Regverdig verklaar as ’n vriend van God

“Abraham het God geglo, en dit is hom tot geregtigheid gereken, en hy is ’n vriend van God genoem.”​—JAKOBUS 2:23.

1, 2. Hoe word “die dinge in die hemele” en “die dinge op die aarde” met God versoen?

“DIT het die Vader behaag dat in Hom [Christus] die ganse volheid sou woon en dat Hy deur Hom alles met Homself sou versoen nadat hy vrede gemaak het deur die bloed van sy kruis . . . die dinge op die aarde sowel as die dinge in die hemele” (Kolossense 1:19, 20). Hierdie goddelike voorneme van versoening nader sy klimaks.

² “Die dinge in die hemele” is nie geesskepsele nie, want engele word nie deur Christus se bloed vrygekoop nie. Hulle is eerder mense wat met die Lam se bloed gekoop is om “konings en priesters” saam met Christus in die “nuwe hemele” te wees. Hulle is reeds ten volle regverdig verklaar deur die bloed van Christus. Daarbenewens maak Jehovah nagenoeg 50 jaar lank al vrede met “die dinge op die aarde”, daardie mense wat ’n deel van die regverdige “nuwe aarde” sal word (Openbaring 5:9, 10; 2 Petrus 3:13). Hierdie insameling om “alle dinge” te verenig, aardse sowel as hemelse dinge, is “na sy [Jehovah se] welbehae wat Hy in Homself voorgeneem het”.​—Efesiërs 1:9, 10.

God se voorneme met sy seun Adam

3, 4. Wat was Adam se posisie voor God, maar in watter opsig moes hy nog regverdig verklaar word?

³ Adam is as ’n volmaakte, regverdige menseseun van God geskep (Lukas 3:38). Sy geregtigheid is nie aan hom toegeskryf of toegereken nie. Dit was inherent. Wat skuldeloosheid voor Jehovah betref, was dit nie nodig dat Adam regverdig “verklaar” word nie. Solank hy hom aan God se regmatige heerskappy onderwerp het, het hy ’n goeie posisie voor sy Skepper behou.

⁴ Hy het egter nog nie bewys dat hy ’n handhawer van onkreukbaarheid is nie en is nog nie waardig geag om die reg tot die ewige lewe op die aarde te ontvang nie. Daarvoor moes hy oor ’n tydperk getrouheid aan Jehovah en gehegtheid aan geregtigheid openbaar. As hy derhalwe sy onkreukbaarheid onder beproewing bewys het, sou hy die reg tot die ewige lewe op die aarde ontvang het. Dit sou gewees het asof God verklaar of opgeteken het dat Adam eindelose lewe verdien. As simbool hiervan sou Jehovah hom ongetwyfeld na “die boom van die lewe” gelei het en hom toegelaat het om van die vrugte daarvan te eet.​—Genesis 2:9, 16, 17; 3:22.

5. (a) Wat het Adam vir homself en vir sy nakomelinge verloor? (b) Watter hoop op verlossing van sonde en die dood het Jehovah die menslike skepping gegee?

⁵ Maar Adam het gefaal toe hy beproef is en het daardeur volmaaktheid, geregtigheid en seunskap vir homself en sy nakomelinge verloor (Romeine 5:12). Gevolglik is al Adam se nakomelinge vervreemd van God, inherent onregverdig, gebore (Efesiërs 2:3; Romeine 3:10). Die menslike skepping is derhalwe “aan die nietigheid onderworpe”, maar “in die hoop” op verlossing van die sonde en die dood wat onmiddellik na die opstand in Eden gegee is.​—Romeine 8:20, 21; Genesis 3:15.

Regverdig verklaar voor Christus​—Hoe?

6, 7. (a) In watter mate is party mense voor Christus se offerdood regverdig verklaar? (b) Meld ’n paar voorbeelde van voorchristelike knegte van Jehovah wat ’n regverdige posisie ontvang het.

⁶ Die mensdom se hoop op verlossing van sonde en die dood het afgehang van die koms van die beloofde “saad”, God se eniggebore Seun (Johannes 3:16). Voor Christus se offerdood was daar geen manier waarop mense “vryspraak en lewe” of “regverdigmaking vir die lewe” kon verkry nie (Romeine 5:18, NAV; NW). Maar selfs voor Christus die losprys vir die mens se verlossing betaal het, was daar sommige manne en vroue wat geloof in God se belofte gestel en daardie geloof met werke gerugsteun het. As gevolg hiervan het Jehovah hulle sonde goedgunstig vergewe en hulle as sy knegte aanvaar. Hy het hulle liefdevol as betreklik sondeloos beskou in vergelyking met die meerderheid van die mensdom wat van God vervreemd is (Psalm 32:1, 2; Efesiërs 2:12). Hy het hulle ’n regverdige posisie gegee deur hulle regverdig te verklaar in die mate wat toe gepas was.

