Ons beskou die wêreld

Besoedeling en kanker by kinders

Nadat ’n span epidemioloë ’n 27 jaar lange studie van 22-400 Britse kinders ontleed het, het hulle bevind dat die risiko vir kinders wat binne vyf kilometer van ’n besoedelingsbron af gebore is 20 persent groter is om aan leukemie of ander soorte kinderkanker te sterf as vir ander kinders. Blootstelling aan besoedelende stowwe in die lug is “die waarskynlikste oorsaak” van die toename in gevalle van kanker by kinders, berig The Times van Londen. Dit wil voorkom of die besoedelende stowwe wat hiertoe meewerk petroldampe of ander vlugtige organiese chemikalieë is wat die lug ingestuur word deur nywerheidsaanlegte soos olieraffinaderye, motorfabrieke, gewone kragstasies, staal- en sementfabrieke. Die studie berig ook dat daar meer sterfgevalle as gevolg van kanker was onder kinders wat binne vier kilometer van snelweë en spoorweë af gebore is. Petrol- en dieseldampe is waarskynlik die oorsaak, beweer die skrywers van die berig.

Godsdiens in Brasilië

’n Onlangse opname toon dat “99 persent van Brasiliane aan God glo”, berig die ENI Bulletin. Volgens die opname onder bykans 2000 mense het 72 persent verklaar dat hulle Katolieke is, 11 persent het gesê dat hulle Protestante is en 9 persent het geen spesifieke godsdiens bely nie. Die res het Brasiliaanse en Afro-Brasiliaanse godsdienste beoefen. “Toe hulle gevra is of hulle gedurende die vorige naweek na ’n kerk of godsdiensgebou gegaan het, het 57 persent gesê hulle het nie”, sê ENI. Slegs 44 persent glo aan ewige straf. Hoewel 69 persent van Brasiliane glo dat daar ’n hemel is, verwag net 32 persent om daarheen te gaan.

Wie beheer die afstandbeheer?

Navorsers by EURISPES (Instituut vir Politieke, Ekonomiese en Maatskaplike Studies), in Italië, het onlangs die resultate van ’n studie oor TV-kykgewoontes gepubliseer. Daar is met ongeveer 2000 Italiaanse gesinne onderhoude gevoer. Hulle is onder andere gevra wie in die gesin na alle waarskynlikheid die TV se afstandbeheer, wat deur ’n koerantberig die moderne simbool van gesag in die gesin genoem word, sal vashou en sal beheer. In die meeste gevalle is daar gesê dat die vader dit beheer. Kinders was tweede in bevel wanneer dit gekom het by die oorskakeling na ’n ander kanaal. Die moeder was laaste in die magstryd om die afstandbeheer in die gesin te beheer.

Tienerseks

Volgens die Nigeriese koerant Weekend Concord het ’n onlangse studie bevind dat “Nigeriese adolessente onder die seksueel aktiefste in die wêreld is”. Sowat 68 persent van die seuns en 43 persent van die meisies tussen die ouderdomme van 14 en 19 het erken dat hulle geslagsgemeenskap gehad het “kort nadat puberteit begin het”. Dit het tot talle ongewenste swangerskappe gelei. ’n Afsonderlike studie toon dat “71 persent van alle sterfgevalle van jong vroue onder [die ouderdom van] 19 jaar in Nigerië aan aborsiekomplikasies verwant was”, sê die Concord.

Handewaskrisis

’n Onlangse berig in die Franse mediese koerant Le Quotidien du Médecin het die aandag gevestig op ’n kommerwekkende neiging wat blykbaar aan die toeneem is—om nie hande te was voor ete of nadat die toilet gebruik is nie. Volgens dr. Frédéric Saldmann is hierdie eenvoudige gebrek aan persoonlike higiëne ’n groot gesondheidsrisiko en lyk dit na ’n algemene probleem. Die berig haal ’n studie aan wat toon dat bakkies met grondboontjies in Engelse kroeë spore van urine van 12 verskillende persone bevat het. ’n Ander studie in ’n Amerikaanse skool het aan die lig gebring dat gereelde handewassery, waaroor ’n onderwyser toesig gehou het, die aantal kinders wat as gevolg van spysverteringsprobleme van die skool afwesig was met 51 persent verminder het en dié wat as gevolg van asemhalingsprobleme afwesig was met 23 persent. Die berig het afgesluit deur die belangrikheid daarvan te beklemtoon om kinders van kleins af sulke basiese reëls in verband met higiëne te leer.

