Luister na Jehovah terwyl die einde nader kom
“Gelukkig is die mens wat na my luister . . . Want hy wat my vind, het die lewe gevind.”—SPREUKE 8:34, 35.
1, 2. (a) Wat sê sommige nou, ondanks die gebrek aan vrede dwarsdeur die mens se geskiedenis? (b) Waarom is ware vrede deur menslike pogings onmoontlik?
ONDANKS die gebrek aan vrede dwarsdeur die geskiedenis, veral in hierdie 20ste eeu, sê sommige dat die nasies stappe doen om hulle geskille by te lê. Hulle wys op die feit dat wêreldleiers spitsberade hou om vrede te bespreek en verskeie verdrae te teken. Die Verenigde Volke het dan glad verlede jaar tot die “Internasionale Vredesjaar” uitgeroep! Daar is gehoop dat dit die begin van ’n buitengewone poging aan die kant van die nasies sou sien om vrede te bevorder, met moontlike welslae in die nabye toekoms.
2 Maar het soortgelyke pogings deur die geskiedenis heen blywende vrede gebring? As dit menslik moontlik was, moes daar al lank gelede vrede gewees het—Iank voordat daar vyfmiljard mense was wat in meer as 160 nasies verdeel is, met tallose soorte politieke, ekonomiese en godsdiensfilosofieë. Maar daar was nog nooit vrede nie, en vrede sal ook nooit deur die pogings van hierdie wêreld se leiers tot stand gebring word nie. Waarom nie? Een rede is dat die mensdom se probleme nou so ernstig is dat dit nie deur mensepogings alleen opgelos kan word nie. Soos Jeremia 10:23 tereg sê: ‘Dit behoort nie aan ’n man om te loop en sy voetstappe te rig nie.’
Waarom mensepogings nie kan slaag nie
3. Om watter ander rede sal mense en nasies nooit ware vrede bring nie?
3 Daar is nog ’n rede waarom die pogings van mense en nasies nooit ware vrede kan bring nie. Die Bybel meld dit in 1 Johannes 5:19, waar dit sê: ‘Die hele wêreld lê in die mag van die Bose.’ Openbaring 12:9 dui daarop dat daardie “Bose” die een is “wat genoem word duiwel en Satan, wat die hele wêreld verlei”. Tweede Korinthiërs 4:4 noem hom “die god van hierdie wêreld”. Die hele teenswoordige stelsel van politieke, ekonomiese en godsdienstige heerskappy wat soveel geweld tot gevolg gehad het, is dus die produk van Satan se heerskappy, nie van God se heerskappy nie. Dit is waarom 1 Korinthiërs 2:8 (NAV) die volgende sê oor die wysheid wat van God kom: “Nie een van die heersers van hierdie wêreld het hierdie wysheid geken nie.”—Lukas 4:5, 6.
4. Wat was die gevolg toe ons eerste ouers opgehou het om na Jehovah te luister?
4 Toe Satan teen God in opstand gekom het, het hy ons eerste ouers oorreed om na hom te luister in plaas van na God. Hulle het gevolglik van gehoorsaamheid aan God afgewyk en sowat 6 000 jaar van foltering oor die mensdom gebring. Die Bybel deel ons duidelik mee dat Satan mense wysgemaak het dat hulle beter sou vaar as hulle nie na hulle Skepper luister nie (Genesis 3:1-5). In sy wysheid het Jehovah die wêreld van die mensdom oor die algemeen tot vandag toe op hulle eie, sonder sy leiding, laat voortploeter. En gedurende al hierdie eeue is daar tog seker bo alle twyfel bewys dat menseheerskappy ’n mislukking is.—Deuteronomium 32:5, NW; Prediker 8:9.
5. Wat sou ons nog steeds met ons hê, selfs al kon vrede deur mensepogings bewerkstellig word?
5 Toe Adam en Eva opgehou het om na Jehovah, die Bron van volmaakte lewe, te luister, het hulle onvolmaak geword en uiteindelik gesterf. Al hulle nakomelinge is gevolglik onvolmaak gebore. Siekte, die ouderdom en die dood het die mensdom se lot geword (Romeine 5:12). Selfs al sou mense vrede kon bring, sou hulle dus nog nie oorgeërfde onvolmaaktheid kon genees nie. Ons sou nog steeds siek word, oud word en sterf. Aangesien Satan hiervoor verantwoordelik is, het Jesus van hom gesê: “Hy was ’n mensemoordenaar van die begin af en staan nie in die waarheid nie” (Johannes 8:44). Ja, wanneer ’n mens dink aan die miljarde wat in die verlede gelewe en gesterwe het, is dit asof Satan hulle almal vermoor het.
