Koninkryksverkondigers berig
“Die waarheid sal julle vrymaak”—en geluk bring
IN BRITTANJE het Bybelwaarheid meer as 113 000 mense in Brittanje vrygemaak, en elke dag neem meer mense die waarheid aan. Jesus se woorde word waarlik vervul: “Julle sal die waarheid ken, en die waarheid sal julle vrymaak” (Johannes 8:32). Hierdie vryheid lei tot geluk, soos die volgende ondervinding uit Brittanje toon.
◻ Terwyl Penny in die huis-tot-huisbediening bedrywig was, berig die takkantoor, het ’n ouerige vrou taamlik kortaf vir haar gesê: “Ek’s besig.” Penny het geantwoord dat sy haar weer sou besoek. ’n Paar dae later, op ’n tyd wat sy gewoonlik nie besoek sou aflê nie, het sy na die huise teruggegaan waar sy niemand tuis gevind het nie en per ongeluk by dieselfde huis aangeklop. Die ouerige vrou het die deur oopgemaak en Penny ingenooi. “Ek het geweet jy sou terugkom”, het sy gesê, “en ek het vir jou gewag.” Hulle het die Koninkrykshoop bespreek, en die vrou het gesê sy hoop dat dit ’n werklikheid sal word. Sy was 79, en haar man het drie jaar tevore gesterf. Sy het geen vertroosting van haar kerk gekry nie en kon geen rede sien om te lewe nie. Sy wou sterf. Later, nadat Penny ’n Bybelstudie met haar begin hou het, het sy vir Penny gesê dat sy selfmoord oorweeg het, maar geweet het dat dit verkeerd is. Sy het tot God gebid dat hy haar vertroosting moet gee en haar moet help om weer hoop te kry. Geleidelik, namate sy studeer het, het haar wanhoop in hoop verander, met diepe oortuiging en dankbaarheid teenoor Jehovah. Sy het haar lewenslange verbintenis met die kerk verbreek, is op die ouderdom van 80 gedoop en is nou ’n baie ywerige gereelde verkondiger. Die waarheid van God se Woord het haar waarlik vrygemaak en groot geluk verskaf.
◻ Die waarheid van God se Koninkryk maak ’n mens vry van slawerny aan valse godsdiens. Dit kan ook ’n mens se persoonlikheid verander, en hierdie verandering beïndruk ander dikwels en help hulle om die waarheid in te sien, soos die volgende ondervinding toon.
’n Jong vrou het aan die deur van ’n Getuie se huis geklop en ’n Bybelstudie gevra. Wat het daartoe aanleiding gegee? Die vrou se ouers het die Bybel saam met Jehovah se Getuies bestudeer, en die invloed wat dit op haar ouers—veral haar vader—gehad het, was so dramaties en indrukwekkend dat dit die dogter regtig verbaas het. Haar vader, wat 80 sigarette per dag gerook het, het heeltemal opgehou rook toe daar aan hom verduidelik is dat Jehovah dit afkeur. Hy het byna onmiddellik daarna ’n hele voorraad goedere wat hy oor ’n tydperk gesteel het aan sy werkgewers teruggegee. Die dogter het gemeen dat as enigiets haar ouers só kon beïnvloed, dit sekerlik ondersoek moet word. Die ouers is nou gedoop en die dogter woon al die vergaderinge by.
Die waarheid wat Jesus verkondig het, het geluk gebring aan dié wat hierbo gemeld word en aan tallose ander. Dit kan eweneens geluk bring aan diegene wat die waarheid van die Bybel aanvaar en dit in hulle lewe toepas.—Psalm 19:8, 9.