Groeiende ekonomie en armoede

Hoewel die wêreldwye ekonomie tussen 1975 en 1985 met 40 persent gegroei het, “het die aantal arm mense in die wêreld met 17% toegeneem”, sê HCHR News, ’n bulletin van die Buro van die Hoë Kommissaris vir Menseregte. Vandag is mense in 89 lande ekonomies erger daaraan toe as wat hulle tien of meer jaar gelede was. In 70 ontwikkelende lande is inkomstes selfs laer as wat dit 20, en in sommige gevalle 30, jaar gelede was. HCHR News kom tot die gevolgtrekking dat ekonomiese groei net “’n paar lande” bevoordeel het.

Onveilige bouwerk in Italië

Gedurende die afgelope eeu het aardbewings meer as 120-000 lewens in Italië geëis. Tog woon ongeveer 25 miljoen Italianers in gebiede waar “64 persent van die geboue nie teen aardbewings bestand is nie”, berig Corriere della Sera. Onder die onveilige geboue is hospitale, brandweerstasies en ander geboue wat in geval van ’n ramp as nooddienssentrums moet dien. Daar word elke jaar in Italië gemiddeld 7 biljoen lire (R17,7 miljard) daaraan bestee om skade te herstel wat deur geologiese en industriële rampe veroorsaak word. ’n Deskundige verduidelik dat “daardie ontsaglike bedrae wat dikwels ná rampe bestee word . . . , gebruik word om [geboue] op dieselfde verkeerde manier en in dieselfde hoërisikogebiede te herbou”.

Bloed en HIV-besmetting

Van die byna 22 miljoen mense regoor die wêreld wat met HIV/vigs besmet is, woon meer as 90 persent in ontwikkelende lande. “Tot 10 persent van nuwe gevalle van HIV-besmetting in ontwikkelende lande word deur bloedoortappings veroorsaak”, berig Panos, ’n inligtingsorganisasie in Londen. In baie lande is die bloedvoorraad onveilig omdat laboratoriumtoetse vir HIV nie heeltemal betroubaar is nie. Byvoorbeeld, in Pakistan het minder as die helfte van alle bloedbanke HIV-siftingstoerusting. Gevolglik word 12 persent van alle nuwe gevalle van HIV-besmetting daar deur bloedoortappings veroorsaak. Sedert die eerste gevalle van vigs meer as 15 jaar gelede aangemeld is, het byna 30 miljoen mense regoor die wêreld HIV, die virus wat die siekte veroorsaak, opgedoen.

’n Oordrewe vrees vir God

In ’n onlangse studie is daar onderhoude gevoer met Brasiliaanse kinders wat aan spanning ly. Volgens die ENI Bulletin is daar bevind dat ’n groot persentasie van die kinders angs ondervind wat verband hou met ’n oordrewe vrees vir God. Terwyl 25 persent van die kinders spanning ondervind het wat verband hou met gesinsprobleme of die dood van ’n familielid, het 75 persent tekens van angs getoon omdat hulle God as ’n wraaksugtige persoon beskou wat daarop uit is om hulle te straf. Die studie “het ouers aangespoor om hulle kinders te leer dat God hulle sal help en hulle kan verstaan”, berig ENI.

Olifantkommunikasie

’n Olifant se stembande is so groot dat die basiese frekwensie van die klanke wat hulle voortbring 20 siklusse per sekonde of minder is—ver onder die omvang van menslike gehoor. Sulke diep geluide dra goed en olifante kan dit een en ’n half kilometer ver herken. Hulle kan ook die roep van tot 150 verskillende olifante uitken en hulle reageer positief op die roep van gesinslede en dié wat deel van hulle trop is. Olifante ignoreer gewoonlik die roep van vreemde olifante of hulle word onrustig wanneer hulle dit hoor. Nadat die dierekenner dr. Karen McComb, van die Universiteit van Sussex in Brittanje, navorsing in die Amboseli- Nasionale Park in Kenia gedoen het, het sy verduidelik dat “geen ander soogdier sulke uitgebreide netwerke van vokale kommunikasie vertoon nie”, berig The Times van Londen.