Die ongehude staat—’n lonende lewenswyse
“Sy [is] vry om te trou met wie sy wil, maar net in die Here. Sy is egter gelukkiger as sy . . . bly [soos sy is].”—1 KORINTHIËRS 7:39, 40, vgl. NW.
1. Wat is ons aan Jehovah verskuldig, hetsy ons ongetroud of getroud is?
JEHOVAH verdien die heelhartige aanbidding van almal wat aan hom toegewy is. Of ons getroud of ongetroud is, ons moet God met ons hele hart, siel, verstand en krag liefhê (Markus 12:30). Die ongetroude Christen het weliswaar met minder dinge te kampe wat sy aandag kan aflei as dié wat in die eg verbind is. Maar kan die ongetroude kneg van Jehovah waarlik gelukkig wees?
2, 3. (a) Wat het Paulus in wese in 1 Korinthiërs 7:39, 40 gesê? (b) Watter vrae moet oorweeg word?
2 Die apostel Paulus antwoord ja. Met betrekking tot diegene wat vroeër getroud was, maar wie se omstandighede verander het, het hy geskryf: “’n Vrou is . . . gebonde so lank as haar man lewe; maar as die man ontslaap het, is sy vry om te trou met wie sy wil, maar net in die Here. Sy is egter gelukkiger as sy . . . bly [soos sy is], volgens my gevoele. En ek meen dat ek ook die Gees van God het.”—1 Korinthiërs 7:39, 40, vgl. NW.
3 Wie kan dit redelikerwys oorweeg om, ten minste ’n tyd lank, ongetroud te bly aangesien Paulus toon dat ongetroude mense gelukkig kan wees? Wat dra by tot die geluk van ongetroude Christene? Trouens, hoe kan die ongehude staat ’n lonende lewenswyse wees?
Lonende jare as ’n ongetroude persoon
4. Wat geld vir die jeugjare van mans en vroue?
4 Wyse koning Salomo het gemaan: “En dink aan jou Skepper in die dae van jou jonkheid voordat die ongelukkige dae [van die ouderdom] kom en die jare aanbreek waarvan jy sal sê: Ek het daar geen behae in nie” (Prediker 12:1). Die jeugjare van ’n man en vrou is gewoonlik ’n tyd van minstens betreklike lewenskrag en goeie gesondheid. Hoe gepas is dit dan tog dat hierdie bates in Jehovah se diens gebruik word sonder dat ’n mens se aandag afgelei word! Bowendien is hierdie vroeë jare ’n tyd om lewenservaring op te doen, om stabiliteit te ontwikkel. Maar dit is ook ’n tyd wanneer jongmense van die wêreld verlief raak. Beskou byvoorbeeld die resultate van ’n opname onder 1 079 persone tussen die ouderdomme van 18 en 24. Hulle het elkeen gemiddeld sewe “romanses” gehad en het sonder uitsondering gesê dat hulle huidige ervaring ware liefde is, nie verliefdheid nie.
5. Watter persoonlike vrae moet ’n jong persoon hom gepas aangaande die huwelik afvra?
5 Statistieke van skeiding, egskeiding en van gesinne wat op ander maniere verbrokkel het, toon duidelik hoe onraadsaam dit is om vroeg te trou. Pleks van halsoorkop te begin afsprake maak, iemand die hof te maak en te trou, is jong Christene verstandig as hulle positief nadink oor hoe hulle ten minste hulle vroeë jare met onverdeelde aandag aan die diens van Jehovah kan wy. Wanneer jy as ’n jong persoon jou omstandighede evalueer, kan jy jou gerus vrae soos die volgende afvra: Is ek nou emosioneel volwasse en gereed om die huwelik ernstig te oorweeg? Het ek genoeg lewenservaring om ’n goeie huweliksmaat te wees? Kan ek die verantwoordelikhede van die huwelik en moontlik van ’n gesin met kinders behoorlik nakom? Behoort ek nie, met die oog op my toewyding aan Jehovah, hom met my jeugdige energie en krag te dien sonder die dinge in die huwelik wat ’n mens se aandag aflei nie?
