Sedelike reinheid is die sieraad van jongmense
“Verbly jou, o jongeling, in jou jeug . . . en wandel in die weë van jou hart en in die aanskouing van jou oë; maar weet dat God jou oor al hierdie dinge in die gerig sal bring.”—PREDIKER 11:9.
1, 2. (a) Wat wil Jehovah vir jongmense hê? (b) Waarom is dit dwaas om alles wat vir jou hart en oë begeerlik lyk na te streef?
“JEUG, entoesiasme en teerheid is soos die dae van die lente. Pleks van te kla . . . oor hulle korte duur moet jy hulle probeer geniet.” Dit is wat ’n 19de-eeuse Duitse digter geskryf het. Daardie woorde van raad aan julle jongmense kom ooreen met dié wat duisende jare tevore in die Bybelboek Prediker neergeskryf is: “Verbly jou, o jongeling, in jou jeug en laat jou hart jou vrolik maak in die dae van jou jonkheid; en wandel in die weë van jou hart en in die aanskouing van jou oë” (Prediker 11:9a). Jehovah God het dus nie noodwendig ’n negatiewe beskouing van die dinge wat vir jongmense begeerlik lyk nie. Hy wil hê dat jy die krag en energie van jou jeug ten volle moet geniet.—Spreuke 20:29.
2 Beteken dit egter dat jy enigiets kan doen wat vir jou hart en oë begeerlik lyk? Allermins! (Numeri 15:39; 1 Johannes 2:16). Die teks sê voorts: “Maar weet dat God jou oor al hierdie dinge [die strewes wat jy kies om jou begeertes te bevredig] in die gerig sal bring” (Prediker 11:9b). Ja, jy kan nie die gevolge van jou dade vryspring nie; jongmense is, net soos ouer persone, aan Jehovah se oordeel onderworpe.—Romeine 14:12.
3, 4. (a) Waarom moet jy ’n hoë standaard van sedelike reinheid handhaaf? (b) Watter druk word op jou uitgeoefen om jou rein posisie voor God prys te gee, en watter vrae ontstaan?
3 ’n Gunstige oordeel deur Jehovah lei nie net tot die ewige lewe nie, maar ook nou reeds tot ’n intieme verhouding met God. Jy moet egter ’n hoë standaard van sedelike reinheid handhaaf. Psalm 24, verse 3 tot 5, stel dit so: “Wie mag klim op die berg van die HERE? En wie mag staan in sy heilige plek? Hy wat rein van hande en suiwer van hart is, wat sy siel nie ophef tot nietigheid en nie vals sweer nie. Hy sal seën wegdra van die HERE en geregtigheid van die God van sy heil.” Ja, jy is pragtig in Jehovah se oë as jy sedelike reinheid handhaaf.
4 Daar word egter voortdurend druk op jou uitgeoefen om jou rein posisie voor God prys te gee. Terwyl hierdie laaste dae hul einde nader, is daar ’n epidemie van onsedelike gedrag en onreine invloede (2 Timotheüs 3:1-5). Die uitdaging om sedelike reinheid te handhaaf, was nog nooit tevore so groot vir jongmense nie. Bied jy die uitdaging die hoof? Sal jy aanhou om dit te doen?
Die uitdaging waarvoor jy te staan kom
5. Watter onrein invloede maak dit moeilik om ’n rein posisie voor God te handhaaf?
5 Die vermaaklikheidsmedia val jongmense aan met dinge wat ordentlikheid opsy skuif en eksplisiet onsedelike dinge verheerlik. Toe een van ’n reeks gewelddadige gruwelrolprente uitgereik is, het een rolprentresensent byvoorbeeld geskryf: “Hierdie rolprent bestaan uit die afwisseling van seksskok, moordskok en obseniteitskok in reusehoeveelhede. As dit ’n rekordgetal mense trek, sal dit nog ’n groot daling in die verslegting . . . in rolprentsmaak kenmerk.” Buiten sulke rolprente is daar ook liedjies met seksueel eksplisiete woorde en televisieprogramme wat ongeoorloofde seks verheerlik. Kan jy jou aan sulke beeldende voorstellings van die “lae poel van liederlikheid” blootstel en steeds jou rein posisie voor God handhaaf? (1 Petrus 4:4, NW). Soos die spreuk sê: “Kan iemand vuur in sy skoot dra sonder dat sy klere verbrand?”—Spreuke 6:27.
