Die verspreiding van die geur van die kennis van God

“God sy dank wat ons altyd in ’n triomftog meevoer in die geselskap van die Christus en die geur van die kennis van hom deur bemiddeling van ons in elke plek waarneembaar maak!”—2 KORINTHIËRS 2:14, “NW”.

1. Watter geur bespreek ons hier, en hoe moet die voorreg om dit te versprei, beskou word?

RUIK, Ruik! M-m-m-m! Ruik jy die soet geur? Ons praat nie hier van die geur van blomme nie, maar eerder van ’n figuurlike geur wat afkomstig is van die puikste geskrifte op aarde. Hierdie geskrifte is nie dié wat van die mens af kom nie, maar is die figuurlike ruiker wat geïnspireer is deur die Een wat ook die geurige blomme geskep het wat die aarde verfraai. Die voorreg om hierdie geur van die kennis van God te versprei, is ’n groot skat. Ja, dit is ’n besonder kosbare diens—wat nie deur almal besit word nie, waaraan die mensdom oor die algemeen nie ’n deel het nie.

2. Wanneer het Christus se dissipels ’n figuurlike geur begin versprei, en met watter gevolg?

² Christus se dissipels het hierdie kosbare skat op Pinksterdag in die jaar 33 van ons Gewone Jaartelling ontvang toe hulle tot aktiewe diens aan Jehovah God geroep is. Nadat hulle met die heilige gees vervul is, het hulle die figuurlike geur begin versprei, en “die groot dade van God” begin verkondig (Handelinge 2:1-4, 11). Die geur van die kennis van God sou deur hulle na ander gaan, nie net na natuurlike, besnede Jode nie maar ook na onbesnede nasies, stamme, volke en tale (Handelinge 10:34, 35). Die ware dissipels het hierdie diens beskou as iets wat kosbaarder is as al die materiële rykdom wat mense vir hulself vergaar.

3. In watter mate word die werk om die geur van die kennis van God te versprei gedoen, en watter vraag moet ons ons afvra?

³ Vandag word die groot werk om die geur van die kennis van God te versprei aardwyd gedoen—op ’n groter skaal as ooit tevore in die mensegeskiedenis. Dit behels dat die opgerigte Koninkryk van God onder sy aangestelde Koning, Jesus Christus, aan almal verkondig word (Mattheüs 6:10; Handelinge 1:8). Beskou jy die diens om die Koning en sy Koninkryk te adverteer as ’n kosbare skat? Jesus Christus, wat die voorloper was van die verkondiging van die goeie nuus van daardie Koninkryk, het dit só waardeer en die voorbeeld gestel.—Mattheüs 4:17; 6:19-21.

Parfumeer die weg van die triomftog

4. Volgens 2 Korinthiërs 2:14, hoe lei God nou sy aardse knegte, en op watter eertydse gebruik het Paulus se woorde betrekking?

⁴ Waarom is diens aan God iets wat kosbaar geag moet word? Een rede is dat diegene wat Jehovah dien selfs nou die buitengewone voorreg het om deur God in ’n luisterryke triomftog gelei te word. Volgens die New International Version sê 2 Korinthiërs 2:14: “Dank aan God, wat ons altyd in ’n triomftog lei in Christus en wat deur ons oral die geur van die kennis van hom versprei [“wat ons kennis van hom deur die wêreld laat versprei soos ’n lieflike parfuum!” Phillips].” Daardie woorde van Paulus het betrekking op die eertydse gebruik om oorwinningsoptogte te hou.a

5, 6. (a) Wat het gedurende die ou Romeinse triomftogte plaasgevind, en wat het die soet reuk vir verskillende mense beteken? (b) Wat is die geestelike toepassing van die illustrasie in 2 Korinthiërs 2:14-16?

