Hoop op Jehovah

“Hoop op Jehovah en hou sy weg, en hy sal jou verhoog om die aarde in besit te neem. Wanneer die goddelose afgesny word, sal jy dit sien.”—PSALM 37:34, NW.

1, 2. Waar bevind die mensdom hom blykbaar, en hoe is die Verenigde Volke hierby betrokke?

DIE mensdom het intellektueel sy mees gevorderde ontwikkelingstadium bereik. Vanweë sy inspanning het die mensdom uiteindelik die kerntydperk bereik. Kernkrag kan blykbaar oorvloedige energie verskaf en sodoende grootse dinge aardwyd moontlik maak. Dit het dit ironies genoeg ook moontlik gemaak dat die mensdom groot skade berokken kan word.

² Wat verhinder die mensdom om homself in ’n kernslagting te vernietig? Dit kan lyk asof dit die Verenigde Volke is, wat spog met sowat 159 lidlande met talle regeringsvorme. Hierdie regerings is dit nie op politieke gebied met mekaar eens nie, omdat elkeen meen dat sy eie vorm van heerskappy beter, ja, die beste is. Die VV self is dus as ’n liggaam verdeeld. Dit is deurtrek van nasionale trots en ’n begeerte na onafhanklikheid. Boonop het ’n aantal nasies geloof in God verloën en derhalwe ateïsties geword.

3. Hoe is die Christendom se beskouing van God anders as God se eie beskouing?

³ Die naam Christendom is steeds van toepassing op nasies wat nie as ongelowig bestempel wil word nie, maar bely dat hulle glo in Jesus Christus sowel as “God die Vader” wat in ’n drie-enige verbintenis met Jesus en met ’n verpersoonlikte “heilige gees” is. Daar word beweer dat die lede van die Drie-eenheid gelyk is. Maar Jesus se Vader het die profeet Jesaja hierdie woorde van identifikasie laat neerskryf: “Ek is [Jehovah], dit is my Naam; en my eer sal Ek aan geen ander gee, of ook my lof aan die gesnede beelde nie” (Jesaja 42:8, vgl. NW). Hierdie Jehovah, of Jahweh (The Jerusalem Bible), het vir homself ’n onvergelyklike reputasie opgebou.

4. Waarvan lei die Verenigde Volke die mensdom se aandag af?

⁴ Dit strek die Verenigde Volke geensins tot eer dat dit versuim het om God se naam die eer en erkenning te gee wat dit verdien nie. Dit spoor die mensdom, wat nou in die benardste toestand verkeer, nie aan om op die draer van daardie naam te vertrou nie. Tog word daardie Een tereg ‘die God van hoop’ genoem, aangesien hy die grondslag gelê het vir die enigste gegronde hoop wat die mensdom nou kan koester (Romeine 15:13). Die hoop wat hy gee, het talle manne en vroue versterk en krag gegee.

In die begin—hoop!

5. Wanneer is die grondslag vir hoop gelê?

⁵ Die grondslag vir daardie hoop is vroeg in die geskiedenis van die mensdom gelê. Ja, dit is gelê onmiddellik voor ons eerste ouers uit hulle tuintuiste in Eden in die Midde-Ooste uitgedryf is. Die verslag wat in Hebreeus oor daardie tuin, of Paradys, geskryf is, is nie ’n fabel of mite van volke wat die aanbidding van hulle Skepper versaak het nie.—Genesis 2:7–3:24.

6. Waarom het die mensdom hoop nodig?

⁶ Die Christenapostel Paulus is meer as 4 000 jaar later geïnspireer om te skryf: “Deur een mens het die sonde in die wêreld gekom en deur die sonde die dood, en so het die dood tot al die mense deurgedring, omdat almal gesondig het” (Romeine 5:12, NAV). In een van sy ander geskrifte het hy die een skuldige man geïdentifiseer: “Soos hulle almal in Adam sterwe, so sal hulle ook almal in Christus lewend gemaak word” (1 Korinthiërs 15:22). ’n Dokter genaamd Lukas het Jesus se geslagslyn in die derde hoofstuk van sy Evangelie tot by Adam teruggevoer, wat Jehovah se boodskap van hoop gehoor het voordat hy uit Eden uitgedryf is.—Lukas 3:23-38.

7. Watter bemoedigende ding het God gedoen terwyl Adam nog gelewe het?

⁷ Jy sal natuurlik wil weet wat daardie boodskap bevat. Maar voordat jy dit lees, moet jy ag slaan op die feit dat Jehovah al lank ’n hoopgewer is. In die begin was Adam God se aardse seun, en God het hom toegelaat om kinders voort te bring. As jy ’n sombere situasie vooruit kan sien, sal jy jou kinders moontlik wil bemoedig of hoop gee. God het iets soortgelyks gedoen. Nadat Adam gehoor het hoe God sy oordeelswoorde oor hom persoonlik uitspreek, het hy woorde van hoop vir sy nageslag gehoor.

