Jongmense—Moenie ’n dubbele lewe lei nie
“Verbly jou, o jongeling, in jou jeug . . . maar weet dat God jou oor al hierdie dinge in die gerig sal bring.”—PREDIKER 11:9.
1, 2. Watter voorbeeld is daar van ’n jeugdige wat ’n dubbele lewe gelei het?
“EK IS van kleins af in ’n Christelike atmosfeer onder Jehovah se Getuies grootgemaak”, het ’n jeugdige geskryf. “Die lewe wat ek gelei het, selfs by die huis, was nietemin heeltemal strydig met die standaarde en denke van my ouers. My lewe was merendeels ’n losbandige lewe, ’n ongedissiplineerde lewe van die wêreld.”
2 Die jeugdige het verder verduidelik: “Selfs voor ek tien was, het ek begin om die mantel na die wind te draai—om aanvaarding en vriendskap by die skool te kry en steeds deur my ouers aanvaar te word. By die skool het ek my sover moontlik by die mode en gedrag daar aangepas . . . Maar by die huis was ek heeltemal anders. Ek was die voorbeeldige Christen wat my ouers verwag het.”
3. (a) Waarvan is ons seker, maar wat besef ons? (b) Waarom skenk ons aandag aan die jeug?
3 Ons besef dat hierdie jeugdige se gedrag nie tipies is van die meeste van julle jongmense in die gemeente nie. Ons is seker dat die meeste van julle eerlik met julle ouers en die gemeente is, en dit verbly ons harte. Terselfdertyd weet ons dat party hulle regskape voordoen en ’n weg van oortreding so goed hulle kan vir ouer persone wegsteek. Die vraag is gevolglik: Is jy die soort persoon wat jy ons laat dink jy is of lei jy ’n dubbele lewe? Ons vra dit nie in ’n kritiese gees nie, maar eerder omdat ons jou waarlik liefhet en jou wil help om jou jeug te geniet deur so te lewe dat dit Jehovah sal behaag.—Prediker 11:9, 10; 12:14; 2 Korinthiërs 5:10.
4. Hoe het party volwassenes ook dubbele lewens gelei, maar wat is onlangs onder jongmense opgemerk?
4 Maar jy vra dalk: ‘Waarom word daar op ons as jongmense gepik? Wat van volwassenes?’ Dit ly geen twyfel dat hulle ook moet oppas dat hulle nie ’n dubbele lewe lei nie. Gehasi, die dienaar van Elisa, het bedrieglik opgetree en die feit probeer wegsteek dat by geskenke van Naäman aanvaar het (2 Konings 5:20-26). En Ananias en Saffira, wat volwassenes was, het oneerlik gehandel deur te sê dat hulle die hele prys van die grond vir die apostels gegee het—in ’n poging om ’n goeie indruk te skep—terwyl hulle in werklikheid vir hulleself van die geld agtergehou het (Handelinge 5:1-4). Die rede waarom ons egter aandag aan julle as jongmense skenk, is omdat hierdie probleem blykbaar onder julle toegeneem het.
Waarom party ’n dubbele lewe lei
5. (a) Waarom lei party jongmense ’n dubbele lewe? (b) Hoe word jongmense dikwels behandel wanneer hulle prysenswaardige lewens lei, en wat doen party dus?
5 Waarom is dit so? Een jeugdige het ’n vername rede raak aangewys en verduidelik: “Ek wou nie my vriende verloor deur anders te wees nie.” Dit is weliswaar so dat ’n mens dikwels bespot word omdat jy op ’n heilsame wyse anders is. (Vergelyk 1 Petrus 3:16; 4:4.) Om dit te vermy en deur hulle portuurs aanvaar te word, sal party jongmense selfs dronk word of geslagsomgang hê. ’n Dertienjarige meisie wat nie ’n Getuie is nie en net A’s gekry en altyd aan klasbesprekings deelgeneem het, het gekla: “Ouens sal nooit in iemand soos ek belangstel wat altyd voorbeeldig is nie. . . . Ek oorweeg dit om my punte te laat daal of iets dergeliks te doen om my reputasie interessanter te maak.”
