Vertrou op Jehovah—nie op “’n sameswering” nie
1. In watter toestand het Jehovah se sigbare organisasie gedurende die Eerste Wêreldoorlog verkeer?
DIE geledere van Jehovah se volk is gedurende die Eerste Wêreldoorlog aansienlik verminder as gevolg van onverbloemde afvalligheid. Vervolging wat deur godsdiensvyande aangeblaas is, het ook teen hulle gewoed. Hulle hoofkwartier in Brooklyn, New York, is gesluit. Daarbenewens was hulle sonder die bystand van die Genootskap se president, die sekretaris-tesourier, die kantoorbestuurder, ’n redakteur en vier ander verteenwoordigers van die Genootskap—wat almal in die strafgevangenis in Atlanta, Georgia, opgesluit was. Dit het gelyk asof die einde vir die geesverwekte Bybelstudente aangebreek het en asof hulle hemelse verheerliking ophande was. Maar dit was nie die geval nie!
2. Watter profesie van Jesaja het ’n hedendaagse toepassing in 1919 gehad?
2 Trouens, in die noordelike lente van 1919 kon die vrae wat die profeet Jesaja gestel het weer geopper word in ’n hedendaagse toepassing van Jesaja 66:6-8: “Hoor—’n rumoer uit die stad! Hoor—uit die tempel! Hoor—dit is die HERE wat sy vyande hulle dade vergeld! Voordat sy weë gekry het, het sy gebaar; voordat smart oor haar gekom het, is sy van ’n seuntjie verlos. Wie het so iets gehoor? Wie het sulke dinge gesien? Word ’n land [’n toestand van heerlike geestelike voorspoed] op een enkele dag gebore? Of word ’n nasie met een slag gebaar? Want Sion het weë gekry, meteens haar kinders gebaar.”
3. Watter bewys was daar in 1919 dat Sion haar seuns gebaar het en dat ’n nuwe “nasie met een slag” gebaar is?
3 Asof opgewek uit die dood, het die Internasionale Bybelstudente hulle eerste naoorlogse byeenkoms op 1-8 September 1919 by Cedar Point, Ohio, gehou. Die Genootskap se president, die sekretaris-tesourier, die kantoorbestuurder en die ander voormalige gevangenes, wat van alle aanklagte vrygespreek is, was by hierdie vreugdevolle geleentheid teenwoordig. Tot die vreugde van die byeenkomsgangers het president Rutherford die publikasie van ’n nuwe tydskrif, The Golden Age—wat vandag Ontwaak! genoem word—aangekondig. Meer as 200 pastoegewyde persone is ook gedoop. Jehovah se teokratiese organisasie het haar kinders vir ’n aktiewe lewe in die naoorlogse tydperk gebaar. Dit het nuwe, ja, onverskrokke, pionierprosedures geverg van die “nasie” wat as ’t ware met een slag gebore is en gevestig is in “’n land” wat opeens gebore is.
4. (a) Watter uitwerking het al hierdie dinge op “Babilon die Grote” gehad? (b) Waarvan was die blootlegging van “Babilon die Grote” se ware posisie ten opsigte van bomenslike, hemelse magte ’n voorspel?
4 Dit was ’n uitdagende situasie. Dit het “Babilon die Grote”, die wêreldryk van valse godsdiens, heeltemal verras. Haar lidmate, veral die Christendom, het baie ontsteld geraak. Sy het gemeen dat daar inbreuk gemaak word op haar vrede. Haar veiligheid as ’n onbetwisbare aanspraakmaker op die gebied van godsdiensaktiwiteit was nou in gevaar. Haar ware verhouding met bomenslike, hemelse magte sou blootgelê word, nie haar verhouding met die God van die Bybel nie, maar met “die god van hierdie wêreld”—Satan, die aanstigter van die Antichris wat in Bybelprofesie voorspel is (2 Korinthiërs 4:4; 1 Johannes 2:18). Hierdie blootlegging was bloot die voorspel van haar doodstryd. Dan sal die Opperregter van die heelal regstreeks teen haar optree en haar teregstel sonder om haar ontvlugting te bied van haar dan hoogs ontstoke, voormalige politieke minnaars.
