Koninkryksverkondigers berig

◻ DIE apostel Johannes het gesê: “Laat ons nie liefhê met woorde of met die tong nie, maar met die daad en in waarheid” (1 Johannes 3:18). Jesus het gesê dat ‘ons ons naaste moet liefhê soos onsself’ (Mattheüs 22:39). Die betoning van liefde met die daad is ’n aanbeveling vir die waarheid, soos die volgende ondervinding uit Brittanje toon.

Wanneer Pauline haar moeder, wat veelvoudige sklerose gehad het, besoek het, was daar nooit enigiemand anders nie. Maar by hierdie geleentheid kon sy, toe sy die huis binnegaan, die wasmasjien hoor en iemand wat ’n stofsuier op die boverdieping gebruik. “Wat gaan aan, wie is hier?” het sy haar moeder gevra. Haar moeder het verduidelik dat Jehovah se Getuies na haar deur toe gekom het, haar situasie gesien het en gebly het om te help. Nadat hulle die huiswerk gedoen het en kos gemaak het, het hulle gesit en gesê: “Is jy gereed?” “Gereed waarvoor?” het Pauline gevra. Haar moeder het verduidelik dat sy ingestem het om die Bybel te studeer. Pauline was huiwerig om te bly, maar aangesien sy van ver af gekom het, het sy gevra of dit in die haak sal wees as sy by die studie aansluit. Sy het dit so geniet dat sy gereël het om elke week op dieselfde dag te kom sodat sy dit gereeld kon bywoon. Later het ’n vriendin haar vergesel, en albei is nou gedoop. As gevolg van hierdie oorspronklike studie is tien lede van dieselfde familie nou Getuies van Jehovah! Ja, help “met die daad”!

Pastoor in Nieu-Guinee reageer op die waarheid

◻ In Jesus se dag het sommige priesters die leer van Jesus aanvaar. Geestelikes met die regte hartstoestand doen dit ook vandag, soos ’n ondervinding uit die hoogland van Nieu-Guinee, waaroor ’n kringopsiener berig het, toon. Hy sê: “’n Geleerde jong man, ’n Pinksterpastoor, het ’n klein kerkie taamlik naby die Koninkrysaal gebou. ’n Broer van daardie gemeente het vir hom getuig, en hy was vriendelik. Kort daarna het ek die gemeente besoek en by die broer tuisgegaan wat in dieselfde straat as die pastoor gewoon het. Die eerste aand nadat ek daar aangekom het, het hierdie jong man met sy Bybel na ons deur gekom, saam met ’n groot groep van sy gemeente. Almal wou die Koninkryksboodskap hoor. Hy het baie vrae gestel en die bespreking het tot laat in die nag aangehou. Hy en die ander belangstellendes het elke aand van my besoek gekom sodat van hulle ander vrae beantwoord kon word. Ek het hom na die kringbyeenkoms die volgende week genooi en hy het dit bygewoon saam met die broer wat aanvanklik vir hom getuig het. Hierdie man het voortgegaan met sy Bybelstudie, die Pinksterkerk verlaat en is nou ’n gereelde verkondiger van die goeie nuus.”

Dit is waarlik God se wil “dat alle mense gered word en tot kennis van die waarheid kom”.—1 Timotheüs 2:4.