6. Met watter druk deur hulle portuurs het jongmense te kampe?
6 Druk om jou jou rein posisie voor God te laat prysgee, kom ook van ’n ander bron—jou portuurs. ’n Sewentienjarige wêreldse meisie het met spyt erken: “Die redes waarom ek vir die eerste keer seks gehad het, was almal verkeerd: omdat my kêrel daarop aangedring het en omdat ek gedink het dat almal dit doen.” Niemand wil hê dat ander vir hom moet lag nie. Dit is natuurlik om te wil hê dat ander van jou moet hou. Maar wanneer jy standpunt inneem vir Bybelse sedelikheid sal ander jongmense jou moontlik bespot. Die begeerte om in te pas, om deur jou portuurs aanvaar te word, kan jou onder druk plaas om iets te doen wat jy weet verkeerd is.—Spreuke 13:20.
7. Waarom is dit besonder moeilik vir jongmense om teen onrein invloede te stry, maar wat het duisende jongmense in Jehovah se organisasie ten opsigte van hulself getoon?
7 Dit is veral moeilik om tydens “die bloei van die jeug”, wanneer geslagsdrange sterk is, teen hierdie invloede te stry (1 Korinthiërs 7:36, NW). Dit is geen wonder nie dat een navorsingsorganisasie hierdie gevolgtrekking gemaak het: “Dit is die uitsonderlike jong persoon wat op die ouderdom van 19 nog nie voorhuwelikse omgang gehad het nie.” Tog het duisende van julle jongmense in Jehovah se organisasie getoon dat julle uitsonderlik is. Julle bied die uitdaging moedig die hoof en handhaaf sedelike reinheid.
8. Waarom het party Christenjeugdiges toegelaat dat die wêreld se onsedelike gesindhede hulle beïnvloed, en wat is die gevolg?
8 Ongelukkig het ’n aantal Christenjeugdiges egter toegelaat dat die wêreld se onsedelike gesindhede hulle beïnvloed. Hoewel hulle dalk voorgee dat hulle die goeie liefhet, haat hulle nie die kwaad nie; altans, hulle haat dit nie genoeg nie (Psalm 97:10). In party gevalle lyk dit selfs asof hulle dit liefhet. Soos Psalm 52:5 dit stel: “Jy hou meer van kwaad as van goed, van die leuen meer as om geregtigheid te spreek.” Party gaan so ver as om die raad wat Jehovah se organisasie oor dinge soos afsprake, vermaak en sedelikheid gee openlik te verwerp. Gevolglik bring hulle dikwels skande oor hulleself sowel as hulle ouers. Hulle verloor ook hulle prag in God se oë.—2 Petrus 2:21, 22.
Hulp om die uitdaging die hoof te bied
9. Wat is nodig om die uitdaging om sedelik rein te bly die hoof te bied?
9 Hoe kan jy die uitdaging om sedelik rein te bly die hoof bied? Die psalmis het dieselfde vraag gevra: “Hoe sal ’n jong man sy pad reinig?” Toe het hy die antwoord gegee: “Deur op sy hoede te bly ooreenkomstig u woord” (Psalm 119:9, NW). Ja, jy het leiding uit God se Woord nodig. En ons liefdevolle hemelse Vader het toegesien dat sy organisasie sulke leiding voorsien om jou te help om die onrein druk van hierdie wêreld te weerstaan.
10, 11. (a) Watter publikasies is uitgegee om jongmense te help om sedelik rein te bly? (b) Hoe is party jongmense deur die reeks “Jongmense vra . . . ” gehelp? (c) Hoe het jy persoonlik baat gevind by die reeks “Jongmense vra . . . ”?