8. Hoe het Genesis 3:15 ’n grondslag vir hoop voorsien?

⁸ Wat was daardie woorde van hierdie God wat hoop inboesem? Aan ’n “slang” wat by Adam se sonde betrokke was, het God gesê: “Ek sal vyandskap stel tussen jou en die vrou, en tussen jou saad en haar saad [nageslag]. Hy sal jou die kop vermorsel, en jy sal hom in die hakskeen byt” (Genesis 3:14, 15). Jy wonder dalk hoe daar gesê kan word dat daardie woorde hoop wek. In die eerste plek leer ons dat “die slang” se kop vermorsel sou word.

9. Wie was “die slang” wat in Genesis 3:14, 15 gemeld word?

⁹ In Openbaring 12:9 is die volgende geskrywe: “En die groot draak is neergewerp, die ou slang wat genoem word duiwel en Satan, wat die hele wêreld verlei, hy is neergewerp op die aarde, en sy engele is saam met hom neergewerp.” Ja, “die slang” wat in Eden was, was niemand anders nie as die bose geesskepsel wat as Satan die Duiwel bekendstaan. Nie alleen het daardie simboliese slang engele in die hemel nie, maar hy het ’n “saad” hier op aarde, ’n “saad” wat later saam met hom vernietig gaan word.

10. Hoe het Jesus die identifikasie van “die slang” bevestig?

¹⁰ Jesus Christus het hierdie identifikasie van die Duiwel as “die slang” wat die ondergang van ons eerste ouers veroorsaak het, bevestig toe hy vir Joodse godsdiensleiers in die eerste eeu gesê het: “Julle het die duiwel as vader, en die begeertes van julle vader wil julle doen. Hy was ’n mensemoordenaar van die begin af en staan nie in die waarheid nie . . . Wanneer hy leuentaal praat, praat hy uit sy eie, omdat hy ’n leuenaar is en die vader daarvan” (Johannes 8:44). Jesus het daardie godsdiensteenstanders ook “addergeslag” genoem.—Mattheüs 12:34; 23:33.

Die hoop word lewend gehou

11. Watter bykomende rede vir hoop het Genesis 3:15 voorsien?

¹¹ Die goddelike belofte dat die simboliese slang se kop vermorsel sal word, het in werklikheid ’n verblydende hoop voorsien vir die hele mensdom wat nog gebore sou word. Ons kan sien waarom as ons ander aspekte van Genesis 3:15 ondersoek. Die “saad” van die vrou word gemeld. Die identiteit van daardie “saad” was lank ’n raaisel. Maar dit was duidelik dat Jehovah God vyandskap sou stel tussen daardie “saad”, wat toe nog nie geïdentifiseer was nie, en die simboliese slang en sy “saad” wat teen God gekant is. Die “saad” van “die vrou” is die oorwinning beloof, ja, gewaarborg! Sy oorwinning is vir die mensdom as ’n hoop gegee. Die lede van die mensdom kon dus hoop op die koms van daardie “saad” van “die vrou”.

12. Watter bykomende inligting is later oor die “saad” van “die vrou” geopenbaar?

¹² Deur die eeue heen het God geopenbaar dat hierdie “saad” sy eniggebore Seun was, wat na die aarde gestuur is om die Messias te word en sy lewe as ’n losprysoffer te gee (Genesis 22:17, 18; Galasiërs 3:16; 1 Johannes 2:2; Openbaring 5:9, 10). Om hierdie rede stel Jehovah se Getuies nie hulle hoop op die Verenigde Volke nie. Dit is gevestig op ’n lewende Jesus Christus, die Hoofwoordvoerder van Jehovah God. Ons kan seker wees dat Christus lewe, aangesien hy uit die dode opgewek is om in die hemel aan Jehovah se regterhand te sit. Soos Paulus sê: “As ons net vir hierdie lewe [wat ons 20ste eeu insluit] op Christus hoop, dan is ons die ellendigste van alle mense. Maar nou, Christus is opgewek uit die dode; Hy het die eersteling geword van die wat ontslaap het” (1 Korinthiërs 15:19, 20). Soos al dikwels in hierdie tydskrif aan die hand van die Bybel bewys is, heers Jesus Christus vandag as hemelse Koning.—Openbaring 11:15.

13, 14. Waarop vestig Jehovah se Getuies hulle hoop, en wat doen hulle daaromtrent?

