Wat verhinder jou om gedoop te word?
“Daar is water; wat verhinder my om gedoop te word?”—HANDELINGE 8:36.
1. Wat was besig om op die pad tussen Jerusalem en Gasa te gebeur?
JEHOVAH se engel het gespreek, en iets merkwaardigs was besig om op die woestynpad tussen Jerusalem en Gasa te gebeur. ’n Ethiopiër het op ’n bewegende wa gesit en die Skrif gelees. Weldra het ’n ander man langs die wa gehardloop. “Verstaan u wel wat u lees?” het hy gevra. Die Ethiopiër het geantwoord: “Hoe kan ek tog as niemand my die weg wys nie?” Filippus die evangelis, wat deur die engel gestuur is, het hom daardie weg gewys. Nadat Filippus op die wa geklim het, het hy begin met ’n profesie wat deur Jesaja opgeteken is en “die evangelie van Jesus . . . verkondig”.
2, 3. (a) Hoe het die Ethiopiër op die goeie nuus gereageer? (b) Tot watter vrae gee hierdie gebeurtenis aanleiding?
2 Op een plek langs die pad het die Ethiopiër gesê: “Daar is water; wat verhinder my om gedoop te word?” Toe het hy beveel dat die wa moes stilhou. Albei mans het in die water ingegaan, en Filippus het hom gedoop. Jehovah se gees het die evangelis daarna elders weggevoer, en die Ethiopiër het met blydskap verder gereis.—Handelinge 8:26-39.
3 As jy met Jehovah se Getuies omgaan, maar nog nie gedoop is nie, laat hierdie gebeure jou dalk vra: Waarom is die Ethiopiër so gou gedoop? Hoe moet ’n mens gedoop word? Waarvan is dit ’n simbool? En wat verhinder my om gedoop te word?
Nie te vroeg gedoop nie
4. Wie was hierdie Ethiopiër?
4 Aangesien die Ethiopiër “na Jerusalem gekom het om te aanbid”, was hy ’n besnede Joodse proseliet. Hy was ’n “eunug”, maar nie in vleeslike sin nie, want seksueel verminkte manne is uit die Israelitiese gemeente uitgesluit (Deuteronomium 23:1). In sy geval het “eunug” ’n hofdienaar aangedui, want hy was ‘’n staatsamptenaar van koningin Kandace van die Ethiopiërs en was oor al haar skatte’.—Handelinge 8:27, vgl. NW.
5. Waarom kon die Ethiopiese eunug so gou gedoop word?
5 Die Ethiopiër was ’n heiden. Maar aangesien hy tot die Joodse godsdiens bekeer is, kon hy as ’n dissipel van Christus gedoop word voordat die Koninkryksboodskap in 36 G.J. aan onbesnede nie-Jode soos Cornelius verkondig is. As ’n Joodse proseliet het die Ethiopiër van God en Sy Woord geweet, hoewel hy geestelike hulp nodig gehad het. Filippus is dus beveel om vir hierdie man te preek en kon hom doop voordat die goeie nuus aan nie-Jode verkondig is.
Vroeë Christendoop
6. Hoe is die Ethiopiër gedoop, en waarom antwoord jy so?
6 Hoe is die Ethiopiër gedoop? Die woord “doop” vertaal die Griekse woord ba·ptiʹzo, wat beteken “indompel, onderdompel”. ’n Vorm van dieselfde woord word in 2 Konings 5:14 in die Griekse Septuaginta vir “ondergeduik” gebruik. En dit is opmerklik dat die Ethiopiër gevra het om gedoop te word toe hy en Filippus by “water” gekom het. Hulle het vir die doop “in die water afgeklim” en daarna daaruit ‘opgeklim’ (Handelinge 8:36-39, vgl. NW). Die Ethiopiese eunug is derhalwe deur onderdompeling in water gedoop.
7. Watter voorbeeld was daar van doop deur onderdompeling in water?
7 Jesus self is deur onderdompeling in water gedoop. Daar word derhalwe gesê dat hy “uit die water opgeklim” het nadat hy in die Jordaanrivier gedoop is (Mattheüs 3:13, 16). Trouens, Johannes die Doper het ’n plek in die Jordaanvallei naby Salim gekies as ’n geskikte plek om mense te doop. Waarom? “Omdat daar baie water was” (Johannes 3:23). Die Skrif magtig dus doop in ’n watermassa.