10 Deur die jare heen is verskeie publikasies uitgegee wat met veral jongmense in gedagte geskryf is, soos die boek Jou jeug—Hoe om dit ten beste te benut. Sedert 1982 gee die reeks “Jongmense vra . . . ” in Ontwaak! heelwat nuttige raad oor aangeleenthede soos pornografie, liefdesverhale en behoorlike gedrag tydens hofmakery. Het sulke informasie jongmense werklik gehelp? Beskou ’n voorbeeld. Verskeie artikels in die reeks het die masturbasiegewoonte bespreek en getoon dat hierdie gewoonte “seksuele begeerte” opwek en maklik kan veroorsaak dat ’n mens jou aan geslagsonsedelikheid skuldig maaka (Kolossense 3:5, NW). Praktiese wenke is gegee oor hoe die gewoonte bestry kan word en wat gedoen kan word as ’n mens daarin terugval. Party jongmense het die volgende geskryf nadat hulle die artikels gelees het: “Ek het die masturbasieprobleem sedert ek 12 jaar oud is. Nou is ek 18, en danksy julle artikels kom ek dit stadigaan te bowe.” “Noudat ek die raad in die artikels gevolg het, vind ek dat ek ’n baie beter gemoedstoestand het. Ek voel baie skoner as voorheen.”
11 Dit kos tyd om sulke informasie te lees en te bestudeer, maar as jy dit doen, kan dit jou help om sedelik rein te bly. Benut jy sulke gedrukte materiaal ten volle? Nadat sy die artikel “Jongmense vra . . . Voorhuwelikse seks—Waarom nie?”b gelees het, het een jong meisie, wat destyds ’n Bybelstudent was, geskryf: “Ek weet hoe sleg, skuldig en jaloers ’n mens na voorhuwelikse seks voel, en ek het groot spyt daaroor. Ek bedank Jehovah elke dag vir sy aanvaarding en sy vergifnis. Ek hoop dat julle artikel ander sal help voordat hulle doen wat ek gedoen het. Dit maak werklik seer. Nou verstaan ek waarom Jehovah God wil hê dat ons ons ‘moet onthou van hoerery’.”—1 Thessalonicense 4:3.
12. Wat sal ons beweeg om Jehovah te wil behaag?
12 Dit bring ons by nog iets wat jou sal help om die uitdaging die hoof te bied: Jy moet besef dat Jehovah die Universele Soewerein is en gehoorsaam moet word (Openbaring 4:11). Terselfdertyd is hy egter ’n liefdevolle hemelse Vader en dra hy ons belange op die hart (Spreuke 2:20-22; Jesaja 48:17, vgl. NW). Die doel van sy wette is om ons te beskerm, nie om ons onnodig te beperk nie. Daarom is dit wys om hierdie wette te gehoorsaam (Deuteronomium 4:5, 6). As jy duidelik verstaan waarom Jehovah op sedelike reinheid aandring, sal dit jou help om die ware prag daarvan te sien en jou beweeg om hom te wil behaag.—Psalm 112:1.
13. Hoe sal jy verduidelik dat Jehovah se wet wat hoerery verbied ons tot voordeel strek?
13 Beskou die feit dat God bepaal dat seks tot die huwelik beperk moet word en dat hy hoerery ten strengste verbied (Hebreërs 13:4). Beroof gehoorsaamheid aan hierdie wet jou van enigiets goeds? Sou ’n liefdevolle hemelse Vader ’n wet maak om jou van lewensgenot te beroof? Natuurlik nie! Kyk wat gebeur in die lewens van jou portuurs wat God se sedewet ignoreer. Ongewenste swangerskappe lei dikwels daartoe dat hulle aborsies ondergaan of dalk trou voordat hulle reg is daarvoor. In baie gevalle beteken dit dat hulle sonder ’n man ’n kind moet grootmaak. Daarbenewens sondig jongmense wat hoerery beoefen ‘teen hulle eie liggame’ en stel hulle hul bloot aan seksueel oorgedraagde siektes (1 Korinthiërs 6:18). En wanneer ’n jeugdige wat aan Jehovah toegewy is hoerery pleeg, kan die emosionele newe-effekte verwoestend wees. Pogings om die knaery van ’n skuldige gewete te onderdruk, kan ’n mens afmat en slapelose nagte veroorsaak (Psalm 32:3, 4; 51:5). Is dit dan nie duidelik dat Jehovah se wet wat hoerery verbied, bedoel is om jou te beskerm nie? Dit is werklik voordelig om sedelike reinheid te handhaaf!
