Apokalips​—Wat is dit?

“DIE Apokalips!” Waaraan dink jy wanneer jy daardie uitdrukking hoor? Is dit die oordeelsdag? ’n Kernslagting? Die Derde Wêreldoorlog? Die einde van die wêreld? As hierdie beelde opdoem, is jy nie alleen nie. Die wetenskap en die nuusmedia skilder ’n donker prentjie van die mens se toekoms. Is dit dan ’n wonder dat talle die apokalips met die uitwissing van die mensdom deur die een of ander katastrofe verbind?

“Apokalips is vandag nie bloot ’n Bybelse beskrywing nie, maar het ’n baie wesenlike moontlikheid geword”, het die sekretaris-generaal van die VV, Javier Pérez de Cuéllar, in sy intreerede gewaarsku. “Nooit tevore in die mens se ervaring is ons op die smal randjie tussen rampspoed en oorlewing geplaas nie.” Waarvan het hy gepraat? Van kernkonfrontasie as gevolg van ’n verskerping van die huidige wapenwedloop. Hy het krag verleen aan sy waarskuwing tot die Verenigde Volke deur te sê dat “nagenoeg 500 000 wetenskaplikes oor die hele wêreld hulle kennis wy aan die ontwikkeling van meer gesofistikeerde en dodeliker wapentuig”.

Ander is ook bewus van die huidige toedrag van sake. Hans Jonas, afgetrede professor in filosofie aan die Nuwe Skool vir Maatskaplike Navorsing, sê dat sy grootste vrees ’n “dreigende apokalips [is] as gevolg van die aard van die onbedoelde dinamika van die tegniese beskawing”. Hy verbind die apokalips met ‘uitputting, besoedeling, verwoesting van die planeet, sowel as die bedreiging van skielike vernietiging deur die atoombom’.

Die geskiedskrywer Golo Mann het insgelyks gesê: “Ons kan nie nog ’n wêreldoorlog hê nie. Oorlog is die verkeerde woord. Ons moet die uitdrukking ‘Derde Wêreldoorlog’ verbied en eerder apokalips of slagting sê.”​—Die Zeit van Hamburg, 30 Augustus 1985.

Ja, die mens besef dat hy op die randjie van selfvernietiging is. Maar sal hy die apokalips aan die gang sit? Nie volgens die Bybel nie, want dit sê dat “Jehovah God, die Almagtige”​—nie die mens nie—​‘die verderwers van die aarde sal verderf’(Openbaring 11:17, 18, vgl. NW), ’n Begrip van wat die apokalips uit die Bybel se standpunt is, kan jou dus ’n ander uitkyk gee, ’n splinternuwe en rooskleuriger uitkyk.

Wat dit werklik is

Die apokalips word in ’n brief aan die Thessalonicense beskryf. Daar sê die apostel Paulus: “Dit [is] reg . . . by God om aan die wat julle verdruk, verdrukking te vergelde, en aan julle wat verdruk word, verligting te gee saam met ons in die openbaring [of, apokalips] van die Here Jesus uit die hemel met sy magtige engele in vuur en vlam, wanneer Hy wraak uitoefen op die wat God nie ken nie en op die wat aan die evangelie van onse Here Jesus nie gehoorsaam is nie. Hulle sal as straf ondergaan ’n ewige verderf.”​—2 Thessalonicense 1:6-10.

Die apokalips is derhalwe die openbaring van Jesus gedurende ’n tydperk van “groot verdrukking” (Mattheüs 24:21). Volgens W. E. Vine se An Expository Dictionary of New Testament Words, het die Griekse woord a·po·kaʹly·psis betrekking op “die Here Jesus Christus wanneer Hy kom om die oordele van God te voltrek”. Elders noem die Bybel hierdie openbaring, of apokalips, “die oorlog van daardie groot dag van die almagtige God” by Armageddon.​—Openbaring 16:14, 16; 19:11-21.a

Ons het wel gesien dat die Bybel van “verdrukking”, “wraak” en “straf” melding maak waar dit van die apokalips praat. Nietemin praat dit ook van “verligting” vir die onskuldiges wat verdrukking gely het. God se Woord beloof: “Nog ’n klein rukkie en die goddelose sal daar nie wees nie” (Psalm 37:10). Die apokalips sal die mensdom dus van alle bose invloede verlos. Dit sal ’n keerpunt wees tot beter toestande vir opregtes van hart​—nie ’n gebeurtenis wat hulle hoef te vrees nie.

In plaas van die algehele vernietiging van almal, of totale uitwissing, sal die apokalips dus die regverdige oplossing vir die mensdom se probleme wees. Is die vooruitsig om in ’n nuwe era te lewe​—’n era van geregtigheid, vrede en gerief—​nie vir jou en jou gesin aanloklik nie?

Maar nader ons die Bybelse apokalips? Indien wel, kan ons bepaal wanneer dit presies gaan kom?

[Voetnote]