Toetsing en sifting in ons dag
‘Wie kan die dag van sy koms verdra? En wie kan standhou as Hy verskyn?”—MALEAGI 3:2.
1. Wat het Jehovah gevind toe hy in ons dag na die geestelike tempel gekom het, en watter vraag het dit laat ontstaan?
WAT het Jehovah gevind toe hy as “die ware Heer” kort na die Koninkryk in 1914 in die hemele opgerig is, vergesel van sy “boodskapper van die verbond”, na die geestelike tempel gekom het? Sy volk het loutering en reiniging nodig gehad. Sou hulle hulle hieraan onderwerp en enige nodige reiniging van hulle organisasie, bedrywigheid, leer en gedrag verduur? Soos Maleagi dit gestel het: “Wie kan die dag van sy koms verdra? En wie kan standhou as Hy verskyn?”—Maleagi 3:1, 2.
2. Wie is “die seuns van Levi” van Maleagi 3:3 in ons dag?
2 Jehovah aanvaar die verantwoordelikheid om “die seuns van Levi” te reinig en te louter (Maleagi 3:3). In eertydse Israel het die stam van Levi die priesters en tempelassistente voorsien. Sulke “seuns van Levi” kom ooreen met die gesamentlike liggaam van gesalfdes wat vandag as priesters onder Jesus, die Hoëpriester, dien (1 Petrus 2:7-9; Hebreërs 3:1). Hulle was die eerstes wat getoets is toe Jehovah met sy “boodskapper van die verbond” na die geestelike tempel gekom het. Wel, watter bewys is daar dat hierdie loutering van die laaste deel van die Eerste Wêreldoorlog af plaasgevind het?
’n Tyd van vurige beproewings
3. Wat was die toestand van God se getuies teen die noordelike lente van 1918?
3 Toe Jehovah sy “boodskapper van die verbond” na die geestelike tempel vergesel het, het Hy bevind dat die oorblyfsel loutering en reiniging nodig het. The Watch Tower het byvoorbeeld sy lesers aangespoor om 30 Mei 1918 ’n biddag vir die oorwinning van die demokratiese moondhede te maak, soos versoek deur die Amerikaanse kongres en deur president Wilson. Dit het neergekom op ’n skending van Christelike neutraliteit.—Johannes 17:14, 16.
4. Watter wending het die vervolging van Jehovah se knegte toe geneem?
4 Die geestelikes en die regerings het groot druk uitgeoefen op Jehovah se gesalfde knegte. Nadat die gesalfde oorblyfsel valslik van sedisie beskuldig is, het hulle probeer om hulle onskuld in die openbaar bekend te maak. Maar op 7 Mei 1918 is lasbriewe uitgereik vir die inhegtenisneming van agt lede van die bestuur en redaksie van die Wagtoring- Bybel- en Traktaatgenootskap, onder meer die president, J. F. Rutherford. Hulle verhoor het op Maandag, 3 Junie, begin. Op 20 Junie was die jurie se uitspraak dat hulle op vier hoofde skuldig is. Op 4 Julie 1918 is hierdie toegewyde manne dus per trein na die gevangenis in Atlanta, Georgia, VSA, geneem.
5. Hoe was dit duidelik dat sifting nodig was onder diegene wat God gedien het, en wat toon dat dit plaasgevind het?
5 Teen die noordelike somer van 1918 was die eens sterk, georganiseerde stem waarmee die gesalfdes in die openbaar oor Jehovah se Koninkryk gepreek het baie sagter. Dit was asof hulle ‘doodgemaak’ is ten opsigte van hulle openbare bedrywigheid (Openbaring 11:3, 7). Ten tye van die Genootskap se byeenkomste daardie somer het sommige afvalliges weggebreek en hulle eie opponerende godsdiensgroepe gestig. Omdat hulle die karaktertrekke van ’n “slegte dienskneg” geopenbaar het, is hulle soos “kaf” uitgewan om van Jehovah se getroue oorblyfsel geskei te word (Mattheüs 3:12; 24:48-51). Die Herdenking van Christus se dood is op Sondag, 13 April 1919, gevier, en 17 961 het dit in talle lande bygewoon. Vergeleke met die onvolledige rapport van 1917 het die Gedenkmaalopkoms met meer as 3 000 afgeneem, ’n aanduiding van die uitwerking van die sifting.
6. Hoe weet ons dat Jehovah sulke beproewings toegelaat het met die uiteindelike seën van sy volk voor oë?
6 Maar dit was met hulle uiteindelike seën voor oë dat Jehovah toegelaat het dat sy volk sulke vurige beproewings beleef. Hy het hulle nooit heeltemal versaak nie. Op Dinsdag, 25 Maart 1919, is J. F. Rutherford en sy sewe metgeselle op borgtog vrygelaat, en hulle is later heeltemal vrygespreek. Vir die gereinigde oorlewendes van hierdie toetstyd was daar skielik bevryding van gevangenskap! Ja, “gees van die lewe uit God [het] in hulle ingegaan, en hulle het op hul voete gaan staan”, gereed vir aksie.—Openbaring 11:11.
