Wat is werklik kosbaar?

“Baie voer ’n leë bestaan, kan nie ’n werk behou nie, het geen blywende verhoudings nie en beweeg doelloos van plek tot plek in ’n afgesonderde wentelbaan​—en dit kan niemand skeel nie. Die rede: Hulle is skatryk.”​—The New York Times, 15 Mei 1984.

JY WEET goed dat geld nodig is om voedsel, klere, huisvesting, vervoer, mediese sorg en ander lewensbenodigdhede te bekom. Trouens, jy besef waarskynlik dat dit in die moderne samelewing moeilik sal wees om sonder geld klaar te kom, want, soos die Bybel sê, “alles kos geld”.​—Prediker 10:19, NAV.

Tog het die koerantartikel waaruit hierbo aangehaal is die emosionele probleme van die rykes bespreek. Dit hou ongetwyfeld gevaar in om jou lewe om geld en besittings te bou. Nietemin doen baie mense dit. Soms is gierige ambisie noodlottig. Ons hoor van hardwerkende mans in hulle dertiger- en veertigerjare wat aan ’n hartaanval beswyk. Sommige het hulle gesondheid, selfs hulle lewe, op die spel geplaas om hulle drang na geld te bevredig. Ons hoef nie baie godsdienstig te wees om saam te stem dat dit beter sou gewees het as hulle Jesus se woorde ter harte geneem het nie: “Wat baat dit ’n mens as hy die hele wêreld win, maar aan sy siel skade ly? Of wat sal ’n mens gee as losprys vir sy siel?”​—Mattheüs 16:26.

Wat het werklik waarde?

Jy weet beslis dat daar geen einde is aan die dinge wat ons aanloklik vind nie. ’n Video-bandopnemer, ’n eie huis, duur sporttoerusting​—in party lande is dit dinge waarna mense streef. Elders het die doelwit moontlik nog minder waarde. In een land het ’n jong vrou haar tot prostitusie gewend om geld vir mooier klere te kry.

Hoe kan ons onsself beskerm, daar ons besef dat daar gevare verbonde is aan ’n uitsluitlik materialistiese lewensbeskouing? Moet ons die samelewing die rug toekeer, ons afsonder of kluisenaars word, soos sommige gedoen het? Wanneer ons oorweeg wat waarlik kosbaar is, moet ons ons ook afvra: Wat sal vir my op die lange duur ware geluk en gemoedsrus verskaf?

Kom ons beskou, om ons in hierdie saak te help, die voorbeeld van ’n man wat deur die eeue heen gerespekteer en bewonder is. Hy was ’n rabbynse wetsgeleerde en lid van ’n Joodse sekte in die eerste eeu wat bekend was vir hul “geldgierigheid” (Lukas 16:14). Sy naam was Paulus, en hy het die opvoeding en die nodige dryfkrag gehad om rykdom te vergaar en om al hoe meer aansien in die gemeenskap te verkry.

Hy het egter deur ’n skokkende ondervinding tot die besef gekom dat iets heel anders werklik die grootste waarde in die lewe het. Of jy nou saamstem of nie, dit is die moeite werd om na te dink oor die gevolgtrekking wat Paulus gemaak het.

Hy het vasgestel dat ’n goedgekeurde verhouding met God, as ’n dissipel van Jesus, die kosbaarste ding in die lewe is. Dit was so kosbaar dat Paulus, as ’n apostel van Jesus, ontberinge en vervolging kon verduur. Hy was soos Moses, ’n eertydse man van faam, wat “die smaad van Christus groter rykdom geag het as die skatte van Egipte”.​—Hebreërs 11:26; 2 Korinthiërs 11:23-27.

Jy moet ook besef dat Paulus nooit spyt gehad het oor die feit dat hy sy aansien in die Joodse gemeenskap verloor het nadat hy ’n Christenapostel geword het nie. Na ongeveer 25 jaar as ’n toegewyde Christen het hy geskryf: “Wat vir my wins was, dit het ek om Christus wil skade geag. Ja waarlik, ek ag ook alles skade om die uitnemendheid van die kennis van Christus Jesus, my Here, ter wille van wie ek alles prysgegee het en as drek beskou, om Christus as wins te verkry en in Hom gevind te word” (Filippense 3:7-9). Jy sal moet saamstem dat Paulus daarvan oortuig was dat hy iets waarlik kosbaars gevind het.

Paulus se keuse het nie beteken dat hy nie meer enige materiële dinge gehad het nie. Dink byvoorbeeld na oor sy woorde: “In elke opsig en in alle dinge is ek onderrig: om versadig te word sowel as om honger te ly, om oorvloed te hê sowel as om gebrek te ly.”​—Filippense 4:12.

Wat ook al jou posisie ten opsigte van die Christelike geloof, jy kan waarskynlik sien hoe uitstekend die gevolg vir Paulus was. Sy keuse van wat kosbaar is, het hom die bevrediging verskaf wat die wêreld se rykste manne en vroue ontwyk het. Jean Paul Getty, die oliemagnaat, het erken: “Geld het nie noodwendig enige verband met geluk nie. Miskien met ongelukkigheid.”

’n Persoon kan nietemin daarop aanspraak maak dat hy ’n Christen is en nog steeds nie besef wat die kosbaarste is nie. Dit was die geval in die eerste eeu, want Paulus het van een medewerker gesê: “Demas het my verlaat, omdat hy die teenwoordige wêreld liefgekry het” (2 Timotheüs 4:10). Op ’n tydstip dat hy die gevange apostel kon gehelp het, het Demas tou opgegooi en verkies wat die teenwoordige wêreld hom gebied het.

Paulus het daarop gewys dat ’n materialistiese beskouing ’n Christen in ernstige gevaar kan plaas, en gesê: “Die wat ryk wil word, val in versoeking en strikke en baie dwase en skadelike begeerlikhede wat die mense laat wegsink in verderf en ondergang. Want die geldgierigheid is ’n wortel van alle euwels; en omdat sommige dit begeer, het hulle . . . hulleself met baie smarte deurboor.”​—1 Timotheüs 6:9, 10.

Jy kan dan wel vra: Watter rol moet geld of besittings in my lewe speel? Kom ons ondersoek die saak verder, om te sien hoe jy dinge kan besit wat waarlik kosbaar is.