Dink aan jou Skepper in jou jeug

“ONTEVREDE jeug: ’n Internasionale feit van die lewe.” Dit was die opskrif van ’n artikel in The Star van Johannesburg. Die inleiding tot die artikel het gesê: “Aangesien groot groepe jeugdiges nou te staan kom voor beperkte geleenthede wat selfs verder beperk word deur wêreldresessie, het ontevredenheid onder die jeug in propvol stede internasionaal ’n ooglopende feit van die lewe geword. In die onluste in Miami, in San Salvador, in Managua, in Teheran en in Kaapstad was daar een gemeenskaplike aspek—in elke geval het jongmense eerste doodgemaak en is hulle eerste doodgemaak.”

Dit is ongeveer tien jaar gelede gedruk, en sedertdien het omstandighede versleg. Waarom is daar wêreldwyd sulke ontevredenheid onder jongmense? Die toenemende onbestendigheid van hierdie stelsel van dinge is beslis ’n faktor. Werkloosheid het epiese afmetings aangeneem. En watter sekuriteit is daar vir jongmense aangesien die gesinslewe vinnig agteruitgaan? Dit is geen wonder dat sommige van hulle in opstand kom teen ’n wêreld wat buite hulle beheer is nie. Is dit nie omdat hulle nie ’n vaste hoop het waarop hulle hul lewens kan anker nie?

’n Mens sou verwag dat die wêreld se godsdienste so ’n hoop sal inboesem. Maar een jeugdige het geskryf: “Ek is baie verward. . . . Ek het baie vriende wat aan baie verskillende godsdienste behoort en hulle voel net soos ek. Ek is werklik so verward dat ek nie meer weet wat ek moet glo nie. Kan julle my asseblief ’n bietjie raad gee?” Watter raad sal jy so ’n jongmens gee?

Jongmense wat na aan God se Woord en die ware Christengemeente bly, word sulke verwarring en hartseer gespaar. Terwyl die meeste jongmense nie ’n vaste hoop op die toekoms het nie, vertrou Christenjeugdiges op Jehovah God en sy betroubare Woord van waarheid. Gevolglik het hulle die vooruitsig om die einde van hierdie stelsel van dinge te oorleef en vir ewig te lewe. Daarna sal hulle, op ’n aarde wat van ongeregtigheid en goddeloosheid gesuiwer is, deel vorm van die fondament van die “nuwe aarde” waarin “geregtigheid woon” (2 Petrus 3:13; Johannes 17:3). Jongmense word vermaan om ‘aan hulle Skepper te dink’ as hulle sulke wonderlike vooruitsigte verwesenlik wil sien (Prediker 12:1). En die beste raad wat gegee kan word, is dat hulle ’n integrale deel van die Christengemeente word en bly. Waarom?

Die meeste van julle jongmense in die Christengemeente het gelowige ouers wat vir julle lief is en vir julle omgee. Elke gemeente het sy aangestelde ouere manne, wat opreg belangstel in julle geestelike welsyn. Sulke hulp en sorg moet nie geringgeag word nie. Die waarheid uit God se Woord, asook teokratiese leiding, sal jou sekuriteit, ’n lewe sonder frustrasies en ’n vaste hoop op die toekoms gee. Al hierdie dinge sal jou help om “aan die geloof en ’n goeie gewete” en aan ’n hoop vas te hou wat soos ’n anker is wat verhinder dat ’n vaartuig in ’n storm op die see skipbreuk ly.—1 Timotheüs 1:18, 19; vergelyk Hebreërs 6:18, 19.

Vermy wêreldse versoekinge

Ondanks die veelvuldige geestelike seëninge wat jongmense in die Christengemeente kan geniet, het sommige die neiging om die weë van die wêreld na te jaag. Dit is asof hulle meen dat hulle iets waardevols mis wat net in die wêreld buite die Christengemeente gevind kan word. Maar kan die wêreld ’n mens waarlik iets waardevols aanbied?