⁵ Een van die hoogste eerbewyse wat die Senaat in die dae van die Romeinse republiek aan ’n seëvierende generaal kon verleen, was om hom toe te laat om sy oorwinning met ’n duur triomftog te vier. Die Romeinse optog het stadig met die Via Triumphalis langs beweeg en dan met die kronkelpad op na die tempel van Jupiter op Kapitoolheuwel. Die konings, prinse en generaals wat in die oorlog gevange geneem is, is tot hul vernedering en skande saam met hulle kinders en dienaars in kettings gelei, dikwels naak.

⁶ Terwyl die optog deur die strate van Rome beweeg het, het die stadsbewoners blomme voor die oorwinnaar se strydwa gegooi, en brandende wierook het die hele roete geparfumeer. Die soet reuk het eer en ’n veiliger lewe vir die seëvierende soldate beteken. Maar vir die onbegenadigde gevangenes wat aan die einde van die optog tereggestel sou word, het dit die dood beteken. Dit werp lig op Paulus se geestelike toepassing van die illustrasie in 2 Korinthiërs 2:14-16. Dit beeld Paulus en mede-Christene af as toegewyde onderdane van God, “in die geselskap van die Christus”, wat almal in God se seëvierende gevolg is en deur Hom in ’n luisterryke triomftog langs ’n geparfumeerde roete gelei word.

Geur van die lewe of die reuk van die dood

7, 8. (a) Hoe versprei Jehovah se Getuies die soet geur van die kennis van God? (b) Hoe reageer diegene wat gered word op die verspreiding van die figuurlike geur deur die Getuies? (c) Hoe reageer dié wat verlore gaan?

⁷ Jehovah se Getuies verkondig oral die Bybelwaarhede aangaande God se Koninkryk onder Christus en sodoende versprei, vertoon en openbaar hulle oral die soet geur van die kennis van die genadige God wie se waarheid hulle van valse godsdiens bevry het. Hulle gaan triomfantlik vooruit in Jehovah se diens. Hulle diensoffers as Getuies van hom en sy Koning is vir Jehovah soos aangename wierook. Ons kan dus verstaan wat die apostel bedoel het toe hy gesê het: “Want ons is ’n aangename geur van Christus tot eer van God onder die wat gered word en onder die wat verlore gaan; vir die laaste ’n reuk van die dood tot die dood, maar vir die eerste ’n reuk van die lewe tot die lewe [“’n belangrike geur wat die lewe bring”, The New English Bible; “die verkwikkende geur van die lewe self”, Phillips].”—2 Korinthiërs 2:15, 16.

⁸ Opregte, skaapgeaarde mense besef dat die kennis van Jehovah wat deur sy Getuies versprei word soet is. Vir sulke mense het die getuieniswerk die reuk van gesondheid en lewe, van lewende, lewegewende waarheid. Hulle dank Jehovah en sy Koning, by wie se triomftog hulle aansluit, en roep hardop uit: “Ons redding kom van ons God, wat op die troon sit, en van die Lam” (Openbaring 7:10, NAV). Hulle asem die lug van Koninkrykswaarheid in, wat ’n verfrissende geur van lewe is wat tot lewe lei. Maar Satan en sy demone het die reukvermoë van diegene wat aan valse godsdiens vasklou, verderf sodat hulle hul neuse toedruk en die waarheid minagtend verwerp. Vir “die wat verlore gaan”, versprei die waarheid en die getroue draers daarvan ’n reuk van die dood wat tot die dood lei. Of soos die New International Version dit stel: “Vir die een het ons die reuk van die dood.” Die Phillips-vertaling sê: “Vir laasgenoemdes is dit soos die dodelike reuk van verdoemenis.”

9. Watter vraag vra Paulus nou, en hoe sal jy dit beantwoord, en waarom?

⁹ “En wie is tot hierdie dinge bekwaam?” vra die apostel dan (2 Korinthiërs 2:16). Met ander woorde: “En wie kan bekwaam wees vir so ’n werk?” (The Jerusalem Bible). “En wie is bevoeg vir so ’n diens?” (Weymouth). Die skriftuurlike antwoord is: Jehovah se Getuies! Waarom? Omdat net toegewyde mense wat eerlik en opreg is, nie eie gewin soek nie en wat reguit die waarheid spreek, sonder om ’n kompromis met valse godsdiens aan te gaan, bekwaam is vir hierdie werk om die geur van die kennis van God te versprei.—Kolossense 1:3-6, 13; 2 Timotheüs 2:15.