⁷ Abel het dus deur die geloof ‘getuienis ontvang dat hy regverdig was’ (Hebreërs 11:4). Noag ‘het ’n erfgenaam geword van die geregtigheid wat volgens die geloof is’ (Hebreërs 11:7). Ondanks sy tekortkominge is daar gesê dat Job “vroom en opreg” was (Job 1:1, 22; 7:21). Pinehas het ywer vir ware aanbidding getoon “en dit is hom gereken tot geregtigheid” (Psalm 106:30, 31; Numeri 25:1-13). Die nie-Israelitiese hoer Ragab het “deur die geloof” en deur haar vriendelike dade teenoor God se volk ’n regverdige posisie verkry, of is regverdig verklaar.​—Hebreërs 11:31; Jakobus 2:25.

Hoe Abraham regverdig gereken is

8, 9. (a) Wie se regverdigheid is die hoofonderwerp van Paulus se brief aan die Romeine? (b) In watter opsigte strek die regverdigmaking van die “heiliges” verder as die van Abraham?

⁸ Die geval van Abraham verdien besondere aandag. Twee skrywers van die Christelike Griekse Skrifte, wat albei geskryf het aan eerste-eeuse Christene wat geroep is om ’n deel van die 144 000 lede van geestelike Israel te wees, het gesê dat hy regverdig verklaar is.​—Romeine 2:28, 29; 9:6; Jakobus 1:1; Openbaring 7:4.

⁹ In sy brief aan die Romeine voer Paulus aan dat die “geroepe heiliges” (1:7), Jode sowel as nie-Jode (1:16, 17), “deur die geloof sonder die werke van die wet” (3:28) regverdig verklaar word. Om sy redenasie te staaf, begin hy ’n lang verduideliking (4:1-22) en haal Genesis 15:6 aan wanneer hy sê: “Abraham het in God geglo, en dit is hom tot geregtigheid gereken.” Dan sê Paulus in die laaste verse van hoofstuk 4 dat Jesus “oorgelewer is ter wille van ons misdade en opgewek is ter wille van ons [dit wil sê, “die heiliges” (Romeine 1:7) se] regverdigmaking”. “Ons” kan Abraham nie insluit nie, aangesien hy lank voor Christus se dood en opstanding gesterf het. Wanneer Paulus gevolglik in die daaropvolgende hoofstukke van diegene praat wat as konings sal “heers” en dat hulle regverdig verklaar word “vir die lewe” met die doel om “kinders van God” en “mede-erfgename van Christus” te word, het hy klaarblyklik van iets heeltemal anders gepraat as die feit dat God Abraham geregtigheid toegereken het.​—Romeine 5:17, 18, vgl. NW; 8:14, 17, 28-33.

10. Hoe werp Jakobus lig op die omvang van Abraham se regverdigmaking?

¹⁰ Jakobus meld Abraham ook as ’n voorbeeld om te bewys dat geloof deur godvrugtige werke gerugsteun moet word. Nadat hy meld dat Abraham geregverdig of regverdig verklaar is deur Genesis 15:6 aan te haal, voeg Jakobus ’n kommentaar by wat ons help om die omvang van Abraham se regverdigmaking te begryp. Hy skryf: “Die Skrif is vervul wat sê: En Abraham het God geglo, en dit is hom tot geregtigheid gereken, en hy is ’n vriend van God genoem” (Jakobus 2:2023). Ja, as gevolg van sy geloof is Abraham as ’n vriend van Jehovah regverdig verklaar, nie as ’n seun met die reg op volmaakte menselewe of koningskap saam met Christus nie. Dit is interessant dat Robert Girdlestone in sy Synonyms of the Old Testament oor Abraham se geregtigheid geskryf het: “Hierdie geregtigheid was nie absoluut, d.w.s. so dat dit Abraham by God sou aanbeveel as ’n regmatige aanspraakmaker op die erfenis van seunskap nie.”

Jehovah se gedenkboek

11. Wie se name is in Jehovah se gedenkboek geskryf, en waarom?

¹¹ Die toerekening van betreklike geregtigheid aan getroue manne en vroue voor Christus was ’n blyk van die ware, of werklike, geregtigheid en volmaaktheid wat geassosieer is met die ewige lewe wat hulle op God se nuwe aarde kan verkry. Met die oog op hulle lewensvooruitsigte is dit asof hulle name in ’n gedenkboek geskryf is. (Vergelyk Maleagi 3:16; Exodus 32:32, 33.) Dit bevat die name van diegene wat deur Jehovah beskou word as “regverdiges” wat hulle geloof deur regverdige werke getoon het en wat in aanmerking sal kom vir die ewige lewe op die aarde.​—Psalm 69:29; Habakuk 2:4.