Na meer as 40 jaar in die voltydse diens het een van God se knegte dit so gestel: “Die enigste deel van my lewe waaroor ek spyt is, is die deel voordat ek in die waarheid gekom het. Ek was toe ’n deel van die wêreld. Ek het net vir die wêreld geleef. Toe ek 18 geword en teruggekyk het op my lewe, het ek besef dat dit leeg was. Daar was geen rigting, geen doel, in my lewe nie. Die wêreldse plesier wat ek na my mening geniet het, het my in werklikheid net frustrasie en hartseer besorg. Ek het na die waarheid begin soek. Ek het dit gevind en ’n jaar later die voltydse diens betree. Ek het geen geld gehad nie, net ’n jaar se ondervinding in die waarheid en geloof dat Jehovah my sal ondersteun. Wanneer ek nou terugkyk op my lewe, waarvan ek twee derdes in die voltydse diens deurgebring het, is ek baie gelukkig. Ek sal nooit dit wat ek uit diens aan Jehovah gekry het vir enigiets wat die wêreld kan bied, wil verruil nie.” Dit is inderdaad die gevoelens van duisende van Jehovah se Getuies.

Waarom sal ons dan na dinge verlang wat ander Christene die rug toegekeer het? Waarom sal ons smag na die dinge van ’n wêreld wat op vernietiging afstuur? (1 Johannes 2:15-17). Miskien voel jy as jongmens dat diens aan Jehovah te beperkend is en dat dit jou die plesier wat die wêreld bied, sal laat mis. Maar is dit verstandig om te dink dat jou ouers en die ouere manne jou te veel inperk wanneer hulle jou wil help om Jehovah te behaag en die ewige lewe te verkry?

Sal jy dink dat ’n moeder wat haar kind na ’n plaaslike winkel stuur en hom daaraan herinner om na albei kante te kyk voordat hy die straat oorsteek hom te veel inperk? Probeer sy nie eerder liefdevol om haar kind te beskerm nie? Sê nou die kind het die waarskuwing veronagsaam en is deur ’n motor omgery en het gesterf? Sou jy steeds voel dat die moeder hom te veel ingeperk het? Jy sal eerder dalk dink dat sy beter voorsorg moes geneem het om die lewe van haar kind te beskerm! Die vermaninge in God se Woord en van sy organisasie word insgelyks liefdevol gegee, nie as beperkinge nie maar om ons te beskerm.

As jy in staat wil wees om die druk van hierdie wêreld te weerstaan, is die nie genoeg om net in ’n Christenhuis groot te word nie. Jy moet ook persoonlik oortuig wees van die waarheid van God se Woord. Sulke persoonlike oortuiging en liefde vir die Skepper vorm ’n grondslag vir jou om jou lewe aan God toe te wy. Hierdie persoonlike oortuiging is ook nodig sodat jy jou geloof voor ander kan verdedig (1 Petrus 3:15). Leiding deur God se Woord is die grondslag vir ’n suksesvolle lewe (Josua 1:8; Psalm 119:9). Maar om sukses in die lewe te behaal, het jy ook goeie opleiding nodig.

Gee spesifieke opleiding

Christenouers, julle sal beslis verheug wees as julle sien dat julle kinders ’n ferm standpunt vir die waarheid inneem en saam met julle in ware aanbidding verenig bly. Dit is hoofsaaklik die vader se verantwoordelikheid om kinders “in die tug en vermaning van die Here” groot te maak (Efesiërs 6:4). Maar kan julle gebiede sien waarop julle moet verbeter in hulle opleiding? Bring julle genoeg tyd saam met julle kinders deur? Doen julle as ’n gesin dinge saam? En geniet julle heilsame ontspanning saam?

