Jesus se lewe en bediening

Die verhaal van ’n verlore seun

Die Fariseërs het Jesus gekritiseer omdat hy met berugte sondaars omgaan, en in antwoord hierop het hy pas tevore gelykenisse vertel oor ’n afgedwaalde skaap en ’n verlore penning wat teruggekry is. Hy vertel nou ’n ander gelykenis, hierdie keer oor ’n liefdevolle vader en hoe hy sy twee seuns behandel, wat elkeen ernstige foute het.

Eers is daar die jongste seun, die hoofkarakter van die gelykenis. Hy maak sy erfenis bymekaar, wat sy vader sonder aarseling aan hom gee. Dan verlaat hy die huis en begin hy ’n baie onsedelike lewe lei. Maar luister terwyl Jesus die verhaal vertel, en kyk of jy kan vasstel wie deur die karakters voorgestel word.

“’n Man”, begin Jesus, “het twee seuns gehad. En die jongste van hulle het vir sy vader gesê: Vader, gee my die deel van die eiendom wat my toekom. En [die vader] het die goed tussen hulle verdeel.” Wat doen hierdie jongste seun met wat hy ontvang?

“En nie baie dae daarna nie”, verduidelik Jesus, “het die jongste seun alles bymekaargemaak en weggereis na ’n ver land. En daar het hy sy eiendom verkwis deur losbandig te lewe.” Die ware toedrag van sake is dat hy sy geld deurbring deur saam met prostitute te lewe. Daarna kom swaar tye, soos Jesus voorts vertel:

“En toe hy alles deurgebring het, kom daar ’n swaar hongersnood in daardie land, en hy het begin gebrek ly. Toe het hy hom by een van die burgers van daardie land gaan voeg. En dié het hom in sy veld gestuur om varke op te pas. En hy het verlang om sy maag te vul met die peule wat die varke eet, en niemand het dit aan hom gegee nie.”

Hoe vernederend is dit tog om gedwing te word om varke op te pas, aangesien hierdie diere volgens die Wet onrein was! Maar wat die seun die meeste laat ly het, was die knaende honger wat hom selfs die varkvoer laat begeer het. Jesus het gesê dat hy as gevolg van sy verskriklike ellende ‘tot besinning gekom het’.

Jesus sit sy verhaal voort en verduidelik: “Hy het [vir homself] . . . gesê: Hoe baie huurlinge van my vader het oorvloed van brood, en ek vergaan van honger! Ek sal opstaan en na my vader gaan, en ek sal vir hom sê: Vader, ek het gesondig teen die hemel en voor u, en ek is nie meer werd om u seun genoem te word nie; maak my soos een van a huurlinge. En hy het opgestaan en na sy vader gegaan.”

Hier is iets waaroor ons kan nadink: As sy vader hom weggejaag en woedend op hom geskreeu het toe hy die huis verlaat het, sou die seun waarskynlik nie so seker gewees het van wat hy moet doen nie. Hy kon besluit het om terug te keer en elders in sy tuisland werk te probeer vind sodat dit nie nodig sou wees om sy vader in die oë te kyk nie. Maar so ’n gedagte het glad nie by hom opgekom nie. Hy wou by die huis wees!

Die vader in Jesus se gelykenis stel ongetwyfeld ons liefdevolle, genadige hemelse Vader, Jehovah God, voor. En jy het miskien ook besef dat die verlore seun berugte sondaars voorstel. Die Fariseërs, met wie Jesus hier praat, het Jesus voorheen gekritiseer omdat hy saam met hierdie einste sondaars geëet het.

Maar wie stel die ouer seun voor? En watter toepassing het Jesus se gelykenis in ons 20ste eeu? Ons volgende nommer van hierdie tydskrif sal hierdie vrae beantwoord deur die res van Jesus se verhaal oor die verlore seun wat gevind is te bespreek. Lukas 15:11-20, 30, vgl. NW; Levitikus 11:7, 8.

◆ Vir wie vertel Jesus hierdie gelykenis, of verhaal, en waarom?

◆ Wie is die hoofkarakter in die verhaal, en wat gebeur met hom?

◆ Wie word deur die vader en die jongste seun voorgestel?

◆ Watter informasie sal in die volgende nommer van hierdie tydskrif bespreek word?