Koninkryksverkondigers berig

Bevryding van spiritisme deur Bybelwaarheid

JEHOVAH het sy beskouing van spiritisme baie duidelik aan Israel gestel: “Julle mag nie waarsêery en towery beoefen nie” (Levitikus 19:26, NAV). Maar hoe kan iemand wat by towery en spiritisme betrokke is van die demone se mag bevry word? Jesus het gesê: “Julle sal die waarheid ken, en die waarheid sal julle vrymaak” (Johannes 8:32). Dit blyk uit die volgende ondervinding van ’n Getuie in Frankryk.

“Ek het my pas in my nuwe huis gevestig toe ’n vriendelike buurvrou kom kuier en aangebied het om my horoskoop te trek. Ek het onmiddellik besluit om niks meer met haar te doen te hê nie, maar dit was glad nie maklik nie, want sy was van natuur baie gesellig.

“In November 1980 het ek siek geword, en sy het haar hulp kom aanbied. Ek het haar goedhartigheid begin waardeer. Ek het my des te meer tot haar aangetrokke gevoel toe sy my vertel het dat sy dikwels wakker word omdat sy van angs stik. Ek het toe besef dat sy nie so gelukkig is as wat ek gedink het nie. Maar hoe kon hierdie probleem van spiritisme aangepak word? Ek kon nie langer wag nie en het my voorgeneem om met haar oor die waarheid te praat.

“Ons het begin om die geldelike probleme te bespreek wat ons as ongetroude vroue ondervind. Toe het sy gesê: ‘Ek het ’n oplossing. Ek maak geld deur tarotkaarte te lees.’ Ek het my Bybel uitgehaal en vir haar gewys hoe gevaarlik dit is om met kragtige, bose magte deurmekaar te raak.

“Dit het tot ’n ernstige bespreking van spiritisme gelei. Sy het verduidelik dat alles wat sy voorspel, gebeur. Ek het haar probeer help om oor die saak te redeneer en het vervolgens Moses se woorde in Deuteronomium 18:10, 11 vir haar gewys: ‘Daar mag niemand by jou gevind word . . . wat met waarsêery, goëlery of met verklaring van voortekens . . . omgaan nie, . . . of wat ’n gees van ’n afgestorwene vra of ’n gees wat waarsê, of wat die dooies raadpleeg nie.’ Toe ek gaan, het sy gesê: ‘En ek het geglo dat ek die oplossing vir my probleme gevind het.’ Hoe het hierdie woorde my tog bemoedig, want sy het reeds, ná net een bespreking, in die verlede tyd oor spiritisme gepraat! Myns insiens het dit beteken dat sy in haar diepste wese werklik gesnap het waarom dit gaan.

“Sy het ’n onversadigbare begeerte na geestelike voedsel gehad en het die Bybel tot drie- of vieruur in die oggend gelees. Ons het aanvanklik twee studies per week gehad. Sy het vergaderinge bygewoon en het vinnig gevorder. Ons het die onderwerp van spiritisme met behulp van die Bybel en die Wagtoringpublikasies natuurlik deeglik ondersoek, en sy het self besluit om al haar besittings wat met demonisme verband hou te verbrand.

“Die vrou het volhard en het weldra die ‘goeie nuus’ aan ander verkondig. Sy het van tyd tot tyd telefoonoproepe van voormalige klante ontvang, en nadat sy verduidelik het dat sy haar spiritistiese bedrywighede laat vaar het, het sy hulle genooi om na iets baie interessanters te kom luister. Sy is gedoop en is nou ons suster.”