6. Hoe is Petrus beïnvloed om verkeerd op te tree, en hoe moet dit dus ons beoordeling van jongmense raak?
6 Dit is noemenswaardig dat die apostel Petrus eenkeer sy beeld, of reputasie, belangriker geag het as om te doen wat hy geweet het reg was. Toe Joodse Christene van Jerusalem Antiochië besoek het, het Petrus hom onttrek aan omgang met die nie-Joodse Christene uit vrees dat die Jode hom sou kritiseer vir sy omgang met hierdie nie-Jode (Galasiërs 2:11-14). Is dit dan ’n wonder, aangesien selfs ryp Christene aldus voor portuurdwang geswig het, dat onervare jongmense dit ook doen?—Spreuke 22:15.
7. Wat kan party jongmense in die versoeking bring om ’n dubbele lewe te lei?
7 ’n Verwante rede waarom jongmense ’n dubbele lewe lei, is omdat hulle meen dat hulle pret mis. Hulle hoor kinders by die skool oor hulle bedrywighede praat—hoe lekker die partytjie was, die wonderlike musiek, die drinkery, die dwelms, hoe bedwelmd hulle was! Of hulle hoor hoe hy, of sy, kan soen en geslagsgemeenskap het. ’n Begeerte word dus gewek om hierdie dinge te ervaar, en die jonges word beïnvloed om wat die Bybel “die kortstondige genieting van sonde” noem op die proef te stel.—Hebreërs 11:24, 25, NAV; 1 Korinthiërs 10:6-8.
8. Om watter fundamentele rede lei jongmense dubbele lewens?
8 Die grondrede waarom party jongmense ’n dubbele lewe lei, is egter dat Jehovah en die komende nuwe wêreld eenvoudig nie vir hulle werklik is nie. Hulle glo nie werklik Jehovah se beloftes of die waarskuwings wat deur sy Woord en sy sigbare organisasie oor die gevolge van ongehoorsaamheid aan Jehovah gegee word nie (Galasiërs 6:7, 8). Hulle is nie soos Moses van wie die Bybel sê nie: “Hy het uitgesien na [God se] beloning. . . . Hy het volgehou soos een wat die Onsienlike sien.” Jehovah en Sy beloftes was vir Moses ’n werklikheid. Maar diegene wat ’n dubbele lewe lei, het nie daardie geloof nie. Al wat hulle sien, is wat Satan wil hê hulle moet sien—die glans van sy stelsel. En daarom jaag hulle die tydelike genieting van sonde na en probeer hulle nietemin om hulle terselfdertyd heilig voor te doen.—Hebreërs 11:26, 27.
Ouers, julle kan help
9. (a) Hoe kan ouers daartoe bydra dat hulle kinders ’n dubbele lewe lei? (b) Wat moet ouer persone besef en wakker wees om te doen?
9 Die jeugdige wat aan die begin aangehaal is, het gesê: “Wat my by die skool ongewild gemaak het, het aanvaarding en ’n glimlag van goedkeuring by die huis meegebring. Maar ek het meer as dit nodig gehad. Ek het iemand nodig gehad op wie ek kon steun, mee kon praat en in my vertroue kon neem, en ek het dit nie by my ouers gekry nie.” Ouers, let julle daarop dat julle nie daartoe bydra dat julle kinders ’n dubbele lewe lei nie? Gee julle hulle die persoonlike aandag en leiding wat hulle nodig het? Ouer persone moet besef watter ontsaglike, geloofondermynende druk ons jongmense by die skool ondervind en moet wakker wees om alles moontlik te doen om hulle aan te moedig en te help.—Psalm 73:2, 3; Hebreërs 12:3, 12, 13.
10. (a) Dit is ouers se verantwoordelikheid om watter nuuskierigheid te bevredig? (b) Wat is dikwels die gevolg wanneer ouers nie leiding gee nie?
10 ’n Jeugdige se vrae draai dikwels om verhoudinge met lede van die ander geslag, ’n onderwerp wat baie ouers ongelukkig vermy. “Hulle het nooit ’n openhartige gesprek met my gevoer nie”, het ’n mooi 15-jarige leerling wat met lof geslaag het, gesê. “Alles wat ek oor seks geleer het, moes ek self uitvind. . . . Ek was te skaam om daaroor te begin praat, al was daar baie dinge wat ek wou weet.” Wat was die gevolg? Sy het gesê: “Die onsigbare muur tussen my en my ouers het al hoe dikker geword, en ek het ’n baie nuuskierige, dwase en ontvanklike meisie geword.” Ja, sy het voor die seksuele toenaderings van ’n jongman geswig, maar wie sou jy sê was deels hiervoor verantwoordelik?—Spreuke 22:3; 27:12.