¹³ Jesus het Jehovah natuurlik nie as die hoop van die mensdom vervang nie. Psalm 37:34 (NW) is steeds van toepassing: “Hoop op Jehovah en hou sy weg, en hy sal jou verhoog om die aarde in besit te neem. Wanneer die goddelose afgesny word, sal jy dit sien.” Dit is steeds nodig om op Jehovah te bly hoop en om alle volke aan te spoor om nie meer op mensgemaakte instellings te vertrou nie.

¹⁴ Ooreenkomstig hierdie feit verkondig Jehovah se Getuies die goeie nuus van die Koninkryk in 208 lande. Hulle kan nie verhinder word om dit te doen nie. Politieke instellings, wat deur godsdiensorganisasies gesteun en aangehits word, het nie die goddelike reg om hulle te probeer keer nie. Ons kan voortgaan om getuies van Jehovah te wees en op hom te vertrou, soos Dawid van Betlehem wat geskryf het:

15. Watter soort hoop het koning Dawid op Jehovah gestel?

¹⁵ “[Jehovah] is my herder; niks sal my ontbreek nie. Hy laat my neerlê in groen weivelde; na waters waar rus is, lei Hy my heen. Hy verkwik my siel; Hy lei my in die spore van geregtigheid, om sy Naam ontwil. Al gaan ek ook in ’n dal van doodskaduwee, ek sal geen onheil vrees nie; want U is met my: u stok en u staf dié vertroos my. U berei die tafel voor my aangesig teenoor my teëstanders; U maak my hoof vet met olie; my beker loop oor. Net goedheid en guns sal my volg al die dae van my lewe; en ek sal in die huis van [Jehovah] bly in lengte van dae.”—Psalm 23, vgl. NW.

16. Waarom kan daar gesê word dat Jesus dieselfde beskouing as Dawid gehad het?

¹⁶ Koning Dawid was Jehovah se geestelike herder vir die stamme van eertydse Israel, en hy het die weg gebaan sodat Jerusalem die nasie se hoofstad kon word, waar sy seun Salomo 40 jaar lank geheers het. Jesus Christus is tereg die “seun van Dawid” genoem (Lukas 1:31; 18:39; 20:41). As Dawid sy hoop op Jehovah God gestel het, sou sy aardse nakomeling Jesus Christus dieselfde doen. En hy het.

17. Watter bewys is daar dat Jesus op Jehovah gehoop het?

¹⁷ As ’n bewys dat Dawid se beroemdste aardse nakomeling, Jesus Christus, die raad van Psalm 37:34 gevolg het toe hy sy laaste asem aan die folterpaal uitgeblaas het, het Jesus gesê: “Vader, in u hande gee Ek my gees oor!” (Lukas 23:46). Hy het Dawid se woorde in Psalm 31:6, wat aan God gerig is, aangehaal en vervul: “In u hand gee ek my gees oor.” Jesus se hoop is nie beskaam nie, ewemin as dié van koning Dawid. Christus is op die derde dag uit die dode opgewek. Hy het 40 dae later na sy hemelse Vader teruggekeer. Aan die einde van die Heidense Tye in 1914 het Jehovah sy Seun verhoog om Heerser van die aarde te word.

Nou ’n tyd vir hoop

18. Waarom is dit vandag ’n gepaste tyd vir hoop?

¹⁸ Watter hoop is daar vandag vir die mensdom terwyl hy in die nuwe jaar, 6014 AM (in die jaar van die wêreld), die toekoms tegemoetgaan? Daardie vraag is nou uiters gepas, want dit is nou byna 1 900 jaar ná die Bybelse tydperk. Dawid het Psalm 37:34 baie lank gelede geskryf.

19. Wat het Jehovah vir Jesus gedoen wat ons hoop gee?

¹⁹ Jehovah God, die almagtige God wat Jesus uit die dode opgewek het, het ’n veel grootser rol vir hom as dié wat kortsigtige mense versin. Deur sy eniggebore Seun op te wek en hom na sy regterhand in die hemel te verhoog, het Jehovah God ons meer rede gegee om met onfeilbare hoop, ons allerlaaste hoop, op Hom te vertrou. Dit kan ons ewige lewe in geluk beteken, soos die geïnspireerde skrywer Paulus sê: “Ons [word] gered in [hierdie] hoop.”—Romeine 8:24, vgl. NW.