6. Wie is die vredesverstoorders, en wat moet met hulle gebeur?
6 Satan het ook ander geesskepsele oorgehaal om saam met hom in opstand te kom, en al hierdie goddeloses het geweier om te luister wanneer Jehovah spreek. Dit is dus Satan, sy demone en opstandige mense wat hierdie wêreld gemaak het wat dit is. Hulle moet almal uit die weg geruim word, en so sal daar ’n einde gemaak word aan hierdie rampspoedige 6 000-jarige eksperiment met onafhanklikheid van God. Romeine 16:20 (NAV) verseker ons: “God wat vrede gee, sal die Satan spoedig . . . verpletter”, tesame met sy demone en alle mense wat weier om te luister wanneer God spreek.—Mattheüs 25:41.
Nou nog nodiger om te luister
7. Waarom moet ons nou ons pogings verskerp om Jehovah te dien?
7 Ons is nou baie diep in die laaste deel van hierdie “laaste dae” (2 Timotheüs 3:1-5). Daarom is dit des te dringender om te luister na wat Jehovah vir ons sê. Dit is eweseer nodig om groter gewilligheid te toon om opofferings te maak om hom te dien. Waarom is groter inspanning nodig? Omdat Satan weet dat daar vir hom “min tyd” oorbly (Openbaring 12:12). Daarom sal hy beslis sy pogings om te verderf en te vernietig verskerp.
8. (a) Waarom kan die vyande van die predikingswerk dit nie keer nie? (b) Wat moet ons doen om goddelike steun te behou?
8 Satan wil veral verhinder dat Jehovah se Getuies die goeie nuus van die Koninkryk verkondig. Maar hy kan nie, want Jehovah het hulle belowe: “Elke wapen wat teen jou gesmee word, sal niks uitrig nie” (Jesaja 54:17). Daar sal bevind word dat diegene wat sy knegte teëstaan “selfs teen God stry” (Handelinge 5:38, 39). Met die kragtige steun van Jehovah se gees, Christus Jesus en ’n mag der menigte engele neem die intensiteit van die Koninkryksverkondiging elke jaar toe. Om daardie goddelike steun te behou, gehoorsaam Jehovah se knegte die raad in Jakobus 4:7, 8 noulettend: “Onderwerp julle dan aan God; weerstaan die duiwel, en hy sal van julle wegvlug. Nader tot God, en Hy sal tot julle nader.”
9. Waarom moet ons Satan nie onderskat nie?
9 Moenie Satan se vermoë om te bedrieg en kwaad te doen onderskat nie. God se Woord waarsku: “Wees nugter en waaksaam, want julle teëstander, die duiwel, loop rond soos ’n brullende leeu en soek wie hy kan verslind. Hom moet julle teëstaan, standvastig in die geloof” (1 Petrus 5:8, 9). As jy geweet het dat daar ’n rasende leeu in julle buurt rondloop, sou jy voorsorg getref het om jou en jou gesin te beskerm. Wat Satan betref, moet ons nog waaksamer wees, want hy kan ons ewige skade berokken. Ongelukkig is die meeste mense weerloos, want hulle weet nie eens dat Satan bestaan nie. Waarom is dit die geval? Omdat hulle kies om nie na Jehovah se Woord te luister nie. En wat sal die gevolg van daardie slegte keuse wees? “Net wat die mens saai, dit sal hy ook maai.”—Galasiërs 6:7.
Wanneer hulle uitroep: “Vrede en veiligheid”
10, 11. (a) Wat moet ons onthou in verband met enige welslae wat die nasies moontlik met hulle vredespogings behaal? (b) Watter Bybelprofesie het betrekking op die hedendaagse soeke na vrede deur die nasies? (c) Hoe duursaam sal enige sodanige vrede wees?
10 Moenie onverhoeds gevang word deur enige welslae wat die nasies moontlik met hulle vredespogings behaal nie. Onthou altyd dat Jehovah geeneen van hierdie wêreld se instellinge gebruik om vrede te bring nie. Jehovah het sy eie manier om ware vrede te bring, en dit is net deur middel van sy Koninkryk in die hande van Christus. Enige welslae wat die nasies behaal met pogings om vrede te bewerkstellig, sal kortstondig en slegs skyn wees. Niks sal werklik verander het nie. Misdadigheid, geweld, oorlog, honger, armoede, gesinsverbrokkeling, onsedelikheid, siekte, die dood en Satan en sy demone sal nog met ons wees totdat Jehovah van hulle almal ontslae raak. “As die HERE die huis nie bou nie, tevergeefs werk die wat daaraan bou.”—Psalm 127:1.
