Jong knegte in Bybelse tye

DIE Bybel vertel van baie jongmense wat hulle diens aan God as iets ernstigs beskou het en wat ryklik geseën is as gevolg daarvan. Hierdie puik Bybelse voorbeelde kan ons grootliks aanmoedig, of ons jonk is, of oud en grys.

Josef was maar 17 jaar oud toe hy in Egipte in slawerny verkoop is. Daar, ver van sy gesin af en waar niemand wat hom geken het hom kon sien nie, het Josef sy onkreukbaarheid bewys. Toe Potifar se vrou Josef probeer verlei het, het hy gesê: “Hoe kan ek dan hierdie groot kwaad doen en sondig teen God?” Josef het selfs voor magtige Farao, die invloedrykste koning van sy dag, die geleentheid gebruik om God die eer te gee vir die verklaring van Farao se drome. Hy is ryklik geseën. God het hom gebruik om die Egiptenare, sowel as sy gesin, van ’n hongerdood te red en om sy vader, Jakob, en sy huisgesin na Egipte te bring.—Genesis 37:2; 39:7-9; 41:15, 16, 32.

Moses en ander getroue jongmense

Farao se dogter het Moses as haar eie kind aangeneem, maar Moses se moeder en vader kon hom van die ware God leer. Die Bybel sê dat Moses, toe hy grootgeword het, “geweier [het] om die seun van Farao se dogter genoem te word, omdat hy verkies het om liewer sleg behandel te word saam met die volk van God as om ’n tyd lank die genot van die sonde te hê”. God het Moses gebruik om sy volk uit Egipte uit te lei, om die Wet by Sinai te ontvang en om ’n groot deel van die Bybel te skryf. Het jy jou, ongeag jou ouderdom, vas voorgeneem om God te dien soos Moses gedoen het?—Hebreërs 11:23-29; Exodus 2:1-10.

Die Skrif vertel ons van “kinders” wat saam met die res van die nasie geluister het toe God se Wet aan Israel voorgelees is (Deuteronomium 31:10-13). In Nehemia se dag het “almal wat met verstand kon luister . . . vandat dit lig geword het tot die middag” gestaan om die Wet te hoor (Nehemia 8:1-8). Al het die kindertjies nie alles verstaan nie, kon hulle begryp dat hulle Jehovah God moes liefhê, aanbid en gehoorsaam. Luister jy, ongeag hoe oud jy is, by byeenkomste waar God se Woord bespreek word? Het jy, soos daardie jong Israeliete, geleer hoe belangrik dit is om hom te gehoorsaam?

Dawid, Josia en Jeremia

God het Dawid, die jongste van agt broers, vir spesiale diens uitgekies en van hom gesê: “Ek het Dawid, die seun van Isai, gevind, ’n man na my hart, wat al my welbehae sal doen.” God het hom gekies om “’n herder” te wees oor sy volk, en Dawid het daardie diens verrig terwyl hy deur baie jare heen sy liefde vir Jehovah bewys het. Hy het meer as 70 van die Psalms geskryf en ’n voorouer van Jesus Christus geword. Waardeer jy God se weë en doen jy, soos Dawid, die dinge wat hy wil hê, ongeag hoe oud jy is?—Handelinge 13:22; Psalm 78:70, 71, NW; 1 Samuel 16:10, 11; Lukas 3:23, 31.

Josia het koning geword toe hy net agt jaar oud was. Toe hy omtrent 15 was, “terwyl hy nog jonk was, het hy begin om die God van sy vader Dawid te soek”. Voor hy 20 was, het Josia met ’n veldtog teen valse aanbidding begin. Later het hy die tempel laat herstel, en hy het ware aanbidding in die land heringestel. Ons lees: “Al sy dae het hulle nie van die HERE, die God van hulle vaders, afgewyk nie.” Ons kan nie almal soos Josia ’n koning wees nie, maar ons kan, ongeag ons ouderdom, God dien en ’n ferm standpunt teen valse godsdiens inneem.—2 Kronieke 34:3, 8, 33.