14. Verduidelik, in die lig van die bewering dat ’n tienerhuwelik ’n beskerming is, hoe ons Paulus se woorde in 1 Korinthiërs 7:9 en 7:36 moet beskou.
14 Dit is weliswaar nie maklik om God se streng sedewette na te kom nie. Gevolglik het party jongmense die gevolgtrekking gemaak dat dit die beste beskerming is om te trou terwyl hulle nog in hulle tienderjare is. ‘Want’, redeneer hulle, ‘1 Korinthiërs 7:9 sê per slot van rekening: “As hulle hul nie kan beheers nie, laat hulle trou; want dit is beter om te trou as om van begeerte te brand.”’ So ’n beskouing is egter kortsigtig. Paulus se woorde is nie tot tieners gerig nie, maar tot diegene wat verby “die bloei van die jeug” is (1 Korinthiërs 7:36, NW). In die meeste gevalle het diegene wat steeds in die bloei van die jeug is nog nie emosioneel en geestelik genoeg ontwikkel om die druk en verantwoordelikhede wat die huwelik meebring op hulle te neem nie. Die Journal of Marriage and the Family berig: “Mense wat vroeg trou, ondervind minder huweliksbevrediging omdat hulle nie behoorlik voorberei is om hulle huweliksrol te vervul nie. As ’n mens jou rol nie goed vervul nie, neem jou bevrediging af, wat weer tot onbestendigheid in die huwelik lei.” Die oplossing is dus nie om te trou terwyl jy jonk is nie, maar om kuis te bly in jou ongehude staat totdat jy al die eienskappe ontwikkel het wat nodig is vir ’n suksesvolle huwelik.
Hou jou rein!
15. Watter drastiese stappe is nodig om sedelik rein te bly?
15 Die apostel Paulus het geskryf: “Maak dood dan julle lede wat op die aarde is, naamlik hoerery, onreinheid, hartstog” (Kolossense 3:5). Ja, drastiese stappe is nodig; jy moet vasbeslote wees om sedelik rein te bly. Waar The Expositor’s Bible Commentary kommentaar lewer oor die werkwoord wat met “maak dood” vertaal word, sê dit: “Dit dui daarop dat ons bose dade en gesindhede nie net moet onderdruk of beheers nie. Ons moet hulle uitwis, die ou lewenswyse heeltemal vernietig. ‘Heeltemal ombring’ kan die krag daarvan uitdruk. . . . Die betekenis van die werkwoord sowel as die krag van die tydvorm dui op ’n ferm, pynlike daad van persoonlike vasbeslotenheid.”—Vergelyk Mattheüs 5:27-30.
16. Waarom moet jy jou inspan om verstandelik rein te bly sodat jy jou sedelike reinheid kan behou, en hoe kan jy dit regkry?
16 Maar hoe kan jy sedelik onrein dade en gesindhede “heeltemal ombring” of “uitwis”? Jesus het tot die kern van die probleem deurgedring toe hy gesê het: “Van binne, uit die hart van die mense, kom die slegte gedagtes, egbreuk, hoerery, . . . hebsug” (Markus 7:21, 22). Die figuurlike hart sluit die denkvermoëns in, en dit is waarom dit met “gedagtes” geassosieer word. Om sedelik rein te bly, moet jy dus daarna streef om verstandelik rein te bly. Hoe? Aangesien die verstand deur die sinne gevoed word, moet oppas waarna jy met jou oë kyk en boeke, TV-programme of rolprente vermy wat geslagsonsedelikheid uitbeeld of vergoelik. Jy moet ook versigtig wees oor waarna jy met jou ore luister en liedjies met seksueel eksplisiete woorde vermy. Dit kos moed om so ’n standpunt in te neem, veral as jou portuurs jou teëstaan, maar as jy dit doen, sal dit jou help om sedelik rein te bly en selfrespek te behou.
