Die slag by Jerigo—Mite of feit?
ARGEOLOË het die Bybelverslag oor Josua en die slag by Jerigo dekades lank in twyfel probeer trek. Volgens die Bybel het Josua en die Israelitiese leërmag sewe dae lank om Jerigo geloop, totdat God die stad se ontsaglike mure laat inval het. Dit het die Israeliete in staat gestel om in te gaan en ‘die stad met alles wat daarin was met vuur te verbrand’.—Josua 6:1-24.
Maar talle argeoloë, beïnvloed deur die hoogs gerespekteerde werk van Kathleen Kenyon in die vyftigerjare, was oortuig dat Jerigo nie eens gedurende die tyd van die Israelitiese inval bestaan het nie. Hulle het gemeen dat die stad meer as ’n eeu tevore reeds vernietig is! Die Bybelse verslag oor Josua en die Israeliete is derhalwe oor die algemeen geïgnoreer. Maar dr. Bryant G. Wood, ’n argeoloog aan die Universiteit van Toronto, Kanada, het die gegewens oor Jerigo onlangs opnuut beskou. Volgens The New York Times het hy tot die slotsom gekom dat dr. Kenyon “na die verkeerde soort erdewerk, en op die verkeerde plekke, gesoek het”, en dat die getuienis in werklikheid “merkwaardig ooreenstem” met die Bybel.
Dr. Wood noem ’n laag as van een meter dik vol potskerwe, stukkies baksteen van ’n muur wat ingeval het en balke, alles swart asof dit deur ’n stadswye vuur verbrand is. Daar is vasgestel (met die beskikbare metodes wat weliswaar onakkuraat is) dat die potskerwe uit min of meer 1410 voor ons Gewone Jaartelling, met ’n speling van 40 jaar aan weerskante, dateer—glad nie lank na 1473 v.G.J. nie, die datum waarop die slag by Jerigo volgens die Bybel plaasgevind het.
Opgrawers het gevind dat daar oorvloedige voorrade graan in die huise van eertydse Jerigo was. Dit is interessant, aangesien die Bybel toon dat Jerigo kort na die lente-oes en sonder ’n uitgerekte uithongeringsbeleg geval het (Josua 3:14-16). Dit is albei goeie redes waarom Jerigo se huise soveel graan in voorraad gehad het toe die stad vernietig is.
Wetenskaplikes is taamlik teësinnig om te erken dat die Bybel akkuraat is. Die Times haal dus een hoogstaande geleerde aan wat na aanleiding van Wood se bevindinge gesê het: “’n Groot hoeveelheid inligting in die Bybel bevat ongetwyfeld ’n greintjie waarheid.” Maar terwyl al hoe meer skriftuurlike verslae deur hedendaagse wetenskaplike en argeologiese ontdekkings gestaaf word, is dit vir die onbevooroordeeldes duidelik dat die Bybel beslis nie ’n versameling valshede is wat hier en daar ’n greintjie waarheid bevat nie. Soos die Bybel self sê: “God moet waaragtig wees en elke mens leuenagtig.”—Romeine 3:4.
Hoewel hedendaagse verklarings van argeologiese uitgrawings by Jerigo belangrik is, wandel ware Christene “deur geloof en nie deur aanskouing nie” (2 Korinthiërs 5:7). Hulle geloof hang nie van argeologie af nie. Die Bybel toon herhaaldelik, met of sonder argeologiese getuienis, dat dit ’n betroubare bron van inligting oor die verlede, die hede en die toekoms is.—Psalm 119:105; 2 Petrus 1:19-21.
[Prent op bladsy 7]
Die bouvalle van Jerigo, waar Jehovah die Israeliete ’n oorwinning gegee het
[Erkenning]
Pictorial Archive (Near Eastern History) Est.