12. Wat sal die “regverdiges” wat opgewek word, moet doen om nulle name in Jehovah se gedenkboek te hou?

¹² Sulke name is egter nog nie in Jehovah se “boek van die lewe” geskryf nie (Openbaring 20:15). Wanneer sulke getroue manne en vroue van die ou tyd in ‘die opstanding van die regverdiges’ op aarde opgewek word, sal hulle ongetwyfeld in geloof Jehovah se voorsiening vir die lewe deur Christus se losprysoffer aanvaar (Handelinge 24:15). Sodoende sal hulle saam met die “groot menigte” wat die “groot verdrukking” oorleef het deel uitmaak van Jesus se “ander skape” (Johannes 10:16; Openbaring 7:9, 14). So sal hulle hulle name in Jehovah se gedenkboek hou.

Regverdig gereken as vriende vir oorlewing

13. Wie versamel die Goeie Herder nou, en hoe kan hulle in Jehovah se gedenkboek opgeskryf word?

¹³ Die Goeie Herder, Jesus Christus, versamel nou “ander skape” wat nie ’n deel is van die “klein kuddetjie” van 144 000 “heiliges” aan wie die hemelse Koninkryk gegee word nie (Lukas 12:32; Daniël 7:18). Hierdie “ander skape” luister na die stem van die Goeie Herder (Johannes 10:16). Hulle stel geloof in Jehovah en in sy Seun. Hulle wy hulle lewens op grond van Christus se losprysoffer aan Jehovah toe. Hulle word “in die Naam van die Vader en die Seun en die Heilige Gees” gedoop en besef dat hulle “die vrug van die Gees” moet aankweek (Mattheüs 28:19; Galasiërs 5:22). Hulle name word in Jehovah se gedenkboek geskryf.

14. Wat gee die “ander skape” ’n rein posisie voor Jehovah, maar wat moet hulle God vra?

¹⁴ Hierdie “ander skape” wat in hierdie tyd van die einde versamel word, sal die “groot menigte” uitmaak wat die apostel Johannes in ’n gesig gesien het nadat hy die 144 000 lede van geestelike Israel gesien het (Openbaring 7:4, 9). Hy het beskryf hoe die “groot menigte” “hul klere gewas en hul klere wit gemaak [het] in die bloed van die Lam” (Vers 14). As gevolg van hulle geloof in die Lam se vergote bloed word ’n mate van geregtigheid aan hulle toegeskryf. Dit is voorgestel deur hulle simboliese wit klere. Hulle het ’n rein posisie voor Jehovah en “daarom” laat hy hulle toe om ‘hom dag en nag in sy tempel te dien’ (Vers 15). Hulle moet nietemin elke dag hulle sondes aan Jehovah bely en deur Jesus Christus om vergifnis vra.​—1 Johannes 1:9-2:2.

15. (a) Hoe toon die gelykenis van die skape en die bokke dat die “ander skape” ’n regverdige posisie voor God het? (b) In watter mate word hulle nou regverdig verklaar?

¹⁵ Die feit dat die “ander skape” God se vriende is en selfs nou ’n betreklik regverdige posisie voor hom het, word ook duidelik getoon in Jesus se profesie oor ‘die teken van sy teenwoordigheid’, wat die illustrasie van die skape en die bokke insluit. Omdat die “skape” goed doen aan die oorblyfsel van Christus se 144 000 “broeders” wat nog op aarde is, word hulle deur Jesus se Vader geseën en “regverdiges” genoem. Soos Abraham word hulle as vriende van God geregtigheid toegereken, of regverdig verklaar. Hulle regverdige posisie sal ook vir hulle oorlewing beteken wanneer die “bokke” in “die ewige straf” weggaan (Mattheüs 24:3-25:46). Hulle sal “uit die groot verdrukking kom” wat die einde van die huidige goddelose stelsel sal kenmerk.​—Openbaring 7:14.

Tot volmaaktheid verhef

16. Hoe weet ons dat die groot menigte nie voor die “groot verdrukking” regverdig verklaar word vir die lewe nie?

¹⁶ Die “groot menigte”, wat die “groot verdrukking” oorleef, is nog nie regverdig verklaar vir die lewe nie. Ons kan dit sien uit die feit dat die hoofstuk waarin hulle gemeld word voorts sê: “Die Lam wat in die middel van die troon is, sal hulle laat wei en hulle na lewende waterfonteine lei” (Openbaring 7:17). Hoewel God hulle dus voorheen in vergelyking met die mensdom in die algemeen en as sy vriende as regverdig gereken het, het hulle bykomende hulp nodig, of moet nog stappe gedoen word, sodat hulle vir die lewe regverdig verklaar kan word.