7. (a) Wat het hierdie herstelde getuies nou gedoen? (b) Wat was die gevolg van hierdie loutering en reiniging?
7 Wat sou hulle nou doen? As ’n herstelde Christengemeenskap het die oorblyfsel hulself noukeurig ondersoek. Hulle het Jehovah om vergifnis gevra vir enige sondes van kompromie. (Vergelyk Psalm 106:6; Jesaja 42:24.) Hulle het deurgekom as ’n gereinigde volk. Omdat hulle gelouter is, het die trouhartige oorblyfsel vir Jehovah ’n volk geword wat ‘’n offer in geregtigheid bring’ (Maleagi 3:3). Die geestelike lofoffers wat hulle gebring het, het vir God aangenaam geword (Hebreërs 13:15). Hulle was verheug dat die kort tussenpoos van Jehovah se misnoeë geëindig het. Hulle was seker dat hulle diens in die toekoms vir hom aanneemlik sou wees (Jesaja 12:1). Van 1 tot 8 September 1919 is ’n vreugdevolle byeenkoms te Cedar Point, Ohio, gehou wat deur 7 000 bygewoon is en waar 200 gedoop is. Al hierdie dinge het gedui op ’n herstel en ’n bereidwilligheid om Jehovah se predikingswerk te doen.
8. (a) Hoe raak die louterings- en reinigingsproses ons vandag? (b) Wie benewens dIe hedendaagse “seuns van Levi” moet getoets en gesif word?
8 Hoe raak al hierdie dinge God se volk wat vandag lewe? Volgens die profesie sou Jehovah, vergesel van sy boodskapper, kom en “sit as ’n louteraar en reiniger” (Maleagi 3:3, NW). Ja, die louterings- en reinigingsproses sou voortduur, en hy sou “sit” en dit noukeurig dophou. Die feit dat die lojale oorblyfsel ’n tyd van vurige beproewings vroeg in hierdie eeu beleef het, het nie beteken dat die Groot Louteraar sy reiniging van hulle afgehandel het nie. Die toetsing en sifting duur tot ons dag toe voort. Jehovah is nog steeds by sy tempel en vel oordeel. Hy het nie net “die seuns van Levi”, die gesalfde oorblyfsel, gereinig nie. Maleagi se profesie het getoon dat Hy besorg is oor “die vreemdeling”, wat ooreenkom met die “groot menigte” met die vooruitsig op aardse lewe (Maleagi 3:5; Openbaring 7:9, 10). Ja, gedurende die afgelope 69 jaar was daar ’n voortdurende suiwering van Jehovah se volk op vier algemene maniere.
Organisatoriese loutering
9. Wat is sommige van die progressiewe ontwikkelinge in die organisatoriese struktuur sedert 1919?
9 Ten eerste, reiniging het plaasgevind namate die wêreldwye organisasie hom progressief geskik het na Skriftuurlike beginsels wat pas tevore verstaan is. Demokratiese maniere om gemeentesake te hanteer, moes geleidelik afgeskaf word. Beskou sommige van die progressiewe ontwikkelinge op hierdie gebied.
1919: Die Bestuursliggaam het begin om aanstellings te doen deur van die hoofkwartier van die Wagtoringgenootskap af ’n permanente diensleier vir elke gemeente te benoem om toesig te hou oor velddiensbedrywighede.
1932: Die jaarlikse verkiesing van ouere manne en diakens is beëindig; die gebruik dat die gemeente manne vir hierdie posisies kies, is vervang deur die verkiesing van ’n dienskomitee wat die diensleier, wat deur die Genootskap aangestel is, bygestaan (en ingesluit) het.
1937: Daar is besef dat “Jonadabs” [diegene met ’n aardse hoop] verantwoordelike posisies in die gemeente mag beklee.
1938: Alle opsieners en hulle assistente sou voortaan op ’n teokratiese wyse deur die Genootskap aangestel word.
1972: Daar is verduidelik dat die Skriftuurlike manier om elke gemeente te bestuur deur ’n liggaam van ouere manne is wat deur die Genootskap aangestel is, en nie net deur een ryp Christenman nie.
1975: Die stigting van komitees van die Bestuursliggaam om na verskeie verantwoordelikhede om te sien; sake sou nie deur ’n enkele man bestuur word nie, maar almal in ’n komitee sou ewe veel seggenskap hê en sou verenig op die leiding van Christus Jesus staatmaak.
10. (a) Wat was die gevolg van sulke loutering? (b) Hoe voel jy oor al sulke aanpassings?