8. Watter gevolgtrekking in verband met doop kan ons uit gebruike van die Fariseërs en ander Jode maak?
8 Ons kan etlike gegronde gevolgtrekkings oor doop maak as ons gebruike van die Fariseërs en ander Jode ondersoek. Die Evangelieskrywer Markus het gesê: “Wanneer hulle van die mark kom, eet hulle nie tensy hulle hul eers deur besprinkeling [Grieks, ran·tiʹzo] gereinig het nie; en daar is baie oorleweringe wat hulle ontvang het en waaraan hulle vashou: die doop [ba·pti·smousʹ] van bekers en kanne en kopervate” (Markus 7:3, 4, NW). Hierdie manne het, wanneer hulle van die mark of gekom het, hulself skynheilig besprinkel voordat hulle geëet het. Maar hulle het die verskillende voorwerpe wat hulle gedurende maaltye gebruik het, gedoop, of in water gedompel.
9. Wat het Tertullianus aangaande doop gesê?
9 Selfs ná die nadelige invloed van afvalligheid het die kerkvader Tertullianus (omstreeks 160-230 G.J.) aangaande doop gesê: “Daar is hoegenaamd niks waarteen die menslike verstand meer skop nie as die eenvoud van die goddelike werke wat gesien word in die handeling vergeleke met die grootsheid wat boonop in die gevolg beloof word; sodat dit des te ongeloofliker geag word dat ’n mens, wat met soveel eenvoud, sonder vertoon, sonder enige groot, buitengewone voorbereiding en uiteindelik sonder koste, in water gedompel en onder die voordrag van ’n paar woorde besprinkel word en dan, weinig (of glad nie) skoner nie, weer verrys, as gevolg daarvan die ewigheid kan beërf.” Let daarop dat Tertullianus gesê het dat ‘’n mens in water gedompel word en dan weer verrys’.
10. Wat sê geleerdes aangaande die vroegste metode van Christendoop?
10 Geleerdes toon ook dat Christene mense oorspronklik deur algehele onderdompeling in water gedoop het. ’n Bekende Franse ensiklopedie sê: “Die eerste Christene is deur onderdompeling gedoop oral waar water gevind is.” En The Catholic Encyclopedia sê: “Die oudste gebruiklike vorm was ongetwyfeld onderdompeling.”—Deel II, bladsy 261 (uitgawe van 1907).
Onderrig en doop
11. Watter opdrag het Jesus sy dissipels gegee?
11 Voordat iemand gedoop word, moet hy juiste kennis opdoen en daarvolgens handel. Dit is duidelik gestel toe Christus vir sy volgelinge gesê het: “Gaan dan heen, maak dissipels van al die nasies, en doop hulle in die Naam van die Vader en die Seun en die Heilige Gees; en leër hulle om alles te onderhou wat Ek julle beveel het. En kyk, Ek is met julle al die dae tot aan die voleinding van die wêreld.”—Mattheüs 28:19, 20.
12. Wat beteken dit om “in die Naam van die Vader” gedoop te word?
12 Doop “in die Naam van die Vader” beteken dat die doopkandidaat God se amp en gesag erken. Hy moet erken dat Jehovah “die Allerhoogste . . . oor die hele aarde”, die Skepper en Universele Soewerein, is (Psalm 36:10; 83:19, NW; 2 Konings 19:15). So ’n persoon aanvaar Jehovah ook as sy Regter, Wetgewer en Koning.—Jesaja 33:22, vgl. NW; Psalm 119:102; Openbaring 15:3, 4.