10. Waarom is die geestelikes nie bekwaam om verspreiders van die geur van die kennis van God te wees nie?

¹⁰ Die Christendom se geestelikes, wat ’n goeie naam by die wêreld wil hê, is nie bekwaam tot en bevoeg vir hierdie onselfsugtige diens nie. Waarom nie? Omdat hulle nie aan die vereistes voldoen wat deur Paulus se verklaring aangedui word nie: “Ons is nie soos baie wat handel dryf met die woord van God nie; maar as uit opregtheid, maar as uit God, in die teenwoordigheid van God [“onder die oog van God”, NW], spreek ons in Christus” (2 Korinthiërs 2:17). Of soos die New International Version dit stel: “Anders as baie, smous ons nie met die woord van God om wins te maak nie. Inteendeel, ons spreek in Christus voor God met opregtheid, soos manne wat van God gestuur is.”

11, 12. (a) Waarom dryf die Getuies “nie handel met die woord van God” omdat hulle bydraes aanvaar nie? (b) Wat bied Jehovah se Getuies in teenstelling met die vervalste vorm van die Christelike godsdiens wat so baie mense koop?

¹¹ Jehovah se Getuies is deur God gestuur, en hulle doen hulle getuieniswerk onder die oog van God. Hoewel hulle waardevolle boeke en ander publikasies wat God se Woord verduidelik aan belangstellendes voorsien en vrywillige bydraes vir die wêreldwye Koninkrykspredikingswerk aanvaar, is sulke gebruike nie dieselfde as om met die Woord van God handel te dryf of dit te vervals nie. Trouens, sulke bydraes help bloot om die kennis van God aan nog meer mense te versprei.

¹² Vandag het baie mense, wetend of onwetend, ’n vervalste weergawe van die Christelike godsdiens gekoop, want dit pas hulle selfsugtige begeertes en meng nie in in hulle lewenstyl nie. Hulle glo dat God hulle aanvaar omdat hulle beweer dat hulle liefde vir hom in hulle hart het. Maar wanneer daar vir hulle gewys word dat hulle opvattings en gedrag met God se Woord bots, verdraai hulle die Skrif om persoonlike opinies bo die regte Bybelse begrip te verhef (Mattheüs 15:8, 9; 2 Petrus 3:16). Jehovah se Getuies verkondig egter die suiwer, onvervalste waarheid van die Bybel en bring sodoende ’n soet geur voort wat vir God en sy ware aanbidders aanneemlik is. Daardeur verdryf hulle al die godsdienstradisies en struikelblokke wat ’n mens kan verhinder om die ware kennis van God te hê.

13. Wie, buiten die gesalfde Christene, is in God se triomftog, en wat doen hulle oral waar hulle gaan?

¹³ Om in God se triomftog in die geselskap van Christus te wees, is waarlik ’n onvergelyklike voorreg wat nie net deur die gesalfde Christene geniet word nie maar wat ook, selfs nou, deur die “groot menigte” “ander skape” geniet word omdat die Koninkryk se oorwinning ophande is (Openbaring 7:4, 9; Johannes 10:16). Terwyl ons verdere oorwinnings van ons seëvierende Koning verwag, versprei ons oral waar ons gaan die kennis van God soos parfuum, of kosbare wierook, aan diegene wie se hart na waarheid en regverdigheid hunker. Wat ’n voorreg vir diegene wat bekwaam is vir hierdie merkwaardige werk!—Johannes 17:3; Kolossense 3:16, 17.

