Hoe beskou jy die Tien Gebooie?

MENSE het verskillende beskouings van die Bybel se Tien Gebooie. Sewendedag-Adventiste sê dat alle mense die Tien Gebooie moet onderhou. Lutherane beskou hulle as die “beste stel wette wat ooit gegee is waarvolgens ’n individu sy lewe kan rig”. “As hulle reg verstaan word”, verduidelik ’n Katolieke woordvoerder, “voorsien die Tien Gebooie steeds ’n grondslag van die Christelike lewe.”

Terwyl sommige godsdiensgroepe meen dat ons die Tien Gebooie na die letter moet gehoorsaam, beskou ander hulle dus bloot as ’n gids vir goeie sedelike gedrag. Trouens, volgens die Encyclopœdia of Religion and Ethics “is daar waarskynlik geen menslike dokument wat ’n groter invloed op die godsdiens- en sedelike lewe uitgeoefen het as die Dekaloog [Tien Gebooie] nie”. Waarom is dit die geval? Beskou eerstens wat hulle sê. Hulle is kort, omvattend en kragtig. Maar hoe moet jy die Tien Gebooie beskou? Wat beteken hulle vir jou?

[Venster op bladsy 3]

DIE TIEN GEBOOIE

1. Jy mag geen ander gode voor my aangesig hê nie.

2. Jy mag vir jou geen gesnede beeld of enige gelykenis maak van wat bo in die hemel is, of van wat onder op die aarde is, of van wat in die waters onder die aarde is nie. Jy mag jou voor hulle nie neerbuig en hulle nie dien nie . . . 

3. Jy mag die Naam van die HERE jou God nie ydellik gebruik nie . . . 

4. Gedenk die sabbatdag, dat jy dit heilig. Ses dae moet jy arbei en al jou werk doen; maar die sewende dag is die sabbat van die HERE jou God; dan mag jy géén werk doen nie—jy of jou seun of jou dogter, of jou dienskneg of jou diensmaagd, of jou vee of jou vreemdeling wat in jou poorte is nie . . . 

5. Eer jou vader en jou moeder . . . 

6. Jy mag nie doodslaan nie.

7. Jy mag nie egbreek nie.

8. Jy mag nie steel nie.

9. Jy mag geen valse getuienis teen jou naaste spreek nie.

10. Jy mag nie jou naaste se huis begeer nie; jy mag nie jou naaste se vrou begeer nie, of sy dienskneg of sy diensmaagd, of sy os of sy esel of iets wat van jou naaste is nie.—Exodus 20:3-17.