13. Wat beteken dit om ‘in die naam van die Seun’ gedoop te word?
13 Om ‘in die naam van die Seun’ gedoop te word, beteken dat ’n mens Christus se amp en gesag erken, sowel as die feit dat God deur hóm “’n ooreenstemmende losprys” voorsien het (1 Timotheüs 2:5, 6, NW). Na Jesus se dood as ’n handhawer van onkreukbaarheid het “God Hom ook uitermate verhoog”, en diegene wat gedoop wil word, moet erken dat Christus “Here is tot heerlikheid van God die Vader” (Filippense 2:9-11). Hulle moet Jesus ook as Jehovah se “getroue getuie” en as die “Koning van die konings” erken.—Openbaring 1:5; 19:16.
14. Wat vereis doop ‘in die naam van die heilige gees’?
14 ’n Persoon moet ook ‘in die naam van die heilige gees’ gedoop word. Hy moet besef dat die heilige gees nie ’n persoon is nie, maar wel God se werkende krag, wat gebruik is in die skepping, om Bybelskrywers te inspireer, ensovoorts (Genesis 1:2; 2 Samuel 23:1, 2; 2 Petrus 1:21). Hy moet ook erken dat Jehovah se gees noodsaaklik is as ons “die diep dinge van God” wil verstaan en die goddelike vrugte “liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing” aan die dag wil lê (1 Korinthiërs 2:10, NW; Galasiërs 5:22). Verder moet hy erken dat God se gees nodig is om die Koninkrykspredikingswerk te doen.—Joël 2:28, 29.
Wat doop simboliseer
15. Waarom was Christendoop nie sondes af nie?
15 Dit was met die steun van die heilige gees dat Johannes die Doper mense ondergedompel het (Handelinge 13:24, NW). Hy het hulle gedoop, nie om hulle sondes af te was nie, maar as ’n simbool van hulle berou (Handelinge 19:4, NW). Johannes het Jesus, wat “geen sonde gedoen het nie”, ook gedoop (1 Petrus 2:22). En Ananias het Saul van Tarsus gemaan: “Staan op, word gedoop en was jou sondes af deurdat jy [Jesus se] naam aanroep” (Handelinge 22:12-16, NW). Christenwaterdoop was derhalwe nie sondes af nie. Dit is nie doop nie, maar die vergieting van Jesus se bloed en die feit dat ’n mens “sy naam aanroep” wat vergifnis moontlik maak.—Hebreërs 9:22; 1 Johannes 1:7.
16. (a) Wat simboliseer doop aangesien dit nie sondes afwas nie? (b) Wat gebeur figuurlik wanneer iemand gedoop word?
16 Hoewel Christendoop nie sondes afwas nie, is dit ’n simbool wat aandui dat die individu wat in water ondergedompel word hom onvoorwaardelik deur Jesus Christus aan Jehovah God toegewy het. (Vergelyk Mattheüs 16:24.) Toewy beteken “om te verklaar, om te bevestig, om te wy aan”. Toewyding aan God het betrekking op die daad waardeur iemand onvoorwaardelik afgesonder word deur ’n verbintenis om God se wil deur Christus te doen. Wanneer die doopkandidaat tydelik onder die water “begrawe” en dan daaruit opgelig word, sterf hy figuurlik wat sy vorige handelwyse betref en word hy opgewek tot ’n nuwe lewenswyse, om Jehovah se wil onvoorwaardelik te doen.—Vergelyk Romeine 6:4-6.
17. Waarom is kinderdoop verkeerd?
17 Doop is uiteraard ’n ernstige stap. Kinderdoop is verkeerd, want ’n baba kan nie verstaan, ’n besluit neem en ’n dissipel word nie (Mattheüs 28:19, 20). Diegene wat gedurende Filippus se bediening in Samaria gedoop is, was “manne sowel as vroue”, nie babas nie (Handelinge 8:4-8, 12). Doop is vir mense wat oud genoeg is om te leer, te glo en geloof te beoefen (Johannes 17:3; Handelinge 5:14; 18:8; Hebreërs 11:6). Geskiedskrywer Augustus Neander het hieroor geskryf: “Geloof en doop is altyd met mekaar verbind; en daarom is dit hoogs waarskynlik . . . dat die gebruik om kinders te doop in hierdie tydperk [in die eerste eeu G.J.] onbekend was. . . . Die feit dat dit eers in die loop van die derde eeu as ’n apostoliese tradisie erken is, is eerder bewys teen as vir die erkenning van die apostoliese oorsprong daarvan.”—History of the Planting and Training of the Christian Church by the Apostles (New York, 1864), bladsy 162.
