“Die geopenbaarde dinge is vir ons”
“Die verborge dinge is vir die HERE onse God; maar die geopenbaarde dinge is vir ons.”—DEUTERONOMIUM 29:29.
1, 2. (a) Waarom het die mensdom Jehovah se openbaringe broodnodig? (b) Watter soort gesindheid moet ons hê teenoor inligting wat Jehovah vir ons beskikbaar gestel het?
GESTEL ’n persoon bevind homself in ’n mynveld maar hy het ’n kaart wat ’n paadjie tussen die landmyne deur toon. Kan jy jou voorstel hoe noukeurig hy daardie kaart sou bestudeer en al die aanwysings daarop sou volg? Of dink aan iemand wat aan ’n ongeneeslike siekte ly. Kan jy jou voorstel met watter lewendige belangstelling hy al die jongste mediese ontdekkings sou dophou wat hoop op ’n moontlike genesing bied? Wel, die droewige feit is dat ons in albei situasies verkeer. Ons lewe in ’n wêreld wat besaai is met valstrikke en slaggate wat ons kan vernietig. En ons sterf aan die menslik ongeneeslike siekte, naamlik oorgeërfde onvolmaaktheid. (1 Johannes 2:15-17; Romeine 7:20, 24). Slegs God kan ons help om die valstrikke te identifiseer en te vermy, en hy alleen het die genesing vir ons onvolmaaktheid. Dit is waarom ons Jehovah se openbaringe nodig het.
2 Dit is ook waarom die geïnspireerde skrywer van die boek Spreuke gemaan het: “Gee gehoor en luister na die woorde van die wyse manne, en let op my kennis” (Spreuke 22:17). Ons lees eweneens in Spreuke 18:15: “Die hart van die verstandige verwerf kennis, en die oor van wyse soek na kennis.” Ons kan nie bekostig om enige kennis wat Jehovah beskikbaar stel die rug toe te keer nie.
Jehovah se geopenbaarde geheime
3. Watter openbaringe aangaande sy voorneme het Jehovah vir Adam en Eva gegee?
3 Gelukkig was Jehovah baie rojaal in die openbaring van kennis. Sedert die skepping het God geleidelik aan sy aanbidders al die inligting gegee wat hulle onder verskillende omstandighede nodig sou hê (Spreuke 11:9; Prediker 7:12). Hy het aan die begin verduidelik dat die aarde en sy dierebewoners aan Adam en Eva en hulle nakomelinge onderworpe sou wees (Genesis 1:28, 29). Maar Satan het Adam en Eva beïnvloed om te sondig, en dit was moeilik om te sien hoe die goddelike voorneme tot God se heerlikheid volbring kon word. Jehovah het sake egter gou begin opklaar. Hy het geopenbaar dat daar mettertyd ’n regverdige nakomeling, of “saad”, sou verskyn wat die werke van Satan en sy volgelinge sou verydel.—Genesis 3:15.
4, 5. Watter ander openbaringe het Jehovah gegee, en wie het hy as kanale gebruik?
4 Godvresende manne en vroue moes talle vrae oor daardie Saad gehad het. Wie sou hy wees? Wanneer sou hy kom? Hoe sou hy die mensdom tot voordeel strek? Met die verloop van eeue het Jehovah verdere openbaringe oor sy voornemens gegee, en uiteindelik het hy al daardie vrae beantwoord. Voor die Vloed het hy Henog geïnspireer om die komende vernietiging van Satan se saad te voorspel (Judas 14, 15). Sowat 2 400 jaar voor ons Gewone Jaartelling het hy die openbaring dat menselewe en -bloed heilig is aan Noag toevertrou—’n waarheid wat van groot belang sou wees wanneer die beloofde Saad verskyn.—Genesis 9:1-7.
5 Na Noag se dag het Jehovah lewensbelangrike kennis deur middel van ander getroue aartsvaders geopenbaar. In die 20ste eeu v.G.J. het Abraham geleer dat die beloofde Saad een van sy nakomelinge sou wees (Genesis 22:15-18). Hierdie belofte het die kosbare besitting geword van Abraham se seun Isak en kleinseun Jakob (wat later Israel genoem is) (Genesis 26:3-5; 28:13-15). Toe het Jehovah deur Jakob geopenbaar dat hierdie Saad, “Silo”, ’n kragtige heerser uit die stam van sy seun, Juda, sou wees.—Genesis 49:8-10.
