Jong mense vra . . .

Hoe kan ek van ’n dubbele lewe wegbreek?

“Ek het alles verwerp wat my ouers gesê het”, bely Ann.a “Ek was opstandig en het vir hulle leuens begin vertel. Ek het vir hulle gesê dat ek winkels toe gaan, terwyl ek in werklikheid by ’n kêrel gaan kuier het.”

ANN het ’n dubbele lewe gelei, en spoedig het sy nie net haar ouers nie, maar ook haar Bybelopgeleide gewete verontagsaam. Jy sien, Ann het in die geheim geslagsomgang met haar kêrel gehad. Sy sê: “Ek het Jehovah heeltemal uit my gedagtes probeer skuif.” Sy moes nietemin spoedig die werklikheid van die volgende feit onder die oë sien: ‘Net wat ’n mens saai, dit sal jy ook maai’ (Galasiërs 6:7). Ann het swanger geraak. “Ek het my kind met my hele hart lief”, sê sy, “maar niemand behoort so iets deur te maak nie. Nie ongetroud nie. Nie alleen nie.”

Het jy op die een of ander manier in ’n dubbele lewe verstrik geraak—terwyl jy vir jou ouers en mede-Christene probeer wegsteek wat jy werklik is? Miskien gaan jy met net ’n paar van jou skoolmaats om wat jy weet jou ouers nie sal goedkeur nie. Of dalk maak jy jou aan ernstiger wangedrag skuldig, soos om te rook, alkohol te misbruik of voorhuwelikse geslagsomgang te hê. Wat ook al die geval, dit is soos met Ann net ’n kwessie van tyd voordat dit tot ernstige gevolge lei.b

Nogtans laat sommige jongmense nie toe dat hierdie feit hulle enigsins van hulle opstandige weg afsien nie. Hulle is soos die man wat na homself in die spieël kyk en ‘dadelik vergeet hoe hy gelyk het’ (Jakobus 1:23, 24). Ons hoop dat jy anders is. Miskien het jy reeds ernstig na jouself begin kyk—en jy hou nie van dit wat jy sien nie. Jy wil verander. Jy besef dat jy moet verander. Die vraag is: Hoe kan jy verander?

Berou—die eerste stap

Eerstens moet jy ’n doelbewuste besluit neem om te verander. Handelinge 3:19 spoor ons aan: “Kom dan tot inkeer en bekeer julle, sodat julle sondes uitgewis kan word en tye van verkwikking van die aangesig van die Here mag kom.” Berou is egter veel meer as net ’n verstandelike prestasie. Om berou te toon, beteken om “spyt, wroeging of gewetenskwelling te hê oor wat jy gedoen het”. Die Bybelskrywer Jakobus het gemaan: “Weeklaag, treur en ween. Laat julle gelag in treurigheid verander word en julle blydskap in bedruktheid. Verneder julle voor die Here” (Jakobus 4:9, 10). Hoe kan jy sleg voel oor iets wat jy tot nou toe geniet het? Dink aan hoe verkeerd dit is. Dink aan hoe dit God seergemaak het. Dink aan die probleme wat jou verborge weg vir jou meegebring het en die leuens wat jy al moes vertel om dit geheim te hou. Herinner jouself daaraan dat God bedrog verafsku! (Psalm 5:7). As jy oor hierdie feite peins, sal dit jou help om slegte gedrag verstandelik sowel as emosioneel te verwerp.

Om net sleg te voel oor wat jy doen, is egter nie genoeg nie. ’n Jong man met die naam Robert, wat in die geheim dwelms misbruik het, erken: “Ek het ellendig gevoel. Ek het geweet wat reg en wat verkeerd is. Tog het ek aangehou om ’n dubbele lewe te lei.” Moedige optrede is dus nodig! In 2 Kronieke 7:14 sê God as sondaars “hulle verootmoedig en bid en [sy] aangesig soek en hulle bekeer van hul verkeerde weë, dan sal [hy] uit die hemel hoor en hulle sonde vergewe”.

Om ‘God se aangesig te soek’, beteken om hom in gebed te nader, jou sonde te bely en hom om vergifnis te smeek. Dit sal moontlik nie maklik wees nie, maar jy sal ongetwyfeld baie verlig voel omdat jy dit gedoen het. Die psalmis het gesê: “Toe ek geswyg het, het my gebeente uitgeteer in my gebrul die hele dag; want u hand was dag en nag swaar op my; . . . My sonde het ek U bekend gemaak, en my ongeregtigheid het ek nie bedek nie.”—Psalm 32:3-5.