11. (a) Hoe kan ouers toon dat hulle hulle kinders liefhet? (b) Hoe sal jongmense waarskynlik op sulke liefde reageer?
11 Dit is noodsaaklik dat ouers vir hulle kinders wys dat hulle hulle waarlik liefhet deur tyd saam met hulle deur te bring, vertroulike gesprekke met hulle te voer en hulle van riglyne te voorsien (Spreuke 15:22; 20:18). “Ek dink dat as hulle werklik vir my omgegee het hulle reëls sou neergelê het”, het ’n ander jeugdige gesê. Selfs al grief jou reëls en regulasies jongmense nou, sal hulle later met waardering daarop terugkyk. ’n Jong meisie het aan haar moeder geskryf: “As iemand wat voortdurend gekyk het hoe ver ek kon gaan, op die uitkyk was na swak plekke en skuiwergate om die streng reëls en regulasies te ontduik, is ek baie, baie dankbaar dat Ma my kortgevat het.” Toon dus dat jy jou kinders liefhet deur te vereis dat hulle jou riglyne gehoorsaam. Mag jy nooit daartoe bydra dat hulle ’n dubbele lewe lei omdat jy versuim om die kommunikasielyne oop te hou of omdat jy nie daar is wanneer hulle jou nodig het nie!
12. Watter onverstandige gesindheid van party ouers dra daartoe by dat hulle kinders ’n dubbele lewe lei?
12 Ouers kan ook op ’n heeltemal ander manier daartoe bydra dat hulle kinders ’n dubbele lewe lei. Die kommentare van ’n regter van ’n hoër hof in die staat New Jersey lig dit toe: “Onderwysers”, het die regter gesê, “probeer om kinders vir oortredings by die skool te dissiplineer en word dan deur ouers verwyt in plaas van ondersteun.” Dit lyk of party ouers verkeerdelik glo dat hulle kinders niks verkeerds kan doen nie. Selfs wanneer Christen- ouere manne of ander verantwoordelike persone in die gemeente die oortredings van hulle kinders onder hulle aandag bring, is die ouers doof daarvoor. Sodoende dra hulle by tot die dubbelhartigheid van hulle kinders.
Wat ’n dubbele lewe werklik is
13. Waarop kom ’n dubbele lewe in werklikheid neer?
13 Dit is noodsaaklik om oor die volgende na te dink: Om ’n dubbele lewe te lei, kom in werklikheid op bedrog neer—om ’n bedrieër, ’n huigelaar, te wees (Psalm 12:3; 2 Timotheüs 3:13). Dit is om soos Satan te wees, wat ‘homself in ’n engel van die lig verander’ (2 Korinthiërs 11:14, 15). Dit beteken ook dat jy soos daardie godsdiensleiers is van wie Jesus gesê het: “Wee julle, skrifgeleerdes en Fariseërs, geveinsdes, want julle is net soos gewitte grafte wat van buite wel fraai lyk, maar van binne vol doodsbene en allerhande onreinheid is. So lyk julle ook van buite vir die mense wel regverdig, maar van binne is julle vol geveinsdheid en ongeregtigheid” (Mattheüs 23:27, 28). Dit is duidelik dat ’n dubbele lewe ’n ernstige oortreding teen God is.
14. Waarom moet jy nie ’n dubbele lewe wil lei nie?
14 Nog ’n feit vir ernstige oorweging is: ’n Huigelagtige weg kan nie vir ’n onbepaalde tyd weggesteek word nie. “Die seun laat hom alreeds aan sy handelinge ken, of sy handelwyse suiwer en of dit reg is”, sê die Bybel (Spreuke 20:11; Lukas 12:1-3). Ja, jou dade, hetsy goed of sleg, sal uiteindelik aan die lig kom. En die Bybel toon dat God huigelaars swaar sal straf (Mattheüs 24:51). Dit moet beslis jou begeerte wees om nie ’n dubbele lewe te lei nie!