17. Waarom moet sedelike onreinheid nie eens onder julle genoem word nie?
17 Die apostel Paulus het ook gemaan: “Hoerery en allerhande onreinheid of hebsug moet onder julle selfs nie genoem word nie, soos dit die heiliges betaam.” (Efesiërs 5:3; kyk ook vers 12.) Sedelike onreinheid moet dus nie eens genoem word nie, dit wil sê, dit moenie die onderwerp van ’n gesprek of skertsery wees nie. Waarom nie? Soos Bybelkenner William Barclay dit stel: “As ’n mens oor ’n ding praat, oor ’n ding skerts, dit gereeld die onderwerp van jou gesprekke maak, laat jy dit posvat in die verstand en is jy ’n stap nader daaraan om dit te doen” (Jakobus 1:14, 15). Dit verg ware vasbeslotenheid om ‘jou mond in toom te hou’, veral wanneer ander jongmense vuil grappe vertel of skurwe taal gebruik om geslagsbedrywighede te beskryf (Psalm 39:2). Maar deur regskape en rein te bly, sal jy Jehovah se hart verbly.—Psalm 11:7; Spreuke 27:11.
18. (a) Waarom is dit nie genoeg om onrein gedagtes en spraak te verwerp om die stryd teen sedelike onreinheid te wen nie? (b) Hoe kan jy baat vind by Paulus se raad aan die Filippense?
18 Dit is nie genoeg om onrein gedagtes en spraak te verwerp as jy die stryd teen sedelike onreinheid wil wen nie. ’n Chinese spreekwoord sê: “’n Leë verstand is vatbaar vir alle voorstelle.” (Vergelyk Mattheüs 12:43-45.) Paulus het besef hoe belangrik dit is om die verstand met opbouende, rein gedagtes te vul. Daarom het hy die Filippense aangespoor: “Alles wat waar is, alles wat eerbaar is, alles wat regverdig is, alles wat rein is, alles wat lieflik is, alles wat loflik is—watter deug en watter lof daar ook mag wees, bedink dit [‘maak dit die onderwerp van noukeurige bepeinsing’c].”—Filippense 4:8.
19. Waarom moet jy God se Woord ywerig bestudeer, en hoe sal dit jou help om sedelik rein te bly?
19 Dit beteken dat jy God se Woord ywerig moet bestudeer (Josua 1:8, vgl. NW; Psalm 1:2, vgl. NW). Dit sal jou verstand en hart versterk en sal jou help om ’n intieme persoonlike verhouding met Jehovah op te bou. Gevolglik sal jy in ’n baie beter posisie wees om versoekings te weerstaan om jou aan sedelik onrein gedrag skuldig te maak. Jy sal dit eenvoudig nie waag om Jehovah se naam oneer aan te doen en skande oor jou gesin en die gemeente te bring nie. Jy sal die krag en energie van jou jeug eerder op so ’n wyse gebruik dat jy nie later oor sekere dinge spyt sal wees nie. Ja, jy sal die weg van sedelike reinheid volg, wat waarlik die sieraad is van jongmense wat Jehovah dien!—Spreuke 3:1-4.
[Voetnote]
a Kyk Ontwaak! se nommers van 8 September 1987, bladsye 19-21; 8 November 1987, bladsye 18-20; en 8 Maart 1988, bladsye 20-3.
b Ontwaak! van 8 Desember 1985, bladsye 10-2.
c The Expositor’s Greek Testament.
Jongmense—Hoe sal julle antwoord?
◻ Waarom moet jy ’n hoë standaard van sedelike reinheid handhaaf?
◻ Watter vorme van druk maak dit ’n uitdaging om ’n rein posisie voor God te handhaaf?
◻ Wat kan jou help om die uitdaging om sedelik rein te bly die hoof te bied?
◻ Watter drastiese stappe is nodig om jouself rein te hou?
[Prent op bladsy 13]
Die meeste persone wat nog in die bloei van die jeug is, is te jonk om die verantwoordelikhede van ouerskap na te kom