Jesus se lewe en bediening

Geseën met verdere onderrigting

DlE dissipels het so pas ’n verduideliking van die gelykenis van die saaier gehoor. Maar nou wil hulle meer leer. Hulle vra: “Verklaar vir ons die gelykenis van die onkruid in die saailand.”

Hoe verskil die gesindheid van die dissipels tog van dié van die res van die skare op die strand! Daardie mense het nie ’n opregte begeerte om die betekenis van die gelykenisse te leer nie. Hulle is tevrede met slegs die breë trekke van wat daarin uiteengesit is. Jesus vergelyk hierdie gehoor op die strand met sy weetgierige dissipels en sê:

“Met die maat waarmee julle meet, sal vir julle gemeet word, en daar sal bygevoeg word vir julle wat hoor.” Die dissipels meet aan Jesus uit in die vorm van opregte belangstelling en aandag en word gevolglik geseën met verdere onderrigting. In antwoord op sy dissipels se vraag, verduidelik Jesus dus soos volg:

“Hy wat die goeie saad saai, is die Seun van die mens, en die saailand is die wêreld. Die goeie saad—dit is die kinders van die koninkryk, en die onkruid is die kinders van die Bose, en die vyand wat dit gesaai het, is die duiwel. Die oes is die voleinding van die wêreld, en die maaiers is die engele.”

Nadat hy die hooftrekke van sy gelykenis verduidelik het, beskryf Jesus die uitslag daarvan. Met die voleinding van die wêreld, sê hy, sal “die maaiers”, of die engele, die onkruidagtige namaak-Christene van die ware “kinders van die koninkryk” skei. “Die kinders van die Bose” sal dan bestem word vir vernietiging, maar die kinders van God se Koninkryk, “die regverdiges”, sal helder skyn in die Koninkryk van hulle Vader.

Jesus seën nou sy weetgierige dissipels met nog drie gelykenisse. Hy sê ten eerste: “Die koninkryk van die hemele [is] soos ’n skat wat verborge is in die saailand, wat ’n man kry en wegsteek; en uit blydskap daaroor gaan hy en verkoop alles wat hy het, en koop daardie saailand.”

“Verder”, gaan hy voort, “is die koninkryk van die hemele soos ’n koopman wat mooi pêrels soek; en toe hy een baie kosbare pêrel kry, gaan hy weg en verkoop alles wat hy het, en koop dit.”

Jesus self is soos die man wat ’n verborge skat kry en soos die koopman wat die baie kosbare pêrel kry. Hy het as ’t ware alles verkoop deurdat hy ’n geëerde posisie in die hemel opgegee het om ’n nederige mens te word. Daarna verduur hy as ’n mens op aarde smaad en kwaadwillige vervolging, en word sodoende waardig om die Heerser van God se Koninkryk te wees.

Ook Jesus se volgelinge het die uitdaging om alles te verkoop sodat hulle die wonderlike beloning kan verkry om òf ’n medeheerser van Christus òf ’n aardse Koninkryksonderdaan te wees. Sal ons ’n aandeel in God se Koninkryk waardevoller as enigiets anders beskou, soos ’n kosbare skat of waardevolle pêrel?

Ten laaste vergelyk Jesus “die koninkryk van die hemele” met ’n sleepnet wat allerhande soorte visse vang. Wanneer die visse uitgesoek word, word die slegtes weggegooi, maar die goeies word gehou. So, sê Jesus, sal dit in die voleinding van die wêreld wees; die engele sal die slegte mense van die regverdiges skei en die slegtes vir vernietiging uithou.

Jesus self begin met hierdie visvangprojek en roep sy eerste dissipels om “vissers van mense” te wees, Onder die toesig van die engele gaan hierdie visvangwerk deur die eeue heen voort. Uiteindelik breek die tyd aan om die “net” in te trek. Die “net” beeld die organisasies op aarde af wat bely dat hulle Christelik is.

Al word die slegte visse vernietig, kan ons gelukkig onder die ‘goeie visse’ gereken word wat behou word. As ons ook soos Jesus se dissipels ’n opregte begeerte na meer kennis en insig openbaar, sal ons geseën word, nie alleen met verdere onderrigting nie, maar met God se seën van die ewige lewe. Mattheüs 13:36-52; 4:19; Markus 4:24, 25.

◆ Hoe verskil die dissipels van die skare op die strand?

◆ Wie of wat word voorgestel deur die saaier, die saailand, die goeie saad, die vyand, die oes en die maaiers?

◆ Watter drie bykomende gelykenisse het Jesus gegee, en wat kan ons daaruit leer?