Jesus se lewe en bediening

Onderrigting met illustrasies

JESUS is blykbaar in Kapernaüm wanneer hy die Fariseërs bestraf. Later daardie dag verlaat hy die huis en stap hy tot naby die See van Galilea, waar ’n menigte mense vergader. Hy klim daar in ’n skuit, vaar ’n entjie weg en begin om die mense op die strand van die Koninkryk van die hemele te leer. Hy doen dit deur middel van ’n reeks gelykenisse, of illustrasies, elkeen met ’n agtergrond waarmee die mense vertroud is.

Jesus vertel eers van ’n saaier wat saad saai. Van die saad val langs die pad en word deur voëls opgeëet. Ander saad val op rotsagtige grond. Omdat die wortels nie diep kan groei nie, verwelk die nuwe plante in die skroeiende son. Nog ander saad val tussen dorings, wat die plante verstik wanneer hulle opkom. Laastelik val ’n deel van die saad op goeie grond en bring honderdvoudig, party sestigvoudig en party dertigvoudig voort.

In ’n ander illustrasie sê Jesus dat die Koninkryk van God is soos wanneer ’n man saad saai. Met verloop van tyd, terwyl die man slaap en wanneer hy wakker is, groei die saad. Die man weet nie hoe nie. Dit groei vanself en bring koring voort. Wanneer die koring ryp word, oes die man dit.

Jesus vertel ’n derde illustrasie van ’n man wat die regte soort saad saai, maar terwyl hy slaap, kom ’n vyand en saai onkruid onder die koring. Die man se diensknegte vra of hulle die onkruid moet uittrek. Maar hy antwoord: ‘Nee, julle sal van die koring uittrek. Laat albei saam groei tot die oes toe. Dan sal ek vir die maaiers sê om die onkruid bymekaar te maak en dit te verbrand en die koring in die skuur te sit.’

Jesus spreek die skare op die strand verder toe en gebruik nog twee illustrasies. Hy verduidelik dat “die koninkryk van die hemele” soos ’n mosterdsaad is wat ’n man plant. Hoewel dit die kleinste van al die soorte saad is, sê hy, groei dit groter as al die groentesoorte. Dit word ’n boom waarheen voëls kom om skuiling tussen sy takke te vind.

Party beweer vandag dat daar kleiner saad as mosterdsaad is. Maar Jesus gee nie ’n plantkundeles nie. Die mosterdsaad is werklik die kleinste saad wat Galileërs van sy dag ken. Hulle verstaan dus die fenomenale groei wat Jesus illustreer.

Ten slotte vergelyk Jesus “die koninkryk van die hemele” met suurdeeg wat ’n vrou neem en in drie groot mate meel inwerk. Mettertyd, sê hy, deurdring dit die hele deeg.

Nadat hy hierdie vyf illustrasies gegee het, stuur Jesus die skare weg en keer hy terug na die huis waar hy bly. Sy 12 apostels en ander kom weldra daar na hom toe. Mattheüs 13:1-9, 24-36; Markus 4:1-9, 26-32; Lukas 8:1-8.

◆ Wanneer en waar het Jesus deur illustrasies met die skare gepraat?

◆ Watter vyf illustrasies het Jesus vir die skare vertel?

◆ Waarom het Jesus gesê dat die mosterdsaad die kleinste van al die soorte saad is?