6. Wie het in die 16de eeu v.G.J. die kanaal vir “die geopenbaarde dinge” geword, en wat is party van die nuwe dinge wat hulle geleer het?
6 In die 16de eeu v.G.J. het Jehovah die kinders van Israel tot ’n nasie gevorm. Aan wie het die volgehoue openbaring van die waarheid toe behoort? Moses het die vraag met hierdie woorde aan daardie jong nasie beantwoord: “Die verborge dinge is vir die HERE onse God; maar die geopenbaarde dinge is vir ons en ons kinders tot in ewigheid” (Deuteronomium 29:29). Ja, na sy ontstaan in 1513 v.G.J. het die nasie Israel die kanaal geword aan wie “die woorde van God toevertrou is” (Romeine 3:2). En wat ’n vloed van woorde tog! God het die Wetsverbond met die Israeliete gesluit, wat die moontlikheid ingehou het dat hulle ’n nasie van priesters en konings kon word (Exodus 19:5, 6). Die Wet het ’n gedragskode bevat wat hulle gehelp het om die valstrikke van sonde te identifiseer en te vermy. Dit het ook ’n stelsel van offerandes behels wat die heilige bloed van diere gebruik het om hulle sondes op ’n simboliese manier te dek.
7, 8. (a) Watter bykomende inligting het Jehovah omtrent die komende Saad geopenbaar? (b) Hoe is “die geopenbaarde dinge” bewaar, en wie het die regte begrip van sulke dinge geopenbaar?
7 Met verloop van tyd het Jehovah verdere openbaringe oor die Saad gegee. Deur die psalmis het God geopenbaar dat die nasies sy Saad sou verwerp, maar dat die Saad met Jehovah se hulp sou seëvier (Psalm 2:1-12). Deur Jesaja het hy geopenbaar dat die Saad die “Vredevors” sou wees, maar ook dat hy vir die sondes van ander sou ly (Jesaja 9:5; 53:3-12). In die agtste eeu v.G.J. het Jehovah selfs die Saad se geboorteplek geopenbaar en, in die sesde eeu v.G.J., die tydrooster vir sy bediening.—Miga 5:1; Daniël 9:24-27.
8 “Die geopenbaarde dinge” is uiteindelik in die 39 boeke van die Hebreeuse Skrifte saamgestel. Maar in baie gevalle was dit slegs die eerste stap. Die geskrewe dinge was dikwels selfs vir diegene wat gebruik is om dit te skryf moeilik verstaanbaar! (Daniël 12:4, 8; 1 Petrus 1:10-12). Maar toe begrip uiteindelik gekom het, het dit nie van ’n menslike uitlêer afgehang nie. Soos in die geval van profetiese drome, ‘is uitlegging ’n saak van God’.—Genesis 40:8.
’n Nuwe kanaal
9. Waarom het natuurlike Israel die voorreg as kanaal vir “die geopenbaarde dinge” verloor, en wanneer het dit gebeur?
9 Toe Jesus Christus op die aarde was, was Israel steeds God se kanaal. Enigiemand wat Jehovah wou dien, moes dit saam met sy uitverkore nasie doen (Johannes 4:22). Maar Moses het getoon dat die voorreg om rentmeesters van “die geopenbaarde dinge” te wees ook verantwoordelikhede meegebring het. Hy het gesê: “Die geopenbaarde dinge is vir ons en ons kinders tot [onbepaalde tyd], om te doen al die woorde van hierdie wet” (Deuteronomium 29:29, vgl. NW). Daardie “onbepaalde tyd” het in 33 G.J. verstryk. Waarom? Omdat die Jode, as ’n nasie, versuim het om ‘al die woorde van die wet te doen’. Hulle het in die besonder versuim om die Saad, Jesus Christus, te verwelkom, hoewel die Wet in werklikheid ’n “tugmeester na Christus toe” was (Galasiërs 3:24). As gevolg van hierdie versuim het Jehovah ’n ander kanaal vir “die geopenbaarde dinge” gekies.
