Wat beteken die visnet en die visse vir jou?
“Aan julle [is dit] gegee . . . om die verborgenhede van die koninkryk van die hemele te ken.”—MATTHEÜS 13:11.
1, 2. Waarom stel ons moontlik in Jesus se gelykenisse belang?
GENIET jy dit om ’n geheim te weet of om ’n raaisel op te los? Sê nou dit sal jou help om ’n duideliker begrip te hê van jou aandeel aan die uitvoering van God se voorneme. Gelukkig kan jy hierdie bevoorregte insig verkry deur middel van ’n gelykenis wat Jesus vertel het. Dit het baie mense wat dit gehoor het, dronkgeslaan, en sedertdien was dit vir tallose ander ’n raaisel, maar jy kan dit verstaan.
2 Let op wat Jesus in Mattheüs hoofstuk 13 gesê het oor sy gebruik van gelykenisse. Sy dissipels het gevra: “Waarom spreek U tot hulle deur gelykenisse?” (Mattheüs 13:10). Ja, waarom het Jesus gelykenisse gebruik wat die meeste mense nie sou verstaan nie? Hy het in verse 11 tot 13 geantwoord: “Aan julle [is dit] gegee . . . om die verborgenhede van die koninkryk van die hemele te ken, maar aan hulle is dit nie gegee nie. . . . Daarom spreek Ek tot hulle deur gelykenisse, omdat hulle, terwyl hulle sien, nie sien nie, en terwyl hulle hoor, nie hoor of verstaan nie.”
3. Hoe kan dit ons tot voordeel strek as ons Jesus se gelykenisse verstaan?
3 Jesus het toe Jesaja 6:9, 10 toegepas, wat ’n volk beskryf het wat geestelik doof en blind was. Ons hoef egter nie so te wees nie. As ons sy gelykenisse verstaan en in ooreenstemming daarmee optree, kan ons baie gelukkig wees—nou en in die eindelose toekoms. Jesus gee ons hierdie hartlike versekering: “Julle oë is gelukkig, omdat hulle sien; en julle ore, omdat hulle hoor” (Mattheüs 13:16). Daardie versekering dek al Jesus se gelykenisse, maar kom ons vestig nou ons aandag op die kort gelykenis van die visnet, wat in Mattheüs 13:47-50 opgeteken is.
’n Gelykenis van groot betekenis
4. Wat het Jesus deur middel van ’n gelykenis vertel, soos dit in Mattheüs 13:47-50 opgeteken staan?
4 “Die koninkryk van die hemele [is] soos ’n net wat in die see gegooi word en van elke soort bymekaarbring; en as dit vol geword het, trek hulle dit op die strand uit en gaan sit en maak die goeies in bakke bymekaar, maar gooi die slegtes weg. So sal dit wees in die voleinding van die wêreld: die engele sal uitgaan en die slegte mense onder die regverdiges uit afskei en hulle in die vuuroond gooi. Daar sal geween wees en gekners van die tande.”
5. Watter soort vrae ontstaan oor die betekenis van die gelykenis van die visnet?
5 Jy het waarskynlik al ten minste in ’n rolprent of op televisie gesien hoe mense met ’n net visvang; dus is dit nie moeilik om jou Jesus se gelykenis voor die gees te roep nie. Maar wat van die fyner besonderhede en die betekenis daarvan? Jesus het byvoorbeeld gesê dat hierdie gelykenis oor “die koninkryk van die hemele” gaan. Maar hy het sekerlik nie bedoel dat “elke soort” mens, die goeies en die slegtes, of die goddeloses, in die Koninkryk sal wees nie. En wie vang die visse? Het hierdie visvangs en skeidingswerk in Jesus se dag plaasgevind of is dit beperk tot ons tyd, “die voleinding van die wêreld [“stelsel van dinge”, NW]”? Sien jy jouself in hierdie gelykenis? Hoe kan jy verhoed dat jy onder diegene beland wat ween en op hulle tande kners?
6. (a) Waarom moet ons ’n lewendige belangstelling daarin hê om die gelykenis van die visnet te verstaan? (b) Wat is die sleutel om hierdie gelykenis te verstaan?