Belonings vir kuisheid in die ongehude staat
6, 7. (a) Wat is sommige voordele wat ongetroude Christene oor die algemeen geniet? (b) Wat het ’n ongetroude sendeling in Afrika in hierdie verband gesê?
6 Ongetroude Christene is vry van dinge wat hulle aandag kan aflei en kan “altyd oorvloedig in die werk van die Here” wees (1 Korinthiërs 7:32-34, NW; 15:58). In plaas van aandag te gee aan een individu van die ander geslag, het die ongetroude persoon meer geleenthede om sy Christelike liefde vir baie in die gemeente, waaronder die bejaardes en ander wat liefdevolle hulp nodig het, te verruim (Psalm 41:2). Ongetroude persone het oor die algemeen meer tyd vir studie en bepeinsing oor God se Woord (Spreuke 15:28). Hulle het ’n groter geleentheid om ’n intieme verhouding met Jehovah te verkry deur te leer om volkome op hom te vertrou en sy leiding te vra (Psalm 37:5; Filippense 4:6, 7; Jakobus 4:8). ’n Ongetroude man wat Jehovah al jare lank as ’n sendeling in Afrika dien, het gesê:
7 “Die lewenswyse in die statte was deur hierdie jare heen eenvoudig, met min dinge van die moderne beskawing wat ’n mens se aandag kan aflei. Sonder hierdie dinge het ek volop geleenthede gehad om God se Woord te bestudeer en daaroor te peins. Dit het my sterk gehou. Ja, die sendelinglewe was ’n ware seën en ’n beskerming teen materialisme. Tydens die aangename, tropiese aande was daar baie tyd om oor Jehovah se skepping te peins en na te dink en na aan hom te kom. Ek is op my gelukkigste wanneer ek elke aand, terwyl my verstand nog helder is, alleen onder die sterrehemel kan stap en met Jehovah gesels. Dit het my nader aan Jehovah gebring.”
8. Wat het ’n ongetroude suster wat al jare lank by die Genootskap se hoofkwartier dien aangaande die ongehude staat gesê?
8 Die volgende kommentaar van ’n ongetroude suster wat al baie jare by die hoofkwartier van die Wagtoringgenootskap dien, is ook noemenswaardig: “Ek het verkies om ongetroud te bly in my diens aan Jehovah. Word ek ooit eensaam? Glad nie. In werklikheid is die oomblikke wanneer ek alleen is van my kosbaarste oomblikke. Ek kan in gebed intiem met Jehovah kommunikeer. Ek kan bepeinsing en persoonlike studie geniet sonder dat my aandag afgelei word. . . . Die ongehude staat het grootliks tot my vreugde bygedra.”
9. Wat is party diensvoorregte wat ’n ongetroude Christen kan geniet?
9 ’n Ongetroude persoon kan ook diensvoorregte aanvaar wat getroude persone met gesinsverantwoordelikhede dalk nie sal kan geniet nie. Daar kan byvoorbeeld geleenthede wees om as ’n pionier aan die voltydse bediening deel te neem in ’n gebied waar daar ’n behoefte aan Koninkryksverkondigers is. Of ’n ongetroude jongman kan bevoorreg wees om as ’n lid van die Bethelgesin by die hoofkwartier of ’n takkantoor van die Wagtoringgenootskap te dien. ’n Jong, ongetroude vrou kan dalk by ’n ietwat ouer, ongetroude suster in die pionierdiens aansluit, hetsy in hulle tuisgemeente of in ’n ander gemeente met gebied wat gedek moet word. Bespreek gerus sulke moontlikhede met die kringopsiener. As ’n ongetroude Christen kan jy jou beskikbaar stel vir groter diens tot eer van Jehovah, en hy sal jou ryklik seën.—Maleagi 3:10.