17. (a) Wat beteken die “genesing van die nasies”? (b) Wie se name sal in “die boek van die lewe” geskryf moet word?

¹⁷ Gedurende die Millennium sal die gekroonde Lam, Christus Jesus, saam met sy 144 000 medekonings en -priesters ’n program van geestelike en fisiese “genesing van die nasies” volg (Openbaring 22:1, 2). Sulke “nasies” sal bestaan uit die oorlewendes van die groot verdrukking, enige kinders wat hulle na Armageddon sal hê, en diegene wat in die “opstanding van die regverdiges sowel as die onregverdiges” sal opstaan (Handelinge 24:15). Die name van almal wat geloof in Christus se bloed stel en gepaste “werke” verrig, sal uiteindelik in “die boek van die lewe” geskryf word.​—Openbaring 20:11-15.

18. Tot watter toestand sal die aarde se bewoners teen die einde van die Millennium verhef wees?

¹⁸ Teen die einde van Christus se Duisendjarige Heerskappy sal die bewoners van die aarde wat getoon het dat hulle Christus se losprys aanvaar en volgens Jehovah se standaarde sal lewe tot volmaaktheid verhef wees (Openbaring 20:5). Hulle sal soos Adam wees voordat hy gesondig het. Hulle gehoorsaamheid sal, soos syne, op die proef gestel word.

‘Heerlike vryheid’ as “kinders van God”

19. (a) Wat sal onmiddellik na afloop van die Millennium plaasvind? (b) Wat sal gebeur met diegene wie se name nie in “die boek van die lewe” geskryf is nie?

¹⁹ Onmiddellik na afloop van die Duisendjaar sal Christus ’n volmaakte mensdom aan sy Vader oorgee (1 Korinthiërs 15:28). ‘Satan sal losgelaat word’ vir ’n beslissende toets van die mensdom (Openbaring 20:7, 8, NAV). Die naam van enigiemand wat onder die toets swig, sal nie ‘in die boek van die lewe opgeskryf wees nie. Hulle sal simbolies “in die poel wat brand met vuur” gewerp word, wat “die tweede dood” beteken.​—Openbaring 20:15; 21:8.

20. (a) Wie sal deur Jehovah regverdig verklaar word vir die lewe, en waarom? (b) Hoe sal Jehovah se barmhartige reëling van regverdigmaking aan sy doel beantwoord het?

²⁰ Die name van diegene wat getrou aan Jehovah bly, sal onuitwisbaar in die “boek van die lewe” geskryf word as mense met volmaakte onkreukbaarheid en wat waardig is om die reg tot die ewige lewe op die aarde te ontvang. Jehovah self sal hulle dan in ’n volmaakte sin regverdig verklaar (Romeine 8:33). Hulle sal vir die ewige lewe geregverdig wees. God sal hulle as sy aardse kinders aanneem, en hulle sal die beloofde ‘heerlike vryheid van die kinders van God’ binnegaan (Romeine 8:20, 21). Vrede en harmonie sal in die heelal herstel wees. “Die dinge op die aarde sowel as die dinge in die hemele” sal volkome met God versoen wees (Kolossense 1:20). Jehovah se barmhartige reëling van regverdigmaking sal aan sy doel beantwoord het. Elke skepsel in die hemel en op aarde sal ja kan antwoord op die vraag: “Is jy met God versoen?” en byvoeg: “Aan Hom wat op die troon sit, en aan die Lam kom toe die lof en die eer en die heerlikheid en die krag tot in alle ewigheid!”​—Openbaring 5:13.

Ten opsigte van die “ander skape” se posisie voor God—

◻ Waarom is Adam nie regverdig verklaar nie?

◻ In watter mate is Abraham en ander manne en vroue voor Christus regverdig verklaar?

◻ Wie se name is in Jehovah se gedenkboek geskryf?

◻ In watter mate het die “ander skape” nou ’n regverdige posisie, en wanneer sal hulle tot volmaaktheid verhef word?

[Lokteks op bladsy 18]

Deur geloof in “die bloed van die Lam” ontvang die “ander skape” ’n goedgekeurde posisie voor Jehovah en word dus regverdig verklaar vir vriendskap met hom en vir oorlewing gedurende die “groot verdrukking”. Hulle sal teen die einde van die Millennium volmaaktheid bereik. Na die finale toets sal hulle regverdig verklaar word vir die lewe.

[Prente op bladsy 16]

Die name van regverdiges word in Jehovah se gedenkboek geskryf

Ragab

Abel

Job

Hedendaagse “groot menigte”