Jesus se lewe en bediening

’n Intieme verhouding

NA DIE gedenkmaal het Jesus sy apostels aangemoedig deur informeel en openhartig met hulle te gesels. Dit is moontlik ná middernag. Daarom sê Jesus: “Staan op, laat ons hiervandaan weggaan.” Maar voor hulle loop, praat Jesus, weens sy liefde vir hulle, verder met hulle en vertel hy hulle ’n aanmoedigende gelykenis.

“Ek is die ware wynstok, en my Vader is die landbouer”, begin hy. Die Groot Landbouer, Jehovah God, het hierdie simboliese wynstok geplant toe hy Jesus met sy doop in die herfs van 29 G.J. met heilige gees gesalf het. Maar Jesus gaan voort en toon dat die wynstok meer voorstel as net hy, en sê:

“Elke loot wat in My nie vrug dra nie, neem Hy weg; en elke loot wat vrug dra, dié maak hy skoon, sodat dit meer vrug kan dra. . . . Net soos die loot geen vrug kan dra van homself as dit nie in die wynstok bly nie, so julle ook nie as julle in My nie bly nie. Ek is die wynstok, julle die lote.”

Die apostels en ander word met Pinkster, 51 dae later, lote van die wynstok wanneer heilige gees op hulle uitgegiet word. Uiteindelik word 144 000 persone lote van die figuurlike wynstok. Hulle maak, saam met die stam van die wynstok, Jesus Christus, ’n simboliese wynstok uit wat die vrugte van God se Koninkryk dra.

Jesus verduidelik wat die sleutel is om vrug te dra: “Wie in My bly, en Ek in hom, hy dra veel vrug; want sonder My kan julle niks doen nie.” Maar as iemand nie vrug dra nie, sê Jesus, “word hy uitgewerp soos die loot en verdroog, en hulle maak dit bymekaar en gooi dit in die vuur, en dit verbrand”. Aan die ander kant belowe Jesus: “As julle in My bly en my woorde in julle, sal julle vra net wat julle wil hê, en julle sal dit verkry.”

Jesus toon vervolgens vir sy apostels wat die Vader verheerlik: “Dat julle veel vrug dra; en julle sal my dissipels wees.” Die vrug wat God van die lote wil hê, is dat hulle Christelike eienskappe, veral liefde, aan die dag moet lê. Aangesien Christus ’n verkondiger van God se Koninkryk was, sluit die verlangde vrugte ook in dat hulle, net soos hy, dissipels maak.

“Bly in hierdie liefde van My”, maan Jesus nou. Maar hoe kan sy apostels dit doen? “As julle my gebooie bewaar”, sê hy, “sal julle in my liefde bly.” Jesus verduidelik verder: “Dít is my gebod, dat julle mekaar moet liefhê net soos Ek julle liefgehad het. Groter liefde het niemand as dit nie, dat iemand sy lewe vir sy vriende gee.”

Jesus sal oor ’n paar uur bewys lewer van hierdie weergalose liefde deur sy lewe af te lê vir sy apostels, sowel as vir alle ander mense wat geloof in hom sal beoefen. Sy voorbeeld moet sy volgelinge beweeg om dieselfde selfopofferende liefde vir mekaar te hê. Hierdie liefde sal hulle identifiseer, soos Jesus vroeër gesê het: “Hieraan sal almal weet dat julle my dissipels is, as julle liefde onder mekaar het.”

Jesus identifiseer sy vriende en sê: “Julle is my vriende as julle alles doen wat Ek julle beveel. Ek noem julle nie meer diensknegte nie, omdat die dienskneg nie weet wat sy heer doen nie. Maar Ek het julle vriende genoem, omdat Ek alles wat Ek van my Vader gehoor het, aan julle bekend gemaak het.”

Wat ’n kosbare verhouding is dit tog nie—om intieme vriende van Jesus te wees! Maar om hierdie verhouding in stand te hou, moet sy volgelinge aanhou om ‘vrug te dra’. Hulle moet dit doen, sê Jesus, “sodat wat julle die Vader ook al in my Naam vra, Hy julle dit [sal] gee”. Dit is beslis ’n groot beloning omdat hulle Koninkryksvrug dra!

Jesus spoor die apostels weer aan om ‘mekaar lief te hê’ en verduidelik dan dat die wêreld hulle sal haat. Maar hy troos hulle en sê: “As die wêreld julle haat, moet julle weet dat hy My voor julle gehaat het.” Hierna vertel Jesus hulle waarom die wêreld sy volgelinge haat en sê: “Omdat julle nie van die wêreld [“geen deel van die wêreld”, NW] is nie, maar Ek julle uit die wêreld uitverkies het, daarom haat die wêreld julle.”

Jesus verduidelik verder waarom die wêreld hulle haat en sê voorts: “Al hierdie dinge sal hulle aan julle doen ter wille van my Naam, omdat hulle Hom [Jehovah God] nie ken wat My gestuur het nie.” Jesus se wonderwerke veroordeel in werklikheid diegene wat hom haat, soos hy sê: “As Ek nie die werke onder hulle gedoen het wat niemand anders gedoen het nie, sou hulle geen sonde hê nie. Maar nou het hulle dit gesien, en tog het hulle My sowel as my Vader gehaat.” Gevolglik, soos Jesus sê, is die teks vervul wat sê: “Hulle het My sonder oorsaak gehaat.”

Jesus troos hulle weer, soos hy vroeër gedoen het, deur te belowe om die helper, die heilige gees, God se kragtige werkende krag, te stuur. “Hy [sal] van My getuig. En julle getuig ook.” Johannes 14:31–15:27; 13:3, 35; Galasiërs 6:16; Psalm 35:19; 69:5.

▪ Wanneer het Jehovah die simboliese wynstok geplant, en wanneer en hoe word ander deel van die wynstok?

▪ Hoeveel lote het die simboliese wynstok uiteindelik?

▪ Watter vrug verlang God van die lote?

▪ Hoe kan ons vriende van Jesus wees?

▪ Waarom haat die wêreld Jesus se volgelinge?