Gedrag wat die leer van God versier

Die bestuur van ’n maatskappy in Caracas, Venezuela, het onlangs ’n brief aan die ouere manne en bedieningsknegte van ’n nabygeleë gemeente van Jehovah se Getuies gestuur. Hulle het daarin geskryf: “Ons het baie goeie getuigskrifte ontvang oor die mense in julle geloof wat hulle verantwoordelikheidsin en eerlikheid betref. Daarom nader ons julle nou. Vanweë ons huidige gebrek aan personeellede, het ons dringend twee mense nodig om die volgende poste te vul: een om ’n voertuigbestuurder en die ander om ons pakhuisbestuurder te wees. Ons sal dit baie waardeer as julle inligting kan verskaf oor iemand in julle gemeente of in een daar naby. Ons wil werklik nie personeellede in diens neem wat nie Getuies is nie. Laat ons asseblief weet selfs al is daar niemand beskikbaar nie, aangesien ons op julle antwoord sal wag voordat ons enige besluit neem.”

Nadat hy die brief onder die Koninkryksaaldeur gevind het, het een van die gemeentelike ouere manne die eienaar van die betrokke maatskappy besoek. Die eienaar doen al 15 jaar lank sake met Jehovah se Getuies en het gesê dat hy nog nooit ernstige probleme met sy Getuiewerknemers gehad het nie. Hy het hulle ernstige, verantwoordelike, eerlike en harde werkers genoem. Toe het hy bygevoeg: “Ek weet dat julle nie kwaaddoeners duld nie, en dat julle hulle uitsit. Dit toon dat julle gemeente nie medepligtiges van sulke mense wil word nie.”

Sulke gedrag versier die leer van God (Titus 2:10). Dit is vanweë ’n opregte begeerte om streng by die sedelike beginsels van die Bybel te bly.