6 Sulke vrae toon dat hierdie gelykenis op stuk van sake nie so eenvoudig is nie. Maar moenie vergeet nie: “Julle oë is gelukkig, omdat hulle sien; en julle ore, omdat hulle hoor.” Kom ons kyk of ons die betekenis daarvan kan navors sodat ons nie ons ore en ons oë sluit vir die belangrikheid daarvan nie. In werklikheid het ons reeds ’n uiters belangrike sleutel om die betekenis daarvan te ontsluit. Die vorige artikel het vir ons gesê hoe Jesus vissers van Galilea genooi het om daardie beroep te laat vaar en ’n geestelike werk as “vissers van mense” te doen (Markus 1:17). Hy het vir hulle gesê: ‘Van nou af sal julle mense lewend vang.’—Lukas 5:10, vgl. NW.
7. Wat het Jesus bedoel toe hy van visse gepraat het?
7 In ooreenstemming daarmee verteenwoordig die visse in hierdie gelykenis mense. Wanneer vers 49 derhalwe van die skeiding van die goddeloses en die regverdiges praat, beteken dit nie regverdige of goddelose seediere nie, maar mense wat regverdig of goddeloos is. Vers 50 moet ons ook nie laat dink aan seediere wat ween of op hulle tande kners nie. Nee. Hierdie gelykenis gaan oor die insameling van mense en hulle latere skeiding, wat uiters ernstig is, soos die gevolge toon.
8. (a) Wat kan ons leer uit dit wat met die slegte visse gebeur? (b) Watter gevolgtrekking kan ons aangaande die Koninkryk maak in die lig van wat oor die slegte visse gesê is?
8 Let op dat die slegte visse, dit wil sê die goddeloses, in die vuuroond gegooi sal word, waar hulle sal ween en op hulle tande sal kners. Elders het Jesus so ’n geween en gekners geassosieer met die toestand wanneer ’n mens buite die Koninkryk is (Mattheüs 8:12; 13:41, 42). In Mattheüs 5:22 en 18:9 het hy selfs melding gemaak van “vurige Gehenna”, wat op permanente vernietiging dui (NW). Toon dit nie hoe noodsaaklik dit is om te weet wat hierdie gelykenis beteken en dienooreenkomstig op te tree nie? Ons weet almal dat daar nie goddelose mense in God se Koninkryk is of sal wees nie. Toe Jesus dus gesê het dat “die koninkryk van die hemele soos ’n net” is, moes hy bedoel het dat daar ’n aspek in verband met God se Koninkryk is wat soos ’n net is wat uitgegooi word om allerlei visse bymekaar te maak.
9. Hoe is die engele betrokke by die gelykenis van die visnet?
9 Nadat die visnet uitgegooi en die visse bymekaargemaak is, sou daar ’n skeidingswerk wees. Wie sou volgens Jesus hierby betrokke wees? Mattheüs 13:49 het hierdie vissers wat die skeidingswerk doen as engele geïdentifiseer. Jesus het ons dus vertel dat die engele toesig sou hou oor ’n instrument op aarde wat gebruik sou word om mense te identifiseer—sommige goed en geskik vir die Koninkryk van die hemele, ander sleg of nie geskik vir daardie roeping nie.
Die visvangs—Wanneer?
10. Deur watter redenasie te gebruik, kan ons bepaal dat die visvangs oor ’n aansienlike tydperk plaasgevind het?
10 Die konteks help ons om uit te vind wanneer dit van toepassing is. Net voor hierdie gelykenis het Jesus ’n gelykenis gegee oor goeie saad wat gesaai is, maar toe is onkruid gesaai in die saailand, wat die wêreld afbeeld. Hy het in Mattheüs 13:38 verduidelik dat die goeie saad “die kinders van die koninkryk” afgebeeld het, maar “die onkruid is die kinders van die Bose”. Hulle het eeue lank saam gegroei tot die oes in die voleinding van die stelsel van dinge. Toe is die onkruid bymekaargemaak en daarna verbrand. As ons dit met die gelykenis van die visnet vergelyk, sien ons dat die optrek van mense in die net oor ’n lang tydperk sou plaasvind.—Mattheüs 13:36-43.
