Ons moet “veel vrug bly dra”

‘Bly veel vrug dra en toon dat julle my dissipels is.’—JOHANNES 15:8.

1. (a) Watter vereiste vir dissipelskap het Jesus vir sy apostels gemeld? (b) Watter vraag moet ons ons afvra?

DIT was die aand voor sy dood. Jesus het heelwat tyd gebruik om sy apostels met ’n openhartige bespreking aan te moedig. Dit moes teen dié tyd al ná middernag gewees het, maar Jesus, beweeg deur liefde vir sy intieme vriende, het aanhou praat. Toe, in die middel van sy gesprek, het hy hulle herinner aan nog ’n vereiste wat hulle moes nakom om sy dissipels te bly. Hy het gesê: “My Vader word hierin verheerlik, dat julle veel vrug bly dra en toon dat julle my dissipels is” (Johannes 15:8). Kom ons vandag hierdie vereiste vir dissipelskap na? Wat beteken dit om ‘veel vrug te dra’? Om uit te vind, moet ons teruggaan na die gesprek van daardie aand.

2. Watter illustrasie oor vrugte vertel Jesus die aand voor sy dood?

² Die aansporing om vrug te dra, is deel van ’n illustrasie wat Jesus vir sy apostels vertel het. Hy het gesê: “Ek is die ware wingerdstok, en my Vader is die landbouer. Elke loot in my wat nie vrug dra nie, neem hy weg, en elkeen wat vrug dra, maak hy skoon, sodat dit meer vrug kan dra. Julle is reeds skoon weens die woord wat ek tot julle gespreek het. Bly in eenheid met my, en ek in eenheid met julle. Net soos die loot nie vanself vrug kan dra tensy dit in die wingerdstok bly nie, so ook kan julle nie, tensy julle in eenheid met my bly. Ek is die wingerdstok, julle is die lote. . . . My Vader word hierin verheerlik, dat julle veel vrug bly dra en toon dat julle my dissipels is. Net soos die Vader my liefgehad en ek julle liefgehad het, moet julle in my liefde bly. As julle my gebooie bewaar, sal julle in my liefde bly.”—Johannes 15:1-10.

3. Wat moet Jesus se volgelinge doen om vrug te dra?

³ In hierdie illustrasie is Jehovah die Landbouer, Jesus die wingerdstok en die apostels met wie Jesus gepraat het, die lote. Solank die apostels daarna gestreef het om ‘in eenheid met Jesus te bly’, sou hulle vrug dra. Jesus het toe verduidelik hoe die apostels hierdie noodsaaklike eenheid kon behou: “As julle my gebooie bewaar, sal julle in my liefde bly.” Later het die apostel Johannes soortgelyke woorde aan mede-Christene geskryf: “Wie [Christus se] gebooie bewaar, bly in eenheid met hom” (1 Johannes 2:24; 3:24).a Deur Christus se gebooie te bewaar, bly sy volgelinge dus in eenheid met hom, en daardie eenheid stel hulle in staat om vrug te dra. Wat kenmerk die vrugte wat ons moet dra?

Geleentheid vir groei

4. Wat kan ons leer uit die feit dat Jehovah elke loot ‘wegneem’ wat nie vrug dra nie?

⁴ In die illustrasie word ’n loot wat nie vrug dra nie, deur Jehovah ‘weggeneem’, of afgekap. Wat sê dit vir ons? Dit sê nie net vir ons dat daar van alle dissipels verwag word om vrug te dra nie, maar ook dat almal dit kan doen, ongeag wat hulle omstandighede of beperkings is. Dit sal immers strydig met Jehovah se liefdevolle weë wees as hy ’n dissipel van Christus sou ‘wegneem’, of diskwalifiseer, omdat hy iets wat bo sy vermoë was, nie gedoen het nie.—Psalm 103:14; Kolossense 3:23; 1 Johannes 5:3.

5. (a) Hoe toon Jesus se illustrasie dat ons meer vrug kan dra? (b) Watter twee soorte vrugte sal ons bespreek?

