Jesus se lewe en bediening
Goeie werke op die sabbat
Dit is die [noordelike] lente van 31 G.J. ’n Paar maande het verstryk sedert Jesus op pad van Judea na Galilea met die vrou by die put in Samaria gepraat het.
Nadat hy op groot skaal dwarsdeur Galilea geleer het, vertrek Jesus nou weer na Judea, waar hy in die sinagoges preek. In vergelyking met die aandag wat aan sy Galilese bediening geskenk word, sê die Bybel min oor Jesus se bedrywigheid in Judea gedurende hierdie besoek en gedurende die maande wat hy ná die vorige Pasga hier deurgebring het. Sy bediening het klaarblyklik nie so ’n gunstige reaksie in Judea soos in Galilea uitgelok nie.
Jesus is weldra op pad na Judea se hoofstad, Jerusalem, vir die Pasga van 31 G.J. Hier, naby die stad se skaapspoort, is die bad wat Betesda genoem word, waarheen talle siekes, blindes en lammes kom. Hulle glo dat mense genees kan word deur in die bad se water te klim wanneer dit geroer word.
Dit is die sabbat, en Jesus sien ’n man by die bad wat al 38 jaar siek is. Jesus weet hoe lank die man al siek is en vra: “Wil jy gesond word?”
“Here, ek het niemand om my in die bad te sit as die water geroer word nie”, antwoord hy, “en onderwyl ek kom, gaan ’n ander een voor my in.”
Jesus sê vir hom: “Staan op, neem jou bed op en loop.” Daarop word die man onmiddellik gesond, neem sy bed op en begin loop!
Maar wanneer die Jode die man sien, sê hulle: “Dit is sabbat; dit is jou nie geoorloof om jou bed te dra nie.”
Die man antwoord hulle: “Hy wat my gesond gemaak het, Hy het vir my gesê: Neem jou bed op en loop.”
“Wie is die man wat vir jou gesê het: Neem jou bed op en loop?” vra hulle. Jesus het weggegaan as gevolg van die skare, en die man wat genees is, het nie geweet wat Jesus se naam is nie. Later kom Jesus en die man mekaar egter in die tempel teë, en die man vind uit wie hom genees het.
Die genese man vind dus die Jode en vertel hulle dat dit Jesus is wat hom gesond gemaak het. Toe hulle dit hoor, gaan die Jode na Jesus toe. Waarom? Om uit te vind hoe hy hierdie wonderlike dinge kan doen? Nee. Maar om hom te kritiseer omdat hy hierdie goeie dinge op die sabbat doen. En hulle begin hom selfs vervolg! Lukas 4:44; Johannes 5:1-16.
♦ Omtrent hoe lank is dit sedert Jesus se laaste besoek aan Judea?
♦ Waarom was die bad wat Betesda genoem is so gewild?
♦ Watter wonderwerk het Jesus by die bad verrig, en wat was die Jode se reaksie?