18. (a) Wat is volgens die Skrif nodig om een van Jehovah se Getuies te word? (b) Watter bewyse van geloof sou aandui dat iemand gedoop kan word? (c) Hoe word geloof in die losprys vir doopkandidate beklemtoon?
18 Die Skrif meld herhaaldelik dat gelowiges gedoop is (Handelinge 4:4; 5:14; 8:13; 16:27-34; 18:8; 19:1-7). ’n Mens moet dus’n gelowige wees—iemand wat geloof beoefen en gedoop word—om een van Jehovah se Getuies te word. Selfs voor doop word sulke geloof geopenbaar deur godvrugtige gedrag, vertroue in Jehovah, deelname aan die Koninkryksverkondigingswerk en aanvaarding van Jesus se losprysoffer. Geloof in die losprys word vir doopkandidate beklemtoon, want die eerste van twee vrae wat die spreker hulle vra, is: “Het jy, op grond van die offerande van Jesus Christus, berou oor jou sondes en het jy jou aan Jehovah toegewy om sy wil te doen?” Alleenlik as die individu bevestigend antwoord en ook begryp dat sy toewyding en doop hom as een van Jehovah se Getuies identifiseer in samewerking met God se geesgerigte organisasie kan hy gepas in water ondergedompel word.
Toewyding in gebed
19. Waarom moet ’n mens jou in gebed aan Jehovah toewy?
19 Dopelinge moet geloof in God en Christus hê. Maar waarom sê Jehovah se Getuies dat ’n mens jou in gebed aan God moet toewy? Omdat dit gepas is om in gebed aan Jehovah te betuig dat ons besluit het om hom die uitsluitlike toewyding te gee wat hom toekom (Deuteronomium 5:8, 9; 1 Kronieke 29:10-13). Dit was klaarblyklik in gebed dat Jesus sy begeerte bekend gemaak het om heilige diens uitsluitlik aan sy hemelse Vader te verrig (Hebreërs 10:7-9). Trouens, Jesus ‘was besig om te bid’ selfs terwyl hy gedoop is! (Lukas 3:21, 22). Dit is dus duidelik dat ’n mens jou in gebed aan God moet toewy.
20. Waarom is dit waarskynlik dat die vroeë Christene nuwe dissipels aangespoor het om hulle in gebed aan God toe te wy?
20 Vroeë Christene het nuwe dissipels blykbaar aangespoor om hulle in gebed toe te wy, want nog later het Tertullianus gesê: “Diegene wat op die punt staan om gedoop te word, moet herhaaldelik, met vastye en op hul knieë bid.” Vroeër het Justinus Martyr (omstreeks 100-165 G.J.) geskryf: “Ek sal ook vertel van die manier waarop ons ons aan God toegewy het nadat ons deur Christus nuut gemaak is . . . Almal wat oortuig word en glo dat wat ons leer en sê waar is, en hulle verbind om dienooreenkomstig te lewe, word opdrag gegee om te bid en God met vastye te smeek om hulle vorige sondes te vergewe, terwyl ons saam met hulle bid en vas.”
21. Wat is waarskynlik die geval al is toewyding in gebed nie benadruk toe jy jare gelede gedoop is nie?
21 As ’n toewyding in gebed nie benadruk is toe jy jare gelede gedoop is nie, maak dit jou doop nie noodwendig ongeldig nie. Baie was ongetwyfeld selfs destyds soos een man wat nog duidelik onthou hoe hy gekniel en hom in opregte gebed aan Jehovah toegewy het toe hy meer as 40 jaar gelede nog maar ’n seuntjie was. En al het iemand hom nie vroeër in ’n formele gebed aan God toegewy nie, het hy dit wel destyds ’n saak van gebed gemaak toe doopkandidate en ander saam gebid het toe die dooptoespraak op die dag van sy doop gehou is.