5. (a) Waarom sal die Christendom onverhoeds gevang word, en hoe beskou die God van die Bybel haar? (b) Wat sien “Babilon die Grote” nie?
5 Selfs die Christendom, wat die Bybel het wat al hierdie dinge voorspel, sal onverhoeds gevang word. Sy sal op die komende uitroep “Vrede en veiligheid” vertrou wat bedink word deur die nasies waaronder sy haar godsdiensformalisme beoefen het. Terselfdertyd stuur haar kerke die kollektebord om en verryk hulle hul met die bydraes wat daarin geplaas word. Maar vir die God van die heilige Skrif is sy egter “arm en blind en naak”. Sy vertrou nie op Jehovah nie, en sy benut ook nie die groot geestelike kosbaarhede wat hy voorsien nie (Openbaring 3:17, 18). Sy sien nie die skrif aan die muur nie. Wat bedoel ons hiermee?
Die skrif aan die muur verskyn
6. Aan watter eertydse wêreldmoondheid laat dit ons nou dink, en hoe het Jehovah se tipiese volk toe gevaar?
6 Om dit te verstaan, moet ons kyk na die laaste ure van die derde wêreldmoondheid van Bybelgeskiedenis, naamlik Babilon, op die oewer van die Eufraatrivier. Belsasar was die laaste heerser van Babilon, wat die terrein van die toring van Babel ingesluit het waar die almagtige God die een taal van die bouers verwar en hulle verstrooi het (Genesis 11:1-9). Jehovah se tipiese volk, die Jode, was ten tyde van Babilon se laaste ure ballinge in daardie heidense land. Maar hulle 70 jaar van gevangenskap het op die punt gestaan om te verstryk.
7. (a) Waarom het koning Belsasar met volle vertroue ’n maaltyd vir sy maghebbers gehou? (b) Wat het gedurende die maaltyd plaasgevind, en watter uitwerking het dit op die koning gehad?
7 Die verenigde Meders en Perse, wat die vierde wêreldmoondheid van Bybelgeskiedenis sou uitmaak, het teen die hoogs versterkte, skynbaar onneembare, ommuurde stad Babilon opgetrek. Die Eufraatrivier het deur die middel van die stad gevloei, met kaaie langs sy oewers waarop dubbelkoperdeure in die stadsmure oopgemaak het. Met volle vertroue in die veiligheid van die stad het koning Belsasar” ’n groot maaltyd berei vir sy duisend maghebbers”—sy laaste maaltyd. Skielik het daar in Belsasar se gesigslyn ’n bewegende hand teen die muur verskyn. En dit het die volgende profetiese woorde op die muur geskryf: “Mené, mené, tekél ufarsín” (Daniël 5:1, 5, 25). Dit was op die aand van 5 Oktober 539 v.G.J. Die woorde het ’n geweldige impak gehad. Koning Belsasar het van vrees gebewe. Wag ’n bietjie! Bring die wyse manne—die towenaars en astroloë wat na bewering tekens en voortekens kan verklaar. Maar hulle kon nie die wonderdadige woorde, wat hulle nie eens kon lees nie, ontraaisel nie. Wat moes nou gedoen word?
8, 9. (a) Watter handelwyse is as ’n laaste toevlug by die koning aanbeveel? (b) Hoe het Daniël die skrif aan die muur uitgelê? (c) Waarom het koning Belsasar se groot maaltyd tot so ’n verskriklike profesie aanleiding gegee?
