Geloofsgenesing—Wat is die aantrekkingskrag daarvan?
Die kerk weergalm van die klank van die ghitaar, trompet, tromme, tamboeryne en kletterende simbale. Mans, vroue en kinders dans en sing in koorsagtige vervoering. Die stemming is reg vir die genesings om te begin.
Die geloofsgeneser wat in ’n wit sleepgewaad geklee is, begin deur sy hande op ’n kreupel man te lê wat hande-viervoet loop. Volgende, ’n blinde man, wie se onsiende oë deur ’n donker bril verberg word. “Dis ’n wonderwerk!” roep toeskouers uit wanneer die kreupele begin loop en die blinde weer sien . . .
TONELE soos hierdie is algemeen in talle geloofsgenesingskerke in Afrika. Trouens, geloofsgenesers het ’n groot aanhang in Afrika en ander lande omdat hulle daarop aanspraak maak dat hulle allerhande probleme deur gebed en geloof in God kan oplos. Party kom dus met finansiële probleme na geloofsgenesers. En aangesien kinderloosheid in Afrikane-gemeenskappe dikwels ’n stigma is, kom party na geloofsgenesers in die hoop dat hul onvrugbaarheid genees sal word.
Maar niks anders neem geloofsgenesers se aandag soveel in beslag soos gesondheidsprobleme nie. Hoewel geneesmiddels die wêreldmark oorstroom en prysenswaardige pogings in die mediese veld aangewend word om verligting vir die siekes te bring, het die mens nog lank nie ’n oplossing vir siekte gevind nie. Sommige slagoffers van siekte het groot somme geld bestee op soek na genesing en het geen welslae gehad nie. Dit is dan geen wonder nie dat baie hulle uit wanhoop tot geloofsgenesers wend!
Party is van mening dat geloofsgenesing hulle gehelp het en kan nie sien hoe dit strydig met die Christelike godsdiens kan wees nie. Aangesien die genesers dikwels beweer dat hulle in die naam van Jesus werk, is dit trouens nie ongewoon dat hulle volgelinge lidmate van ’n hoofstroomgodsdiens sowel as ’n geloofsgenesingskerk is nie. Maar is dit gepas vir ’n ware aanbidder van God om van ’n geloofsgeneser se dienste gebruik te maak? (Johannes 4:23). En kan enige genesings wat deur so ’n persoon teweeggebring is werklik aan God toegeskryf word?