10. Wat was die nuwe kanaal vir Jehovah se openbaringe?
10 Wat was hierdie nuwe kanaal? Paulus het dit aan die Efesiërs geïdentifiseer toe hy geskryf het dat “deur die gemeente . . . die menigvuldige wysheid van God bekend gemaak kan word, volgens die ewige voorneme wat Hy opgevat het in Christus Jesus, onse Here” (Efesiërs 3:10, 11). Ja, dit was die Christengemeente, wat op Pinkster 33 G.J. tot stand gekom het, aan wie die nuwe “geopenbaarde dinge” toevertrou is. As ’n groep het gesalfde Christene as “die getroue en verstandige dienskneg” gedien wat aangestel is om geestelike voedsel op tyd te voorsien (Mattheüs 24:45). Christene was nou “[rentmeesters] van die verborgenhede van God”.—1 Korinthiërs 4:1, vgl. NW.
11, 12. Wat is party van die wonderlike openbaringe wat deur hierdie nuwe kanaal gegee is?
11 Die kerngedagte van hierdie nuwe “verborgenhede” was dat Jesus Christus, die beloofde Saad, verskyn het (Galasiërs 3:16). Jesus was “Silo”, die een wat die reg het om oor die mensdom te heers, en Jehovah het hom aangestel as Koning van die Koninkryk wat uiteindelik die Paradys op die aarde sal herstel (Jesaja 11:1-9; Lukas 1:31-33). Jesus was ook Jehovah se aangestelde Hoëpriester, wat sy vlekkelose, volmaakte lewe as ’n losprys vir die mensdom gegee het—’n allerwonderlikste toepassing van die beginsel van die heiligheid van bloed (Hebreërs 7:26; 9:26). Van toe af het gelowige mense die hoop gehad om daardie volmaakte menselewe wat Adam verloor het te herwin.—1 Johannes 2:1, 2.
12 Hierdie beloofde Saad was ook ’n middelaar wat ’n nuwe verbond, wat die ou Wetsverbond vervang het, tussen sy volgelinge en sy hemelse Vader bemiddel het (Hebreërs 8:10-13; 9:15). Op grond van hierdie nuwe verbond het die jong Christengemeente die vleeslike nasie Israel vervang en ’n geestelike Israel, saam met Jesus ’n geestelike “nageslag van Abraham”, asook rentmeesters van “die geopenbaarde dinge” geword (Galasiërs 3:29; 6:16; 1 Petrus 2:9). Daarbenewens is nie-Jode genooi om ’n deel te word van daardie nuwe geestelike Israel—iets ondenkbaars vir Jode! (Romeine 2:28, 29). Joodse en nie-Joodse geestelike Israeliete is almal aangesê om dissipels van Jesus dwarsoor die aarde te maak (Mattheüs 28:19). So het “die geopenbaarde dinge” ’n internasionale aspek aangeneem.
13. Hoe is hierdie nuwe “geopenbaarde dinge” vir toekomstige geslagte bewaar?
13 Mettertyd is hierdie dinge wat deur die Christengemeente geopenbaar is, neergeskryf in die 27 boeke van die Christelike Griekse Skrifte wat die kanon van die geïnspireerde Bybel voltooi het. Maar hierdie boeke het weer eens talle profesieë aangaande Jehovah se voorneme bevat wat eers baie eeue later ten volle verstaan sou word. Weer het die skrywers van die Skrif nog ongebore geslagte as ’t ware gedien.
