Vrae van lesers
◼ Wat is God se “boek van die lewe”, en hoe kan my naam daarin geskryf word en daarin bly?
Verskeie Bybeltekste toon dat Jehovah God ’n “boek” het met die name van getroue persone wat in aanmerking sal kom om die ewige lewe te ontvang, hetsy in die hemel of op die aarde.
Vanuit die hemele let die ware God op mense wat geloof openbaar en sy goedkeuring verdien en waardig is om onthou te word, Ons lees omtrent sekere Jode in Maleagi se dag: “Toe het die wat die HERE vrees, met mekaar gespreek; en die HERE het dit opgemerk en gehoor, en daar is ’n gedenkboek voor sy aangesig geskrywe vir die wat die HERE vrees en sy Naam eer.”—Maleagi 3:16.
God let blykbaar sedert Abel se tyd op diegene in die wêreld van die redbare mensdom wat vir die ewige lewe onthou moet word, net asof hy hulle name in ’n boek neerskryf (Mattheüs 23:35; Lukas 11:50, 51). Gesalfde Christene se name is ook ‘in hierdie boek van die lewe’, of gedenkboek om die ewige lewe te ontvang, en in hulle geval sal dit hemelse lewe wees (Filippense 3:14, 20; 4:3) Openbaring 17:8 sê daarenteen van diegene wat hulle “verwonder” oor “die dier”: “[Hulle] name [is] nie van die grondlegging van die wêreld af in die boek van die lewe geskryf . . . nie.”
Maar die feit dat ’n persoon goedgekeur word en onthou sal word (deurdat sy naam “in die boek van die lewe” geskryf is), beteken nie dat hy verseker is van die ewige lewe, asof dit voorbestem of onveranderbaar is nie. Moses het Jehovah omtrent die Israeliete gevra: “Nou dan, as U tog maar hulle sonde wou vergewe! En so nie, delg my dan maar uit u boek wat U geskryf het!” God het geantwoord: “Wie teen My gesondig het, dié sal Ek uitdelg uit my boek” (Exodus 32:32, 33). Ja, selfs nadat God iemand goedgekeur en in sy “boek” neergeskryf het, kan die individu ongehoorsaam word of sy geloof prysgee. As dit gebeur, sal God “sy naam . . . uitwis uit die boek van die lewe”.—Openbaring 3:5.
As ons name nou in God se “boek van die lewe”, of “gedenkboek”, is, moet ons andersyds steeds geloof beoefen. So sal ons ons name daarin hou. Wanneer persone in die toekomstige ‘opstanding van die onregverdiges’ opgewek word, sal hulle insgelyks die geleentheid hê om geloof te beoefen en sodoende aan die vereistes voldoen om hulle name in daardie boek neergeskryf te kry (Handelinge 24:15). Laastelik, individue wat so neergeskryf is, sal hulle name permanent daar kan hou. Dit geld vir die gesalfdes terwyl hulle hulle ‘tot die dood toe getrou’ bewys (Openbaring 2:10; 3:5). As diegene met aardse verwagtinge nou getrou bly, asook dwarsdeur Christus se Duisendjarige Heerskappy en dan deur die beslissende toets wat sal volg, sal hulle name permanent ‘in die boek van die lewe opgeskryf word’.—Openbaring 20:5-15.