11. Hoe is ’n internasionale visvangs in die eerste eeu begin?
11 Volgens Jesus se gelykenis sou die visse sonder onderskeid bymekaargemaak word, dit wil sê, die visnet het goeie sowel as slegte visse opgetrek. Terwyl die apostels nog gelewe het, het die engele wat die visvangs gelei het God se Christenorganisasie gebruik om “visse” te vang wat gesalfde Christene geword het. ’n Mens kan sê dat Jesus se visvangs van mense voor Pinkster 33 G.J. ongeveer 120 dissipels in die net opgelewer het (Handelinge 1:15). Maar toe die gemeente van gesalfde Christene eers gestig is, het die visvangs met die visnetinstrument begin, en duisende goeie visse is gevang. Van 36 G.J. af het die visvangs na internasionale waters uitgebrei, namate nie-Jode na die Christelike godsdiens getrek is en lede van Christus se gesalfde gemeente geword het.—Handelinge 10:1, 2, 23-48.
12. Wat het ná die dood van die apostels kop uitgesteek?
12 In die eeue nadat die apostels van die toneel verdwyn het, was daar altyd ’n paar Christene wat daarna gestreef het om goddelike waarheid te vind en na te leef. Ten minste party van hulle het God se goedkeuring gehad, en hy het hulle met heilige gees gesalf. Nogtans het ’n invloed wat die wettelose mens teëgehou het met die dood van die apostels verdwyn, wat daartoe gelei het dat afvalligheid oral kop uitgesteek het (2 Thessalonicense 2:7, 8). ’n Organisasie het ontstaan wat voorgegee het dat hulle God se gemeente is. Die organisasie het valslik beweer dat hy die heilige nasie is wat met God se gees gesalf is om saam met Jesus te regeer.
13. Waarom kan daar gesê word dat die Christendom ’n rol met betrekking tot die werksaamheid van die visnet gespeel het?
13 Dink jy dat ontroue belyers van die Christelike godsdiens enige aandeel gehad het aan die vervulling van die gelykenis van die visnet? Wel, daar is ’n rede waarom ons moet antwoord: ja, hulle het. Die simboliese visnet het die Christendom ingesluit. Die Katolieke Kerk het wel eeue lank probeer om die Bybel van die gewone mense af weg te hou. Nogtans het lede van die Christendom deur die eeue heen ’n groot rol gespeel om God se Woord te vertaal, kopieë daarvan te maak en dit te versprei. Kerke het later Bybelgenootskappe gestig of ondersteun, wat die Bybel in die landstale van afgeleë lande vertaal het. Hulle het ook sendelinge as dokters, verpleegsters en onderwysers gestuur wat ryschristene gemaak het. Hulle het groot getalle slegte visse bymekaargemaak wat nie God se goedkeuring weggedra het nie. Maar dit het ten minste die Bybel en ’n vorm van die Christelike godsdiens, hoewel dit verdraaid was, aan miljoene nie-Christene bekend gemaak.
14. Hoe het van die werk wat die kerke van die Christendom gedoen het met die vangs van goeie visse gehelp?
14 Intussen het die verstrooide getroues wat aan God se Woord getrou gebly het hulle soveel moontlik ingespan. Op enige gegewe tyd het hulle God se ware gesalfde gemeente op aarde uitgemaak. En ons kan daarvan seker wees dat hulle ook visse, of mense, gevang het, waarvan baie deur God as goed beskou en met sy gees gesalf sou word (Romeine 8:14-17). Hierdie goeie belyers van die Christelike godsdiens kon Bybelwaarheid aan talle bring wat ryschristene geword het of wat min Bybelkennis opgedoen het uit die Skrif wat deur die Christendom se Bybelgenootskappe in hulle tale vertaal is. Die insameling van goeie visse het weliswaar voortgeduur, hoewel die meeste wat deur die Christendom bymekaargemaak is in God se oë nie geskik was nie.