20. Waarom kan ons sê dat Jehovah steeds ‘die God van hoop’ is?

²⁰ Die apostel sê voorts: “Maar die hoop wat gesien word, is geen hoop nie; want wat iemand sien, waarom hoop hy dit nog? Maar as ons hoop wat ons nie sien nie, dan wag ons daarop met volharding” (Romeine 8:24, 25). Daardie oorspronklike hoop bestaan dus voort, ja, sal binnekort op glorieryke wyse vir die mensdom verwesenlik word (2 Petrus 3:13; Openbaring 21:4, 5). Juis omdat dit ’n hoop vir die hele mensdom is, verdien dit om aan almal bekendgemaak te word. Dit is die voorneme van ons ‘God van hoop’.

21, 22. Wat kan ons verwag dat die nasies in die nabye toekoms sal doen?

²¹ Nou is sy tyd om hierdie voorneme uit te voer. Selfs in ons era wanneer sommige nasies van die VV wetenskaplike beheer oor die kern van alle materie verkry het, meen die leiers van hierdie regerings nie dat dit nodig is om die oplossing van probleme aan ’n hoër intelligensie oor te laat nie.—Vergelyk Genesis 11:6.

²² Volksgodsdiens neem meer as ooit tevore ’n verdedigende houding aan, met die rug teen die muur. Die verdelende invloed daarvan moet weggedoen word. Die Bybel toon dat die heersende elemente hulle meerderheid sal laat geld en hulle sal afskei van die parasietagtige godsdienste wat al so lank probeer om soveel moontlik uit die wêreldstelsel te suig. Dit is dus nie verbasend dat die politieke element hierdie weg sal inslaan nie. Wanneer hulle hierdie aanval op godsdiens met welslae deurvoer, sal dit na hulle mening toon dat daar geen God is wat verdien om aanbid en gedien te word nie. Profesieë toon dat hulle dan sal draai teen die getuies van God, wat oorbly. Hulle sal uitsien na ’n maklike oorwinning oor Jehovah se Getuies om hulle veldtog teen God af te sluit.—Openbaring 17:12-17; Esegiël 38:10-23.

23, 24. Hoe sal Jehovah reageer op die nasies se aanval op sy volk?

²³ Maar hulle sal uiteindelik die skandelike nederlaag ly wat onvermydelik is vir iemand wat die stryd durf aanbind met Jehovah van die leërskare, wat nog nooit die onderspit gedelf het nie. Dit sal onmiskenbaar toon dat hulle die doelstellings bevorder het van die enigste ware God se hoofteenstander, naamlik, “die slang”, Satan, “die god van hierdie wêreld”.—2 Korinthiërs 4:4.

²⁴ Wat ’n vernedering sal dit tog vir hulle wees! Wat hulle wou doen, sal die opperste vermetelheid blyk te wees en sal die God van hemel en aarde se regverdige verontwaardiging opwek. Dis hy wat vir die niksbeduidende mensdom kon sê: “Want my gedagtes is nie julle gedagtes nie, en julle weë is nie my weë nie, spreek die HERE. Want soos die hemel hoër is as die aarde, so is my weë hoër as julle weë en my gedagtes as julle gedagtes. Want soos die reën en die sneeu van die hemel neerdaal en daarheen nie terugkeer nie, maar die aarde deurvogtig en maak dat dit voortbring en uitspruit en saad gee aan die saaier en brood aan die eter; so sal my woord wees wat uit my mond uitgaan: dit sal nie leeg na My terugkeer nie, maar doen wat My behaag en voorspoedig wees in alles waartoe Ek dit stuur.”—Jesaja 55:8-11.

25. Waarom het ons nou goeie rede om op Jehovah te vertrou as ons ‘God van hoop’?

²⁵ Hierdie Skepper van die mens het groot fyngevoeligheid, soos hy self het, in die mens se hart geplaas. “Want so sê [Jehovah] van die leërskare: Hy het my gestuur agter heerlikheid aan na die nasies wat julle uitgebuit het; want wie julle aanraak, raak [my] oogappel aan” (Sagaria 2:8, vgl. NW). Jehovah se Getuies sal derhalwe op Jehovah moet hoop. Hy sal aan daardie hoop voldoen en sy universele soewereiniteit op die heerlikste wyse versier. Hy sal buite alle verdere dispuut bewys dat hy die allerhoogste, almagtige, ewige God is, wat aan die hoogste verwagtinge van sy skepsele in die ganse hemel en aarde voldoen het. Halleluja!—Psalm 150:6.

Hoe sou jy antwoord?

◻ Waarom is die hoop van die nasies bedrieglik?

◻ Hoe het God in Genesis 3:15 ’n grondslag vir hoop voorsien?

◻ Wat was Jesus se beskouing in verband met Psalm 37:34?

◻ Waarom het ons nou rede tot hoop?

[Prent op bladsy 10]

Soos skape hulle herder volg, het Dawid op Jehovah vertrou en gehoop

[Erkenning]

Prente-argief (Nabye Oosterse geskiedenis)