Voorbeelde uit die verlede
10. Wie was die beste voorbeeld van ’n ongetroude kneg van Jehovah, en waarom meen jy was sy ongehude staat voordelig?
10 Die beste voorbeeld van ’n ongetroude kneg van Jehovah was Jesus Christus. Hy het hom geheel en al daarop toegelê om God se wil te doen. “My voedsel is om die wil te doen van Hom wat My gestuur het en om sy werk te volbring”, het Jesus gesê (Johannes 4:34). Hy was inderdaad besig—om te preek, die siekes te genees, ensovoorts! (Mattheüs 14:14). Jesus het opreg in mense belang gestel en was op sy gemak in die teenwoordigheid van mans, vroue en kinders. Trouens, hy het in sy bediening rondgereis, en ander het hom by sekere geleenthede vergesel (Lukas 8:1-3). Maar hoe moeilik sou dít tog gewees het as hy vergesel was van ’n vrou en kindertjies! Die ongehude staat was ongetwyfeld in Jesus se geval ’n voordeel. ’n Ongetroude Christen kan vandag soortgelyke voordele geniet, veral as hy gevra word om die Koninkryksboodskap in afgesonderde of gevaarlike gebiede te verkondig.
11, 12. Watter goeie voorbeelde word gemeld vir ongetroude vroue wat Jehovah vandag dien?
11 Maar ander het ook gevind dat die ongehude staat prakties en lonend is. Jefta se dogter het haar vader se gelofte gewillig gestand gedoen deur ongetroud te bly in ’n gemeenskap wat groot nadruk gelê het op die huwelik en kinders. Sy het vreugde geput uit haar diens aan Jehovah, en dit is opmerkenswaardig dat ander haar gereeld bemoedig het. ‘Die dogters van Israel het jaar vir jaar heengegaan om die dogter van Jefta, die Gileadiet, te prys, vier dae in die jaar’ (Rigters 11:34-40, vgl. NW). Getroude Christene en ander moet ongetroude vroue wat Jehovah vandag moedig dien eweneens prys en bemoedig.
12 Filippus se vier dogters, wat maagde was, het “die profetiese gawe besit” (Handelinge 21:8, 9). Hierdie ongetroude vroue het seker groot bevrediging geput uit hulle bedrywige diens tot eer van Jehovah. Vandag het talle jong, ongetroude vroue eweneens die lonende voorreg om as pioniers, of voltydse Koninkryksverkondigers, te dien. Hulle verdien beslis lof as lede van die ‘groot skare vroue wat die goeie tyding bring’.—Psalm 68:12.
13. Hoe lig Paulus se geval toe dat die ongehude staat ’n lonende lewenswyse kan wees?
13 Die apostel Paulus het gevind dat die ongehude staat voordelig is. Hy het duisende kilometers in sy bediening afgelê en moes groot ontberinge, talle gevare, slapelose nagte en nypende honger die hoof bied (2 Korinthiërs 11:23-27). Hierdie dinge sou ongetwyfeld baie moeiliker en angswekkender gewees het as Paulus getroud was. Bowendien is dit heeltemal onwaarskynlik dat hy sy voorregte as “’n apostel van die heidene” sou ontvang het as hy besig was om ’n gesin groot te maak (Romeine 11:13). Ondanks die beproewinge waarvoor hy te staan gekom het, het Paulus persoonlik ondervind dat die ongehude staat ’n lonende lewenswyse kan wees.