⁵ Jesus se illustrasie van die wingerdstok toon ook dat ons na gelang van ons omstandighede daarna moet streef om te groei wat ons bedrywighede as ’n dissipel betref. Let op hoe Jesus dit stel: “Elke loot in my wat nie vrug dra nie, neem hy weg, en elkeen wat vrug dra, maak hy skoon, sodat dit meer vrug kan dra” (Johannes 15:2). Teen die einde van die illustrasie spoor Jesus sy volgelinge aan om “veel vrug” te dra (Vers 8). Wat impliseer dit? As dissipels moet ons nooit selfvoldaan raak nie (Openbaring 3:14, 15, 19). Ons moet eerder na maniere soek om meer vrug te dra. Watter soort vrugte moet ons in oorvloediger mate probeer dra? Daar is (1) “die vrugte van die gees” en (2) die Koninkryksvrugte.—Galasiërs 5:22, 23; Matteus 24:14.

Christelike eienskappe as vrugte

6. Hoe het Jesus Christus die waarde beklemtoon van die eerste vrug van die gees?

⁶ Liefde word eerste onder “die vrugte van die gees” genoem. God se heilige gees bring liefde voort in Christene, want hulle gehoorsaam die gebod wat Jesus gegee het kort voordat hy die illustrasie van die vrugdraende wingerdstok vertel het. Hy het vir sy apostels gesê: “Ek gee julle ’n nuwe gebod, dat julle mekaar moet liefhê” (Johannes 13:34). Trouens, in sy gesprek daardie laaste aand van sy aardse lewe het Jesus die apostels deurgaans daaraan herinner hoe belangrik dit is om liefde te betoon.—Johannes 14:15, 21, 23, 24; 15:12, 13, 17.

7. Hoe het die apostel Petrus aangedui dat die openbaring van Christelike eienskappe daarmee verband hou om vrug te dra?

⁷ Petrus, wat daardie aand teenwoordig was, het verstaan dat Christus se ware dissipels Christelike liefde en verwante eienskappe moet openbaar. Jare later het Petrus Christene aangespoor om eienskappe soos selfbeheersing, broederlike geneentheid en liefde aan te kweek. Hy het bygevoeg dat dit sou verhoed dat ons “onbedrywig of onvrugbaar word” (2 Petrus 1:5-8). Wat ons omstandighede ook al is, dit is vir elkeen van ons moontlik om die vrugte van die gees te openbaar. Laat ons derhalwe daarna streef om liefde, goedhartigheid, sagmoedigheid en ander Christelike eienskappe in voller mate te toon, want “teen sulke dinge is daar geen wet”, of beperking nie (Galasiërs 5:23). Ja, laat ons “meer vrug” dra.

Dra Koninkryksvrugte

8. (a) Wat is die verband tussen die vrugte van die gees en Koninkryksvrugte? (b) Watter vraag moet ons oorweeg?

⁸ Kleurvolle en sappige vrugte versier ’n plant. Maar die waarde van sulke vrugte strek baie verder as versiering. Vrugte is ook noodsaaklik vir die voortplanting van die plant deur middel van hulle saad. Net so is die vrugte van die gees nie net daar om ons Christelike persoonlikheid te versier nie. Eienskappe soos liefde en geloof beweeg ons ook om die saad van die Koninkryksboodskap wat in God se Woord gevind word, te versprei. Let op hoe die apostel Paulus hierdie noodsaaklike verband beklemtoon. Hy sê: “Ons [beoefen] geloof [een van die vrugte van die gees], en daarom spreek ons” (2 Korintiërs 4:13). So, verduidelik Paulus verder, ‘bring ons aan God ’n lofoffer, dit wil sê die vrug van die lippe’—die tweede soort vrug wat ons moet openbaar (Hebreërs 13:15). Is daar geleenthede in ons lewe om as verkondigers van God se Koninkryk meer vrug te dra, ja, om “veel vrug” te dra?

9. Dra ons slegs vrug as ons dissipels maak? Verduidelik.

⁹ Om dit te kan antwoord, moet ons eers verstaan wat Koninkryksvrugte is. Sou dit reg wees om tot die slotsom te kom dat ons dissipels moet maak om vrug te dra? (Matteus 28:19). Verwys die vrugte wat ons moet dra, hoofsaaklik na mense wat deur ons gehelp word om gedoopte aanbidders van Jehovah te word? Nee. As dit die geval was, sou die situasie uiters ontmoedigend gewees het vir al daardie dierbare Getuies wat al jare lank die Koninkryksboodskap getrou verkondig in gebiede waar daar nie veel belangstelling is nie. As die Koninkryksvrugte wat ons dra, net nuwe dissipels verteenwoordig, sou hierdie hardwerkende Getuies immers soos die onvrugbare lote in Jesus se illustrasie wees! Dit is natuurlik nie die geval nie. Wat is dan die vernaamste Koninkryksvrugte van ons bediening?