Goedgekeur as menseparfumeurs

14. Waarom het diegene wat die geur van die kennis van God versprei nie ’n magtigingsertifikaat van mense nodig nie?

¹⁴ Maar het diegene wat die geur van die kennis van God en van sy Koninkryk versprei ’n diploma of ’n magtigingsertifikaat van mense nodig? Nee! Ons het reeds ’n opdrag, of aanstelling, ontvang as Getuies van die Opperwese in die heelal. Daarom hoef ons nie te aarsel om uit te gaan in die veld en die geur van die goeie nuus van God se Koninkryk te versprei nie. Hou in gedagte dat Jehovah ons lei. Jesus het sy bediening uitgevoer ten spyte van “teëspraak van die sondaars” (Hebreërs 12:3). Tog kan Jesus se rekord van veldaktiwiteit, soos in die Bybel opgeteken, nie betwis word nie, en sy werk in die veld beveel hom aan en bewys dat hy ’n ware bedienaar van Jehovah God was.

15. Hoe het die apostel Paulus getoon dat ware Christene nie “aanbevelingsbriewe” nodig het nie?

¹⁵ Die apostel Paulus het ’n soortgelyke uitdaging in sy dag die hoof gebied deur die volgende argument aan te voer: “Begin ons weer om onsself aan te beveel? Of het ons miskien, soos sommige, aanbevelingsbriewe nodig aan julle of van julle? Julle is ons brief, geskrywe in ons harte, geken en gelees deur alle mense; omdat julle duidelik ’n brief van Christus is deur ons diens berei, geskrywe nie met ink nie, maar met die Gees van die lewende God; nie op kliptafels nie, maar op die vleestafels van die hart.”—2 Korinthiërs 3:1-3.

16. Watter soort brief bied Jehovah se Getuies as getuigskrif dat hulle bediening van God af is?

¹⁶ Wêreldse owerhede erken nie ons aanstelling as Jehovah se Getuies nie. Maar laat ons werk as verspreiders van die geur van die kennis van Jehovah self getuig! Hierdie werk is onuitwisbaar, ofskoon sommige mense weier om hierdie getuigskrif van ons bediening te lees. Geestelikes lê hulle sertifikate voor wat deur kerklike beheerliggame uitgereik is. Maar dit is bloot stukkies papier, die woord van mense. Jehovah se Getuies word nie net deur God se Woord gesteun nie, maar is getuigskrifte van vlees en bloed. Die groot menigte ander skape wat met die goeie nuus van die Koninkryk bereik is, is ook reeds aan die regterkant van Jehovah se Koning versamel (Mattheüs 25:33, 34). Al hierdie mense is ons aanbevelingsbrief, ’n brief wat ons as Jehovah se Getuies oral op ons hart en verstand saamdra en met vertroue kan vertoon. Diegene wat ’n standpunt inneem vir God se universele soewereiniteit en God saam met Jehovah se Getuies dien, is self ’n aanbevelingsbewys, en mense kan nie anders as om dit te lees en daarvan kennis te neem nie.

17. Hoe is ons “brief van Christus” geskryf, en waarom sê Paulus dat dit op harte geskryf is?

¹⁷ Beoefenaars van valse godsdiens word natuurlik kwaad en jaloers wanneer hulle dit lees. Die toenemende groot menigte ander skape is nietemin ’n aanbevelingsbrief van Jesus Christus, die Goeie Herder, wat al Jehovah se Getuies in sy herderswerk gebruik. Ons is die pen, of menslike instrument, wat hy gebruik om hierdie brief te skryf. Dié brief is nie met uitwisbare ink geskryf nie, maar is geskryf deur en met die werkende krag, of gees, van God, wat in ons werk. Dit is nie soos in Moses se geval toe die wet van die Tien Gebooie met die vinger van God op twee kliptafels geskryf is nie. Ons brief is op vleestafels van menseharte geskryf, aangesien ons geestelike bediening ’n verandering van gedagte en hart voortbring in die ontvangers van die geurige goeie nuus.