10 Wat was die gevolg van sulke aanpassings? Jehovah se seën is ongetwyfeld ryk, soos blyk uit die geestelike ontwikkeling en aanwas van sy aanbidders. (Vergelyk Handelinge 6:7; 16:5.) Sommige opsieners en ander is weliswaar uitgesif omdat hulle hul nie lojaal aan die Godgerigte manier onderwerp het nie. Maar verreweg die meerderheid van Jehovah se volk was gehoorsaam en het hulle aan organisatoriese verbeteringe onderwerp (Hebreërs 13:17). Hulle besef dat die Groot Louteraar hulle deur middel van sulke aanpassings nader aan Skriftuurlike metodes vir die gemeentes gebring het.
Die veldbediening
11. Watter progressiewe vorme het die predikingswerk in onlangse dekades aangeneem?
11 Ten tweede, reiniging het plaasgevind deur toetse in verband met deelname aan die velddiens.
1922: Almal wat aan die gemeentes verbonde was, is aangespoor om deel te neem aan velddiens van huis tot huis. Die maandelikse Bulletin (nou Ons Koninkryksbediening) met diensvoorskrifte was nou beskikbaar.
1927: Gereelde predikingswerk van huis tot huis op Sondae het begin; boeke en boekies is teen ’n bydrae versprei.
1937: Die verkondigers het die eerste Modelstudie-boekie vir tuisbybelstudies ontvang.
1939: Die eerste jaarlikse Wagtoringintekeningveldtog is onderneem; meer as 93 000 nuwe intekeninge is verkry.
1940: Tydskrifwerk op straat het begin.
Hierdie openbare prediking het verdere progressiewe vorme aangeneem, onder meer die doen van herbesoeke en die hou van tuisbybelstudies.
12. (a) Wat was die gevolg van sulke loutering van die veldbediening? (b) Hoe kan ons ons lojaliteit toon teenoor die wyse waarop Jehovah sy volk louter?
12 Wat was die gevolg? Deur die jare heen is sommige uitgesif omdat hulle onwillig was om vrugdraende Christene te wees (Johannes 15:5). Maar die grootste deel van Jehovah se volk het beslis gehoor gegee aan die oproep om Koninkryksverkondigers. Daardie groepie van minder as 8 000 in 1919 het dan aangegroei tot ’n hoogtepunt van 3 229 022 Koninkryksverkondigers in 1986! Wat van die voltydse bediening? Vergeleke met 150 aktiewe kolporteurs (pioniers) in die noordelike lente van 1919 was daar verlede jaar elke maand gemiddeld meer as 391 000 pionierverkondigers—die meeste in die geskiedenis van Jehovah se hedendaagse Getuies! Deur mee te doen aan die verkondiging van die goeie nuus toon ons ons lojale steun aan die manier waarop Jehovah aangehou het om sy volk te reinig.—1 Korinthiërs 9:16.
Meer lig
13. Wat is van die voorbeelde van hoe Jehovah sy volk verlig het?
13 Ten derde, reiniging het plaasgevind namate God se volk getoets is ten opsigte van hulle aanvaarding van progressiewe geestelike verligting uit die Bybel (Spreuke 4:18). Van 1919 af tot nou toe was daar inderdaad ’n vloed van nuut onthulde waarhede.
1925: Daar is duidelik onderskei dat daar twee afsonderlike en opponerende organisasies is—Jehovah s’n en Satan s’n.
1931: Die nuwe naam Jehovah se Getuies is aangeneem.
1935: Die “groot menigte” van Openbaring 7:9-15 is geïdentifiseer as ’n klas met ’n aardse bestemming.
1941: Daar is getoon dat die regmatigheid van Jehovah se universele soewereiniteit die hoofgeskil is wat deur Satan se uitdaging geopper is.
1962: Die “hoëre owerhede” van Romeine 13:1 (NW) is tereg geïdentifiseer as die sekulêre regeringsowerhede waaraan Christene betreklike onderdanigheid moet toon.
1986: Daar is besef dat die oorblyfsel sowel as die “groot menigte” figuurlik Jesus se vlees moet eet en sy bloed moet drink deur sy offer te aanvaar om in harmonie met hom te wees.—Johannes 6:53-56.
Namate Jehovah sy volk verlig het, het dit met die verloop van die dekades duidelik geword dat gemeentes aandag moet skenk aan die handhawing van ’n rein, neutrale organisasie wat die heiligheid van bloed respekteer.—1 Korinthiërs 5:11-13; Johannes 17:14, 16; Handelinge 15:28, 29.
14. (a) Hoe het Jehovah se volk op sulke progressiewe verligting gereageer? (b) Wat is jou vaste voorneme ten opsigte van Jehovah se kommunikasiekanaal?