Vrugbaar deur Koninkryksaad te versprei

10. Hoe toon Jesus se illustrasie van die saaier en die verskillende soorte grond wat Koninkryksvrugte is en wat dit nie is nie?

¹⁰ Jesus se illustrasie van die saaier en die verskillende soorte grond help ons om die antwoord te kry—’n bemoedigende antwoord vir dié wat in minder vrugbare gebiede getuig. Jesus het gesê dat die saad die Koninkryksboodskap is wat in God se Woord gevind word en dat die grond die mens se figuurlike hart verteenwoordig. Van die saad “het op die goeie grond geval, en nadat dit uitgespruit het, het dit . . . vrug voortgebring” (Lukas 8:8). Watter vrug? Wel, nadat ’n koringhalm uitspruit en ryp word, is die vrug wat dit voortbring nie koringhalmpies nie, maar nuwe saad. Net so is die vrug wat ’n Christen voortbring, nie noodwendig nuwe dissipels nie, maar nuwe Koninkryksaad.

11. Hoe kan Koninkryksvrugte omskryf word?

¹¹ Die vrugte in hierdie geval is dus nie nuwe dissipels of goeie Christelike eienskappe nie. Aangesien die saad wat gesaai word, die woord van die Koninkryk is, moet die vrugte ’n vermenigvuldiging van hierdie saad wees. In hierdie geval verwys die vrugte wat gedra word, na die getuienis wat oor die Koninkryk gelewer word (Matteus 24:14). Is dit vir ons moontlik om ongeag wat ons omstandighede is, sulke Koninkryksvrugte te dra—dit wil sê die goeie nuus van die Koninkryk te verkondig? Ja, dit is! In dieselfde illustrasie verduidelik Jesus waarom.

Ons gee ons beste tot heerlikheid van God

12. Kan alle Christene Koninkryksvrugte dra? Verduidelik.

¹² ‘Die een wat op die goeie grond gesaai is’, het Jesus gesê, ‘bring voort, hierdie een honderd-, daardie een sestig-, die ander dertigvoudig’ (Matteus 13:23). Die opbrengs van graan wat in ’n veld gesaai word, verskil na gelang van die omstandighede. Net so kan wat ons in die verkondiging van die goeie nuus doen, verskil na gelang van ons omstandighede, en Jesus het getoon dat hy dit besef. Party het meer geleenthede; ander het beter gesondheid en meer energie. Wat ons dus kan doen, is moontlik meer of minder as wat ander kan doen, maar solank dit ons beste is, behaag dit Jehovah (Galasiërs 6:4). Selfs al beperk ouderdom of ’n uitmergelende siekte ons aandeel aan die predikingswerk, beskou ons medelydende Vader, Jehovah, ons ongetwyfeld as iemand wat “veel vrug bly dra”. Waarom? Want ons gee aan hom ‘alles wat ons het’—ons heelhartige diens.b—Markus 12:43, 44; Lukas 10:27.

13. (a) Wat is die vernaamste rede waarom ons ‘aanhou’ om Koninkryksvrugte te dra? (b) Wat sal ons help om vrug te bly dra in gebiede waar daar nie veel belangstelling is nie? (Sien venster op bladsy 21.)

¹³ In watter mate ons ook al Koninkryksvrugte kan voortbring, ons sal beweeg word om “aan te hou vrug dra” as ons in gedagte hou waarom ons dit doen (Johannes 15:16). Jesus het die vernaamste rede gemeld: “My Vader word hierin verheerlik, dat julle veel vrug bly dra” (Johannes 15:8). Ja, ons predikingswerk heilig Jehovah se naam voor alle mense (Psalm 109:30). Honor, ’n getroue Getuie in haar middelsewentigerjare, sê: “Selfs in gebiede waar daar nie veel belangstelling is nie, is dit ’n voorreg om die Allerhoogste te verteenwoordig.” Toe Claudio, wat al sedert 1974 ’n ywerige Getuie is, gevra is waarom hy met die predikingswerk voortgaan al luister min mense in sy gebied, het hy Johannes 4:34 aangehaal, waar ons Jesus se woorde lees: “My voedsel is om die wil te doen van hom wat my gestuur het.” Claudio het bygevoeg: “Soos Jesus wil ek nie net my werk as ’n Koninkryksverkondiger begin nie, maar dit ook voltooi” (Johannes 17:4). Getuies van Jehovah regoor die wêreld stem hiermee saam.—Sien die venster “Hoe om ‘met volharding vrug te dra’” op bladsy 21.

