Hoe goed ken jy die Bybel?

‘Die boek Thomas? Ja, dit is in die Bybel. Maar die boek Jona is nie. Christus se geboorteplek? O, dit is Jerusalem—of was dit Nasaret? Ek is nie regtig seker of die boek Jesaja in die eerste of die tweede deel van die Bybel is nie. Die getal apostels? Ek weet werklik nie.’

“HIERDIE bevindinge sou miskien nie verbasend gewees het as die inligting net onder nie-Christene ingesamel is nie”, sê die tydskrif Christianity Today. “Wat verbasend—en ontstellend—is, is hoeveel onkunde aangaande die Skrif daar onder wedergebore Christene aangetref is.”

Byvoorbeeld, 22 persent van die naamchristene onder wie ’n opname gedoen is, het gedink dat daar werklik ’n boek Thomas in die Bybel is, terwyl 13 persent nie seker was nie. Wat Jona betref, het 27 persent gesê dat dit nie in die Bybel is nie, en 12 persent het glad nie geweet nie. Ses persent kon nie eers raai waar Christus gebore is nie, terwyl 16 persent gesê het dat dit Jerusalem en 8 persent dat dit Nasaret is. ’n Volle 13 persent het glad nie geweet waar Jesaja in die Bybel gevind kan word nie, terwyl 11 persent gesê het dat dit in die Christelike Griekse Geskrifte (“Nuwe Testament”) is. En hoewel die meeste geweet het dat daar 12 apostels was, het 12 persent ’n ander getal gegee, van 2 tot meer as 20, en 10 persent het glad nie geweet nie.

Die vraag wat die meeste probleme opgelewer het, was of die uitdrukking “God help diegene wat hulleself help” in die Bybel voorkom of nie. Net 38 persent van die “Christene” wat ondervra is, het geweet dat dit nêrens in die Bybel staan nie, terwyl ’n groter getal, 42 persent, gedink het dat dit ’n Bybelse aanhaling is. Die res het nie geweet nie.

“Waarom is daar soveel onkunde wat die Bybel betref?” vra Christianity Today. “Dit is heel waarskynlik omdat die Bybel so min gelees word. Die helfte van alle Amerikaners lees nie die Bybel nie. Die meeste wedergebore Christene lees die Bybel een of twee keer per week, of glad nie. Dit is geen wonder dat so baie Christene so min van die Skrif weet nie!”