Hoe om dit te vermy
15. Wat sal jongmense help om nie ’n dubbele lewe te lei nie?
15 Een manier om ’n dubbele lewe te vermy, is om te besef waarop dit werklik neerkom en jou dan af te vra: Is dit hoe ek onthou wil word, as ’n huigelaar, as ’n nabootser van Satan en die Fariseërs? Natuurlik nie! Iets anders wat jou sal help om ’n dubbele lewe te vermy, is om te dink aan die hartseer en droefheid wat so ’n lewe jou sal besorg. Onthou wat met Gehasi gebeur het omdat by probeer huigel het. Naäman se melaatsheid het hom getref en hy was vir die res van sy lewe ’n melaatse. En Ananias en Saffira is albei deur Jehovah gedood omdat hulle probeer voorgee het dat hulle vrygewig is.—2 Konings 5:27; Handelinge 5:5, 9, 10.
16. Wat het met een jongman gebeur wat in ’n wêreldse lewenstyl verval het?
16 Daar is ook hedendaagse voorbeelde. ’n Jongman in die Verenigde State het begin om die Bybel te bestudeer en vergaderinge by die Koninkryksaal by te woon. Toe het hy in ’n wêreldse lewenstyl verval en Christelike omgang gestaak. Jare het verstryk, en hy het geskryf: “Sowat twee maande gelede het ek God gevra om ’n Getuie na my toe te stuur, want ek wou weer van voor af begin. Ek het weer begin studeer toe die bom bars. Daar is ’n maand gelede gediagnoseer dat ek Kaposi se sarkoom het, deel van die nuwe, ongeneeslike Vigs-sindroom.” Hy het afgesluit: “As ek maar net destyds op Skriftuurlike waarskuwings ag geslaan en dit gehoorsaam het, sou ek nie vandag in hierdie situasie gewees het nie.” Jy wil tog seer seker sulke droewige gevolge vermy! Die wêreld kan werklik niks van waarde aanbied nie.—1 Johannes 2:15-17.
17. Watter ander oorweging sal jongmense help om nie ’n dubbele lewe te lei nie?
17 Nog iets wat jou sal help om nie ’n dubbele lewe te lei nie, is om na te dink oor die uitwerking wat dit op Jehovah se naam sal hê. Die jeugdige wat in die inleiding gemeld is, het gesê dat iemand wat gesien het dat hy ’n sigaret neem, gesê het: “Ek het nie geweet dat Jehovah se Getuies mag rook nie. Is jy nie ’n Getuie nie?” Hy het later gesê dat die vraag hom diep ontstel het, want sy dade het Jehovah tot oneer gestrek. Wil jy hê dit moet gebeur? Dink jy so min van ons God dat jy, soos ontroue Israel van die ou tyd, sy naam skade sal aandoen?—Psalm 78:36, 37, 41; Esegiël 36:22.
18. (a) Hoe sal ouers waarskynlik reageer as hulle uitvind dat hulle kind ’n dubbele lewe lei? (b) Waarom behoort dit Christelike jongmense te keer om ’n dubbele lewe te lei?
18 Dink ook aan jou ouers se naam en gevoelens. “Die dag het aangebreek toe my ouers uitgevind het wat ek werklik is”, het die voormelde jeugdige geskryf. “Dit het hulle geskok. En vir die eerste keer in my lewe het ek my ma en pa sien huil. Wat ek gedoen het, het hulle diep seergemaak.” Jou ouers sal waarskynlik ook huil as hulle moes uitvind dat jy ’n dubbele lewe lei. Wil jy hê dit moet gebeur? “’n Goeie naam is meer werd as groot rykdom”, sê die Bybel (Spreuke 22:1, NAV). Jy vernietig jou eie goeie naam as jy ’n dubbele lewe lei. Maar dit is nie al nie. Jy doen ook jou ouers se goeie naam skade aan en sleep dit deur die modder sodat hulle vernederd voel en in die verleentheid kom.—Spreuke 10:1; 17:21.
19. Hoe het die wangedrag van Jakob se seuns hom geraak, en watter les kan ons hieruit leer?
19 Jakob se seuns is ’n treffende voorbeeld van hoe kinders hulle ouers se goeie naam kan vernietig. Toe Jakob se dogter Dina onteer is, het haar broers die manne van die stad uitgemoor en toe die stad geplunder sodat Jakob geweeklaag het: “Julle het my in die moeilikheid gebring, want julle het my naam sleg gemaak by die mense van hierdie land.” God het Jakob selfs aangesê om die gebied te verlaat (Genesis 34:30, NAV; 35:1). Jy kan ook die naam van jou vader en moeder sleg maak sodat hulle te skaam is om selfs hulle bure en vriende te ontmoet. Ja, soos die Bybel sê: “’n Dwase seun is ’n verdriet vir sy vader en bitter smart vir haar wat hom gebaar het.”—Spreuke 17:25.