Om te preek en te onderrig

14. (a) Watter tweeledige doel het die werk van Johannes die Doper en dié van Jesus gehad? (b) Hoe sou jy die Christelike bedrywigheid van vandag beskryf?

¹⁴ Johannes die Doper is die eerste Koninkryksverkondiger wat in die Evangelies genoem word (Matteus 3:1, 2; Lukas 3:18). Sy vernaamste doel was om “te getuig”, en hy het dit met hartgrondige geloof gedoen en met die hoop dat ‘alle soorte mense sou glo’ (Johannes 1:6, 7). Party vir wie Johannes getuig het, het dan ook dissipels van Christus geword (Johannes 1:35-37). Johannes was dus ’n prediker sowel as ’n dissipelmaker. Ook Jesus was ’n prediker en ’n onderrigter (Matteus 4:23; 11:1). Dit is dan nie verbasend dat Jesus sy volgelinge beveel het om nie net die Koninkryksboodskap te verkondig nie, maar ook om mense wat dit aanneem, te help om sy dissipels te word (Matteus 28:19, 20). Ons werk behels dus vandag om te preek sowel as om te onderrig.

15. Watter ooreenkoms is daar tussen die reaksie op die predikingswerk wat in die eerste eeu G.J. gedoen is en dit wat vandag gedoen word?

¹⁵ In die eerste eeu G.J. het party van dié wat Paulus hoor preek en onderrig het, “die dinge wat gesê is, begin glo; ander het nie geglo nie” (Handelinge 28:24). Vandag is die reaksie baie dieselfde. Ongelukkig val die meeste van die Koninkryksaad op onontvanklike grond. Nietemin is daar nog steeds saad wat op goeie grond val, wortelskiet en uitspruit, net soos Jesus voorspel het. Trouens, regoor die wêreld word gemiddeld meer as 5 000 mense elke week van die jaar ware dissipels van Christus! Hierdie nuwe dissipels ‘glo die dinge wat gesê is’, hoewel die meeste ander mense dit nie glo nie. Wat het gehelp om hulle hart ontvanklik te maak vir die Koninkryksboodskap? Dikwels het die persoonlike belangstelling wat die Getuies getoon het—om as ’t ware die nuwe saadjies nat te gooi—die verskil gemaak (1 Korintiërs 3:6). Kyk net na twee van baie voorbeelde.

Persoonlike belangstelling maak ’n verskil

16, 17. Waarom is dit belangrik om persoonlike belangstelling te toon in die mense wat ons in ons bediening ontmoet?

¹⁶ Karolien, ’n jong Getuie in België, het besoek afgelê by ’n bejaarde vrou wat geen belangstelling in die Koninkryksboodskap getoon het nie. Omdat daar ’n verband om die vrou se hand was, het Karolien en haar metgesel hulp aangebied, maar die vrou het dit van die hand gewys. Twee dae later het dieselfde Getuies na die vrou se huis teruggegaan en gevra hoe dit met haar gaan. “Dit het die verskil gemaak”, het Karolien gesê. “Sy was verbaas om te sien dat ons werklik in haar persoonlik belangstel. Sy het ons ingenooi, en ’n Bybelstudie is begin.”

¹⁷ Sandi, ’n Getuie in die Verenigde State, toon ook persoonlike belangstelling in die mense vir wie sy getuig. Sy kyk na die lys van geboortes in die plaaslike koerant en besoek dan die nuwe ouers met My boek met Bybelverhale.c Aangesien die ma gewoonlik tuis is en graag haar baba vir besoekers wys, lei dit dikwels tot ’n gesprek. “Ek praat met die ouers oor hoe belangrik dit is om ’n band met die baba te vorm deur vir hom te lees”, verduidelik Sandi. “Later praat ek oor die uitdagings om ’n kind in vandag se wêreld groot te maak.” Onlangs het ’n moeder en ses kinders Jehovah danksy so ’n besoek begin dien. As ons inisiatief en persoonlike belangstelling toon, kan ons ook sulke vreugdevolle resultate in ons bediening geniet.