8 Ontbied ’n Jood. Wat? ’n Jood? Ja, een van daardie vorste en edelmanne wat uit Jerusalem in sy geboorteland weggeneem is en deur keiser Nebukadnesar na Babilon gebring is om vir regeringsdiens opgelei te word. Wel, as ’n laaste toevlug was dit die beste wat hulle kon doen. Die koninginmoeder het Daniël aanbeveel as ’n wyse man—’n man wat dinge kan ontraaisel en dit kan uitlê (Daniël 5:10-12). Ons kan die stilte hoor wat oor die banketsaal neerdaal terwyl Daniël, ooreenkomstig die versoek van koning Belsasar, daardie raaiselagtige woorde vir die keiser van die derde wêreldmoondheid van Bybelgeskiedenis en sy maghebbers uitlê.
9 Daniël sê voorts: “Toe is deur Hom die deel van die hand gestuur en hierdie skrif geskrywe. En dit is die skrif wat geskrywe is: Mené, mené, tekél ufarsín. Dit is die uitleg van die woord: Mené—God het u koningskap getel en daar ’n einde aan gemaak; tekél—u is op die weegskaal geweeg en te lig bevind; perésa—u koninkryk is verdeel en aan die Meders en Perse gegee” (Daniël 5:24-28). Koning Belsasar en sy maghebbers en hulle gesellinne het opsetlike, godslasterlike minagting vir die aanbidding van Daniël se God getoon. Hoe? Deur wyn uit die goue voorwerpe te drink wat uit Jehovah se tempel in Jerusalem geneem is toe daardie heilige stad in 607 v.G.J. vernietig is. Dit was soos om minagtend skande by skade te voeg.—Daniël 5:3, 4, 23.
Die voorspelde Kores neem oor
10, 11. (a) Wie het Jehovah voorspel sou die veroweraar van Babilon wees, en hoe het Jesaja die toekomstige verowering beskryf? (b) Hoe het Jehovah hierdie profesie vervul en welverdiende straf oor koning Belsasar en sy maghebbers gebring?
10 Die allerhoogste God het in Jesaja 45:1-3 voorspel: “So sê die HERE aan sy gesalfde, aan Kores, wie se regterhand Ek gevat het om nasies voor hom neer te werp, terwyl Ek die lendene van konings losgord; om voor hom deure oop te maak, en poorte sal nie gesluit bly nie: Ek self sal voor jou uit gaan en hoogtes gelykmaak; koperdeure sal Ek verbreek en ystergrendels stukkend slaan. En Ek sal jou die skatte gee wat in die donkerheid is en die verborge rykdomme, sodat jy kan weet dat Ek die HERE is wat jou by jou naam roep.”
11 Om hierdie profesie te vervul, het Jehovah die gedagte in Kores die Pers laat opkom om die water van die Eufraatrivier in ’n plaaslike meer in uit te keer. Toe het Kores se troepe, ná die rivierbedding leeggeloop het, onder die sluier van die nag met die rivierbedding langs tot reg in die middel van die stad opgeruk. Aangesien die dubbeldeure aan die waterkant oopgelaat is, het hulle teen die rivieroewer opgeklim en die banketsaal binnegegaan waar hulle die wagte oorweldig het. So het koning Belsasar se maaltyd tragies geëindig as ’n welverdiende straf vir hom en sy maghebbers—omdat hulle “die Here van die hemel” oneer aangedoen, geminag en gesmaad het deur die tempelvoorwerpe wat uit Jehovah se heilige woonplek in Jerusalem gesteel is te gebruik.
12. (a) Waarom skryf Daniël Babilon se inname aan Darius die Meder toe terwyl Jesaja voorspel het dat Kores Babilon sou verower? (b) Wie is deur Darius en sy deelgenoot, Kores die Pers, afgebeeld?
12 Volgens die eerste vers van Daniël hoofstuk 6 was Darius, die Meder, “twee-en-sestig jaar oud toe hy die koningskap ontvang het” nadat koning Belsasar om die lewe gebring is. Aangesien Darius ouer as Kores die Pers was, het Daniël die inname van Babilon aan hierdie Mediese koning toegeskryf. Hy het van 539 tot 537 v.G.J. as die koninklike heerser oor die Medo-Persiese ryk regeer. Hy beeld Jehovah God gepas af. Darius se deelgenoot, Kores die Pers, het Jesus Christus afgebeeld, wat as vernaamste werktuig deur Jehovah gebruik sal word om “Babilon die Grote”, die wêreldryk van valse godsdiens, omver te werp en te vernietig.