14 Hoe het God se volk gereageer op sulke progressiewe verligting? Daar was maar altyd ’n paar wat nie sekere aanpassings kon aanvaar nie. Hulle is uitgewan (Mattheüs 3:12). Maar hoe bly is Jehovah se lojale knegte tog nie oor sulke geestelike verligting nie! Op ’n tyd wanneer die Christendom in geestelike duisternis rondtas, word die pad van Jehovah se volk al helderder. Moet ons nie vasbeslote wees om vas te kleef aan die kommunikasiekanaal wat Jehovah gebruik en al sulke progressiewe verligting as “voedsel op tyd” aanvaar nie?—Mattheüs 24:45.
Onrein gebruike word afgeskaf
15. Hoe het Jehovah sy volk geleidelik van onrein of Babiloniese gebruike gelouter?
15 Ten vierde, reiniging het plaasgevind toe dit verpligtend geword het om onrein of Babiloniese gebruike af te skaf. In die twintigerjare het God se volk opgehou om Kersfees en ander feesdae met ’n heidense oorsprong te vier. In 1945 is die Christelike standpunt ten opsigte van bloedoortappings verduidelik. Namate die wêreld se morele milieu gedurende die sestigerjare en sewentigerjare voortdurend versleg het, het Die Wagtoring voortgegaan om vir God se volk reguit raad te gee oor onderwerpe soos geoorloofde gedrag tussen die geslagte en die nodigheid om met tabak en ander dwelms te breek.
16. Hoe moet sulke aanpassings ten opsigte van onrein gebruike beskou word?
16 Sulke aanpassings in verband met onrein gebruike was natuurlik dikwels ’n toets van lojaliteit vir God se volk. Maar diegene wat die nodige aanpassings gemaak het, het sulke veranderinge beskou as hulp om van ’n vuil kledingstuk ontslae te raak (Kolossense 3:9, 10). Hulle het besef dat hoewel die gebruike wat met sommige feesdae gepaard gaan onskadelik lyk, dit Jehovah se beskouing is wat vir ons van belang moet wees; hy het die heidense godsdiensgebruike waaruit hulle ontstaan het persoonlik waargeneem. Hulle het God se morele vereistes as ’n beskerming eerder as ’n beperking beskou, en daarom ‘is hulle deur Jehovah geseën omdat hulle rein geword het. As dit moeilik gelyk het om ’n aanpassing te verstaan, het hulle vertrou dat Jehovah besig was om vir hulle te “leer wat heilsaam is”.—Jesaja 48:17.
17, 18. (a) Hoe word ons individueel deur die Groot Louteraar getoets? (b) Wat moet ons vaste voorneme wees terwyl ons Jehovah se dag verwag?
17 Jaar na jaar gaan Jehovah voort om sy volk te louter en te reinig. Hulle het hulle gesamentlik onderwerp aan die louteringsproses ten opsigte van hulle organisasie, bedrywigheid, leer en sedelike reinheid. Maar wat van ons as individue? Deur sy organisasie voorsien Jehovah steeds “vaste spys” as leiding wat die hart louter. Ons beweegredes word beproef en ondersoek (Hebreërs 4:12; 5:14). Deur gunstig op die louterings- en reinigingsproses van die Groot Louteraar te reageer, kan ons rein bly terwyl ons “die groot en vreesinboesemende dag van Jehovah” verwag.—Maleagi 4:5,NW.
18 Dank sy Jehovah, “die ware Heer”, en sy “boodskapper van die verbond”, Jesus Christus, wat ons in hierdie tyd van toetsing en sifting louter en ons van onreinheid verlos. Mag ons almal vasbeslote wees om aan te hou wandel in Jehovah se rein weë van vrede onder die “Vredevors”, Jesus Christus, en sodoende ons gelukkige verhouding met Jehovah bewaar.—Jesaja 9:5; Psalm 72:7.
Hoe het Jehovah sy volk gelouter ten opsigte van—
◻ Organisatoriese aanpassings?
◻ Deelname aan die velddiens?
◻ Die aanvaarding van progressiewe verligting?
◻ Die afskaffing van onrein gebruike?
[Lokteks op bladsy 16]
As gevolg van reiniging en loutering het die trouhartige oorblyfsel vir Jehovah ’n volk geword wat ‘in geregtigheid ’n offer bring’
[Lokteks op bladsy 19]
Jehovah gaan jaar na jaar voort om sy volk te louter en te reinig
[Prent op bladsy 17]
Die eertydse louteraar het die onsuiwerhede, of skuim, afgeskep. Jehovah laat eweneens toe dat toetsing en sifting sy volk louter
[Prent op bladsy 18]
’n Paar is soos “kaf” uitgewan, maar Jehovah se lojale knegte aanvaar progressiewe geestelike verligting met blydskap
[Erkenning]
Prente-argief (Nabye Oosterse geskiedenis)