Vroue by die werk—toetse en uitdagings

“GEDURENDE die afgelope drie dekades het ’n ongeëwenaarde aantal vroue tot die formele werkerskorps toegetree.” So berig die navorsingsorganisasie Worldwatch-Instituut. “In ryk sowel as arm lande”, het die berig voortgegaan, “spoor inflasie vroue aan om vir betaling te werk.” Of soos een Nigeriese vrou dit gestel het: “Die ekonomiese druk is so groot dat ek eenvoudig móét gaan werk.”

Soos die “deugsame vrou” van Bybeltye dra talle vroue graag finansieel tot die welsyn van hulle gesin by, indien nodig (Spreuke 31:10, 16, 24). En party vind sekulêre werk uitdagend en bevredigend. Maar hoewel sekulêre werk voordele het, kan dit ook nadele inhou.

Een vrou, wat ’n winkelbestuurderes is, sê byvoorbeeld: “Ek geniet my werk. My baas is gaaf en my kantoor is pragtig. Maar ek hou niks daarvan wanneer daardie werk meer van my tyd in beslag neem as wat ek daaraan kan afstaan nie, want daarna het ek ander werk wat vir my by die huis wag—as vrou en moeder.” Talle vroue behartig nietemin hulle sekulêre werk, huis en gesin op ’n heel bekwame wyse, en hulle verdien hartlike lof daarvoor.a

Sekulêre betrekkings stel vroue egter ook bloot aan ’n aantal probleme wat eie is aan die werkplek. Vir talle is dit ’n uitdaging om ’n gebalanseerde beskouing te behou wanneer hulle noodgedwonge in ’n atmosfeer moet werk wat gelaai is met sterk wedywer of wat die ene onverskilligheid is. ’n Begeerte om vooruitgang te maak, het party vroue daartoe gedryf om hulle werk die middelpunt van hulle lewe te maak.

Soms word daar ook sedelike druk by die werk uitgeoefen. Een algemene klagte van werkende vroue is die daaglikse blootstelling aan afbrekende gesprekke. Nog erger, party vind dat hulle voortdurend seksueel lastig geval word. “Toe ek begin werk het”, sê een Christin, “was ek die enigste meisie in die kantoor. Die mans het suggestiewe opmerkings gemaak, en dit was vir my baie moeilik.”

Sulke probleme is ’n groot bron van kommer vir vroue wat daagliks daarmee te doen het, veral vir diegene wat Christelike standaarde wil handhaaf. Gelukkig is daar ’n bron van ware hulp vir hulle.

[Voetnoot]