18. As gevolg waarvan word die ontvangers van die goeie nuus ’n aanbevelingsbrief?

¹⁸ Ons werk met God se Woord het ’n indruk op waarderende ontvangers van die goeie nuus gemaak en merkwaardige veranderinge teweeggebring. Hulle het bewys dat hulle besluit om God te dien nie ’n standpunt was wat hulle op die ingewing van die oomblik ingeneem het weens geesdrif wat deur ’n emosionele evangelis opgewek is nie. Dit verteenwoordig eerder ’n permanente verandering van hulle lewe op grond van die kristalhelder waarhede in die Heilige Bybel. Liefde vir die ware God, Jehovah, beweeg hulle om ‘die oue mens af te lê met die begeerlikhede van die verleiding en hulle met die nuwe mens te beklee’ wat “die vrug van die Gees” openbaar (Efesiërs 4:20-24; Galasiërs 5:22). Die resultaat maak hulle derhalwe ’n aanbevelingsbrief. Dit getuig duideliker as enige handgeskrewe brief deur ons of deur enige sigbare organisasie wat ons kon uitstuur.

19. Hoe beskryf Paulus die bekwaamhede van die “dienaars van ’n nuwe verbond”, en watter invloed het hulle werk op die groot menigte gehad?

¹⁹ In 2 Korinthiërs 3:4-6 sê Paulus voorts: “So ’n vertroue het ons deur Christus by God. Nie dat ons uit onsself bekwaam is om iets as uit onsself te bedink nie, maar ons bekwaamheid is uit God, wat ons ook bekwaam gemaak het as dienaars van ’n nuwe testament [“verbond”, NW].” Hoewel net diegene van die gesalfde oorblyfsel “dienaars van ’n nuwe verbond” is, het hulle werk ’n invloed op die groot menigte ander skape, en dit sal nog talle ander sulke skape beïnvloed wat nog versamel moet word. Dit is die vertroue wat alle Getuies van Jehovah deur Christus Jesus by Jehovah God het. Die oorblyfsel spoor die groot menigte met dankbaarheid aan om heelhartig deel te neem aan die bediening van ‘briefskrywery’ wat Jesus Christus in Mattheüs 24:14 en Mattheüs 28:19 voorspel het.

20. (a) Wat toon die verslag in die jaarboek oor die verspreiding van die geur van die kennis van God? (b) Wat kan ons almal sê aangaande ons kwalifikasies vir die bediening van briefskrywery?

²⁰ Dit is wat hulle gedoen het, soos gesien kan word in die verslag in die jaarboek vir 1990 wat toon dat Jehovah se Getuies die geur van die kennis van God in 212 lande versprei. Daar is meer as 3 787-000 bedrywige verkondigers, en verlede jaar alleen het hulle sowat 835 000 000 uur bestee aan die verkondiging van hierdie goeie nuus van die Koninkryk. Verlede jaar het 9 479 064 die Here se Aandmaal bygewoon. Die gesalfde oorblyfsel sowel as die lede van die groot menigte ander skape kan sê: “Ons bekwaamheid is uit God.” Of soos The Jerusalem Bible dit stel: “Al ons kwalifikasies kom van God.”

21. Wat behoort ons almal te doen, en waarom?

²¹ Versprei derhalwe oral die soet, lewegewende geur van God se kennis! Laat die lug in jou gemeente se gebied swaar word van die geur van die kennis van Jehovah. Dan sal hy, soos ’n seëvierende Generaal, jou in sy triomftog lei terwyl al sy Getuies voortgaan in hierdie hedendaagse glorieryke bediening!

[Voetnote]

Hoe sal jy antwoord?

◻ Watter illustrasie gebruik Paulus in 2 Korinthiërs 2:14-16?

◻ Watter invloed het die ver-spreiding van die geur van die kennis van God op ander?

◻ Slegs wie is bekwaam tot hierdie werk, en waarom?

◻ Waarom het menseparfumeurs nie handgeskrewe aanbevelings-briewe vir hulle werk nodig nie?