15. Wat word spesifiek deur die visnet van die gelykenis voorgestel?
15 Die visnet stel dus ’n aardse instrument voor wat verklaar dat hulle God se gemeente is en wat visse bymekaarmaak. Dit sluit die Christendom sowel as die gemeente van gesalfde Christene in, terwyl laasgenoemde aangehou het om goeie visse bymekaar te maak onder die onsigbare toesig van die engele, soos ons in Mattheüs 13:49 lees.
Ons tyd is spesiaal
16, 17. Waarom is die tyd waarin ons lewe so belangrik wat die vervulling van Jesus se gelykenis van die visnet betref?
16 Laat ons nou die tydelement ondersoek. Die visnetinstrument het eeue lank goeie visse sowel as talle slegtes, of goddeloses, bymekaargemaak. Toe het die tyd aangebreek dat die engele betrokke geraak het by ’n deurslaggewende skeidingswerk. Wanneer? Wel, 13vers 49 sê duidelik dat dit gedurende “die voleinding van die wêreld [“stelsel van dinge”, NW]” is. Dit strook met Jesus se woorde in die gelykenis van die skape en die bokke: “Wanneer die Seun van die mens in sy heerlikheid kom en al die heilige engele saam met Hom, dan sal Hy op sy heerlike troon sit; en voor Hom sal al die nasies versamel word, en Hy sal hulle van mekaar afskei soos die herder die skape van die bokke afskei.”—Mattheüs 25:31, 32.
17 In ooreenstemming met Mattheüs 13:47-50 kan ons derhalwe sien dat ’n deurslaggewende skeidingswerk onder leiding van die engele aan die gang is sedert “die voleinding van die stelsel van dinge” in 1914 begin het. Dit het veral duidelik geword ná 1919, toe die oorblyfsel van gesalfdes van tydelike gevangenskap bevry is en meer bedrewe geword het as ’n instrument om die visvangwerk te doen.
18. Hoe is die goeie visse in bakke bymekaargemaak?
18 Wat sou met die goeie visse gebeur wat afgeskei is? Vers 48 sê dat die engele wat die visse skei ‘die goeies in bakke bymekaarmaak, maar die slegtes weggooi’. Die bakke is beskutte houers waarin die goeie visse gesit word. Het dit in ons tyd gebeur? Beslis. Wanneer simboliese, goeie visse lewend gevang is, is hulle in gemeentes van ware Christene bymekaargebring. Hierdie gemeentes wat soos bakke is, het gehelp om hulle te beskerm en af te sonder vir diens aan God, nie waar nie? Nogtans kan party dink: ‘Dis alles goed en wel, maar wat het dit te doen met my huidige lewe en my toekoms?’
19, 20. (a) Waarom is dit vandag noodsaaklik dat ons hierdie gelykenis verstaan? (b) Watter belangrike visvangs word sedert 1919 gedoen?
19 Die vervulling van hierdie gelykenis is nie beperk tot die eeue tussen die apostels se tyd en 1914 nie. Gedurende daardie tydperk het die visnetinstrument valse en ware belyers van die Christelike godsdiens bymekaargemaak. Ja, dit het slegte sowel as goeie visse bymekaargemaak. Daarbenewens het die skeidingswerk wat die engele doen nie destyds omstreeks 1919 geëindig nie. Nee, beslis nie. Hierdie gelykenis van die visnet is, wat sekere aspekte betref, tot in ons tyd nog van toepassing. Ons, asook ons onmiddellike toekoms, is daarby betrokke. Dit is uiters noodsaaklik dat ons verstaan hoe en waarom dit die geval is as ons wil hê dat die volgende woorde op ons van toepassing moet wees: “Julle oë is gelukkig, omdat hulle sien; en julle ore, omdat hulle hoor” met begrip.—Mattheüs 13:16.