Hedendaagse voorbeelde
14. Watter ondervindings het kolporteurs, waarvan die meeste ongetroud was, geniet?
14 Soos Paulus en ander ongetroude vroeë Christene was ’n hele paar van God se knegte wat (sedert 1881) aan die kolporteurwerk deelgeneem het ongetroude persone sonder afhanklike gesinne. Hulle het gewillig na onbekende stede, dorpe en plattelandse gebiede gegaan, na diegene met goeie harte gesoek en Bybellektuur by hulle gelaat. Hulle het per trein, fiets, perdekar of motor gereis. Hulle het meestal blymoedig van huis tot huis geloop (Handelinge 20:20, 21, NW). “Soms het hulle [Bybellektuur] vir plaasprodukte, hoenders, seep en wat ook al geruil, wat hulle dan gebruik of aan ander verkoop het”, het een getuie van Jehovah gesê en toe bygevoeg: “Soms het hulle in ’n yl bewoonde gebied by boere oornag, en soms het hulle selfs in hooimiedens geslaap . . . Hierdie lojale knegte [waarvan die meeste ongetroud was], het jare der jare aangehou totdat die ouderdom hulle ingehaal het.” Een van hulle het beslis namens daardie eertydse kolporteurs oor die algemeen gepraat toe sy geskryf het: “Ons was jonk en gelukkig in die diens, verheug dat ons ons krag in Jah se diens kon gebruik.”
15. Watter deur wat tot groter bedrywigheid lei, het sowat 45 jaar gelede vir talle ongetroude pioniers oopgegaan?
15 Talle latere pioniers, of voltydse Koninkryksverkondigers, was ook ongetroud. Hulle het dikwels in afgesonderde gebiede getuig, gehelp om nuwe gemeentes te stig en het ander seëninge in Jehovah se diens geniet. ’n Opwindende deur wat tot groter bedrywigheid lei, het vir sommige van hulle oopgegaan toe die Wagtoring-Bybelskool Gilead in 1943, terwyl die Tweede Wêreldoorlog nog gewoed het, begin funksioneer (1 Korinthiërs 16:9, NW). Ja, baie van daardie ongetroude pioniers het sendingopleiding by Gileadskool ontvang en het kort daarna die Koninkryksboodskap in nuwe gebiede verkondig. Omdat hulle nie met huweliksverantwoordelikhede belas was nie, het hulle hul vir Jehovah se diens beskikbaar gestel, en sommige van daardie vroeë gegradueerdes is steeds ongetroud en bedrywig in die sendingveld of ’n ander aspek van die voltydse diens.
16. Watter bewyse is daar dat ongetroude lede van die Bethelgesin gevind het dat die ongehude staat ’n lonende lewenswyse is?
16 Baie ongetroude Christene dien al jare lank as lede van die Bethelgesin by die Wagtoringgenootskap se hoofkwartier of by die takkantore elders in die wêreld. Het hulle gevind dat die ongehude staat ’n lonende lewenswyse is? Ja, beslis. ’n Ongetroude broer wat jare lank by die Brooklynse Bethel gedien het, het byvoorbeeld gesê: “Die vreugde om te sien hoe miljoene tydskrifte en ander publikasies wat die boodskap van God se Woord bevat tot aan die uithoeke van die aarde versprei word, was op sigself ’n wonderlike beloning.” Na sowat 45 jaar van Betheldiens het ’n ander ongetroude broer gesê: “Ek vra ons dierbare, hemelse Vader elke dag in gebed om hulp en wysheid om myself geestelik sowel as liggaamlik gesond en sterk te hou sodat ek kan voortgaan om sy heilige wil te doen. . . . Ek het waarlik ’n gelukkige, lonende en geseënde lewenswyse geniet.”
Hoe om as ’n ongetroude persoon kuis te bly
17. Wat is twee hulpmiddels wat ’n ongetroude persoon kan help om kuis te bly?
17 Dit blyk uit Bybelse en hedendaagse voorbeelde dat die ongehude staat lonend kan wees. Jy moet natuurlik, gedurende watter tydperk van jou lewe jy ook al ongetroud is, ‘in jou hart vasstaan’ (1 Korinthiërs 7:37, NW). Maar wat kan jou help om kuis te bly terwyl jy ongetroud is? Jehovah, die “Hoorder van die gebed”, is die grootste Bron van hulp (Psalm 65:3). Maak dit dus ’n gewoonte om hom dikwels met versoeke te nader. “Volhard in die gebed” en vra God om sy gees en sy hulp om die vrugte van die gees, wat vrede en selfbeheersing insluit, aan die dag te lê (Romeine 12:12; Lukas 11:13; Galasiërs 5:22). Dan moet jy ook gereeld, met ’n biddende gesindheid, oor die raad van God se Woord peins en dit altyd toepas.