11 Bybelprofesie toon wel dat die nasies in ons dag ’n doelbewuste poging sal aanwend om vrede te verkry. Dit sê: “Julle weet self baie goed dat die dag van die Here kom net soos ’n dief in die nag. Want wanneer hulle sê: Vrede en veiligheid—dan oorval ’n skielike verderf hulle soos die barensnood ’n swanger vrou, en hulle sal sekerlik nie ontvlug nie” (1 Thessalonicense 5:2, 3). Daardie uitroep “Vrede en veiligheid” sal nie beteken dat die verval van hierdie wêreld gestuit is nie. Tweede Timotheüs 3:13 sê dat “goddelose mense en bedrieërs sal voortgaan van kwaad tot erger”. Die ware toedrag van sake sal nog steeds wees soos die hoof van ’n omgewingsorganisasie gesê het: “Die kernprobleem waarmee die samelewing te kampe het, is dat dit onregeerbaar geword het.”
12. Wat weet Jehovah se knegte oor die ware betekenis van die komende uitroep oor “vrede en veiligheid”?
12 Baie in die wêreld sal hulle deur ydele verwagtinge laat mislei gedurende die komende uitroep oor “vrede en veiligheid”. Maar nie Jehovah se knegte nie, want hulle luister wanneer God spreek. Hulle weet dus uit sy Woord dat so ’n verklaring nie ware vrede en veiligheid sal bring nie. Inteendeel, dit sal in werklikheid die laaste teken wees dat “’n skielike verderf hulle gaan oorval’. Dit sal die naderende begin aankondig van die “groot verdrukking” wat Jesus vir ons dag voorspel het. Hy het gesê: “Want dan sal daar groot verdrukking wees soos daar van die begin van die wêreld af tot nou toe nie gewees het en ook nooit sal wees nie.”—Mattheüs 24:21.
13. Hoe beskryf die Bybel die einde van menseheerskappye?
13 Gedurende die “groot verdrukking” sal daar ’n einde gemaak word aan menseheerskappy. Psalm 2:2-6 sê: “Die konings van die aarde staan gereed, en die vorste hou saam raad teen die HERE en teen sy Gesalfde en sê: Laat ons hulle bande stukkend ruk en hulle toue van ons afwerp! Hy wat in die hemel woon, lag; die Here spot met hulle. Dan sal Hy hulle aanspreek in sy toorn, en in sy grimmigheid sal Hy hulle verskrik. Ék tog het my Koning gesalf oor [hemelse] Sion, my heilige berg.” Psalm 110:5, 6 voeg by: “Die Here . . . verbrysel konings op die dag van sy toorn. Hy sal ’n strafgerig hou onder die nasies.” Alle politieke planne sal eindig, want Jesaja 8:9, 10 (NAV) sê: “Maak maar klaar vir die geveg, julle sal inmekaar stort! Maak maar klaar vir die geveg, julle sal inmekaar stort! Smee maar planne, dit sal verydel word! Pleeg maar oorleg, daar sal niks van kom nie! God is by ons!”
Seker van oorlewing
14. Waarom is ons seker dat sommige hierdie wêreld se einde gaan oorlewe?
14 Ons is seker dat Jehovah sy volk goed op hoogte van sake sal hou sodat hulle die nodige stappe kan doen om die komende “groot verdrukking” te oorlewe. Hoe kan ons so seker wees? Omdat die profesie in Openbaring 7:9, 14 toon dat “’n groot menigte” inderdaad behoue bly. Waarom? Omdat hulle luister wanneer Jehovah spreek en behoorlik onderrig is. Daarom kan die lede van die “groot menigte” doen wat Openbaring 7:15 sê: “Hulle . . . dien Hom dag en nag.” Hulle doen aldus God se wil, dra sy goedkeuring weg en word beskerm om hierdie wêreld se einde te oorlewe.—1 Johannes 2:15-17.
15. Hoe beskryf Joël die verbryseling van hierdie stelsel, en wat sal die gevolg vir God se knegte wees?
15 Joël 3:13-16 praat ook van die oorlewing van God se knegte wanneer hierdie stelsel soos druiwe in ’n parskuip verbrysel word. Dit sê: “Steek die sekel in, want die oes is ryp! . . . Die kuipe loop oor! Want hulle boosheid is groot. Menigtes, menigtes in die dal van beslissing, want naby is die dag van die HERE in die dal van beslissing! Die son en die maan word duister, en die sterre trek hulle glans in. En die HERE brul uit [hemelse] Sion . . . sodat hemel en aarde bewe. Maar die HERE sal ’n toevlug wees vir sy volk.”