20 Jy weet waarskynlik dat die gesalfde oorblyfsel ná 1919 in die predikingswerk bedrywig geraak het in samewerking met die engele, wat aangehou het om die simboliese visnet te gebruik om visse op die strand uit te trek, om die goeies van die slegtes af te skei. Syfers vir daardie tydperk toon dat die vangs van goeie vis wat met God se gees gesalf is, voortgesit is totdat die laaste van die 144 000 deur die simboliese net bymekaargebring is (Openbaring 7:1-4). Maar teen die middel-dertigerjare het die insameling van goeie visse wat met die heilige gees gesalf is basies geëindig. Moes die gemeente van die gesalfde oorblyfsel die net toe as ’t ware weggooi en eenvoudig ledig rondsit en vir hulle hemelse beloning wag? Beslis nie!
Jou betrokkenheid by die visvangs
21. Watter ander visvangs vind in ons tyd plaas? (Lukas 23:43).
21 Jesus se gelykenis van die visnet het die aandag gevestig op die goeie visse wat beloon sou word met ’n plek in die Koninkryk van die hemele. Maar benewens daardie gelykenis is daar ’n ander simboliese visvangs wat op ’n baie groot skaal plaasvind, soos die vorige artikel getoon het. Hierdie visvangs is nie om die goeie gesalfde visse te vang wat in Jesus se gelykenis gemeld word nie, maar om simboliese visse lewend te vang en hulle die wonderlike hoop te gee om vir ewig op ’n paradysaarde te lewe.—Openbaring 7:9, 10; vergelyk Mattheüs 25:31-46.
22. Watter wonderlike resultaat kan ons verwag, en wat is die alternatief?
22 As jy daardie hoop koester, kan jy jou verheug in die feit dat Jehovah toegelaat het dat ’n lewensreddende werk om vis te vang tot nou toe voortduur. Dit het ’n wonderlike verwagting vir jou moontlik gemaak. Verwagting? Ja, dit is die gepaste woord om te gebruik, aangesien die verwesenliking daarvan afhang van ons volgehoue getrouheid aan die Een wat die voortgesette visvangs lei (Sefanja 2:3). Onthou, in die gelykenis het nie al die visse wat deur die visnet opgetrek is met hulle lewe daarvan afgekom nie. Jesus het gesê dat die slegte, of goddelose, visse van die regverdiges afgeskei sal word. Met watter doel? In Mattheüs 13:50 het Jesus die ernstige gevolge vir die slegte, of goddelose, visse beskryf. Hulle sal in die vuuroond, wat ewige vernietiging beteken, gegooi word.—Openbaring 21:8.
23. Wat maak die visvangs vandag so belangrik?
23 Daar wag ’n glorieryke toekoms op die goeie gesalfde visse en op die simboliese visse wat vir ewig op die aarde kan lewe. Die engele sien dus tereg toe dat die werk om visse te vang nou met welslae oor die hele aarde gedoen word. En watter vangs lewer dit tog op! Jy sal reg wees as jy sê dat dit op sigself net so ’n wonderdadige vangs is soos die letterlike visse wat die apostels gevang het toe hulle hulle nette op Jesus se aanbeveling uitgegooi het.
24. Wat moet ons met betrekking tot die geestelike visvangs wil doen?
24 Neem jy soveel moontlik deel aan hierdie lewensreddende werk van geestelike visvangs? Dit kan ons almal tot voordeel strek om te kyk wat oor die hele aarde gedoen word in die groot werk wat nou aan die gang is om visse te vang en lewens te red ongeag hoeveel ons as individue tot nou toe gedoen het. As ons dit doen, sal dit ons tot selfs groter ywer aanspoor om die nette uit te gooi vir ’n vangs in die dae wat voorlê!—Vergelyk Mattheüs 13:23; 1 Thessalonicense 4:1.
Onthou jy die volgende?
◻ Wat word deur die twee soorte visse in Jesus se gelykenis van die visnet voorgestel?
◻ In watter sin was die kerke van die Christendom betrokke by die werksaamheid van die visnet?
◻ Waarom is die visvangs wat in ons dag plaasvind so kritiek?
◻ Watter soort selfondersoek moet die gelykenis van die visnet ons almal beweeg om te doen?
[Prent op bladsy 18]
Daar word al eeue lank visgevang in die See van Galilea
[Erkenning]
Pictorial Archive (Near Eastern History) Est.