Moenie vergeet dat dit ’n kragtige uitwerking op julle kinders het as julle die regte voorbeeld stel nie. As julle wil hê dat hulle die waarheid ernstig moet opneem, dan moet julle ook die waarheid ernstig opneem (3 Johannes 2-4). En as julle wil hê dat hulle diep eerbied vir Jehovah se organisasie en die ouere manne moet aankweek, moet julle altyd self so ’n goeie gesindheid hê.

Hoewel die opleiding van kinders hoofsaaklik ouers se plig is, het ouere manne ook ’n verantwoordelikheid teenoor jongmense in die gemeente. Wanneer opsieners na God se kudde omsien, moet hulle ook as herders oor die lammertjies toesig hou (1 Petrus 5:1-3). Wat ’n goeie voorbeeld stel Jehovah tog deur selfs die kleintjies teer te versorg! (Jesaja 40:11). Christen-onderherders moet op sy voorbeeld ag slaan en ook innige, liefdevolle belangstelling in jongmense toon en hulle deel van die gemeente laat voel. Sommige jongmense het gesê dat hulle graag sal wil hê dat ouere manne meer dikwels met hulle gesels en hulle in die veldbediening help.

Om ’n jongmens op te lei, beteken meer as om hom kopkennis van die Skrif te gee. Hy moet van ganser harte die dinge haat wat God haat en die dinge liefhê wat God liefhet (Amos 5:14, 15). As hy in sy jeug aan sy Skepper moet dink, moet hy volgens die Skrif gedissiplineer word om in Jehovah se weg van geregtigheid te wandel (Spreuke 22:6; 2 Timotheüs 3:16). Ouers moet nie die nodige dissipline terughou nie. Sommige ouers wat hulle kind se vriendskap tot elke prys wil behou, is geneig om ’n oortreding oor te sien en die erns daarvan te verklein. Hulle word beïnvloed deur die wêreld se permissiwiteit. Maar die liefdevolle ouer slaan ag op berigte dat sy kind hom nie gedra het nie en gee behoorlike dissipline wanneer dit nodig is (Spreuke 13:24). Watter Christenouer wil ’n vriendskap behou wat op permissiwiteit gebaseer is maar sy kind verloor weens gebrek aan behoorlike dissipline?—Spreuke 22:15.

’n Doel in die lewe

Jehovah God het ons geskep sodat ons diens aan hom ons die grootste vreugde en tevredenheid verskaf. Dink aan die groot veld wat julle jongmense kan bearbei. Ongeveer die helfte van die wêreld se bevolking is 20 of jonger. Hierdie jongmense dwaal doelloos rond in die see van mense. Terwyl hulle geen hoop het nie, het julle as Christenjeugdiges ’n vaste hoop en iets waardevols om aan hulle mee te deel. Deur julle goeie Christelike gedrag en julle ywer vir Jehovah se diens kan julle baie van hulle na die waarheid aantrek. Julle kan hulle dus help om op die weg na die lewe te kom.

Watter verdiensteliker doelwit kan jy hê as om jou lewe aan Jehovah God se diens te wy? Het jy al daaraan gedink om die lewensreddende predikingswerk voltyds te doen? Miskien kan jy die goeie nuus as ’n pionier verkondig, of jy kan dien by een van die Wagtoringgenootskap se takkantore waar Bybellektuur gedruk word. Selfs as jy dit nie kan doen nie, behoort jy die aanbidding van Jehovah die middelpunt in jou lewe te maak en so aan jou Skepper te dink. Jy het ’n verdienstelike werk om te doen. Wees dus tot die einde van hierdie stelsel van dinge vasbeslote om ‘oorvloedig in die werk van Jehovah’ te wees.—1 Korinthiërs 15:58, vgl. NW.

Gaan dus vooruit, Christenjeugdiges. Dink nou aan julle Skepper, en hy sal julle bewaar wanneer hy ’n einde aan hierdie goddelose wêreld maak. Ja, Jehovah sal jou gedurende daardie tyd beskerm en jou met ’n eindelose, glorieryke toekoms seën.