“Die geopenbaarde dinge” vandag
14. Wanneer sou Jehovah, ná die groot afval, weer lig op “die geopenbaarde dinge” werp?
14 Ná die dood van die apostels het die groot afval onder voorgewende Christene ontstaan, soos voorspel is (Mattheüs 13:36-42; Handelinge 20:29, 30). In die daaropvolgende eeue het die begrip van “die geopenbaarde dinge” vervaag, hoewel Jesus nie diegene verlaat het wat getrou probeer bly het nie (Mattheüs 28:20). Jesus het egter belowe dat hierdie situasie nie vir altyd sou voortduur nie. Aan die voleinding van die stelsel sou die onderskeid tussen die goddeloses en die regverdiges weer duidelik wees, en ‘die regverdiges sou skyn soos die son in die koninkryk van hulle Vader’ (Mattheüs 13:43). Net soos Daniël voorspel het, sou ‘die kennis in die tyd van die einde vermeerder’ (Daniël 12:4). Lig sou weer op “die geopenbaarde dinge” gewerp word.
15. Waarom was die godsdienste van die Christendom onwaardig om as die kanaal vir die jongste begrip van “die geopenbaarde dinge” te dien?
15 Sedert 1914 lewe ons in die tyd van die voleinding van hierdie stelsel. Dit is gevolglik belangrik om te weet wie Jehovah vandag as ’n kanaal vir hierdie nuwe geestelike lig gebruik. Hy gebruik gewis nie die gevestigde godsdienste van die Christendom nie. Hulle was teensinnig om die verkeerde leringe wat gedurende die groot afval aanvaar is af te werp. Die meeste van hulle leiers is vandag òf so verstrengel in tradisies en geloofsbelydenisse dat hulle nie ontvanklik is vir nuwe kennis nie, òf hulle is so beïnvloed deur skeptisisme dat hulle selfs die inspirasie van die Bybel en die egtheid van sy sedelike standaarde in twyfel trek.
16. Wie is Jehovah se hedendaagse kanaal?
16 Jesus het gesê dat die Koninkryk van God van die Jode weggeneem en “aan ’n volk gegee [sou] word wat die vrugte daarvan sal dra” (Mattheüs 21:43). In die eerste eeu was dit die jong Christengemeente van geestelike Israel. Vandag is daar slegs een groep wat enigsins vrugte soos dié van die vroeë gemeente voortbring. Hierdie geestelike Israeliete is die lede van “die getroue en verstandige dienskneg”-klas van Mattheüs 24:45-47. Soos die eerste Christene is hierdie hedendaagse Christene nie bang om ‘hulle lig te laat skyn nie’ (Mattheüs 5:14-16). Sedert 1919 het hulle moedig die werk onderneem om die goeie nuus van die Koninkryk in die hele wêreld vir ’n getuienis te verkondig (Mattheüs 24:14). Aangesien hulle die vrugte van God se Koninkryk gedra het, het Jehovah hulle ryklik geseën deur hulle op die hoogte te bring van “die menigvuldige wysheid van God”.—Efesiërs 3:10.
17, 18. Watter progressiewe begrip het Jehovah deur sy hedendaagse kanaal moontlik gemaak?
17 In 1923 is Jesus se groot profesie oor die skape en die bokke dus behoorlik verstaan, en daar is onderskei dat die hele wêreld geoordeel word (Mattheüs 25:31-46). In 1925 het God se aardse knegte ’n akkurate begrip van Openbaring hoofstuk 12 verkry en het hulle besef presies wat in die betekenisvolle jaar 1914 gebeur het. In 1932 is hulle begrip verder uitgebrei. Jehovah het geopenbaar dat die profesieë oor die terugkeer van die Jode na Jerusalem nie van toepassing was op natuurlike Israel, wat lank gelede ontrou was en verwerp is nie, maar eerder op geestelike Israel, die Christengemeente (Romeine 2:28, 29). In 1935 het ’n gekorrigeerde begrip van Johannes se gesig van die “groot menigte” in Openbaring hoofstuk 7 die oë van die gesalfdes geopen vir die groot insamelingswerk wat nog vir hulle voorgelê het.—Openbaring 7:9-17.