16. Watter ander profesieë toon dat Jehovah sy volk deur wêreldvernietiging heen sal bewaar?
16 In Jesaja 26:20, 21 sê Jehovah eweneens van daardie tyd wat voorlê: “Kom, my volk, gaan in jou binnekamers en sluit jou deur agter jou toe, verberg jou vir ’n klein oomblik, totdat die grimmigheid verbygaan. Want kyk, die HERE sal uit sy plek uitgaan om die ongeregtigheid van die bewoners van die aarde oor hulle te besoek.” Daarom spoor Sefanja 2:2, 3 ons aan: “Voordat oor julle kom die dag van die toorn van die HERE . . . Soek die HERE, o alle ootmoediges van die land, wat sy ordening onderhou; soek geregtigheid, soek ootmoedigheid—miskien sal julle verborge bly op die dag van die toorn van die HERE.”
“Hardloop” na Jehovah
17. (a) Wat moet gedoen word om Jehovah se beskerming te geniet? (b) Wat het mense in die wêreld voor die Vloed verkeerd gedoen?
17 Spreuke 18:10 sê: “Die Naam van die HERE is ’n sterk toring; die regverdige hardloop daarin en word beskut.” “Hardloop” jy na Jehovah? Onthou wat Jesus van die mense in Noag se dag gesê het, naamlik dat hulle “geëet en gedrink het, getrou en in die huwelik uitgegee het, tot op die dag waarop [Noag] in die ark gegaan het, en daar geen ag op geslaan het nie totdat die sondvloed gekom en almal weggevoer het” (Mattheüs 24:38, 39, Katolieke Nuwe Testament). Hulle fout was dat hulle so behep was met allerhande ander dinge dat hulle nie geluister het toe God tot hulle gespreek het deur sy kneg Noag, ’n “prediker van geregtigheid”, nie (2 Petrus 2:5). Omdat hulle nie geluister het nie, is hulle almal in die verderf in “weggevoer” toe die Vloed gekom het.
18. Waarom het die feit dat hulle net “gawe” mense was diegene wat in die Vloed vernietig is, nie gered nie?
18 Baie van diegene wat in die Vloed omgekom het, het hulself ongetwyfeld as “gawe” mense beskou omdat hulle nie betrokke was by die geweld wat die samelewing in daardie dae gevul het nie. Maar hulle is nie gered net omdat hulle “gawe” mense was nie. Deur hulle onverskillige houding het hulle die boosheid van hulle dag vergoelik. Die kritieke saak is dat hulle nie na Jehovah toe ‘gehardloop’ het nie; hulle het nie geluister toe God se kneg gespreek het nie. Hulle het dus nie die nodige stappe gedoen om die ramp te oorleef nie. Diegene wat wel geluister het, het dit andersyds oorleef.
19. Watter wonderlike voordeel maai Jehovah se knegte selfs nou al, en waarom?
19 God spreek vandag vrede tot diegene wat na hom luister. Met watter gevolg vir hulle? Jesaja 54:13 sê: “Al jou kinders sal deur die HERE geleer wees, en die vrede van jou kinders sal groot wees.” Ja, “die HERE sal sy volk seën met vrede” (Psalm 29:11). Te midde van hierdie gewelddadige wêreld het Jehovah se Getuies gevolglik ware, onverbreeklike vrede onder mekaar. Hulle het ’n liefdevolle, internasionale broederskap wat wêreldleiers, hulle nasies en hulle godsdienste nie kan nadoen nie. Waarom nie? Omdat hulle nie werklik luister wanneer God spreek nie. Hulle doen dus nie wat hy sê nie. Maar Jehovah se Getuies luister wel na God. Hulle neem die woorde in Prediker 12:13 ernstig op: “Vrees God en hou sy gebooie; want dit geld vir alle mense.”
20. Wat moet elkeen doen om tot in God se nuwe wêreld behoue te bly?
20 Dit is wat elkeen—ja, almal wat in God se nuwe wêreld wil lewe—moet doen. Hulle moet sonder versuim na Jehovah “hardloop”. Trouens, hulle moet gelei word deur Godgegewe wysheid wat sê: “Luister dan nou na my, seuns; want gelukkig is hulle wat my weë bewaar. Luister na tug en word wys, en verwerp dit nie. Gelukkig is die mens wat na my luister . . . Want hy wat my vind, het die lewe gevind.”—Spreuke 8:32-35.
Hoe sal jy antwoord?
◻ Waarom sal mensepogings nooit daarin slaag om vrede te bring nie?
◻ Waarom is dit nou dringender om na Jehovah te luister?
◻ Wat sal die komende uitroep “Vrede en veiligheid” werklik beteken?
◻ Wat moet ons doen as ons tot in God se nuwe stelsel behoue wil bly?
[Prent op bladsy 17]
Net soos ’n brullende leeu verskerp Satan sy pogings om te verderf en te vernietig
[Prent op bladsy 18]
Wanneer hierdie stelsel soos druiwe in ’n parskuip verbrysel word, ‘sal Jehovah ’n toevlug wees vir sy volk’