18. Hoe hou 1 Korinthiërs 14:20 verband met hoe ’n mens as ’n ongetroude persoon kuis kan bly?
18 Nog ’n hulp om as ’n ongetroude persoon kuis te bly, is om enigiets te vermy wat die geslagsdrif wek. Dit sluit natuurlik pornografie en onsedelike vermaak in. Paulus het gesê: “Wees kinders [“babas”, NW] in die boosheid en wees volwassenes in die verstand” (1 Korinthiërs 14:20). Moenie probeer om kennis of ondervinding in verband met boosheid op te doen nie, maar wees verstandig en bly met God se hulp so onervare en onskuldig soos ’n baba in hierdie opsig. Onthou terselfdertyd dat geslagsonsedelikheid en -oortreding in Jehovah se oë onbetaamlik is.
19. Watter tekste wys op ander maniere waarop ’n ongetroude persoon kuis kan bly?
19 Dit sal jou ook help om as ongetroude persoon kuis te bly as jy let op jou omgang (1 Korinthiërs 15:33). Vermy omgang met diegene wie se lewe en gesprekke om seks en die huwelik draai. Vermy vuil grappe geheel en al! Paulus het gemaan: “Laat hoerery en allerhande onreinheid of hebsug onder julle selfs nie genoem word nie, soos dit heiliges betaam; ook nie skandelike gedrag of dwase praatjies of vuil grappe nie, dinge wat nie welvoeglik is nie, maar liewer danksegging.”—Efesiërs 5:3, 4, NW.
’n Lonende toekoms
20. Wat sal dit meebring as jy jou jare as ’n ongetroude persoon ten beste in Jehovah se diens benut?
20 As jy jou jare as ’n ongetroude Christen ten beste in Jehovah se diens benut, sal dit nou vir jou bevrediging en gemoedsrus meebring. Dit sal ook tot jou geestelike rypheid en stabiliteit bydra. As jy ter wille van die Koninkryk tot aan die einde van hierdie goddelose stelsel ongetroud bly, sal Jehovah nie jou selfopofferende inspanning in sy heilige diens vergeet nie.
21. Waarmee sal jy waarskynlik die huwelik betree as jy sou trou nadat jy ’n tyd lank as ’n ongetroude persoon kuis gebly en seëninge geniet het?
21 As jy, as ’n ongetroude man of vrou, Koninkryksbelange ywerig nastreef, sal jy baie seëninge geniet (Spreuke 10:22). As jy dan later in jou lewe trou, sal jy die huwelik met groter ervaring en ’n ryk, geestelike agtergrond betree. Bowendien sal jy, deur die raad van die Skrif te volg, ’n toegewyde, onkreukbare huweliksmaat kies wat jou sal help om God getrou te dien. Intussen kan jy vind dat die ongehude staat in die diens van ons liefdevolle God, Jehovah, ’n lonende lewenswyse is.
Hoe sou jy antwoord?
◻ Wat is sommige beloninge onder Jehovah se knegte as jy as ’n ongetroude persoon kuis bly?
◻ Watter Skriftuurlike voorbeelde is daar om te toon dat die ongehude staat lonend kan wees?
◻ Watter hedendaagse voorbeelde het ons dat die ongehude staat lonend is?
◻ Wat kan ’n Christen help om as ’n ongetroude persoon kuis te bly?
[Venster op bladsy 19]
Hulpmiddels om as ’n ongetroude persoon kuis te bly
◆ Bid gereeld om God se gees en sy hulp om die vrugte van die gees aan die dag te lê
◆ Peins oor die raad van God se Woord en pas dit altyd toe
◆ Vermy pornografie en onsedelike vermaak
◆ Let op jou omgang
◆ Vermy vuil gesprekke en grappe
[Prente op bladsy 19]
Jefta se dogter, die apostel Paulus en ander knegte van Jehovah het gevind dat die ongehude staat ’n lonende lewenswyse is. Kan jy?