Jy kan berge versit!
OP 29 MEI 1953 het ’n man volgens berig vir die eerste keer bo-op die hoogste bergpiek in die wêreld gestaan—Mount Everest, 8 848 meter bo die seespieël. Met die ondersteuning van meer as 450 manne het Edmund Hillary van Nieu-Seeland en Tenzing Norgay, ’n Nepalese Sjerpa, met welslae die gevare van gladde ys, verblindende sneeu en gebrek aan suurstof te bowe gekom en die hoogste punt van hulle doelwit van 8,8 kilometer bereik.
Dit is gewis ’n uitsonderlike prestasie om hoë bergspitse te klim. Nogtans kan dit nie vergelyk met wat Jesus vir sy dissipels beskryf het nie: “Voorwaar Ek sê vir julle, as julle geloof het soos ’n mosterdsaad sal julle vir hierdie berg sê: Gaan weg hiervandaan daarnatoe! en hy sal weggaan, en niks sal vir julle onmoontlik wees nie.” Stel jou voor dat jy, pleks van ’n berg te klim, dit versit!—Mattheüs 17:20.
Wat het Jesus beweeg om dit vir sy dissipels te sê? Hulle pogings om ’n demonbesete seun te genees het pas tevore misluk. Jesus het die rede vir hulle onvermoë by hulle tuisgebring: Hulle het meer geloof nodig gehad (Mattheüs 17:14-20). Hy het geloof met ’n mosterdsaad vergelyk, iets wat hulle goed geken het. Hoewel ’n mosterdsaad “die kleinste” van sade is, word dit na ’n paar maande se groei ’n boomagtige plant (Mattheüs 13:31, 32). Jesus het dus beklemtoon watter groot potensiaal ’n bietjie geloof kan hê wanneer dit behoorlik opgebou en gevoed word—die skynbaar onmoontlike sal dan moontlik word.
Maar watter soort berge sal Jesus se dissipels kan versit as hulle sulke geloof opgebou het? Net soos ’n letterlike berg indrukwekkend kan wees, kan bergagtige struikelblokke ons vooruitgang in Jehovah se diens belemmer. Wat kan hierdie “berge” wees en hoe kan ons hulle versit?
Die apostel Paulus is ’n voorbeeld van ’n Christen wat voor talle struikelblokke te staan gekom het: Jy kan in 2 Korinthiërs 6:4-10 en 2 Korinthiërs 11:23-28 lees hoe hy ontberinge, slae, gevangenskap, skipbreuk en baie ander teenspoed ervaar het. Daarbenewens het hy ook daardie figuurlike “doring in die vlees” gehad, waarskynlik die een of ander probleem met sy oë (2 Korinthiërs 12:7; Handelinge 14:15, NW). Hoe kon hy sulke bergagtige struikelblokke oorkom en God se wil met welslae uitvoer? “Ek is tot alles in staat deur Christus wat my krag gee”, het Paulus geskryf. Dit was “sodat die voortreflikheid van die krag van God mag wees en nie uit ons nie” (Filippense 4:13; 2 Korinthiërs 4:7). Paulus het dus volkome vertroue gehad in Jehovah se vermoë om hom op die kritieke oomblik te versterk. Hy het geloof gehad.
Hoe om vandag berge te versit
Is dit jou begeerte om jou diens aan Jehovah uit te brei? Soos honderdduisende wat die groeiende geledere van voltydse predikers (pioniers) betree het, besef jy dalk ook die dringendheid van die tye en oorweeg jy dit moontlik ernstig om jou bediening uit te brei. Maar is daar ’n struikelblok in jou weg wat so onoorkoomlik soos ’n groot berg lyk? Kan jy in so ’n geval berge versit? Duisende het dit gedoen in hulle pogings om hulle diens aan Jehovah uit te brei. Hier is net ’n paar van hulle ondervindinge.
Een jong suster wat in haar laaste skooljaar eerste in haar klas gestaan het, wou graag ’n pionier word, maar haar berg was dat sy nie ’n betrekking gehad het nie. Sy vertel:
“My eie negatiewe denke en twyfelgedagtes oor my pionierdiens het ’n struikelblok geword wat ek moes oorkom. Aangesien dit my so gekwel het om ’n werk te vind voordat ek met die pionierdiens begin het, het ek nie ten volle vertrou op Jehovah en op sy vermoë om te sorg vir diegene wat sy aanbidding eerste stel nie. Ek het bly dink: ‘Ek sal eers ’n werk vind, dan sal ek my pionieraansoekvorm ingee.’ Ek was nie ’n pionier nie; ek het in werklikheid kosbare tyd verspil. Maar een van die gemeentelike ouere manne het my daarop gewys dat hoe langer ek wag om die pionierdiens te betree, hoe aanlokliker die voltydse betrekkings sou lyk, aangesien ek niks gehad het wat my daarvan weerhou het om hulle te aanvaar nie.”