Vertel jou ouers

Iemand anders moet van jou probleme weet. Maar wie? ’n Tiener met die naam Brian erken: “Een van my grootste foute was om met my probleme na my sogenaamde vriende toe te gaan in plaas van na my Christenma. Maar ek was bang om met haar daaroor te praat; bang vir hoe ek gedink het sy sou reageer, en ek het my dus tot my vriende gewend wat my net al hoe verder van die waarheid af weggelei het.” Moenie dieselfde fout begaan nie. Gee jou hart aan jou godvresende ouers. (Vergelyk Spreuke 23:26.) Hulle het die reg om te weet wat jy gedoen het. Hoofstuk 2 van die boek Vrae wat jongmense vra—Antwoorde wat werk het etlike wenke oor hoe jy jou ouers in hierdie verband kan nader.c

Dit spreek vanself dat hulle nie juis gelukkig sal wees omdat jy vir hulle leuens vertel het nie. Maar ouers het sonder uitsondering sterk gevoelens vir hulle kinders. Die skrywer Clayton Barbeau sê: “Hulle sal jou nie verstoot omdat jy ’n fout begaan het of in die moeilikheid is nie. Kinders het al swanger geraak, ’n seksueel oordraagbare siekte opgedoen, ’n alkohol- of dwelmprobleem ontwikkel of in ander moeilikheid beland en dan voorspel dat hulle ouers met afgryse en afkeer vervul sal word, die huis sal opblaas en die land sal verlaat. Maar wanneer hulle hulle ouers vertel het, het hulle eerder ’n drukkie gekry of is hulle omhels en is daar vir hulle gesê: ‘Wel, jy is nou regtig in die verknorsing, ons sal maar moet kyk hoe ons jou daaruit gaan kry.’” Ja, wanneer die aanvanklike skok en woede eers verdwyn het, probeer die meeste ouers hulle ondersteuning gee. Hoeveel te meer is dit die geval wanneer jou ouers godvresend is! Hulle hoofdoel is om sake reg te stel en nie om jou te verneder of seer te maak nie. (Vergelyk Jesaja 1:18.) Hulle sal dalk reël dat jy met die gemeentelike ouere manne hieroor praat.—Jakobus 5:14, 15.

Jy sal weliswaar die een of ander welverdiende straf van jou ouers ontvang en jy word dalk meer as voorheen beperk. Maar dit kan in werklikheid help dat jy nie weer in jou ou weë verval nie. Wanneer jy sake met jou ouers uitstryk en jy hulle liefdevolle besorgdheid sien, kan dit heel moontlik die manier waarop jy hulle beskou heeltemal verander. Tot nou toe het hulle reëls en beperkings jou waarskynlik kwaad gemaak. Een meisie met die naam Paulette erken: “Dis moeilik om ons ouers se raad en riglyne te aanvaar. Maar ek besef nou dat dit tot ons eie voordeel en blywende geluk strek.”

Verander jou vriendekring

’n Jongmens sal baie selde op sy eie ’n dubbele lewe lei. Baie van jou maats het jou heel moontlik in jou opstand aangepor! Om te verhoed dat jy na ’n lewe vol geheimhouding terugkeer, moet jy jou vriendekring verander. Die psalmis het gesê: “Ek sit nie by valse mense nie, en met slinkse mense gaan ek nie om nie” (Psalm 26:4). Om ou vriendskapsbande te verbreek, is nie maklik nie. Jy moet dalk soos die psalmis bid: “Red my van die man van bedrog en onreg” (Psalm 43:1). Tree in ooreenstemming met hierdie gebed op deur jou ou vriende te vertel dat jy verander het en vasbeslote is om te doen wat reg is. Vertel liewer vir ander van jou geloof as wat jy in die geheim ’n dissipel van Jesus is. (Vergelyk Johannes 19:38.) Gewoonlik sal slegte vriende gou ander geselskap soek.

Die volgende stap is om slegte vriende met opbouende vriende te vervang. Vind jy dat daar te min godvresende jongmense is? Dink dan aan die profeet Jeremia wat gesê het: “Ek het nie gesit in ’n vergadering van spotters of was nie uitgelate nie; vanweë u hand het ek alleen gesit” (Jeremia 15:17). Dit sal vir jou beter wees as jy op jou eie is as om by jongmense betrokke te raak wat jou net geestelik sal verswak. Maar ’n mens kan ware vriende vind as jy die moeite doen. Tammy het byvoorbeeld met ’n niggie begin omgaan wat ’n voltydse bedienaar is. “Ons het baie geheg aan mekaar geraak”, sê Tammy. “Die dae wanneer ek nie in die skool was nie, het ek saam met haar aan die predikingswerk deelgeneem. Dit het my gehelp om veranderinge in my lewe aan te bring.”

Maar “die heel beste beskerming”, sê een jong Duitse man, “is ’n goeie gewete, wat uit ’n intieme verhouding met Jehovah God voortspruit”. Een jong meisie wat ’n dubbele lewe begin lei het, erken: “Ek het nooit ’n intieme verhouding met my Vader, Jehovah, ontwikkel nie.” Sy het die situasie deur middel van gebed en persoonlike studie begin verander. “Nou het ek ’n verhouding met Jehovah wat niemand ooit van my kan wegneem nie”, sê sy trots. Jy kan ook so ’n intieme vriendskap met God geniet. Hy sal jou lei en ondersteun, selfs al vind jy dit moeilik om jou ou lewenswyse te verander. Psalm 37:24 sê van ’n getroue kneg van God: “As hy val, dan stort hy nie neer nie; want die HERE ondersteun sy hand.” Ja, met Jehovah se hulp kán jy van ’n dubbele lewe wegbreek.

[Voetnote]

[Lokteks op bladsy 19]

“Ek het Jehovah heeltemal uit my gedagtes probeer skuif”

[Lokteks op bladsy 19]

Jy moet ’n doelbewuste besluit neem om te verander

[Prent op bladsy 20]

Verduidelik vir jou ou vriende dat jy verander het en nie meer saam met hulle verkeerde dinge gaan doen nie