Waarom sommige aarsel
22. Waarom aarsel sommige om gedoop te word?
22 Waarom aarsel sommige om gedoop te word as dit so ’n geseënde voorreg is om ’n toegewyde getuie van Jehovah te wees? Gebrek aan ware liefde is een rede waarom sommige nie God se Woord gehoorsaam, Jesus se voorbeeld volg en gedoop word nie (1 Johannes 5:3). Gewoonlik sê ongedoopte persone natuurlik nie dat hulle nie Jesus se voorbeeld gaan volg of God gaan gehoorsaam nie. Hulle bly eerder so betrokke by wêreldse aangeleenthede dat hulle min tyd vir geestelike belange het. Gestel dit is jou probleem. Sou dit nie verstandig wees om jou voorkeure, belange en ambisies te verander nie? Diegene wat God waarlik liefhet, kan nie ook hierdie wêreld liefhê nie (1 Johannes 2:15-17). En moenie toelaat dat “die verleiding van die rykdom” jou ’n valse gevoel van veiligheid gee nie (Mattheüs 13:22). Ware veiligheid kan alleenlik in ’n toegewyde verhouding met Jehovah God gevind word.—Psalm 4:9 NW.
23. Waarom versuim ander om hulle aan Jehovah toe te wy en dit deur onderdompeling in water te simboliseer?
23 Ander beweer dat hulle God liefhet, maar aarsel om hulle toe te wy omdat hulle meen dat hulle sodoende verantwoordelikheid vermy en nie aanspreeklik gehou sal word nie. Hulle sal graag in die Paradys wil lewe, maar tot dusver doen hulle weinig of niks daaromtrent nie (Spreuke 13:4). Sulke individue kan nie aanspreeklikheid vermy nie, want hulle het die verantwoordelikheid ontvang toe hulle die woord van Jehovah gehoor het (Esegiël 33:7-9). As hulle hul toewy, sal hulle bewys dat hulle God se wil verstaan en gretig is om dit te doen. Pleks van hulle swaarder te belas, sal sulke gehoorsaamheid Jehovah se seën sowel as vreugde meebring omdat dit strook met hulle bewering dat hulle hom liefhet.
24. Om watter rede aarsel nog ander om gedoop te word?
24 Ander vermy doop omdat hulle meen dat hulle nie genoeg weet om die Skrif te verduidelik nie. Maar die Ethiopiese eunug was na ’n bespreking met Filippus tydens ’n rit in ’n wa gereed om sy toewyding aan God te simboliseer. Aanvanklik kon die Ethiopiër seker nie al die vrae van diegene aan wie hy die waarheid verkondig het, beantwoord nie. Maar sy hart het oorgeloop van dankbaarheid vir wat hy gehoor het, en hy het nie uit vrees geaarsel nie. “Daar is geen vrees in die liefde nie; maar die volmaakte liefde dryf die vrees buite” (1 Johannes 4:18). Dit is nie ’n kop vol antwoorde nie, maar wel ’n hart vol liefde wat iemand beweeg om hom aan God toe te wy en gedoop te word.—Lukas 10:25-28.
25. Wat verwag Jehovah God van diegene wat bely dat hulle hom liefhet?
25 As jy nog nie gedoop is nie, moet jy jouself afvra: Wat verwag God van diegene wat sê dat hulle hom liefhet? Hy wil uitsluitlike toewyding hê en soek na diegene wat hom “in gees en waarheid” sal aanbid (Johannes 4:23, 24; Exodus 20:4, 5; Lukas 4:8). Die Ethiopiese eunug het só aanbid, en hy het nie getalm toe hy ’n geleentheid gebied is om gedoop te word nie. Behoort jy toewyding aan Jehovah nie nou ’n saak van opregte gebed te maak en jouself of te vra nie: “Wat verhinder my om gedoop te word?”
Vrae ter hersiening
◻ Waarom kon die Ethiopiese eunug so gou gedoop word?
◻ Hoe is die vroeë Christene gedoop?
◻ Wat beteken dit om ‘in die naam van die Vader, die Seun en die heilige gees’ gedoop te word?
◻ Wat word deur Christendoop gesimboliseer?
◻ Waarom moet ’n mens jou in gebed aan Jehovah toewy?
◻ Om watter redes aarsel sommige om hulle toe te wy en te laat doop?