Wat het sy gedoen? “Ek het aanhoudend tot Jehovah gebid dat my optrede en denke deur sy heilige gees gelei en gerig moet word.” Toe sy haar skoolloopbaan voltooi het, het hierdie suster aan die hulppionierdiens deelgeneem en toe het sy as gewone pionier begin dien. Kort daarna het sy geskikte sekulere werk gevind wat by haar pionierrooster gepas het.
Een ouere man, wie se vrou in die pionierdiens was en wat twee kinders moes grootmaak, het gemeen dat hy meer moes doen as om sy gesin net finansieel te onderhou. Vir sommige waarnemers het die omstandighede wat hom verhinder het om die pionierdiens te betree onoorkoomlik gelyk, en tog het hy begeer om sy bediening uit te brei. Wat moes verander?
“Ek dink die grootste struikelblok wat ek moes oorkom, was werklik ek self”, sê hy. “Die veldbediening was iets wat ek altyd geniet het en wanneer ek met diegene in die voltydse bediening gepraat en gesien het watter seëninge hulle geniet, het ek gevind dat die puik gees wat hulle openbaar aansteeklik was. Ek kon myself eendag in die voltydse bediening sien. Die probleem met my denke was dat die pionierdiens iets geword het waaroor ek net gedink het. Maar ek het nooit vir myself ’n datum bepaal wanneer ek graag die doelwit wou verwesenlik nie.”
Na biddende oorweging het hierdie broer sy doelwit, naamlik die voltydse diens, begin nastreef. Hy het sy voorman by die werk genader, sy planne verduidelik en toestemming gevra om sy weeklikse werkure te verminder. Wat die maatskappy se beleid betref, was die tye wat hy gevra het om te werk ongehoord.
Hy sê voorts: “My voorman het die gesprek beëindig deur te sê dat die tye wat ek versoek het my heel waarskynlik nie toegestaan sou word nie. Ek was taamlik seker dat die antwoord nee sou wees as die besluit uitsluitend by hom berus het. En die goedkeuring kon dus net deur middel van Jehovah se ondersteuning kom. Na anderhalf week het die bestuursafdeling my nuwe werkrooster goedgekeur gekry. Nadat ek my voorman bedank het, het ek na my motor uitgegaan, ’n paar blokke verder gery, langs die pad stilgehou en my dank en waardering teenoor Jehovah uitgespreek. Ja, my doelwit om die voltydse diens te betree kon ’n werklikheid word.”
Hoe het ’n getroude suster haar berg versit? Sy vertel: “Ek het vier kinders en ’n ongelowige man. Toe ek oor pionierdiens begin dink het, het ek heelwat struikelblokke gehad. Om maar een ding te noem, my man was tydelik sonder werk, aangesien hy seisoenwerk gedoen het, en ek het deeltyds gewerk om die rekeninge te help betaal. Ek het dus vir myself gesê dat ek weens my omstandighede nie kon pionier nie, hoewel ek die begeerte het. Maar dit is hier waar ek my denke moes verander. Ek het besef dat ek nooit die moeite sou doen om te probeer as ek aanhou dink dat ek dit nie kon doen nie. Die volgende belangrike vraag wat ek moes beantwoord, was: Waar sal ek die krag vandaan kry om aan die pionierdiens deel te neem? Ek het die antwoord in Filippense 4:13 gevind. Nie net het ek tot Jehovah oor die saak gebid nie, maar ek het ook al hoe meer op hom begin vertrou. Ek het ook stappe gedoen om my doelwit te bereik deur ’n goeie rooster uit te werk en ’n aansoekvorm om hulppionierdiens in te gee. Met verloop van tyd het Jehovah steeds die weg vir my geopen om die pionierdiens te betree. My man kon terugkeer werk toe, en ek het daarin geslaag om my deeltydse werk tot een dag per week te verminder. Kort hierna het ek ’n gewone pionier geword.”
Boonop het die voorreg haar te beurt geval om die Pionierdiensskool by te woon, wat haar baie in haar bediening gehelp het. “Ek wil net vir almal wat daaraan dink om die pionierdiens te betree, sê dat hulle tot Jehovah moet bid en dit aan hom moet oorlaat”, sê sy. “Wend dan die poging aan, en hy sal jou seën omdat jy probeer.”—Psalm 37:5.
Help hierdie ondervindinge jou nie om te besef hoe geloof, wanneer dit beoefen word, ’n Christen kan help om bergagtige hindernisse te oorkom nie? As dit dus jou begeerte is om ’n pionier te wees, kan jy gerus jou omstandighede ondersoek. Praat met ander wat pioniers is en leer uit hulle ondervindinge. Doen stappe om jou doelwit te bereik. En bid bowenal tot Jehovah oor jou begeerte; vertrou dan op hom om jou pogings te seën. Ja, jý kan ook berge versit!