13, 14. Wat het Daniël ongetwyfeld vir Kores die Pers gewys, en hoe begin die boek Esra, wat na die ballingskap geskryf is?
13 Die profeet Daniël het ongetwyfeld vir Kores, na hy in 537 v.G.J. oor Medo-Persië begin regeer het, Jehovah se profesie oor hom, soos opgeteken in Jesaja 45, gewys. Die boek Esra, wat na die ballingskap geskryf is, begin met hierdie woorde:
14 “En in die eerste jaar van Kores, die koning van Persië, het die HERE—sodat die woord van die HERE uit die mond van Jeremia [dat die ballingskap 70 jaar sou duur (Jeremia 25:12; 29:10, 14)] vervul sou word—die gees van Kores, die koning van Persië, opgewek, dat hy ’n oproep deur sy hele koninkryk laat gaan het, selfs ook skriftelik, om te sê: So sê Kores, die koning van Persië: Al die koninkryke van die aarde het die HERE, die God van die hemel, aan my gegee; en Hý het my opgedra om vir Hom ’n huis te bou in Jerusalem wat in Juda is. Enigeen onder julle wat aan sy volk behoort—mag sy God met hom wees, en laat hom optrek na Jerusalem wat in Juda is, en die huis van die HERE, die God van Israel, bou! Hy is die God wat in Jerusalem is.”—Esra 1:1-3.
Die Grotere Kores verower “Babilon die Grote”
15. (a) Wanneer het die antitipiese Kores begin regeer? (b) Watter onwrikbare posisie neem Jehovah se Getuies ten opsigte van ’n sameswering met die Verenigde Volke in, en waarom?
15 Die hedendaagse, antitipiese Kores die Grote het in 1914 aan die einde van “die tye van die nasies”, soos deur Jesus self in Lukas 21:24 voorspel is, begin regeer. Met volkome verontagsaming van hierdie wêreldbelangrike feit het die nasies in die Verenigde Volke op 1986 as hulle Internasionale Vredesjaar besluit. Maar Jehovah se Getuies laat hulle geensins in hierdie opsig onverhoeds vang nie. Wanneer die voorspelde uitroep “Vrede en veiligheid” uiteindelik gemaak word, sal hulle nie saam met politieke aanhangers en vriendelike metgeselle van “Babilon die Grote” oor so ’n fenomenale prestasie op hierdie laat stadium in die geskiedenis van die wêreldse nasies feesvier nie. Hulle staan geen sameswering met die Verenigde Volke of ander vredesmedia voor nie (Jesaja 8:12). As ’n teenmaatreël sê hulle in die woorde van Jesaja 8:20: “Tot die wet en tot die getuienis! As hulle nie spreek volgens hierdie woord nie, is hulle ’n volk wat geen dageraad het nie.” En hulle verstrek die rede vir hulle onwrikbare posisie deur te sê: “Want God is met ons!” (Jesaja 8:10). Om dit ronduit te stel, dit beteken dat Jehovah God geen deel het aan die politieke maatreëls wat die nasies ter wille van ‘vrede en veiligheid’ neem nie, maar hulle eerder duidelik teenstaan.
16. Hoe sal die profesie in Openbaring 17:16, 17 ten volle geregverdig word, en met watter uitwerking op Jehovah se volk?
16 Deur slim maneuvrering sal Jehovah, deur middel van sy Grotere Kores, dit in die harte en verstande van die politieke leiers van die wêreld gee om teen “Babilon die Grote”, die wêreldryk van valse godsdiens, te draai. Hulle sal haar doodmaak, asof met die horings van ’n wrede dier. Die profesie in Openbaring 17 sal ten volle geregverdig wees, en Jehovah se Getuies op die aarde sal hieroor juig.—Openbaring 17:16, 17; 19:1-3.