18. (a) Waarom is dit vir ons almal moontlik om aan die vereiste te voldoen om ‘veel vrug te dra’? (b) Aan watter drie vereistes vir dissipelskap wat in die Evangelie van Johannes gemeld word, is jy vasbeslote om te voldoen?

¹⁸ Hoe gerusstellend is dit tog om te weet dat dit vir ons moontlik is om aan die vereiste te voldoen om ‘veel vrug te bly dra’! Of ons jonk of oud is, of ons gesond of sieklik is, of ons in gebiede preek waar daar baie of min belangstelling is, ons almal kan veel vrug dra. Hoe? Deur die vrugte van die gees in voller mate te openbaar en deur die boodskap van God se Koninkryk na die beste van ons vermoë te verkondig. Terselfdertyd streef ons daarna om ‘in Jesus se woord te bly’ en ‘liefde onder mekaar te hê’. Ja, as ons voldoen aan hierdie drie vername vereistes vir dissipelskap wat in die Evangelie van Johannes gemeld word, bewys ons dat ons “werklik [Christus se] dissipels” is.—Johannes 8:31; 13:35.

[Voetnote]

Hersieningsvrae

• Watter soort vrugte moet ons in oorvloediger mate dra?

• Waarom is die doelwit om ‘veel vrug te dra’ binne ons bereik?

• Watter drie vername vereistes vir dissipelskap wat in die Evangelie van Johannes gemeld word, het ons bespreek?

[Venster/Prent op bladsy 21]

HOE OM ‘MET VOLHARDING VRUG TE DRA’

WAT help jou om die Koninkryksboodskap getrou te verkondig in gebiede waar daar min belangstelling is? Hier is ’n paar nuttige antwoorde op hierdie vraag.

“Die wete dat ons Jesus se volle ondersteuning het, laat ’n mens optimisties voel en help jou om te volhard, ongeag wat die reaksie in die gebied is.”—Harry, 72 jaar oud; gedoop in 1946.

“Die teks in 2 Korintiërs 2:17 moedig my altyd aan. Dit sê dat ons aan die bediening deelneem ‘ten aanskoue van God, in gemeenskap met Christus’. Wanneer ek velddiens doen, is ek in die geselskap van my beste vriende.”—Claudio, 43 jaar oud; gedoop in 1974.

“Om eerlik te wees, die predikingswerk is altyd vir my ’n stryd. Tog vind ek dat die woorde in Psalm 18:29 waar is: ‘Deur my God kan ek ’n muur klim.’”—Gerard, 79 jaar oud; gedoop in 1955.

“As ek net een teks in die bediening kan lees, is ek tevrede dat iemand se hart deur die Bybel ondersoek is.”—Eleanor, 26 jaar oud; gedoop in 1989.

“Ek probeer gedurig nuwe benaderings. Daar is so baie dat ek nie almal in my leeftyd sal kan gebruik nie.”—Paul, 79 jaar oud; gedoop in 1940.

“Ek neem nie aanstoot wanneer mense negatief reageer nie. Ek probeer om vriendelik te wees, met mense te gesels en na hulle siening te luister.”—Daniel, 75 jaar oud; gedoop in 1946.

“Ek het al pasgedooptes ontmoet wat vir my gesê het dat my predikingswerk ’n rol gespeel het in die feit dat hulle Getuies geword het. Sonder dat ek dit geweet het, het iemand anders later die Bybel met hulle gestudeer en hulle gehelp om vooruitgang te maak. Dit verskaf my vreugde om te weet dat ons bediening ’n spanpoging is.”—Joan, 66 jaar oud; gedoop in 1954.

Wat help jou om ‘met volharding vrug te dra’?—Lukas 8:15.

[Prente op bladsy 20]

Ons dra veel vrug deur die vrugte van die gees te openbaar en deur die Koninkryksboodskap bekend te maak

[Prent op bladsy 23]

Wat het Jesus bedoel toe hy vir sy apostels gesê het om ‘veel vrug te bly dra’?