang gebou in die middel) na die grondverdieping van die aanbousel, waar die onderhoudswerkwinkel, die houtwerkafdeling en party kantore ook geleë is. Die res van die nuwe gebou word as woonkwartier vir die Bethelgesin gebruik.
Die nuwe gebou is toegerus met sy eie wateropgaartenk en noodkragopwekker, omdat watertekorte en kragonderbrekings dikwels in hierdie deel van die wêreld voorkom. En om die standhoudende sonskyn en wind ten beste te benut, is die wassery bo in die gebou.
Wat dink die plaaslike inwoners van die nuwe gebou? Hoewel sommige dit betreur dat die pragtige tuin wat eens daar was, verdwyn het, meen talle dat die gebou ’n aanwins vir die buurt is. ’n Welbekende argitek, wat so baie van die bouery gehoor het dat hy self kom kyk het, het vir die broers gesê: “Dit is beslis die beste konstruksie in La Victoria.” Die munisipale ingenieur, wat nie gehuiwer het om die bewoningspermit uit te reik nie, was net so beïndruk en het gesê: “Dit is ’n eer om die permit uit te reik om ’n gebou soos hierdie te bewoon.”
Die Getuies in Venezuela het hulle verheug toe 15 802 van hulle op 21 April 1985 naby Valencia kon vergader vir die toewyding, met 38 059 wat in vyf ander stede byeengekom het om deur middel van telefoonverbindings na die program te luister. Daardie bywoning het die totale aantal verkondigers in die land ver oortref. Hulle waardeer en is bly oor hierdie goddelike voorsiening om hulle beter toe te rus om die goeie nuus van die Koninkryk deeglik te verkondig voor die einde van hierdie stelsel kom.—Mattheüs 24:14.