Jongmense wat God dien

IS DIT vir jou vreemd dat jongmense van hulle tyd sal afstaan om, sonder betaling, na jou huis te kom om oor God te praat? Verbaas dit jou dat kinders hulle ouers vergesel om in ’n eeu van toenemende ongeloof met ander mense oor wonderlike Bybelse beloftes van ’n gelukkige toekoms te praat?a

In die meeste van die ruim 60 000 gemeentes van Jehovah se Getuies dwarsdeur die wêreld sal jy baie jongmense aantref. Hulle gaan nie na ’n weeklikse Sondagskool of katkisasieklas nie. Hierdie jongmense vind eerder baat by gemeentelike vergaderinge en neem selfs daaraan deel. Klein kindertjies gee moontlik eenvoudige antwoorde. Voor hulle tienderjare neem hulle aan die Teokratiese Bedieningskool deel. Baie tieners gebruik skoolvakansies om bure te help om van God en sy wonderlike beloftes vir die toekoms te leer.

Daar is werklik niks nuuts aan sulke aktiwiteite van jongmense nie. Die Bybel vertel van getroue jong mans en vroue, sowel as jeugdiges en kindertjies wat uitstekende voorbeelde in God se diens gestel het.

Die Bybelboek Psalms het ’n “geselskap van jong manne” voorspel wat so verkwikkend en talryk soos “doudruppels” in God se diens sou wees. Dit het ook vertel van “jongelinge” en “jongedogters” wat die naam van God loof (Psalm 110:3, NW; 148:12, 13). Daar was waarskynlik jongmense onder diegene op wie God se heilige gees op Pinkster 33 G.J. uitgegiet is. Daardie dag het sowat 3 000 die Woord aanvaar en is hulle gedoop. Die apostel Petrus het gesê dat hierdie verbasende gebeurtenis ’n vervulling was van Joël se profesie: “Julle seuns en julle dogters sal profeteer, en julle jongelinge sal gesigte sien, en julle ou mense sal drome droom.”—Handelinge 2:4-8, 16, 17, 41.

Ander Bybelse voorbeelde van mense wat Jehovah God in hulle jeug gedien het, is onder andere Samuel, regverdige koning Dawid, die bekende Bybelprofete Jeremia en Daniël, sowel as die getroue Timotheüs. Hierdie nommer bevat drie artikels wat party van hierdie Bybelse voorbeelde bespreek. Jy sal uit die artikels sien waarom jeugdiges, sowel as ouer mense, diens aan God ernstig opneem en waarom hulle soveel tyd daaraan bestee om hulle bure te help om dit ook te doen.

[Voetnote]