Ons moet ons band met Jehovah bewaar
17. Wat sal die wêreldheersers doen hoewel Jehovah se Getuies geen deel van “Babilon die Grote” is nie?
17 Hoewel Jehovah se Getuies geen deel van “Babilon die Grote” is nie, maar haar geswore aan-die-kaak-stellers is, en hoewel hulle geen deel aan die politieke aangeleenthede van hierdie wêreld gehad het nie, sal daardie ongodsdienstige, politieke elemente dan teen die oorblywende Getuies draai. Vasbeslote om diktators met totalitêre beheer oor alle dele van die mensegemeenskap op aarde te wees, sal hulle ’n volskaalse aanval doen op die onkreukbare Getuies van die Opperwese, wat die Bron van alle regverdige heerskappy is.
18. Watter ontsagwekkende daad sal Jehovah verrig wat die Vloed van Noag se dag in die skadu sal stel?
18 Dit is wanneer die almagtige Soewerein van hemel en aarde moet ingryp en daardie vernietigers van “Babilon die Grote” moet laat weet en verstaan dat die Een wat 20ste-eeuse Getuies gehad het, ’n ware God, ’n almagtige God, is—’n God wat geregtig is op heelhartige, onverdeelde aanbidding deur skepsele hier op sy voetbank, die aarde. Hy sal dit op ’n ontsagwekkende wyse doen wat die monde van sy Getuies wat dit sal aanskou van skone verbasing sal laat oophang. Hy sal sy ongeëwenaarde, skitterende oorlogsmaneuvers uitvoer wat tot goddelike oorwinning lei (Openbaring 16:14, 16; 19:19-21). Dit sal die einde van hierdie goddelose, Duiwelbeheerde stelsel beteken—met ’n spoggerige vertoon wat die wêreldvernietigende Vloed van Noag se dag sal oortref.
19. Watter getuies sal Jehovah hê van sy regverdiging van homself as die Universele Soewerein, en wat sal dit toon?
19 Net soos Jehovah getuies gehad het om te getuig van die einde van die ou wêreld in ’n vloed wat die hele mensdom buite die ark verdrink het, sal hy, op ’n baie groter skaal, getuies reg hier op die aarde hê van sy eenmalige daad om homself as die Universele Soewerein te regverdig (2 Petrus 3:6, 7, 13, 14). Dit sal diegene wees wat te midde van hierdie veroordeelde wêreld op hom vertrou vir vrede en veiligheid. Jou vreugde sal groot wees as jy onder daardie wonderdadig begunstigde Getuies tel. Dit sal blyk dat jou vrede en veiligheid van Jehovah God gekom het en nie van enige samespanning, of sameswering, met politieke magte van hierdie Duiwelbeheerde stelsel nie.
20. Hoe sal Jehovah uittree, en wat is ons vasbeslote om te doen?
20 Jehovah God sal in heerlikheid te voorskyn tree as die regmatige Een wat as die opper- Goddelike Wese aanbid en gedien moet word—die God van die gode, die uitsluitlike Een aan wie die woorde van die geïnspireerde psalmis gerig is: “Van ewigheid tot ewigheid is U God” (Psalm 90:2). Laat ons, met immertoenemende waardering, ons vertroue in Jehovah God en ons band met hom deur die Grotere Kores, Jesus Christus, behou.
[Voetnoot]
a “Ufarsín” is die meervoud van die woord “perés” en beteken “verdeeldhede”.
Onthou jy?
◻ Wat sien “Babilon die Grote” nie?
◻ Wat skadu die tragiese uiteinde van Belsasar se maaltyd af?
◻ Wie sal “Babilon die Grote” verower?
◻ Watter standpunt neem Jehovah se Getuies ten opsigte van ’n sameswering met die Verenigde Volke in?
◻ Waarom sal almal wat hulle vertroue in Jehovah stel om vrede en veiligheid te bring gelukkig wees?
[Prent op bladsy 25]
Daniël lê die raaiselagtige skrif uit as ’n oordeelsboodskap teen die Babiloniese ryk