18 Dit het aanleiding gegee tot ’n oplewing in die wêreldwye predikingswerk toe die insameling van ‘die dinge wat op die aarde is’ uiteindelik in alle erns begin het (Efesiërs 1:10). In 1939, terwyl oorlogswolke oor Europa saamgepak het, is die neutraliteitsgeskil duideliker as ooit gemaak. In 1950 is die “vorste” van Jesaja 32:1, 2 meer spesifiek geïdentifiseer. In 1962 is die juiste identifikasie van die “hoër owerhede” en die Christen se regte verhouding ten opsigte van hulle ook danksy “die geopenbaarde dinge” beter verstaan (Romeine 13:1, 2, NW). En in 1965 was daar ’n duideliker begrip van die aardse opstanding en wie daarby baat kan vind.—Johannes 5:28, 29.
19. Hoe bewys Jehovah se “dienskneg”-klas vandag dat hy ’n geskikte bewaarder van die Woord van God is?
19 Daarbenewens is die gesalfde Christengemeente in hierdie 20ste eeu ’n geskikte bewaarder van die Woord van God, die geskrewe versameling van “die geopenbaarde dinge”. Verteenwoordigende lede van hierdie gemeente het ’n vertaling van die Bybel in moderne Engels aangepak, en tot dusver het die New World Translation of the Holy Scriptures in 11 tale verskyn en is nagenoeg 40 000 000 eksemplare gedruk. Die “dienskneg”-klas, wat uit gesalfde Christene bestaan, neem ook die leiding in internasionale onderrigprogramme en druk Bybelstudieboeke en -tydskrifte. Hy organiseer weeklikse vergaderinge, gereelde byeenkomste en verskillende skole—alles met die doel om waarheidsoekers te help om juiste kennis van “die geopenbaarde dinge” te verkry. “Die regverdiges skyn” inderdaad nou in ’n geestelike sin “soos die son” en bewys dat hulle hulle rentmeesterskap waardig is.—Mattheüs 13:43.
Ons verantwoordelikheid
20, 21. (a) Hoe het die psalmis oor Jehovah se geopenbaarde Woord gevoel? (b) Watter aangeleenthede sal in die volgende artikel bespreek word?
20 Jehovah het ons dus nie alleen agtergelaat in die mynveld van hierdie wêreld nie. Inteendeel, hy het ons sy Woord gegee om ons pad te verlig en ons te help om geestelike gevaar te vermy (Psalm 119:105). Jehovah het ons ook nie verlaat om weens sonde en onvolmaaktheid te sterf nie. Hy het ons eerder die geleentheid gebied om die ewige lewe op ’n paradysaarde te verkry en het kennis omtrent hierdie geleentheid geredelik beskikbaar gestel (Johannes 17:3). Geen wonder dat die psalmis oor “die geopenbaarde dinge” in sy dag uitgeroep het nie: “Hoe lief het ek u wet; dit is my bepeinsing die hele dag.”—Psalm 119:97.
21 Is dit hoe jy voel oor die dinge wat in ons dag deur Jehovah geopenbaar is en nou verstaan word? Het jy ’n diepe waardering vir die waarhede wat jy geleer het? Besef jy hoe nodig hierdie waarhede is om jou te help om besluite te neem, versoekinge te vermy en Jehovah te dien? Hoeveel tyd staan jy af om hierdie “geopenbaarde dinge” te lees en te bestudeer? Is daar enige manier waarop jy jou studiegewoontes kan verbeter? Hierdie aangeleenthede sal in die volgende artikel bespreek word.
Onthou jy?
◻ Wat was party van die kanale vir “die geopenbaarde dinge” voor Jesus se tyd?
◻ Aan wie het “die geopenbaarde dinge” na 33 G.J. behoort?
◻ Wat was party van die lewensbelangrike openbaringe wat deur hierdie nuwe kanaal gegee is?
◻ Waarom moet geestelike Israeliete diegene wees aan wie “die geopenbaarde dinge” vandag behoort?
◻ In watter opsigte het die gesalfde gemeente getoon dat dit die waardige bewaarder van Jehovah se Woord is?
[Lokteks op bladsy 12]
Die gesalfde Christengemeente het die nuwe bewaarder van Jehovah se openbaringe geword
[Lokteks op bladsy 13]
Jehovah se gesalfde “dienskneg”-klas kwyt hom goed van sy taak as bewaarder van God se Woord
[Prent op bladsy 10]
Jehovah het lewensbelangrike kennis deur getroue manne van ouds geopenbaar