20. Watter wonderlike gawe het Christenouers vir hulle kinders moontlik gemaak?
20 Ons is egter seker dat jy nie wil hê dat jou ouers verdriet en smart moet ondervind nie. Dink dus na oor watter uitwerking jou dade op hulle sal hê. As jy bevoorreg is om Christenouers te hê, moet jy ook dink aan wat hulle vir jou gegee het—nie net lewe nie—maar iets kosbaarders. Die Bybel sê van Jehovah: “U goedertierenheid is beter as die lewe” (Psalm 63:4). Deur jou in die waarheid groot te maak, het jou ouers dit vir jou moontlik gemaak om God se goedertierenheid te geniet deur jou te help om ’n verhouding met hom te hê. Om dit te hê, is beter as om die lewe self te hê, want al sou jy sterf, sal God jou tot ewige lewe in die Paradys opwek.
Help ander om dit te vermy
21. (a) Watter verantwoordelikheid het jongmense wat weet dat ander verkeerd doen? (b) Watter goeie voorbeeld het ’n 13-jarige gestel?
21 Wat moet jy doen as jy van iemand weet wat ’n dubbele lewe lei? Eerstens, spoor die persoon aan om die ouere manne te nader. En gestel hy of sy weier om dit te doen. Wat dan? Dan is dit jou Skriftuurlike verantwoordelikheid om dit aan te meld (Levitikus 5:1). Ons besef dat dit miskien nie maklik is nie, maar dit is die regte ding om te doen. “Die wonde deur een wat liefhet, is opreg bedoel”, sê die Bybel (Spreuke 27:6). Na ’n 13-jarige meisie ’n toespraak gehoor het wat haar Skriftuurlike verantwoordelikheid uiteengesit het, het sy na ’n vriendin gegaan wat sy geweet het verkeerde dinge doen en vir haar gesê dat sy by die ouere manne moet bieg. “Ek het gaan seker maak of sy met ’n ouere man gepraat het”, skryf die meisie. “Sy het nie. Ek het dus met een van hulle gaan praat.” Die jong meisie het gevra: “Het ek die regte ding gedoen deur my ‘gewese beste vriendin’ te verklap?” Natuurlik het sy! Hoewel die onmiddellike gevolge van hierdie optrede miskien bedroewend is, kan die resultaat agterna vreugdevol, selfs lewensreddend vir die oortreder, wees.—Hebreërs 12:11.
22. Watter verstandige weg word jongmense aangespoor om in te slaan, en wat sal die uiteinde daarvan wees?
22 Maar dit alles kan vermy word as jy in die eerste plek nie ’n dubbele lewe lei nie. Wees dus verstandig. Bou ’n sterk persoonlike verhouding met God op, soos jy met ’n hegte vriend sou doen. Doen dit deur gereeld tot hom te bid, deur hom om hulp te vra en deur sy Woord, die Bybel, ywerig te bestudeer sodat jy sy eienskappe waarlik kan waardeer. Jongmense, julle sal dan geseën word en julle ouers se harte bly maak. Maar belangriker nog, julle sal Jehovah se hart bly maak.—Spreuke 27:11.
Hoe sou jy antwoord?
◻ Waarom lei party jongmense ’n dubbele lewe?
◻ Hoe dra party ouers daartoe by dat hulle kinders ’n dubbele lewe lei?
◻ Waarop kom ’n dubbele lewe in werklikheid neer?
◻ Hoe kan jongmense voorkom dat hulle ’n dubbele lewe lei?
◻ Watter verantwoordelikheid het jongmense as hulle van ander jonges weet wat ernstige oortredings begaan het?
[Prent op bladsy 18]
Vertroulike gesprekke is bewys van die ouer se liefde
[Prent op bladsy 20]
As jy weet dat iemand ’n ernstige oortreding begaan het, moet jy hom of haar aanspoor om dit aan te meld