Die almagtige God het vir Jeremia gesê: “Voordat ek jou in die moederskoot gevorm het, het Ek jou geken; en voordat jy uit die liggaam voortgekom het, het Ek jou geheilig; Ek het jou tot ’n profeet vir die nasies gemaak.” Jeremia het gekla dat hy te jonk is om ’n profeet te wees: “Ag, Here HERE, voorwaar, ek kan nie praat nie, want ek is jonk [“nog ’n seun”, NW].” Jehovah het geantwoord: “Moenie sê: Ek is jonk nie; want na wie Ek jou ook al stuur, moet jy gaan; en wat Ek jou ook al beveel, moet jy spreek.” Jeremia het dit meer as 40 jaar lank gedoen, en selfs toe hy wou ophou, kon hy nie. God se woord was “soos ’n brandende vuur, opgesluit in [sy] gebeente”. Hy moes net praat! Kweek jy, ongeag jou ouderdom, die soort geloof aan wat Jeremia gehad het, en gaan jy vooruit in God se diens soos hy gedoen het?—Jeremia 1:4-8; 20:9.

Daniël, Jesus en Timotheüs

Het jy al ooit van Daniël gehoor? Hy was moontlik heelwat jonger as 20 toe hy saam met ander “kinders” as gevangene na die hof van magtige Nebukadnesar, koning van Babilon, weggevoer is. Daniël was, ondanks sy jeug, vasbeslote om gehoorsaam te bly aan God. Daniël en sy vriende het geweier om hulle te verontreinig met kos wat God se Wet kon skend of deur heidense rituele besoedel is. Daniël het meer as 80 jaar lank standvastig gebly, en het sy onkreukbaarheid dermate gehandhaaf dat hy geweier het om op te hou om tot God te bid, selfs al het dit beteken dat hy vir die leeus gegooi sou word. Is jou diens aan God en jou gebede vir jou so belangrik? Dit behoort te wees.—Daniël 1:3, 4, 8; 6:11, 17, 23.

Toe Jesus 12 was, is hy tussen die godsdiensleraars in die tempel in Jerusalem gevind waar hy “sit en na hulle luister en hulle uitvra. En almal wat [die jong Jesus] gehoor het, was verbaas oor sy verstand en sy antwoorde.” Sou ’n skriftuurlike bespreking deur ouer mans by die tempel jou belangstelling, soos Jesus s’n, gewek het? Sou ander verbaas gewees het oor jou begrip en antwoorde? Vandag het talle jong Getuies wat studeer, goed luister en aan Christenvergaderinge deelneem Bybelkennis wat ouer mense verbaas.—Lukas 2:42, 46, 47.

Is jy soos Timotheüs, wat as kind “die heilige Skrifte” geleer is? Toe Timotheüs ’n jong man was, het die broers in minstens twee gemeentes “goeie getuienis” oor hom gelewer. Die apostel Paulus het Timotheüs gekies om saam met hom te reis, nie bloot om bagasie te dra nie, maar om Paulus te help om ander te leer. Sou jy vir so ’n voorreg gekies word? Word daar, nie net in jou gemeente nie maar ook in ander gemeentes, “goeie getuienis” oor jou aktiwiteit gelewer?—2 Timotheüs 3:15; Handelinge 16:1-4.

Watter soort toekoms wil jy hê?

Is dit vir jongmense vandag moontlik om so getrou soos Josef, Moses, Dawid en ander te wees? Ja, dit is. Baie jongmense stel weliswaar net in genot belang. Maar ander gebruik hulle jeug wyslik deur van God en sy wil vir hulle te leer. Hierdie jongmense vervul die Bybelprofesie: “U volk sal hulle gewillig aanbied op die dag van u krygsmag. . . . [U] het u geselskap van jong manne net soos doudruppels.”—Psalm 110:3, NW.

Sulke jongmense lê wysheid bo hulle jare aan die dag aangesien God hulle kan help om nou suksesvol te wees in hulle lewe sowel as om hulle ’n glorieryke toekoms in die komende nuwe wêreld te gee (1 Timotheüs 4:8). Maar hoe kan ’n hedendaagse jeugdige geloof soos dié van die jongmense wat in die Bybel genoem word, aankweek? As jy graag wil weet, nooi ons jou om die artikel “Gelukkige jongmense in Jehovah se diens”, wat op bladsy 10 van hierdie tydskrif begin, te lees.

[Prente op bladsy 5]

Jong Moses is nie deur die rykdom van Egipte verlei nie

Jong Dawid was ’n man na Jehovah se hart

[Prente op bladsy 6]

Al het Jeremia gedink dat hy “nog ’n seun” was, het hy ’n ongewilde boodskap moedig verkondig

Jesus het, toe hy 12 jaar oud was, ouer persone verbaas met sy begrip van God se Woord

[Prent op bladsy 7]

In Israel het selfs die kindertjies geluister wanneer God se Wet voorgelees is. Luister jy?